EBIBUUZO AHA BY’OMU BAIBULI NIBIGARUKWAMU

Ruhanga ari mu muringo ki?

Ruhanga n’omwoyo kandi tarikureebwa. Niwe yaahangire iguru n’ensi n’ebintu byona ebiine amagara. Ruhanga tarahangirwe kandi taine butandikiro. (Zaaburi 90:2) Ruhanga naayenda ngu abantu bamusherure kandi bamanye amazima agarikumukwataho.​—Shoma Ebyakozirwe 17:24-27.

Nitubaasa kumanya eiziina rya Ruhanga. Nitubaasa kumanya n’emitwarize ye emwe turikuteekateeka aha bi yaahangire. (Abarooma 1:20) Kubaasa kumanya gye Ruhanga, twine kwega ebiri omu Kigambo kye Baibuli. Nikituhwera kwetegyereza gye emitwarize ye mirungi.​—Shoma Zaaburi 103:7-10.

Ruhanga naakwatwaho ata obutari buringaaniza?

Omuhangi waitu, Yehova, naayangira kimwe obutari buringaaniza. Kandi akahanga abantu omu nshusha ye. (Eky’Ebiragiro 25:16) Egi niyo nshonga ahabw’enki baingi ahariitwe nitwanga obutari buringaaniza. Obutari buringaaniza obu turikureeba, tiburikuruga ahari Ruhanga. Ruhanga akaha omuntu obugabe bw’okwecweramu. Eky’obusaasi, abantu baingi nibakoresa kubi obugabe bwabo bakora ebitari by’oburingaaniza. Nibagwisa kubi Yehova.​—Shoma Okutandika 6:5, 6; Eky’Ebiragiro 32:4, 5.

Yehova naakunda oburingaaniza, kandi naija kwihaho obutari buringaaniza. (Zaaburi 37:28, 29) Baibuli neegira ngu Ruhanga naija kwihaho obutari buringaaniza bwona.​—Shoma 2 Petero 3:7-9, 13.