OKU RWANGO ERIKUBAASA KUZIBIRWA KUGUMIZAMU

2 | Otahoora Enzigu

Eki Baibuli Erikwegyesa:

“Mutaihura omuntu weena ekibi ahabw’ekibi. . . . Mutuurane n’abantu boona n’obusingye. Muteehoorera enzigu . . . nk’oku kyahandiikirwe ngu: “Okuhoora enzigu n’okwangye, niinye ndizimuura, nikwo [Yehova] arikugira.”—ABAROOMA 12:17-19.

Eki Kirikumanyisa:

N’obu kiraabe kiri ekya butoosha kugira ekiniga haagira owaakukora kubi, kwonka Ruhanga tarikwenda ngu tuhoore enzigu. Kureka, naatuhiga kuguma tumutegyereize ahakuba juba naija kugonjoora enshonga.—Zaaburi 37:7, 10.

Eki Orikubaasa Kukora:

Abantu abatahikiriire baahoora enzigu, rwango neegumizamu neebaho. N’ahabw’ekyo, omuntu yaakukora kubi nari akakuhutaaza, otahoora enzigu. Kureka, rinda obusingye kandi otegyekye enyehurira zaawe. Obumwe, nooyetambira bingi waayehuzya enshonga. (Enfumu 19:11) Kwonka waareeba ngu okutereeza enshonga nikyo kiraamareho oburemeezi, noobaasa kuba nikyo waakora. Nk’eky’okureeberaho, waareeba ngu oku omuntu yaakutwariza n’omushango, noobaasa kucwamu kutabaaza aha poriisi nari omu b’obushoboorozi abandi.

Waagumizamu noohoora enzigu nooba nooyesaasa

Kandi shi kyaba nikireebeka ngu enshonga terikubaasa kugonjoorwa omu busingye? Nari shi ku waakukora kyona ekirikubaasika kutereeza enshonga omu muringo gw’obusingye bikanga? Otahoora enzigu. Ekyo nikiija kuba rwongyerera maganya. Kureka, zibira rwango kugumizamu. Enshonga noobaasa kuzireka omu mikono ya Yehova kuba niwe yaija kushoboorora oburemeezi. ‘Mwesigye,’ nawe naija kukora ekiraakuhwere.—Zaaburi 37:3-5.

Ekyabaireho Kyenyini—ADRIÁN

Akasingura Okuhoora Enzigu

Adrián omu bushogoyo bwe, akaba ari endwani owaabaire naakunda kuhoora enzigu. Naagira ati: “Nkaba ninkira kwejumba omu kurwanagana kw’embundu, kandi emirungi mingi nkaba tsigara omu kyambu ky’eshagama aha rubaju rw’enguuto ndi hakye kufa.”

Adrián akatandika kwega Baibuli aine emyaka 16. Naayongyeraho ati: “Ku naagumiizemu niinyega, nketegyereza ngu nyine kuhindura emitwarize yangye.” Akaba aine kweihamu rwango, kandi akarekyera aho ebikorwa by’obushaarizi. Okukira munonga akakunda munonga ebiri omu Abarooma 12:17-19, ebirikukwata aha kutahoora enzigu. Naagira ati: “Nketegyereza ngu Yehova naamanya oku araije kumaraho obutari buringaaniza n’obu araakikore. Mporampora nkasingura entwaza yangye y’obushaarizi.”

Omwabazyo gumwe, omwe aha mihiri abu Adrián yaabaire naaharangatana nabo akateeraho kumurwanisa. Orikukurira ekigombe ekyo akamugira ati: “Yerwaneho!” Adrián naagira ati: “Nkaba nimpurira ndikwenda kwerwanaho.” Kwonka omu mwanya gw’ekyo, ahonaaho akashaba Yehova kandi yaaruga omu mwanya ogwo.

Adrián naayongyeraho ati: “Eizooba eryakuratsireho nkabugana orikukurira ekigombe ekyo ari wenka. Nkagira ekiniga kingi, kwonka nabwo nkashabira Yehova aha mutima kumpwera kwezibira. Kikaantangaaza omutsigazi ogwo ku yaagizire ati: ‘Nsaasira ahabw’ekibaireho nyomwabazyo. Amazima gari ngu, niinyenda kuba nkaiwe. Niinyenda kwega Baibuli.’ Ka naashemereirwe munonga ahabw’okutegyeka ekiniga kyangye! Ekirikushemeza, nkatandika kwegyesa omutsigazi ogwo Baibuli.”