Otyipuka tya 2

Lityilika Okulieleka Navakuenyi

OITYI OMBIMBILIYA ILONGESA? “Linga nawa ovilinga viove, opo ukale netyi molipandela. Anthi, wehelieleke navakuenyi.”—Gálatas 6:4, Contemporary English Version.

OTYITATEKA OTYIPI? Onthue tupondola okukala neyembelo liokulieleka navakuetu—vana vena katutu tyipona onthue, ine na vana vapama vali tyipona onthue, novahona vali ine ovanongo vali tyipona onthue. Otyituwa otyo, otyivi. Otyo tyilekesa okuti tukahi nokusoka okuti esilivilo liomunthu litalelwa kuetyi ena ine kuetyi evila okulinga. Ngotyo tulunda olusoke luonkhi notyituwa tyokulilola navakuetu.—Eclesiastes 4:4.

Oityi upondola okulinga? Ovola okulitala ngetyi Huku ekutala. Yeka onkhalelo ya Jeova ihongolele omalusoke ove konthele yokulipanda. “Omunthu utala etyi tyimoneka komaiho, mahi, Jeovaa utala etyi tyikahi momutima.” (1 Samuel 16:7) Jeova utala esilivilo liove, mokutanga momutima wove nokutala nawa omalusoke ove, nomahando ove, mahi kekueleka nomunthu nawike. (Hebreus 4:12, 13) Jeova utyii okuti kuna ovipuka tuhevili okulinga, iya uhanda nonthue tutyinoñgonoke. Inkha utala esilivilo liove mokulieleka navakuenyi, mokala vali nomalityindailo ine nalumwe uhambukwa netyi una. Ngotyo, kala nomutima weliola okutavela okuti kumevili okulinga nawa ovipuka aviho.—Provérbios 11:2.

Haunene oityi una okulinga opo ukale nesilivilo komaiho a Huku? Oe watumine omuuli Mikeia okuhoneka okuti: “Oityi Jeova ahanda kuove, hakulinga ouviuki, nokuhole okankhenda nokueenda na Huku yove tyeliola omutima?” (Miquéias 6:8) Inkha ulandula elondolo olio, Huku mekukuatesako. (1 Pedro 5:6, 7) Olio ehunga enene liokuhambukilwa etyi tuna.

[Onondaka Poutoi]

[Olutalatu pefo 5]

Jeova upanda esilivilo lietu mokutala etyi tyikahi momutima wetu