Elongeso 4
Elyapu Olye?
Satanasi Elyapu — opi oe atundilila? (1, 2)
Oñgeni Satanasi ayapula ovanthu? (3-7)
Omokonda yatyi tuna yokutamananena Nelyapu? (7)
1. Ondaka “elyapu” ihangununa omunthu umwe wokutola omatutu omavi kombinga yomunthu omukwavo. “Satanasi” ihangununa ondyale ine omunthu umwe omupatani. Á omanyina aavelwa ondyale onene ya Yehova. Potete oe ankho wali oandyu imwe yokwelipwa keulu na Huku. Anthi, oe konyima wasoka unene kombinga yae mwene ya apeleya efendelo lina okuti lyatokala vala Huku.—Mateus. 4: 8-10.
2. Oandyu ei, Satanasi, yapopia na Eva mokuundapesa onyoka. Mokwemutolela ounkhembi, oe wemuhindila okuhatavela ku Huku. Satanasi wautukila ngotyo etyi tyiihanwa okuti “Ouhamba wa Huku,” ine onkhalo yae ngou ukahi Kombanda Yatyiho. Satanasi wapaka melimbililiko onkhalo ya Huku yokuvyaala inkha yavyuka nokweta ouwa kovanthu Vae. Satanasi tupu wakatula omapatano okuti petupu omunthu nawike upondola okutwalako nokukolela ku Huku. Mokulinga ngetyi, Satanasi welilinga oe mwene ondyale ya Huku. Otyo oe eila okwihanwa Satanasi Elyapu.—Gênesis 3:1-5; Jó 1:8-11; Revelação (Apocalipse) 12:9.
3. Satanasi ulinga ononkhono mbokuyondya ovanthu opo vemufendele. (2 Coríntios 11:3, 14) Onkhalo imwe oe aundapesa opo apandyule ovanthu, onongeleya mbomatutu. Inkha ongeleya imwe ilongesa omatutu kombinga ya Huku, oyo tyilityili iumbila evangelo lya Satanasi. (João 8:44) Ovanthu vokukahi monongeleya mbomatutu vapondola tyilityili okutavela okuti vekahi nokufendela Huku yotyili. Anthi ovo tyotyili vekahi nokuumbila Satanasi. Oe ‘ohuku youye uno.’—2 Coríntios 4:4.
4. Oumbanda onkhalo onkhwavo Satanasi aeta nayo ovanthu mombwelo yepondolo lyae. Ovanthu tyipondola vaita konondele opo mbuvekwateseko, opo valinge omapita vakwavo, opo vaule kombinga yokomutwe wandyila, ine opo valinge omahuviso. Satanasi oe ononkhono onombi konyima yovilinga ovyo aviho. Opo tuhambukiswe Huku, katupondola okulinga natyike tyoumbanda.—Deuteronômio 18:10-12; Atos 19:18, 19.
5. Satanasi tupu upandyula ovanthu mokuyapaula omihoko nefendelo lyomaongano opulitika. Vamwe vasoka okuti otyilongo tyavo ine omuhoko wavo ukahi vali nawa tyipona wavakwavo. Anthi otyo hatyiliko. (Atos 10:34, 35) Ovanthu ovakwavo vatala momaongano opulitika opo apunguhune ovitateka vyavo. Mokulinga ngotyo, ovo vekahi nokwanya Ouhamba wa Huku. Ouhamba ou ó vala una epondolo lyokupunguhuna ovitateka vyetu.—Daniel 2:44.
6. Onkhalo onkhwavo Satanasi apandyula nayo ovanthu omokuveyondya nomahando okulinga onkhali. Yehova ututolela okuti tuna okulityilika kovituwo vyokulinga onkhali mokonda oe utyi okuti ovyo viketunyona. (Gálatas 6:7, 8) Ovanthu vamwe tyipondola vahanda ulipake kumwe navo movituwo ngovyo. Anthi, hinangela okuti, tyilityili Osatanasi wahanda ulinge ovipuka ovyo.—1 Coríntios 6:9, 10; 15:33.
7. Satanasi upondola okuundapesa ehetaiko lyemone ine oundyale opo uyekepo okuumbila Yehova. Vamwe pononthyolwa mbove vapondola okukala vanumana unene monkonda yetyi ukahi nokulilongesa Ombimbiliya. Ovakwavo vapondola okukulinga omukwele. Anthi okulye walevala omwenyo wove? Satanasi wahanda okukwetesa owoma opo uyekepo okulilongesa kombinga ya Yehova. Uhayeke Satanasi afinde! (Mateus 10:34-39; 1 Pedro 5:8, 9) Mokutamanana Nelyapu, upondola okuhambukiswa Yehova nokulekesa okuti waama kouhamba Wae.—Provébios 27:11.
[Elitalatu kemẽla 9]
Onongeleya mbomatutu, oumbanda, neliyapauko lyomihoko vipandyula ovanthu
[Elitalatu kemẽla 9]
Tamanana na Satanasi mokutwalako nokulilongesa kombinga ya Yehova