Oityi Ndyikevela Kovakuaukulu Vange?

OMANIMA amwe konyima, o jornale The Chosun Ilbo, yoko Koreia ankho ina osapi imwe yepuiya. Yapula okuti: “‘Muwa Shim Cheong,’ Ankho Uhei Natyike Konthele ya Jesus​—Okuti Wapita mo Ifelunu?”

Onondaka ombo mbusokesa unene mokonda Shim Cheong ankho omuhikuena uholwe unene mo Koreia walingile atyiho evila pala okukuatesako tate yae omumphoki. Momanima omanyingi, wapandelue unene. Tyotyili, mo Koreia, Shim Cheong ankho omuhikuena wapandua unene.

Kovanthu ovanyingi okusoka okuti makamoneswa ononkhumbi mo Ifelunu mokonda ankho kambatisalelwe mokapela ankho tyimoneka ngoti tyapenga alo umwe nokunumanesa. Mahi, ehipululo olio liaendakoale omuwo umwe kohale etyi nkhele onondaka konthele ya Kristu mbuhenepopiwe motyilongo tyae.

Monthele oyo muakutikinya omapulo alingwa onkhalamutwe yongeleya. Yapulua inkha aveho vana vankhia tyihei natyike konthele ya Jesus mavakahitiswa mo Ifelunu. Aikumbulula okuti: “Onthwe katutyii. Onthwe tusoka okuti kuna ondyila onkhuavo ya Huku [pala ovanthu ovo].”

OTYITUMINO PALA EYOVO

Omukanda The New Catholic Encyclopedia wati: “Ombatisimu yakolela pala eyovo. Ngetyi Kristu apopia, inkha omunthu katyitiwa otyivali momaande Nospilitu Sandu, kapondola okunyingila mouhamba wa Huku. (Jn 3.5)” Mokonda yotyo, vamwe vasoka okuti vana vankhia tyihenembatisalwe mavayumbwa mo Ifelunu ine okukamoneswa ononkhumbi tyina vamankhi.

Mahi kuna ovanthu ovanyingi vasoka okuti etavelo olio kaliaviukile. Ovanthu ovanyingi, vankhia tyihei Ombimbiliya. Okuti vatokala okumoneswa apeho ononkhumbi? Oityi Ombimbiliya yapopia konthele yotyo?

EKEVELELO LIKAHI MOMBIMBILIYA

Ombimbiliya ilekesa nawa okuti Huku keyele ovanthu vana vankhia tyihena enoñgonoko konthele yovitumino viae. Atos 17:30 itupopila okuti: “Huku katale vali komivo vina ankho omunthu ehei natyike.” Mahi okuti Ombimbiliya ipopia okuti vana vankhia tyihena enoñgonoko, mavakapewa omphitilo yokulilongesa konthele ya Huku?

Ekumbululo tupondola okulivasa mondaka Jesus apopila omphuki ankho ukahi nokunkhia ponthele yae. Omulume wapopila Jesus okuti: “Nthyinangele tyina wamanyingila Mouhamba wove.” Iya Jesus emukumbulula ñgeni? “Tyotyili, hono ame ndyikupopila okuti: “Mokakala naame Momphangu Yombembwa.”​—Lucas 23:39-43.

Okuti Jesus wapopila omulume una okuti makakala nae keulu? Au. Omulume ankho “kenetyitwe otyivali” momaande nospilitu, ovitumino viesukisa pala okunyingila Mouhamba wokeulu. (João 3:3-6) Anthi, Jesus walaa omulume una omphuki okuti makakala vali nomuenyo Mopalaisu. Mokonda ankho omu Judeu Opalaisu pano pohi ankho wii nawa, mokonda yotyikunino tyo Endene, tyapopiwa momukanda wotete Wombimbiliya. (Gênesis 2:8) Omulao wa Jesus wavela omulume onthumbi yokuti makatutila akala Momphangu Yombembwa tyina ohi ino yamalingwa nawa.

Tyotyili, Ombimbiliya ilaa okuti: “Makukakala etutilo liovaviuki na vana vehevaviuki.” (Atos 24:15) “Vehevaviuki” ovo vana vahamwene ovitumino via Huku konthele youviuki mokonda ankho kavei ehando lia Huku. Jesus makatutilisa omphuki ina uhemuviuki wapopia nae, novanthu ovanyingi-nyingi ovakuavo vankhia tyihei Huku. Ngotyo, momphangu yombembwa pano pohi, mavakalongeswa ovitumino via Huku, nokukala nomphitilo yokulekesa ohole yavo na Huku mokutavela ovitumino viae.

TYINA VANA VEHEVAVIUKI VAMATUTILISWA

Okuti tyina vana vehevaviuki vamatutiliswa mavakakoyeswa mokonda yovipuka valingile kohale? Au. Romanos 6:7 yati: “Una wankhia ononkhali mbae mbanyimuapo.” Vana vankhia vehevaviuki vafeta ononkhali mbavo. Ngotyo, mavakakoyeswa movipuka mavakalinga konyima yetutilo liavo, hamovipuka vina valingile tyihetyii tyina ankho vehenenkhie. Oñgeni otyo matyivetela ouwa?

Tyina vana vehevaviuki vamatutiliswa makalongeswa ovitumino via Huku, vina mavikaholololwa monombuingwa mambuikulwa. Mavakakoyeswa okutalela “kovilinga viavo” otyo okutala inkha vetavela ine kavetavela ovitumino via Huku. (Revelação 20:12, 13) Kovanthu ovanyingi vehevaviuki oyo kamaikala omphito yavali, mahi omphitilo yavo yotete yomuenyo waapeho pano pohi mokulilongesa nokulinga ehando lia Huku.

Etyi Ombimbiliya ilongesa tyikahi nokukuatesako ovanthu ovanyingi okukala nekolelo mu Huku. Omuhikuena Sug o umwe puvo. Sug ankho omukatolika. Mombunga yae ankho vamwe ovanakwa. Mokonda ankho ukevela akale omadre elihonekesa opo akale womokati. Konyima, atundumo mokonda ankho wayala etyi amona tyikahi nokulingwa mo. Pahe, ankho ketavela vali elongeso lio ifelunu mokonda ankho ulitehela okuti okuyoka ovanthu motupia katyaviukile tupu ha luembia.

Ngotyo, Ombangi umwe ya Jeova walekesa Yeong Sug onondaka ombu mbapolwa Mombimbiliya: “Ovanthu vokuna omuenyo vetyii okuti mavankhi, mahi vokuankhia, kavei vali natyike.” (Eclesiastes 9:5) Ombangi wemulekesa okuti vokuankhia kavekahi nokumoneswa ononkhumbi mo ifelunu. Mahi, velele mononkhia, okukevela epinduko.

Mokonda wanoñgonoka okuti ovanthu ovanyingi kaveneive otyili konthele Yombimbiliya, Yeong Sug wapaka komutima onondaka mba Jesus mbukahi mo Mateus 24:14 mbati: “Onondaka ombu onongwa mbouhamba wa Huku, mambukaiviswa kombanda yoohi aiho, pala oumbangi movilongo aviho, iya konyima onthyulilo aiya.” Sug pehepano uundapa movilinga viokuivisa onondaka onongwa nokupopila vakuavo ekevelo lihuvisa likahi Mombimbiliya.

“HUKU UTUPU OKAPUNGULULA”

Ombimbiliya itutolela okuti: “Huku utupu okapungulula. Mahi, utavela kese omunthu una onthilo nae nokulinga etyi tyaviuka, momalongo aeho.” (Atos 10:34, 35) Oo ouviuki atuho tupondola okukevela ku Huku, “una uhole ovaviuki na vana vehevaviuki.”​—Salmo 33:5.