Okuzooka kw’Omwana w’Efaakazi

Omu bwire bw’ekyanda, Yehova akagambira Eliya ati: ‘Za Zarefaasi. Omufaakazi naija kukuha eby’okurya.’ Eliya akareeba omufaakazi naatorotoora enku aha irembo ry’orurembo. Yaamushaba ekikopo ky’amaizi. Omukazi ku yaagiire kureeta amaizi, Eliya akamweta ati: ‘Ondeetere n’akagaati omu ngaro.’ Kwonka omufaakazi akamugira ati: ‘Tiinyine kagaati k’okuha. Nyine oruhi rw’esaano omu kanyungu n’amajuta makye omu katsimbo ebi turarye nyowe na mutabani wangye.’ Eliya akamugira ati: ‘Yehova naaraganisa ngu ku oranteekyere akagaati, esaano y’omuri ako kanyungu terikwija kuhwaho, n’amajuta ag’omuri ako katsimbo tigarikwija kuhwamu, okuhitsya aha izooba eri enjura erigwa.’

N’ahabw’ekyo omufaakazi akagaruka omuka yaateekyera nabi wa Yehova akaagati. Nk’oku Yehova yaabaire araganiise, omufaakazi n’omutabani bakaguma baine eby’okurya okuhitsya obu ekyanda kyahweire. Akanyungu k’esaano n’akatsimbo k’amajuta bikaguma biijwire.

Bwanyima haine ekintu kibi ekyabaireho. Mutabani w’omufaakazi akarwara yaafa. Akeeshengyereza Eliya kumuhwera. Eliya akaiha omwojo ogwo omu ngaro z’omufaakazi yaamutwara omu kishengye ky’ahaiguru. Ku yaahikireyo yaamurambika aha kitanda kye yaashaba ati: ‘Yehova, ninkweshengyereza, ikiriza amagara g’ogu mwana gamugarukyemu.’ Noomanya ahabw’enki kyabaire kiri kirungi Yehova kukora ekyo? Ahakuba tihaine owaabaire yaafiire akazooka. Kandi omufaakazi ogu n’omutabani bakaba batari Baisraeli.

Kwonka omwojo akagaruka yaaba ohuriire, kandi yaatandika kwitsya. Eliya akagira omufaakazi ati: ‘Reeba omwana waawe ahuriire.’ Akashemererwa munonga yaagambira Eliya ati: ‘Ori omushaija wa Ruhanga. Ahakuba nimmanya ngu ebi orikugamba nibiruga ahari Yehova Ruhanga.’