Yetebeekanise Kwongyera aha Kubuurira Kwawe
1. Obwire bw’Ekiijutsyo nibutubaasisa kukora ki, kandi nitubaasa kwetebeekanisa tuta?
1 Buri mwaka, obwire bw’Ekiijutsyo nibutubaasisa ‘kuhimbisa Yehova munonga.’ (Zab. 109:30) Noija kwongyera aha kubuurira kwawe omuri Maaci kworeka ngu noosiima Ruhanga owaatuhaire ekitambo? Oshemereire kutandika kwetebeekanisa hati.—Enf. 21:5.
2. Okutuubya aha shaaha za baapayoniya abahwezi omuri Apuri eyaahweire kukakureetera kwehurira ota, kandi abandi bo bakakigambaho ki?
2 Okuba Payoniya Omuhwezi: Omwaka oguhweire, ababuurizi bakashemererwa ku baamanyire ngu omu Apuri eshaaha za baapayoniya abahwezi bakazituubya. Ow’eishe-emwe omwe akahandiika ati: “Nkiri omu siniya, kandi tinkabaasize kuheereza nka payoniya ow’obutwire. Omuri Apuri ninza kushaba kubuurira eshaaha 30 kwonka nteereho kuhitsya eshaaha 50.” Munyaanyazi-itwe oine omurimo ogurikutwara obwire bwingi akahandiika ati: “Eshaaha 30, ezo ninzibaasa!” Entebeekanisa egyo ku yaarangirwe, munyaanyazi-itwe omwe owaabaire yaaheereizeho nka payoniya ow’obutwire kandi hati ori omu myaka 80 akagira ati: “Eki nikyo mbiire ntegyereize! Yehova naamanya ngu okuheereza nka payoniya kikaba nikishemeza munonga!” Abamwe abaabaire batarikubaasa kuba baapayoniya abahwezi bakataho ebigyendererwa kwongyera aha kubuurira kwabo.
3. Ahabw’enki tushemereire kuteekateeka aha kuba baapayoniya abahwezi omuri Maaci, Apuri na Mei?
3 Maaci, nibwija kuba obwire burungi kuba payoniya omuhwezi ahakuba nihaija kuba hariho omugisha gw’okubuurira eshaaha 30 nari 50. Kandi, okutandika na Orwamukaaga, Maaci 17, nitwija kwejumba omu kampeyini y’okweta abantu kwija aha Kiijutsyo ekiraabeho Apuri 5. Baingi abaraayongyere aha kubuurira kwabo nikiija kubashemeza munonga kibareetere kwenda kuba baapayoniya abahwezi omuri Apuri na Mei, barikubuurira eshaaha 50.
4. Nitubaasa kwongyera tuta aha kubuurira kwaitu, kandi ekyo nikirugamu ki?
4 Omu Kuramya okw’Eka okuraakurateho, nimubaasa kugaaniira aha ku buri omwe omu ka arikubaasa kwongyera aha kubuurira kwe omu bwire bw’Ekiijutsyo. (Enf. 15:22) Shaba Yehova akuhwere omu kuteeraho kwawe. (1 Yoh. 3:22) Waayongyera aha kubuurira kwawe, noija kwongyera kuhimbisa Yehova kandi naiwe oyeyongyere kushemererwa.—2 Kor. 9:6.