Obu Rwango Eraahwereho Kimwe!
N’obu twakwiha rwango omu biteekateeko n’omu mutima, titurikubaasa kutegyeka ebikorwa by’abandi n’emiteekateekyere yaabo. Abantu abataine rubanja nibangirwa busha. Mbwenu shi n’oha orikubaasa kumariraho kimwe rwango?
Yehova Ruhanga wenka niwe arikubaasa kwihiraho kimwe rwango ei turikureeba hati. Baibuli neeraganisa ngu eki kyenyini nikyo arikwija kukora.—Enfumu 20:22.
RUHANGA NAIJA KWIHIRAHO KIMWE OBUKOMOOKO BWA RWANGO
1. SITAANE OMUREGI. Sitaane maraika omugomi niwe bukomooko bwa rwango eri omu nsi hati. Ruhanga naija kucwekyereza Sitaane n’abo boona abu arikuhabisa.—Zaaburi 37:38; Abarooma 16:20.
2. ENSI YA SITAANE EIJWIIRE RWANGO. Ruhanga naija kumariraho kimwe ababi abari omu nsi egi, otwariiremu ab’eby’obutegyeki abashomankuzi, n’abeebembezi b’ediini abarikushagika ebikorwa bya rwango. Kandi Ruhanga naija kwihaho n’eby’obushuubuzi ebirimu omururu, obushomankuzi, kandi ebirikunyuunyuuta abantu.—2 Petero 3:13.
3. OBUTAHIKIIRIRA BW’ABANTU. Baibuli neegira ngu abantu boona bakahungura obutahikiirira, oburikubareetera kuteekateeka ebitahikire, n’okugira enyehurira mbi. (Abarooma 5:12) Okugira rwango n’okukora ebirikugyoreka, ni kimwe aha birikureetwaho obutahikiirira. Ruhanga naija kuhwera abantu kusingura obutahikiirira, reero rwango yoona ehwereho kimwe.—Isaaya 54:13.
BAIBULI NEERAGANISA ENSI ETARIMU RWANGO
1. TIHARIKWIJA KUBAHO OBUTARI BURINGAANIZA. Ensi neija kuba neetegyekwa Obukama bwa Ruhanga, gavumenti y’oburingaaniza kandi ey’obutwire, erikutegyekyera omu iguru. (Danieli 2:44) Okushoroora na rwango nibiija kuhweraho kimwe. Ruhanga naija kwihiraho kimwe obutari buringaaniza oburikuhika aha bantu hati.—Luka 18:7.
2. BURI OMWE NAIJA KUGIRA OBUSINGYE. Tihaine orikwija kugaruka kubonabona ahabw’obushaarizi nari entaro. (Zaaburi 46:9) Ensi neija kuba omwanya gw’oburinzi ogurimu abantu b’obusingye na rukundo bonka.—Zaaburi 72:7.
3. BURI OMWE NAIJA KUTUURAHO EBIRO BYONA OMU MBEERA NUNGI. Abaraabe nibatuura omu nsi boona nibaija kuba nibakunda bataahi baabo. (Matayo 22:39) Tihaine orikwija kugaruka kugira amaganya, n’obu kwakuba okuteganisibwa ebiteekateeko bibi. (Isaaya 65:17) Obwo, oruganda rw’abantu abataine rwango, nibaija ‘kwesiima ahabw’okugira obusingye bwingi.’—Zaaburi 37:11.
Oine ekihika ky’okutuura omu nsi nk’egyo? Na hati, abantu nibeega kweihamu rwango barikugyendera aha misingye ya Baibuli. (Zaaburi 37:8) Ekyo nikyo Abajurizi ba Yehova barikukora omu nsi yoona. N’obu baraabe batarikushushanisa enganda n’obukomooko, nibakundana nk’ab’eka emwe, kandi baine obumwe.—Isaaya 2:2-4.
Abajurizi ba Yehova nibaija kushemererwa kubagana naiwe eki beegire, aha bikwatiraine n’okwemera obutari buringaaniza n’okushoroora. Ebi oraayege nibiija kukuhwera mporampora kuta rukundo omu mwanya gwa rwango. Noobaasa kwega oku oine kutwariza gye abantu boona, nangwa n’abo abarikureebeka nk’entasiima nari abarikworeka ngu baine rwango. N’ekirikurugamu, noija kushemererwa hati, kandi noija kwongyera kugira omukago murungi n’abandi. Okukira byona, noija kwega eki oine kukora kubaasa kutegyekwa Obukama bwa Ruhanga obu rwango eraabe yaahweraireho kimwe.—Zaaburi 37:29.