Okuava Omukanda Wokukonga Tyikuatesako Ovanthu
Tyina kuakamba onohanyi ononthatu opo otyonge tyihimbike, matukala notyilinga tyokukonga ovanthu opo veye kotyonge motyilongo tyetu. Kuna omahunga omawa okulinga otyilinga otyo enima lino. Vana vetavela okukongwa aveya kotyonge vehole okuhuva nomalongomona, neonganeko ewa lialingwa no nombangi, novituwa oviwa vena nokuna ewaneko. (Sal. 110:3; 133:1; Isa. 65:13, 14) Ngotyo, oñgeni ovilinga viokukonga vikuatesako ovanthu, haunene vana vesukisa okulinga oungendi okuenda kovionge?
Konyima yotyonge tyo 2011, ofiliyale imwe yatambula omukanda watumwa nomukai umwe wavasa omukanda wokukonga pombundi yondyuo yae. Apeho ankho uholama tyina Onombangi mba Jeova vatotola pondyuo yae. Wahoneka okuti: “Ame ndyina ondyuo ongwa nomulume omuwa, ndyisoka okuti ndyina ovipuka ovinyingi vipondola okunkhalesa nehambu. Mahi ndyitupu ehambu, omuenyo wange utupu esilivilo. Ngotyo nalinga etokolo liokulinga oungendi wo no kilometu 320 okuenda kotyonge Motyasapalo.” Omukai oo wahambukwa unene etyi ehika motyonge atelefonalela omulume wae emupopila opo nae eye kotyonge Motyalumingu. Wati: “Natehelela omalongomona aeho, navasa onombangi ononyingi mba Jeova, iya hihande tyipwe.” Etyi akondoka keumbo, ehimbika okulilongesa Ombimbiliya iya konyima yonohanyi ononkhuana akala omuivisi uhenembatisalwe. Wati: “Nahambukwa unene etyi navasa omukanda una pombundi yange mokonda omuenyo wange pahe una esilivilo!”
Vamwe vatambula omukanda maveya. Ngotyo, tyesukisa okulinga nombili otyilinga otyo tyokukonga. Tyina omikanda viahupapo viokukonga otyiwa okuvityinda pokuenda kotyonge, opo wave navio oumbangi.
[Okakasa pefo 5]
Oñgeni Matuave Omukanda Wokukonga?
Opo tuivise potyilongo tyetu atyiho, otyiwa okupopia tyihasete. Tupondola okupopia vala okuti: “Tukahi nokuava omukanda wokukonga ovanthu ouye auho. Ou owove. Movasi onondaka ononkhuavo momukanda oo.” Popia noundyandyi. Tyina tuava omukanda konthyulilo yosimano, tupu tupondola okuava Omutala Womulavi no Despertai! inkha tyitavela.