Oityi Ovanthu Vanguanguanena Konthele Yospilitu Sandu?
OSPILITU sandu oityi? Epulo eli ngoti liapepuka unene, mahi, okuvasa ekumbululo liapepuka, tyipondola okupuiya. Papa Bento XVI wapopila ounyingi mo Australia okuti: “Okunoñgonoka nawa Ospilitu tyikahi kokule unene nonthue.”
Tyotyili, kuna omalusoke omanyingi nokuhetyivili okukumbulula nawa, epulo eli liati, ospilitu sandu oityi? Omakumbululo amwe ovanthu vehole okuava oyaa maalandulako:
• Omunthu wo tyotyili ukala mokati kovalongwa va Kristu.
• O Huku ukahi pokati kovilinga mouye.
• Omunthu wa tatu mo Utatu ukola.
Oityi ovanthu vanguanguanena ngotyo? Enguanguano olio, liahimbika menima 300 P.K., etyi vamwe vokulilongesa konthele ya Huku vati ospilitu sandu omunthu ulifwe na Huku. Anthi, ovihonekwa novalanduli va Kristu hatyoko valongesile. Omukanda New Catholic Encyclopedia, uhangununa okuti: “O Testamendu Onkhulu ilekesa nawa okuti ospilitu sandu hamunthu . . . ononkhono vala mba Huku.” Tupu uyawisako okuti: “Onotestu ononyingi mbo Testamendu Omphe mbulekesa okuti ospilitu ya Huku, otyipuka, hamunthu; otyo tyimoneka nawa haunene okuelifwa kukahi pokati kospilitu nononkhono mba Huku.”
Pena ehunga omokonda yatyi ovanthu tyivepuiya okusoka ononkhono ngatyina omunthu. Moluotyo, elilongeso lialingwa momanima okualamba pahe mo Estadu Unidu, lialekesa okuti ovanthu ovanyingi kavetavela okuti ospilitu sandu omunthu ine “otyipuka tyina omuenyo.” Okuti olusoke luavo luaviuka? Ine tutavela vana vatualako okuti “Ospilitu Sandu Omunthu tyili welikalela na He no Mona”?
Opo tuvase ekumbululo liaviuka, tuesukisa okutanga Ondaka ya Huku Ombimbiliya, ihangununa nawa ospilitu sandu. Apostolu Paulu wahoneka okuti: “Ovihonekwa aviho viahonekwa kononkhono mba Huku vina esilivilo pala okulongesa otyili, nokuviyula ou waponya.”—2 Timóteo 3:16, Today’s English Version.
Omokonda yatyi ove wesukisila okuovola okunoñgonoka otyili konthele yospilitu sandu? Omokonda okunoñgonoka otyili otyo, matyikuikulila ondyila yokutambula ombatelo ya Huku. Okuti pamwe ulitehela kuapamene pala okukoleleya? Jesus walaa ovalongwa vae okuti: “Tualeiko okuita, opo mupewe . . . Inkha onwe . . . mutyii okuavela ovana venyi ovipuka oviwa, iya Tate keulu, wavilapo vali maavela ononkhono mbae vana vemuita!”—Lucas 11:9, 13.
Monthele mambulandulako, matulilongesa Ovihonekwa vitulekesa oityi ospilitu sandu. Iya atutale oñgeni otyo tyakolela momuenyo wetu.
[Ehangununo liolutalatu pefo 3]
Ovihonekwa vitupopila oityi ospilitu sandu