Oñgeni Tupondola Okunoñgonoka Etyi Omutungi Wetu Makalinga Komutwe Wandyila?

Huku upopia novanthu tunde apa evetunga. Mahi oñgeni etyilinga? Pamwe ankho ulaa onoandyu mbae, pamwe ankho ovauli. Pahe onondaka ombo ankho atuma onoandyu mbae novauli, asoko okumbuhoneka momukanda. Mbumwe ponondaka ombo, mbupopia etyi makalinga komutwe wandyila. Mongeleka, mbupopia okuti komutwe wandyila ove upondola okukakala nomuenyo ukahi nawa. Mahi omukanda watyo oo, oupi?

Omukanda oo, Ombimbiliya. Omo matuvasi etyi Huku ahanda ovanthu vanoñgonoke. (2 Timotiu 3:16) Mahi oñgeni ovauli vetyivila okuhoneka omalusoke a Huku? (2 Petulu 1:21) Huku wapaka omalusoke ae momitwe viavo, avahimbika okuehoneka. Na hono otyo pamwe tyilingwa. Ovahona vamwe vatuma ovaundapi vavo vevehonekele-ko omukanda. Tyina omukanda wamapu, owa-lie? O womuundapi ine o womuhona? Tupu otyo Ombimbiliya ikahi. Namphila yahonekwa novanthu, mahi etyi tyilimo o tya Huku.

ONDAKA YA HUKU YELITYANDYANA MOUYE AUHO

Huku uhanda ovanthu aveho vatange ondaka yae aveinoñgonoka. Ovanthu “vovilongo aviho, nomihoko aviho, nomalaka aeho, novanthu aveho” pahe vapondola okutanga “onondaka onongwa mbahapu.” (Eholololo 14:6, okatoi) Ñgeni ngotyo? Huku wakuatesako ovanthu okupitiya Ombimbiliya momalaka alamba po 3.000. Nii petupu omukanda unepitiyue momalaka omanyingi ngoo!