POKULONGESA OMUNTHU ALINGE OMULONGWA
ELONGESO 10
Suka Umwe Natyo
Etyi Ombimbiliya ipopia: “Twati umwe, katumupe vala oviwa ovipe vya Huku, mahi tupu nomienyo viatyo umwe vietu, mokonda pahe mwalinga ovanthu tuhole.” — 1 Tes. 2:8.
Oityi Sesusi Alingile?
1. Tala OVINDIU, okuti hatyo, tanga Swau 3:1, 2. Pahe haa osoko komapulo aa:
Mokutala, oityi Nikondemu ahandelele okutomphola na Sesusi kounthiki? — Tala Swau 12:42, 43.
Oityi tutila etyi Sesusi atomphola na Nikondemu tyilekesa okuti ankho wesuka umwe natyo tyokulongesa ovanthu valinge ovalongwa?
Oityi Tulilongesila ku Sesusi?
2. Noonthwe ine tukala nolwembia novanthu, matusuku umwe natyo tyokuvekwatesako valinge ovalongwa.
Hetekela Sesusi
3. Lilongesilei apa ahanda okulongesilwa, lilongesei oola itavela kwe. Pamwe omulongwa una umwe onthiki, noola yatyo ahanda okulongeswa mosimanu. Okuti tyimukalesa nawa okulilongesila kovilinga, ine o peumbo, ine o popakwavo vali? Linga umwe atyiho wevila, mulilongese oola itavela kwe, amulilongesila apa ahanda okulongesilwa.
4. Lilongesei apeho. Ine motundu-po, wahatie vala haa tulilongesa osimanu onkhwavo. Okuti tyitavela:
Mulilongese onthiki onkhwavo mosimanu yatyo oyo motundu-po?
Mulilongesile motelefone?
Okumusila omwivisi mukwenyi ekemulongese?
5. Likwambela wahasoye. Likwambela, oiti Siovaa ekukwateseko wahasoye, usuke umwe natyo tyokulilongesa nomulongwa wove, na tyina umwe tyimupwiya okulilongesa apeho, na tyina ehena nokulandula etyi mulilongesa. (Fili. 2:13) Pamwe omulongwa wove omunthu umwe ukahi nawa movipuka ovinyingi. Likwambela oiti Siovaa ekukwateseko utale vala koviwa ovio ena-vio.