Etyi Ukevelela Komutwe Wandyila Tyitei Kuetyi Moholovona!

OKUTI ETYI WAHOLOVONA OKULINGA MATYIKUETELA OUWA KOMUTWE WANDYILA? Ovanthu vamwe vasoka okuti onkhalelo matukakala komutwe katyitei kuetyi tuaholovona, mokonda omuenyo wetu kautei kuetyi tuholovona. Tyina vahanda okulinga tyimwe mahi avehetyivili, kavesuku natyo mokonda vati kavetyivilile okulityilika-tyo. Ngwe vapopia okuti: “Ame hatyitilwe-ale opo ndyilinge ovilinga ovio!”

Vamwe nkhele vakala tyanumana tyina vatala okuti etyi ankho vahanda okulinga katyikahi nokuenda ngetyi ankho vahanda iya avasoko okuti ouye ukahi nokuvemonesa ononkhumbi. Ngwe vapondola okuovola okukala nomuenyo ukahi vali nawa, opo vatale inkha ovilwa noungangala novinimawe nomauvela kamavinyono etyi vapanga okulinga. Vamwe vehole okulipula okuti: ‘Omokonda yatyi tyisoyesila?’

Tutyii nawa okuti ovipuka vipondola okuuhuluka vala. (Eclesiastes 9:11) Mahi, tyina weete okuti maviekuetela ovitateka viahapu, opo wesukisa okulinga etokolo liakolela unene. Tyotyili, Ombimbiliya ilekesa nawa okuti etyi mokamona komutwe wandyila tyitei kuove tala etyi Ombimbiliya ipopia.

Moisesi wokuahongolele ova Isiayeli wevepopilile onondaka ombu etyi vehenenyingile Motyilongo Tyalaelwe okuti: “Napaka komutwe wove omuenyo notyiwa, nononkhia notyivi. Ononkhano onongwa nehingano. Iya ove una okuholovona omuenyo opo ukale nomuenyo, ove nombuto yove. Mokukala nohole na Jeova Huku yove, okutehelela ondaka yae, nokukakatela mwe.” — Deuteronômio 30:15, 19, 20.

“Napaka komutwe wove omuenyo notyiwa, nononkhia notyivi. Ononkhano onongwa nehingano. Iya ove una okuholovona omuenyo.” — Deuteronômio 30:19

Tyotyili Huku wayovolele ova Isilayeli moupika ko Egitu evepake Motyilongo Tyalaelwe omu vapondola okukala nomuenyo omuwa. Mahi ovipuka vina oviwa ankho kaviya vala avike tyahalingile ononkhono. Opo vakale nomuenyo una omuwa ankho vena “okuholovona-po omuenyo.” Ñgeni ngotyo? ‘Mokukala nohole na Huku, mokutehelela ondaka yae, no mokukakatela mwe.’

Hono, nonthue tuesukisa okulinga etokolo ngo olio opo tukamone oviwa komutwe wandyila. Holovona okukala nohole na Huku, nokutehelela ondaka yae, nokukakatela mwe. Inkha ulinga ngotyo, mokakala nomuenyo uhapu momphangu yombembwa pano pohi. Mahi, oityi ove wesukisa okulinga vali?

HOLOVONA OKUKALA NOHOLE NA HUKU

Ohole otyituwa tyotete Huku ena. Apostolu João wahoneka okuti “Huku ohole.” (1 João 4:8) Mokonda yotyo, otyo Jesus akumbululila epulo alingilwe konthele yotyitumino otyinene vali ko vitumino viatyo aviho okuti: “Una okukala nohole na Jeova Huku yove nomutima wove auho, nomuenyo wove auho nonondunge mbove ambuho.” (Mateus 22:37) Katukala omapanga a Jeova Huku mokonda tuakuluminyua okumutavela, mahi tuna okukala omapanga ae mokonda tumuhole. Mahi, omokonda yatyi tuna okuholovonena okukala nohole na Huku?

Ohole ya Jeova novanthu yelifwa nohole ovohe vena novana vavo. Namphila ovakuankhali, mahi ohole ilunda ovohe okupameka omutima wovana vavo, nokuvekuatesako iya nokuvelongesa opo vakale nawa iya avakala nehambu. Omokonda yatyi ovohe valingila ngotyo? Ovohe vakevelela ovana vakale nohole navo iya avahalimbwa etyi ovohe vevelingila pala ouwa wavo. Okuti inkha Tate yetu wokeulu omuviuki akevelela tumupandule muatyiho etulingila, tyapenga?

TEHELELELA ONDAKA YAE

Mombimbiliya melaka lyo konthuko, ondaka “okutehelela” ihangununa “okutavela.” Hangotyo tuhole okupopila omona okuti, “Tehelela ovo tate yove”? Ngotyo, opo tutehelele ondaka ya Huku, tuna okulilongesa ondaka yae iya atutavela etyi etupopila. Onthue katutehelela Ondaka ya Huku ngatyina tutehelela omunthu ukahi ponthele yetu, mahi tutehelela Ondaka ya Huku putyina tutanga Ombimbiliya nokuendela muetyi tuelilongesa. — 1 João 5:3.

Opo Jesus alekese okuti tyakolela okutehelela ondaka ya Huku, nthiki imwe wapopile okuti: “Omunthu kakala vala nomuenyo mokonda yombolo, mahi omokonda yondaka aiho itunda momulungu wa Jeova.” (Mateus 4:4) Ovikulia viakolela opo tukale nomuenyo, mahi okukala nenoñgonoko konthele ya Huku tyakolela vali unene. Omokonda yatyi? Omunongo Ohamba Salomau wahangununa okuti: “Ounongo uyakulila omunthu, ngetyi onombongo mbumuyakulila. Mahi enoñgonoko liakolela unene, mokonda ounongo uhupisa omuenyo wa vana vena-o.” (Eclesiastes 7:12) Enoñgonoko nounongo vitunda ku Huku vipondola okutuyakulila mononthiki mbuno. Tupu vitukuatesako okuholovona nawa etyi matyituetela ouwa komutwe-wandyila.

KAKATELA MU HUKU

Hinangela ongeleka ya Jesus tuelilongesa monthele yokualamba, etyi ati: “Ombundi onthutu nondyila yahita ituala komuenyo, iya kavehi vekahi nokuivasa.” (Mateus 7:13, 14) Opo weendele mondyila oyo, wesukisa omunthu omunongo mekuhongolela opo ukakale nomuenyo uhapu. Ngotyo, otyiwa tukale omapanga a Huku. (Salmo 16:8) Mahi oñgeni matutyilingi?

Ononthiki ambuho, tuna ovipuka ovinyingi tulinga mahi no ngotyo nkhele tuhanda okulinga vali ovipuka ovinyingi. Ovipuka ovio vipondola okutupola omuvo atuhetyivili okulilongesa etyi Huku ahanda tulinge. Ombimbiliya itulondola okuti: “Tualeiko okuliyunga nawa oñgeni mueenda, opo muhaende ngomaova, mahi opo mueende ngo vanandunge, okulanda omuvo auho, mokonda ononthiki onombi.” (Efésios 5:15, 16) Onthue matufuene vala ku Huku putyina tusuka nefendelo tumulingila mokonda otyipuka tyakolela vali momuenyo wetu. — Mateus 6:33.

OVE MUENE MOHOLOVONA

Namphila uhapondola okupilulula ovipuka viokualamba, mahi pahe upondola okuholovona ovipuka nounongo opo ove muene novanthu uhole mupole-ko ouwa komutwe-wandyila. Ombimbiliya ipopia okuti Tate yetu wokeulu, Jeova Huku, utuhole unene iya uhanda ñgeno tulinga etyi ehole. Tala etyi omuuli Mikeia apopia:

“Oityi Jeova ahanda kuove, hakulinga ouviuki, nokuhole okankhenda nokueenda na Huku yove tyeliola omutima?” — Miquéias 6:8.

Okuti ove motavela okukongwa na Jeova, opo ekuhongolele iya ekekuavela ondyambi yapeho alaa okuavela vana valinga etyi ahanda? Ove muene moholovona!