ONTHELE 5
Kondokei “Komunthita Wenyi, Omuyungi wo Nohande Mbenyi”
Povitateka viapopiwa mombruchula ei, okuti nove una-po tyimwe? Inkha una-po, have vala. Ovaumbili ovanyingi vekolelo, tyilinge vo kohale, tyilinge vo hono, vehole okulwa novitateka ngo ovio. Ngetyi vakuatesilueko na Jeova okuyovoka movitateka ovio, nove upondola okukuatesuako.
Jeova mekukuatesako putyina ukondoka kwe
KALA nonthumbi yokuti Jeova mekukuatesako tyina ukondoka kwe. Mekukuatesako okuhakala vali notyiho, nomutima waihamenua, okala nombembwa momalusoke, no momutima, ombembwa ituka kokukala nomutima wasukuka. Iya, ove upondola okukala vali nondundo yokuumbila Jeova kumwe novafendi vakuenyi. Onkhalelo yove mailifu no yo Vakristau vo tete, apostolu Petulu ahonekelele okuti: “Onwe ankho muavomba ngo nongi, mahi pahe muakondoka komunthita wenyi, omuyungi wo nohande mbenyi.”—1 Pedro 2:25.
Otyipuka tyikahi vali nawa upondola okulinga, okukondoka ku Jeova. Omokonda yatyi? Omokonda matyihambukiswa unene Jeova. (Provérbios 27:11) Ngetyi ove utyii, etyi tulinga tyipondola okuhambukiswa ine okunumanesa Jeova. Tyotyili, Jeova ketukuluminya okukala nohole nae, nokumuumbila. (Deuteronômio 30:19, 20) Omunongo umwe konthele Yombimbiliya wati: “Katyitavela okuikulila kondye epito liomutima womunthu. Liikulilwa vala mokati.” Onthue tupondola okuikula epito olio, putyina tufenda Jeova nomutima weyula ohole. Inkha tulinga ngotyo, matuavela Jeova otyipuka tyimwe otyiwa, ekolelo lietu, iya atumuhambukiswa unene. Tyotyili, petupu etyi tupondola okueeleka nehambu lituka kokufenda Jeova.—Atos 20:35; Revelação 4:11.
Mahi, tyina ove uhimbika okufenda vali Jeova, ehando liove liokukala noupanga nae malifuisuapo. (Mateus 5:3) Ñgeni ngotyo? Ovanthu mouye auho velipula okuti: ‘Omokonda yatyi tueila kouye?’ Vahanda unene okunoñgonoka omokonda yatyi ovanthu vatungilwa. Ovanthu vena ehando olio, mokonda Jeova wevetunga nalio. Jeova wetutunga opo tukale nehambu liokumuumbila. Petupu vali etyi tyipondola okutukalesa nehambu enene, tyipona okunoñgonoka okuti tukahi nokufenda Jeova mokonda tumuhole.—Salmo 63:1-5.
Mbambavo, noñgonoka okuti Jeova uhanda ove ukondoke kwe. Oityi tyipondola okukukalesa nonthumbi? Tala: Pokufuiika ine pokupongiya ombruchula ei, palingwa omalikuambelo, nokusoka unene. Weipeua opo wiitange, tyilinge weipeua nomukulu weuaneno tyilinge o nomunthu omukuavo. Pahe wakala nondundo yokuitanga, nokutavela etyi ipopia. Atyiho otyo, tyilekesa nawa okuti Jeova kekulimbuilwe. Mahi, ukahi nokukunanena kwe noluembia.—João 6:44.
Tyotyili, tyipameka okunoñgonoka okuti Jeova kalimbwa ovaumbili vae vavomba. Otyo, otyo omphange umwe utiwa Donna apandele. Wati: “Nayapukile motyili katutu-katutu, mahi ovikando ovinyingi ankho ndyisokolola ko Salmo 139:23, 24 yati: ‘Huku yange, nthale nawa, nokunoñgonoka omutima wange. Ovola okunthala nawa nokunoñgonoka omalusoke ange anthyukalalesa. Tala inkha mokati kange muna ondyila ombi. Iya onthyongolela mondyila ituala komuvo wahapu.’ Ankho ndyityii okuti ame hi wouye. Tyotyili, ankho hatele ine hatokalele okukala mouye. Tupu ankho ndyityii okuti nesukisa okukala meongano lia Jeova. Andyihimbika okuimbuka okuti Jeova kandyekele-po. Etyi ankho nesukisa vala, okuvasa onkhalelo yokukondoka kwe. Pahe nahambukwa mokonda nakondoka kwe!”
“Andyihimbika okuimbuka okuti Jeova kandyekele-po. Etyi ankho nesukisa vala, okuvasa onkhalelo yokukondoka kwe”
Tukahi nokulikuambela nomutima auho opo ove ‘uhambukilwe vali Jeova.’ (Neemias 8:10) Inkha ukondoka ku Jeova, kumelivele na katutu.