Okwegyesa Abantu Baibuli Turikukoresa Akatabo Amakuru Marungi
1. Akatabo Amakuru Marungi katebeekanisiibwe kata?
1 Nk’oku kyayorekirwe omu Obuheereza Bwaitu obw’Obukama aka Gyuraayi, kimwe aha biturikukoresa omu kwegyesa abantu Baibuli n’akatabo Amakuru Marungi Kuruga Ahari Ruhanga! Ebyahandiikirwe ebyorekirwe tibijuriziibwe kugira ngu ou orikwegyesa ayegye arikubishoma omu Baibuli. Ebitabo bingi ebi turikukoresa omu kwegyesa abantu Baibuli bihandikirwe omu muringo ogurikubaasisa omuntu kweshomesa wenka, kwonka akatabo aka katebeekanisiibwe kugira ngu omuntu abe aine orikumwegyesa barikuhikaanisa hamwe ebiteekateeko. N’ahabw’ekyo twakaha omuntu, tushemereire kuteereho kumworeka oku turikukakoresa kugira ngu kimuhige kukunda kwega amakuru marungi kuruga omu Baibuli.—Mat. 13:44.
2. Nitubaasa kukoresa tuta akatabo Amakuru Marungi aha murundi gw’okubanza?
2 Aha Murundi gw’Okubanza: Noobaasa kugira oti: “Abantu nibenda kumanya ekiraabeho omu biro by’omumaisho. Iwe nooteekateeka ngu embeera niziija kuhinduka? [Tegyereza agarukyemu.] Baibuli erimu amakuru marungi agarikubaasa kutuha amatsiko. Ebi nibimwe aha bibuuzo ebi Baibuli erikugarukamu.” Ou orikubuurira muhe akatabo, omushabe kutoorana ekibuuzo kimwe aha biri enyima yaako. Orikukoresa akacweka k’okubanza omu shuura egyo, mworekye oku murikubaasa kukoresa akatabo aka kwega Baibuli. Omuringo ogundi n’okubuuza ou orikubuurira ekibuuzo ekirikubaasa kumureetera kuhurikiza kurugiirira aha ishomo eri otooraine, reero omworekye oku akatabo aka karikubaasa kumuhwera kutunga eky’okugarukamu kuruga omu Baibuli. Aha jw.org haaba hariho vidiyo erikuhikaana n’ekimurikwegaho, ababuurizi abamwe nibagikoresa baaba nibooreka omuntu oku arikubaasa kwega Baibuli.
3. Shoboorora oku orikubaasa kukoresa akatabo Amakuru Marungi kwegyesa omuntu Baibuli.
3 Oku Turikubaasa Kukakoresa Kwegyesa Abantu Baibuli: (1) Shoma ebibuuzo ebiri omu nyuguta ezikwatsire kuhwera ou orikubuurira kuta omutima aha nshonga enkuru. (2) Shoma akacweka akarikukurataho. (3) Shoma ebyahandiikirwe ebiriho ekigambo shoma, reero okorese ebibuuzo ebindi kuhwera ou orikubuurira kwetegyereza oku ebyahandiikirwe birikugarukamu ebibuuzo ebiri omu nyuguta ezikwatsire. (4) Haaba hariho akandi kacweka ahansi y’ekibuuzo ekyo koresa obuhabuzi oburi aharuguru omuri 2 na 3. Vidiyo yaaba neehikaana n’ekibuuzo eki murikugaaniiraho kandi otakagimworekire, teeraho kureeba ngu waagimworeka. (5) Bwanyima, oshabe ou orikubuurira kugarukamu ekibuuzo eky’enyuguta ezikwatsire kugira ngu ohamye yaaba yaayetegyereza.
4. Niki ekiraatuhwere kubaasa kukoresa gye akatabo aka?
4 Teeraho kumanya ebiri omu katabo ako. Kakorese butoosha kyaba nikyetengyesa. Buri kuza kukakoresa, banza oteekateekye aha mwegi hamwe n’omuringo murungi ogu orikubaasa kuhikaanisa nawe ebiteekateeko orikukoresa ebyahandiikirwe ebiri omu ishomo. (Enf. 15:28; Byak. 17:2, 3) Ku oraayege kukoresa gye akatabo aka, noija kureeba ngu ni kamwe aha butabo burungi obu turikukoresa kwegyesa abantu amazima!