OKU RWANGO ERIKUBAASA KUZIBIRWA KUGUMIZAMU

4 | Singura Rwango Ahabw’obuhwezi Bwa Ruhanga

Eki Baibuli Erikwegyesa:

‘[Emitwarize] y’omwoyo n’okukunda, okushemererwa, obusingye, okugumisiriza, embabazi, oburungi, [okwikiriza], obucureezi, n’okwerinda.’—ABAGALATIA 5:22, 23.

Eki Kirikumanyisa:

Okuhendera rwango nikibaasika ahabw’obuhwezi bwa Ruhanga. Omwoyo gurikwera nigutubaasisa kugira emitwarize ei tutarikubaasa kugira ahabwaitu. N’ahabw’ekyo, omu mwanya gw’okuteeraho kusingura rwango omu maani gaitu, n’eky’obwengye kushaba Ruhanga obuhwezi. Twakikora, nitubaasa kwehurira nk’entumwa Paulo, owaahandiikire ati: “Amaani agarikukirira kimwe n’aga Ruhanga, ti gaitu.” (2 Abakorinso 4:7) Buzima, nitwija kubaasa kugira tuti: ‘Okuhwerwa kwangye nikuruga ahari’ Yehova.—Zaaburi 121:2.

Eki Orikubaasa Kukora:

“Yehova ampindwire kuruga aha kuba enshaarizi naaba ow’obusingye.” —WALDO

Shaba Yehova omweshengyereze, kukuha omwoyo gurikwera. (Luka 11:13) Mushabe kukuhwera kugira emitwarize mirungi. Condooza aha ki Baibuli erikugamba aha mitwarize erikuhezaho rwango, nka rukundo, obusingye, okugumisiriza, n’okwerinda. Sherura emiringo y’okworekamu emitwarize egyo. Kandi shashaanuka n’abo abarikuteeraho kugira emitwarize nk’egyo. Abantu nk’abo nibaija kukuhwera kandi bakuhigye ‘kukunda kukora ebirungi.’—Abaheburaayo 10:24.

Ekyabaireho Kyenyini—WALDO

Akasingura Rwango y’Obushaarizi

Waldo akakurira omu mbeera zigumire eza rwango. Naagira ati: “Nkaba ninkira kurwana aha nguuto n’abarikuguza emibazi y’ekitookoza bwongo . . . Eizooba rimwe abu naabaire nimparangatana nabo bakapangisa omushaija owaabaire naamanywa nk’omwitsi ngu anyite, kwonka nkabaasa kuhunga nyine obuhuta.”

Waldo tarashemereirwe Abajurizi ba Yehova ku baatandikire kwegyesa omukazi we Baibuli. Naagira ati: “Nkaba niinyangira kimwe Abajurizi ba Yehova, kandi emirundi mingi nkaba nimbagambira ebigambo ebirikuhemurana. Kwonka bo bakaba nibatwaza omu muringo gw’obusingye.”

Bwanyima, Waldo nawe akatandika kwega Baibuli. Naagira ati: “Kikaba kitoorobi kugyendera aha bi ndikwega. Nkaba niimanya ngu tindikubaasa kutegyeka ekiniga kyangye.” Kwonka haine eki yaayegire omu Baibuli kikamukwataho.

Waldo naashoborora ati: “Eizooba rimwe, Alejandro owaabaire naanyegyesa Baibuli, akanshaba kushoma Abagalatia 5:22, 23. . . . Alejandro akangira ngu okugira emitwarize egi kikaba kitarikwija kwegamira aha maani gangye, beitu aha mwoyo gurikwera. Amazima ago gakahindurira kimwe emiteekateekyere yangye!”

Okwesiga Ruhanga kukahwera Waldo, kandi akabaasa kusingura rwango. Naagira ati: “Abanyabuzaare n’abanywani aba ira tibarikubaasa kukiikiriza baareeba oku mpindukire.” Naayongyeraho ati: “Yehova ampindwire kuruga aha kuba enshaarizi naaba ow’obusingye.”