Koresa Gye Obwire Obu Orikumara omu Kubuurira
1 Buzima hariho kihango ekirikwetengwa kukorwa omu kubuurira kwaitu, kandi obwire obusigaireyo ni bukye. (Yoh. 4:35; 1 Kor. 7:29) Twayetebeekanisa gye bukiri kare, nitubaasa kukoresa gye obwire obu turikuba tutaireho kuza kubuurira.
2 Yetebeekanise: Otakagiire mu ruteerane rw’okwetebeekanisa kuza kubuurira, hamya ngu oine ebitabo ebi orikwetenga kukoresa kandi guma noijuka enyanjura zaawe. Oruteerane orwo rwaheza ruti kuhwa n’okushaba, ahonaaho gyenda ei murikuza kubuurira. Eki nikiija kubasisa iwe hamwe n’abo abarikuza kubuurira naiwe kugira kihango eki baakora omu bwire obu mutaireho kubuurira.
3 Waaba otoorainwe kwebembera oruteerane rw’okwetebeekanisiza okubuurira, rutandikire aha shaaha. Oruteerane oru tirushemereire kurenzya edakiika 15. Mutakagiire ei murikuza kubuurira, hamya ngu buri omwe naamanya ou arikuza kubuurira nawe kandi ngu nibamanya n’ekicweka eki murikuza kubuuriramu.
4 Mwaba Nimubuurira: Oruteerane rw’okwetebeekanisiza kuza kubuurira rwahwa, otakaayeziringa, tandikiraho kugyenda ei murikuza kubuurira. Waaba noobuurira n’abataahi baawe, teekateeka aha baakuba bakutegyereize kuheza kugaaniira n’ou orikubuurira. Ekyo nikibaasa kutwariramu okurekyeraho kugaaniira n’omuntu omu bwengye orikuba naahakana, nari noobaasa kukora entebeekanisa kugarukira ogwo oyorekire ngu naayenda kumanya ebirikukiraho.—Mat. 10:11.
5 Waaba noogarukayo ahari abo aboorekire ngu nibenda kumanya ebirikukiraho, noobaasa kwetantara kushiisha obwire orikugyenda, orikubanza waahika aha bu orikushoma nabo abari omu kicweka kimwe reero okabona kuza omu kindi. Noobaasa kutereera esimu bamwe aha bu orikuza kureeba okuhamya ngu nibaija kuba bari omu ka.—Enf. 21:5.
6 Turi omu ishaaruura ry’amaani ery’eby’omwoyo. (Mat. 9:37, 38) Juba omurimo ogu nigwija kuhendera. N’ahabw’ekyo, ka tugire ekyetengo ky’okukoresa gye obwire bwaitu twaba turi omu kubuurira.