OMUTWE OGURI AHA MUNAARA | OKUZOOKA—NIKWIJA KUBAHO?
Niki Ekirikubaho Bwanyima y’Okufa?
“Nkaba ninteekateeka ngu hariho emyanya ishatu ei abafu barikuzamu: omu iguru, purigatiri, nainga okuzimu. Nkaba nimmanya ngu ti ndi murungi munonga kuza omu iguru kandi ngu ti ndi mubi munonga kuza okuzimu. Nkaba ntarikumanya gye ekirikuba omu purigatiri. Tinkareebaga ekigambo ekyo omu Baibuli. N’ekigambo ky’abantu kwonka.”—Lionel.
“Nkeega ngu abantu boona nibaza omu iguru bwanyima y’okufa, kwonka nkaba ntarikukihamya. Nkaba ninteekateeka ngu omuntu yaafa naaba yaafeera kimwe, ngu abafu tibaine matsiko g’ebiro by’omumaisho.”—Fernando.
Orayebuurizeho oti: ‘Niki buzima ekirikubaho aha kufa? Abakundwa baitu abaafiire haine ahu bari nibabonabona? Mbwenu shi nitwija kugaruka kubareeba? Nitubaasa kukihamya tuta?’ Nyabura ‘we yetegyereze gye eki Baibuli buzima erikwegyesa. Eky’okubanza, ka twetegyereze oku Baibuli erikugyeragyeranisa okufa. Reero tureebe amatsiko agu Ekigambo kya Ruhanga, kirikutuha.
Abafu bari mu mbeera ki?
EKI BAIBULI ERIKUGARUKAMU: “Abahuriire bamanya ku barifa, kwonka abafiire tibagira ki bamanya, kandi baba batakiine bindi bihembo; ahabw’okuba tibaakiijukwa. Kyona eki orikwenda kukora n’emikono yaawe, kikore n’amaani; ahabw’okuba okuzimu ei oriza tihabayo murimo, nari enaama, nari okumanya n’obu bwakuba obwengye.”a—Omubuurizi 9:5, 10.
Okuzimu niyo abantu barikuza baaheza kufa; n’omwanya gw’akamanyiso ahatarikukorerwayo kintu kyona. Yobu omushaija omwesigwa akaba naamanya ki aha kigambo okuzimu? Akafeerwa ebintu bye n’abaana be boona omu izooba rimwe, kandi yagaruka yaakwatwa ebihuute bibi aha omubiri gwe goona. Akashaba Ruhanga ati: “Nkaabaasibwa ki, onshereka okuzimu, ondindira omu mubonano.” (Yobu 1:13-19; 2:7; 14:13) Buzima, Yobu akaba atarikutwara okuzimu nk’omwanya ogurimu omuriro ogutaraara ahu yaakweyongyeire kubonabonera kimwe. Omu mwanya gw’ekyo akakiteekateekaho nk’omwanya gw’okuhuumuriramu.
Hariho ogundi muringo ogu orikubaasa kwega aha mbeera y’abafu. Nitubaasa kushwijuma Ebyahandiikirwe ebirikukwata aha bantu munaana abazookire.—Reeba akabokisi “Okuzooka kw’Abantu Munaana Abarikugambwaho omu Baibuli.”
Tihariho n’omwe aharibo owaagizire ngu akaba ari omu mwanya gw’okubonabona. Kuri noogira ngu abantu abazookire bakaba bari omu mwanya gw’okubonabona, tibaakaakigambiire abantu abandi? Nainga tikikaahandiikirwe omu Baibuli kubaasa kumanywa abantu boona? Omu Byahandiikirwe, tihariho ekintu ekiri nk’ekyo. Abantu munaana abo buzima tihaine eki baagambire aha nshonga egyo. Ahabw’enki? Ahabw’okuba tihaine eki baabaire nibamanya, kureka bakaba bari nk’abagwejegyeire omu turo. Obumwe Baibuli neegyeragyeranisa okufa aha kugwejegyera. Nk’eky’okureeberaho, Daudi na Stefano ‘bakagwejegyera’ omu kufa.—Ebyakozirwe 7:60; 13:36.
Hariho matsiko ki agarikukwata aha bafu? Nibaija kusisiimuka omu kugwejegyera okwo?
a Ekigambo “Okuzimu” nikikoresibwa kumanyisa ekigambo “Sheol” omu Ruheburaayo na “Hades” omu Rugriika. Baibuli ezimwe nizikoresa ekigambo “okuzimu,” kwonka omwanya ogu tigwine kakwate n’omuriro ogutaraara kurugiirira aha Byahandiikirwe.