OKU RWANGO ERIKUBAASA KUZIBIRWA KUGUMIZAMU

3 | Iha Rwango Omu Biteekateeko Byawe

Eki Baibuli Erikwegyesa:

“Muhindurwe basya ahabw’okugarurwa obusya omu biteekateeko byanyu, mubone kumanya gye ebi Ruhanga akunda, oku biri birungi, ebirikusiimwa, kandi ebihikire buzima.”—ABAROOMA 12:2.

Eki Kirikumanyisa:

Ruhanga naafayo aha miteekateekyere yaitu. (Yeremia 17:10) Twine kukora ekirikukira aha kwetantara kugamba ekintu nari kukora ekirikworeka rwango. Rwango neetandikira omu biteekateeko n’omu mutima. N’ahabw’ekyo, twine kwiha rwango yoona omu biteekateeko byaitu n’enyehurira zaitu. Obwo nibwo turikubaasa ‘kuhindurwa basya’ buzima, kandi tukazibira rwango kugumizamu.

Eki Orikubaasa Kukora:

Yeshwijume kumanya oku orikuteekateeka aha bandi n’enyehurira ezi obaineho, na munonga ab’erangi endiijo nari ab’eihanga erindi. Yebuuze oti: ‘Nimbareeba nta? Emiteekateekyere yangye shi neeyegamira aha ki ndikubamanyaho? Nari neeyegamira aha kushoroora?’ Yetantare emikura y’empurizana, vidiyo, nari eby’okweshemeza ebirimu rwango n’obushaarizi.

Ekigambo kya Ruhanga nikibaasa kutuhwera kwiha rwango omu biteekateeko n’omu mutima.

Butoosha tikyorobi kweshwijuma omu biteekateeko n’enyehurira omu buringaaniza. Kwonka Ekigambo kya Ruhanga nikibaasa kutuhwera kumanya ebiteekateeko byaitu ‘n’ebi tumaririire omu mutima gwaitu kukora.’ (Abaheburaayo 4:12) N’ahabw’ekyo gumizamu nooshwijuma Baibuli. Gyeragyeranisa enyegyesa zaayo n’emiteekateekyere yaawe, kandi teeraho kuhikaanisa emiteekateekyere yaawe n’ebi Baibuli erikwegyesa. Ekigambo kya Ruhanga nikibaasa kutuhwera kusingura rwango eri ‘nk’ebigo’ bigumire omu biteekateeko byaitu n’omu mitima yaitu.—2 Abakorinso 10:4, 5.

Ekyabaireho Kyenyini—STEPHEN

Akahindura Emiteekateekyere

Stephen n’ab’eka ye bakaba nibangwa ab’erangi erikwera. N’ekyarugiremu, akaza omu kigombe ky’obutegyeki ekyabaire nikirwanirira obugabe bw’abantu omu miringo y’ekinyamahe. Bwanyima, akatandika kukora emishango eine akakwate na rwango. Stephen naagira ati: “Nyowe na banywani bangye tukaba nitukira kureeba vidiyo ezirikworeka oku abahuuku kuruga omuri Africa baabaire nibabonabonesibwa omuri United States. Ku twabaire tuheza kureeba obutari buringaaniza obwo, tukaba tutandika kuteera eminyeeto y’ab’erangi erikwera aho ahu turikureebera vidiyo. Bwanyima tukaba tuza omu myanya ehereraine naitwe kusherura ab’erangi erikwera abandi ab’okuteera.”

Emiteekateekyere ya Stephen ekahinduka, Abajurizi ba Yehova ku baatandikire kumwegyesa Baibuli. Naagira ati: “Ahabw’okugira ngu nkakura ndikureeba hariho okushoroora kwingi, entwaza y’Abajurizi ba Yehova ekaantangaaza. Nk’eky’okureeberaho, Omujurizi wa Yehova ow’erangi erikwera ku yaabaire naayenda kuza aheeru y’eihanga rye, akatsiga abaana be omu ka y’abairaguju. Kandi, eka emwe y’ab’erangi erikwera ekahwera omutsigazi omwiraguju owaabaire ataine buraaro.” Eki kikareetera Stephen kuhamya ngu Abajurizi ba Yehova nibakundana nk’enyinemwe, nk’oku Yesu yaagizire ngu Abakristaayo abaabuzima nikwo baine kutwaza.—Yohaana 13:35.

Niki ekyahweraire Stephen kweihamu rwango? Akahwerwa Abarooma 12:2. Naagira ati: “Nkatandika kwetegyereza ngu nyine kuhindura emiteekateekyere yangye. Nkaba nyine kuhindura ebiteekateeko, kugira ngu mbe omuntu y’obusingye, kandi nabwo nkareeba ngu egi niyo ntwaza erikukirayo oburungi.” Stephen hati amazire emyaka erikurenga 40 ataine enyehurira za rwango.