Lipongiya Nawa Pala Okulongesa
1. Tyina tulongesa Ombimbiliya, omokonda yatyi tuna okulinga ononkhono pala okupameka omulongua?
1 Tyina tukahi nokulongesa omunthu Ombimbiliya, tuna okulipongiya nawa opo tuavele omulongwa ondundo yokuumbila Jeova. Ononkhono mbetu mambutuetela ouwa inkha tukuatesako omulongwa okupanda etyi ekahi nokulilongesa Mombimbiliya. Otyo matyavela ondundo omulongwa. (Deut. 6:5; Pro. 4:23; 1 Cor. 9:26) Mahi, oñgeni tupondola okutyilinga?
2. Oñgeni elikuambelo litukuatesako okulipongiya nawa tyina tukalongesa?
2 Likuambela Okuita Ombatelo Tyina Ulipongiya Pala Okukalongesa: Namphila Jeova oe ukulisa ombuto yotyili momutima womulongwa, tyina tuhimbika okulipongiya pala okukalongesa, tyakolela okulikuambela konthele yomulongwa netyi esukisa. (1 Cor. 3:6; Tia. 1:5) Elikuambelo tupu malituvatela okutala oñgeni tupondola okumukuatesako okuyulisa omutima wae “nenoñgonoko liafuapo” liehando lia Jeova.—Col. 1:9, 10.
3. Oñgeni tupondola okulipongiya otyo tusoka komulongwa?
3 Soka Komulongwa: Jesus ankho utyii okuti pala okulongesa nawa tyesukisa okusoka kovateheleli. Ovikando vivali, Jesus walingilue omapulo elifwa: “Oityi ndyina okulinga opo ndyimone omuenyo wahapu?” Kese omuvo akumbulula, ankho upopia mononkhalelo mbelikalela. (Luc. 10:25-28; 18:18-20 ) Tyina tukahi nokulipongiya, tuna okusoka kuetyi omulongwa esukisa okulilongesa. O testu patyi matutange nae? Ono palagrafu onoñgapi matulilongesa nae? Ononthele patyi omulongwa apondola okutala okuti mbepuiya okumbunoñgonoka ine okumbutavela? Inkha tusoka komapulo amue omulongwa apondola okulinga, matyitukuatesako okulipongiya opo tukumbulule nawa.
4. Okulipongiya nawa tyesukisa tyi?
4 Pitulula Etyi Mokalongesa: Katyesukisile ovikando viñgapi ove walongesale onthele imue, mahi tyina ulipongiya una okusoka okuti otyo otyikando tyotete mokapopila omulongwa onthele oyo. Tuna okulipongiya nawa opo tutyivile okuhika komutima womulongua. Otyo tyilekesa okuti tuna okulipongiya ngetyi tuhole okutuma omulongwa. Pitulula onthele mokalongesa, no notestu mbukahimo, nokusoka komulongwa, nokuholovona onondaka mbakolela vali.—Rom. 2:21, 22.
5. Oñgeni tupondola okuhetekela Jeova?
5 Jeova uhanda unene kese mulongwa Wombimbiliya ekule mopaspilitu. (2 Ped. 3:9) Inkha tuovola omuvo pala okulipongiya tyina tukalongesa Ombimbiliya kese munthu, nonthue matulekesa okuti tuesuka unene novanthu.