Okuti Ankho Utyii-ale?

Omokonda yatyi kohale mo Isilayeli omunthu unepa ankho una okufeta ononthunya?

KOHALE, omuhikuena ankho uyekelua ononthunya monthiki manepwa. Omunthu ankho upondola okufeta onombongo, okuti hatyo ovipako novipuka ovikuavo vali. Tupu pamwe omunthu ankho upondola okeyeka ononthunya mokuundapela tate yomuhikuena ahanda, ngetyi tyalingile Sakoo, okuundapela tate ya Lakele omanima epandu-vali. (Gên. 29:17, 18, 20) Omokonda yatyi ovanthu ankho kohale vayekela ononthunya?

Omukulu umwe wokupopia evi viapopaiwa Mombimbiliya utiwa Carol Meyers wati: “Etyi tyifetelwa omuhikwena pokunepwa, ankho tyilinga ngatyina uti otyo tyipinga povilinga pahe masi-po, haunene umwe tyina omuhikuena atunda povanthu vokulima.” Etyi omuhikuena afetelwa pokunepwa, tupu ankho tyipondola okulinga ngatyina uti, tyihonyeka onombunga ombo onombali pahe mbelinepela. Ya oupanga ukala pokati kunombunga ombo, mausukisa umwe haunene pomuvo wovitateka. Tupu okuyeka ononthunya ankho tyilekesa okuti okutuka opo omuhikwene oo ketei vali kovohe mahi pahe utei komulume wae.

Okufeta ononthunya ankho katyilekesa okuti omunthu oo wemulanda. Omukanda umwe upopia etyi ankho tyilingwa ko Isilayeli wapopia okuti: “Otyipuka otyo tyokufeta ononthunya, tyilinge onombongo ine otyipuka otyikuavo ovohe yomuhikuena vapewa, mokutala ankho tyilinga umwe ngatyina uti ovohe walandesa omona wavo. Mahi okufeta ononthunya ankho katyilekesa okuti ngotyo ovohe valandesa omona wavo.”

Hono, movilongo ovinyingi, ovanthu vamwe na hono nkhele vafetesa ononthunya. Tyina ovohe ovakilisitau vaita ononthunya vena okutyilinga monkhalelo ‘ovanthu aveho mavamono okuti vapola pokati’, mokuahaiti vala ovipuka ovinyingi. (Fili. 4:5; 1 Kol. 10:32, 33) Tyina valinga ngotyo, mavalekesa okuti ‘kavehole onombongo,’ ovakuatyili. (2 Tim. 3:2) Tyehe otyo vala, tyina ovohe ovakilisitau vahaiti ovipuka ovinyingi, omukuendye manepe omona wavo kamesukisa okukala ehimbwe tyahanepe mokonda nkhele utupu ovipuka vemuita. Tupu ou manepe omona wenyi, kamesukisa okuyekapo ovilinga viokokoli-ndyila mokonda una okuundapa unene opo etyivile okuyekela ononthunya omona wenyi.

Movilongo vimwe, ovatumini vapaka-ko otyitumino tyipopia otyiñgapi omunthu ena okufetelua ononthunya. Kovilongo ngovio, ovohe ovakilisitau vesukisa okulandula ovitumino ovio. Omokonda yatyi? Omokonda Ondaka ya Huku ipopia okuti ovakilisitau “vena okutavela kovatumini” movipuka vina viahailikilwe no Mbimbiliya. — Loma 13:1; Ovil. 5:29.