Etyi Tuna Okupaka Tete Momuenyo Wetu
1. Oñgeni Jesus alekesile okuti ovilinga viokuivisa ankho viakolela kwe?
1 Jesus wapakele tete momuenyo wae ovilinga viokuivisa. Oe waundapele unene okuenda o Palestina aiho pala okuivisa ovanthu ovanyingi. Oe welityilika okuovola omalumono opo akale vali nomuwo wokuundapa movilinga viokuivisa. (Mat. 8:20) Etyi ovanthu ovanyingi vahandele okumutyilika opo ahakule ovavei vavo, oe wati: “Tupu ndyina okukaivisa onondaka onongwa Mbouhamba wa Huku komapundaumbo omakuavo, mokonda etyi, otyo natuminwa.”—Luc. 4:43.
2. Omokonda yatyi ovilinga viokuivisa ankho viakolela unene ku Jesus?
2 Omokonda yatyi ovilinga viokuivisa ankho viakolela unene ku Jesus? Jesus ankho wesuka unene nokusukusisa enyina lia Jeova. (Mat. 6:9) Oe ankho uhole Tate yae keulu, iya mokonda yohole oyo, oe wahandele okufuisapo ehando Liae nokutavela ovitumino Viae aviho. (João 14:31) Tupu, ankho wasuka novanthu iya wahandele okuvekuatesako.—Mat. 9:36, 37.
3. Oñgeni matulekesa okuti tupaka tete momuenyo wetu ovilinga viokuivisa?
3 Hetekela Jesus: Okutualako okupaka tete momuenyo wetu ovilinga viokuivisa ngetyi tyalingile Jesus, katyapepukile mokonda ouye utupola omuwo wetu iya muvahiwa ovipuka ovinyingi vitutalula. (Mat. 24:37-39; Luc. 21:34) Moluotyo, tuesukisa okupunga nawa ovipuka viakolela vali, okuovola omuwo pala okulipongiya nokuundapa apeho movilinga viokuivisa. (Fil. 1:10) Tulingei ononkhono opo tutualeko okutepulula ovipuka vimwe momuenyo wetu nokulityilika okuundapesa unene ouye.—1 Cor. 7:31.
4. Omokonda yatyi tyakolela hono okutualako okupaka tete momuenyo wetu ovilinga viokuivisa?
4 Tyina omuwo kauhi, omunthu wonondunge ulinga tete etyi tyakolela vali. Mongeleka, inkha anoñgonoka okuti kukahi nokuya otyipepe tyimwe otyinene, oe malingi atyiho tyesukisa opo ayovole ombunga yae nokulondola ovomunthele yae. Ovilinga viahasukisile unene mavikevelela. Omuwo wahupako opo o Armagedom ihike kauhi. (Sof. 1:14-16; 1 Cor. 7:29) Opo tuliyovole onthue muene navana vetutehelela, tuna okutualako okulitala nawa onthue muene, nelongeso lietu, tyilinge mokati kewaneno ine kondye. (1 Tim. 4:16) Yoo, eyovo lietu litei kokutualako okupaka tete momuenyo wetu ovilinga viokuivisa!