OKU RWANGO ERIKUBAASA KUZIBIRWA KUGUMIZAMU

1 | Otashoroora

Eki Baibuli Erikwegyesa:

‘Ruhanga tarikushoroora mu bantu, kureka omu mahanga goona orikumutiina, akakora eby’okuhikiirira, ogwo niwe arikusiimwa.’ —EBYAKOZIRWE 10:34, 35.

Eki Kirikumanyisa:

Yehovaa Ruhanga tarikutucwera orubanja kurugiirira aha ihanga, erangi, nari oruganda. Kureka, naata omutima aha nshonga nkuru, eki turi omunda. Buzima, ‘abantu nibareeba emireebekyere y’aha ruguru, kwonka [Yehova] naareeba omutima.’—1 Samueli 16:7.

Eki Orikubaasa Kukora:

N’obu turaabe tutarikubaasa kumanya ebiri omu mitima y’abantu, nitubaasa kutooreza Ruhanga turekye kushoroora. Teeraho kureeba buri muntu okwe omu mwanywa gw’okureeba guruupu yoona. Waamanya ngu oine enyehurira zitahikire aha bantu abandi, nk’ab’erangi endiijo nari eihanga erindi, shaba Ruhanga kukuhwera kweihamu enyehurira ezo. (Zaaburi 139:23, 24) Waamushaba oyihire aha mutima kukuhwera kweihamu okushoroora, noobaasa kugira obwesigye ngu naija kugarukamu okushaba kwawe.—1 Petero 3:12.

a Yehova n’eiziina rya Ruhanga.—Zaaburi 83:18.

“Nkaba ntakashutamahoga n’ow’erangi erikwera omu busingye . . . Hati nkaba ndi omwe aha b’eishe-emwe abahikire ab’oruganda rumwe omu nsi yoona.”—TITUS

Ekyabaireho Kyenyini—TITUS

Akazibira Rwango Kugumizamu

Titus akaba ari omwe aha baabaire batarikwikirizana n’ebiragiro ebirikukwata aha kushoborora. Naagira ati: “Tukaba nituza omu myanya y’etauni ei abairaguju baabaire batarikwikirizibwa kuzamu nka hoteeri n’amabaara kutandikaho endwano.” Titus naikiriza ngu rwango niyo yaabaire neemureetera kukora ekyo, reero ayongyeraho ati: “Ku naabaire ntongana n’omuntu weena yaaba mushaija nari mukazi, niinye naabaire ntandika okurwana.”

Titus akatandika kukora empinduka bwanyima y’Abajurizi ba Yehova kutandika kumwegyesa Baibuli. Ku yaashomire Baibuli, ekamuhwera kuhindura emiteekateekyere ye. Okukira munonga akashemezibwa ebiro by’omumaisho ebirikwija kuba bitarimu ‘okufa, n’obu kwakuba okucura nari okurira nari obusaasi.’—Okushuuruurwa 21:3, 4.

Omu kubanza, Titus akaba naagumirwa kwiha rwango omu mutima gwe. Naagira ati: “Kikaba kigumire munonga kuhindura emiteekateekyere yangye n’emitwarize.” Kwonka ebiri omu Ebyakozirwe 10:34, 35 ebirikugira ngu Ruhanga tarikushoroora bikamuhwera kuhinduka.

Hakarugamu ki? Titus naashoboorora ati: “Nkahamiza kimwe ngu ediini y’Abajurizi ba Yehova niyo ey’amazima, ku naareebire oku barikukundana, kandi batarikushooroora mu ihanga nari erangi. Ntakabatiziibwe kuba omwe aha Bajurizi ba Yehova, omushaija omwe ow’erangi erikwera omu kibiina akanyeta owe yaampa eby’okurya. Okaba nooshusha ngu nindoota. Nkaba ntakashutamahoga n’ow’erangi erikwera omu busingye, kandi tukarya hamwe. Hati nkaba ndi omwe aha b’eishe-emwe abahikire ab’oruganda rumwe omu nsi yoona.”