Oku Turikubaasa Kuguma Twine Emiteekateekyere Mirungi

1. Ni bintu ki ebi Yehova arikutuha ebirikubaasa kutureetera kushemererwa?

YEHOVA naayenda ngu tushemererwe, kandi naatuha bingi ebirikutureetera kushemererwa. Kandi kimwe aharibyo n’amagara. N’ahabw’ekyo, nitubaasa kuhimbisa Yehova ahabw’okutureeta omu kuramya okw’amazima. (Zab. 144:15; Yoh. 6:44) Yehova naatuhamiza ngu naatukunda kandi naatuhwera kugumisiriza omu kumuheereza. (Yer. 31:3; 2 Kor. 4:16) Twine okushemererwa ahabw’okugira paradiso y’eby’omwoyo, erimu ab’eishe-emwe abaine rukundo n’eby’okurya by’omwoyo. Okukira munonga, twine amatsiko aha biro by’omumaisho.

2. Bamwe aha baheereza ba Ruhanga abeesigwa baine miteekateekyere ki?

² N’obu turaabe twine ebyo byona ebirikubaasa kutureetera kushemererwa, bamwe aha baheereza ba Ruhanga abeesigwa nibaba baine emiteekateekyere egwire. Nibabaasa kuteekateeka ngu Yehova tarikusiima buheereza bwabo. Abo abaine emiteekateekyere nk’egyo nikibaasa kubagumira kwikiriza ngu nibabaasa kumara “emyaka mingi” bashemereirwe. Nibareeba ngu amagara gaabo gaijwire enaku yonka.​—Mub. 11:8.

3. Niki ekirikubaasa kutureetera kugira emiteekateekyere etahikire?

³ Ab’eishe-emwe nari banyaanyazi-itwe nk’abo, nibabaasa kugira emiteekateekyere nk’egyo ahabw’okubareebya, okurwara, nari bukuru. (Zab. 71:9; Enf. 13:12; Mub. 7:7) Kwonka, buri Mukristaayo aine kwijuka ngu omutima n’engobya kandi ngu nigubaasa kutureetera kwecwera orubanja n’obu Ruhanga yaakuba naatusiima. (Yer. 17:9; 1 Yoh. 3:20) Omuregi nawe naayomesereza abaheereza ba Ruhanga. Kandi abo abaine emiteekateekyere nk’eya Sitaane nibabaasa kutureetera kuteekateeka nka Elifaazi ngu tituri b’omugasho ahari Ruhanga. Ekyo kikaba kiri ekishuba omu bunaku bwa Yobu kandi nikwo kiri n’obunaku obu.​—Yob. 4:18, 19.

4. Niki eki turikuza kushwijuma omu kicweka eki?

⁴ Yehova naakyoreka gye omu Byahandiikirwe ngu naija kuba ari hamwe n’abo abarikuraba “omu ruhanga rw’ekibunda ky’okufa.” (Zab. 23:4) Omuringo gumwe ogu arikuba naitwe n’okutuha Ekigambo kye. Ekigambo kya Ruhanga Baibuli kiine amaani ‘g’okusheenya ebigo.’ Eki nikimanyisa ngu neebaasa kuhindura emiteekateekyere egwire ei turikubaasa kuba twine. (2 Kor. 10:4, 5) Ka tureebe oku turikubaasa kukoresa Baibuli kubaasa kugira emiteekateekyere mirungi kandi tukaguma tugiine. Noija kugasirwa kandi kikuhwere n’okuhiga abandi.

KORESA BAIBULI KUGIRA EMITEEKATEEKYERE MIRUNGI

5. Niki ekiraatuhwere kugira okushemererwa?

⁵ Entumwa Paulo akagamba ahari bimwe ebirikubaasa kutuhwera kugira okushemererwa. Akahiga ekibiina kya Korinso ati: “Mweshwijume mureebe ku muraabe muri omu kwikiriza.” (2 Kor. 13:5) ‘Okwikiriza’ nikutwariramu enyikiriza z’Abakristaayo zoona eziri omu Baibuli. Ebikorwa n’ebigambo byaitu byaba nibihikaana n’enyikiriza ezo, nituba turi “omu kwikiriza.” Titurikubaasa kutooranamu ebi turaakuratire. Twine kworobera buri kimwe ekiri omu Baibuli.​—Yak. 2:10, 11.

6. Ahabw’enki twine kweshwijuma kureeba yaaba turi omu kwikiriza? (Reeba ekishushani aha kutandika.)

⁶ Nikibaasa kukugumira kukora ekyo na munonga waaba nooteekateeka ngu noobaasa kuremwa. Kwonka, oku Yehova arikutureeba nikyo kikuru okukira oku itwe turikwereeba kandi n’ebiteekateeko bye nibikira ebyaitu. (Isa. 55:8, 9) Tarikushwijuma abaheereza be arikwenda kubacwera orubanja beitu naaba naayenda kubahwera. Waakoresa Ekigambo kya Ruhanga kweshwijuma kureeba yaaba ori omu kwikiriza, noija kwereeba nk’oku Ruhanga arikukureeba. Nikiija kukuhwera kukimanya ngu ori ow’omuhendo ahari Yehova nk’oku Baibuli erikugamba. Okuguma noijuka ekyo nikiija kuba nk’oku waakwigura ekishengye ekirimu omwirima kugira ngu ekyererezi kitaahemu.

7. Eby’okureeberaho ebiri omu Baibuli eby’abantu abeesigwa nibitugasira bita?

⁷ Omuringo murungi gw’okweshwijuma n’okuteekateeka aha by’okureeberaho by’abantu abeesigwa abarikugambwaho omu Baibuli. Gyeragyeranisa embeera n’enyehurira zaabo n’ezaawe, oreebe ku oraabe nootwaza nk’oku baatwarize. Ka tushwijume eby’okureeberaho ebirikworeka oku orikubaasa kukoresa Baibuli kureeba yaaba ori omu kwikiriza, ekiraakuhwere kugira emiteekateekyere mirungi.

OMUFAAKAZI OMWORO

8, 9. (a) Omufaakazi omworo akaba ari mu mbeera ki? (b) Ni miteekateekyere ki etahikire ei omufaakazi ashemereire kuba yaabaire aine?

⁸ Yesu akaba ari omu hekalu omuri Yerusaalemu yaareeba omufaakazi omworo. Nitubaasa kugira eki twayegyera aha ky’okureeberaho ky’omufaakazi ogwo, ekiraatuhwere kuguma twine emiteekateekyere mirungi n’obu turaabe twine obweremwa. (Shoma Luka 21:1-4.) Yetegyereze embeera y’omufaakazi ogwo. Akagumisiriza enaku y’okufeerwa iba n’embeera mbi y’eby’omwoyo eyaabaire ereetsirweho abeebembezi b’ediini abaabaire ‘banyaga enju z’abafaakazi’ omu mwanya gw’okubahwera. (Luk. 20:47) Akaba ari omworo munonga ahabw’okugira ngu esente ezi yaahaireyo zikaba zishashurwa omukozi owaakora obudakiika bukye.

⁹ Teekateeka aha ku yaabaire naayehurira arikutaaha omu hekalu aine obusente bubiri. Mbwenu shi akaba naateekateeka ngu naaza kuhayo kakye waagyeragyeranisa n’eki yaakuhaireyo ku ogire ngu iba akaba akiriho? Mbwenu shi akaba naija kuhemuka yaareeba bingi ebi abandi baabaire nibahayo kimureetere kuteekateeka ngu eki yaahayo tikiine mugasho? N’obu yaakuba yaagizire emiteekateekyere nk’egyo, akakora eki yaabaire naabaasa kushagika okuramya okw’amazima.

10. Yesu akooreka ata ngu omufaakazi akaba ari ow’omuhendo omu maisho ga Ruhanga?

¹⁰ Yesu akooreka ngu Yehova akasiima omufaakazi hamwe n’eki yaahaireyo. Akagira ngu omufaakazi akatamu “bingi okukira bariya boona[abagaiga].” Ebi omufaakazi yaahaireyo bikaba nibiija kugaitwa n’eby’abandi kwonka okukira munonga, Yesu akooreka okusiima ahabw’obwesigwa bwe ahari Ruhanga. Abaabaire nibakora omu hekalu bakaba nibaija kureeba obusente bubiri obwo kwonka bakaba batarikwija kumanya oku Yehova yaabutwaire nk’obw’omuhendo n’ogwo owaabuhaireyo. Kwonka nabwo, eki Ruhanga yaabaire naamuteekateekaho nikyo kyabaire kiri kikuru beitu kutari oku abandi nari we yaabaire naayeteekateekaho. Noobaasa kukoresa eky’okureeberaho eki kweshwijuma kureeba yaaba ori omu kwikiriza?

11. Niki eki turikubaasa kwegyera aha mufaakazi?

¹¹ Nitubaasa kuheereza Yehova kurugiirira aha mbeera zaitu. Ahabwa bukuru nari amagara mabi, abamwe tibarikubaasa kubuurira eshaaha nyingi. Mbwenu shi nibaba bahikire kubanganisa yaaba eki barikukora n’eky’omuhendo? N’obu waakuba otaine birikukuteganisa, noobaasa kwehurira ngu okuteeraho kwawe nikwongyera kakye aha shaaha ezi abaheereza ba Ruhanga barikumara nibamuramya buri mwaka. N’obu kiraabe kiri kityo, nitubaasa kwegyera aha ky’okureeberaho ky’omufaakazi omworo ngu Yehova naareeba kandi naasiima eki turikumukorera kyona, na munonga twaba tukikoreire omu mbeera ezigumire. Teekateeka aha ku otwire nooramya Yehova emyaka ehingwire. Mbwenu shi obumwe kikaba nikikwetengyesa kwefeerereza kubaasa kumuramya? Kyaba nikwo kiri, manya ngu Yehova naasiima eki waamukoreire obwo. Waaba nooteeraho kuheereza Yehova nk’omufaakazi omworo, nooba ohikire kugira ngu ori “omu kwikiriza.”

“NYITA”

12-14. (a) Emiteekateekyere etahikire ekareetera Eliya kwehurira ata? (b) Ahabw’enki Eliya yaayehuriire nk’otaine mugasho?

¹² Nabi Eliya akaba ari omwesigwa ahari Yehova kandi aine okwikiriza kuhami. Kwonka akahitsya obunaku yaahwamu amaani yaashaba Yehova kumwita arikugira ati: “Mperere hi! mbwenu, ai MUKAMA, nyita.” (1 Bag. 19:4) Abo abatakahikwahoga mbeera nk’egyo nibabaasa kuteekateeka ngu okushaba kwa Eliya kukaba kuri ‘okurahuka kugamba.’ (Yob. 6:3) Kwonka, enyehurira ye ekaba eri ayaabuzima. Yetegyereze ngu Yehova tarafubiire Eliya ahabw’okumushaba ngu amwite kureka akamuhwera.

¹³ Niki ekyareeteire Eliya kwehurira atyo? Ekyo kitakabaireho, Eliya akaba yaakozire eky’okutangaaza ekyayorekire ngu Yehova niwe Ruhanga ow’amazima. Bwanyima y’eky’okutangaaza ekyo, baanabi 450 ba Baali bakaitwa. (1 Bag. 18:37-40) Eliya naabaasa kuba yaateekateekire ngu abantu nibaija kugaruka omu kuramya okw’amazima, kwonka ekyo tikiraabaireho. Omugabekazi mubi Yezebeeli akooherereza Eliya obutumwa arikumugira ngu akaba naatebeekanisa kumwita. Ahabw’okutiina, Eliya akaimuka yaagyenda yaahika omu ihamba rya Yuda.​—1 Bag. 19:2-4.

¹⁴ Eliya ku yaabaire ari wenka omu ihamba, akatandika kuteekateeka ngu omurimo gwe nka nabi gukaba guri ogwa busha. Akagambira Yehova ati: “Tiinyine ki ndikuhitsa baatatenkuru.” Akaba naamanyisa ngu akaba ari nk’otaine mugasho nk’omucucu nari amagufa ga baishenkuru. Nitubaasa kugira ngu akeeshwijuma kurugiirira aha mitindo ye yaacwamu ngu aremirwe kandi ngu taine mugasho aha muntu weena n’ahari Yehova.

15. Ruhanga akahamiza ata Eliya ngu n’ow’omuhendo?

¹⁵ Kwonka we Yehova akaba aine emiteekateekyere endiijo ahari Eliya. Ruhanga akaguma naatwara Eliya nk’ow’omuhendo kandi akateeraho kukimworeka. Ruhanga akoohereza maraika kuhuumuriza Eliya. Yehova akabaasisa Eliya kutunga eby’okurya n’eby’okunywa omu rugyendo orwo orw’ebiro 40 arikuza aha Rushozi Horebu. Kandi, Ruhanga akahwera Eliya kugira emiteekateekyere ehikire yaarekyera aho kuteekateeka ngu tihariho Mwisraeli n’omwe owaagumire ari omwesigwa ahari Yehova. N’ekindi, Yehova akaha Eliya obujunaanizibwa obundi kandi Eliya yaabwikiriza. Eliya akagasirwa omu buhwezi obu Yehova yaamuhaire, kandi yaagaruka aha murimo gwe nka nabi.​—1 Bag. 19:5-8, 15-19.

16. Ni miringo ki emwe ei Yehova arikubaasa kuba akuhwereiremu?

¹⁶ Eky’okureeberaho kya Eliya nikibaasa kukuhwera kweshwijuma kureeba yaaba ori omu kwikiriza kandi kikureetere kugira emiteekateekyere mirungi. Eky’okubanza, teekateeka aha ku Yehova akuhwereire. Obundi omwe aha baheereza be nk’omureeberezi nari Omukristaayo okuzire omu by’omwoyo naabaasa kuba yaakuhwereire obu waabaire nooyetenga obuhwezi. (Gal. 6:2) Mbwenu shi Baibuli, enteerane, n’ebitabo byaitu, bikuhwereire kumanya ngu Yehova naakufaho? Ku oraagarukyemu kutunga obuhwezi omu miringo egyo, ijuka ei obuhwezi bwaruga kandi osiime Yehova.​—Zab. 121:1, 2.

17. Niki eki Yehova arikutwara nka kikuru aha baheereza be?

¹⁷ Ekya kabiri, yeetegyereze ngu okugira emiteekateekyere etahikire nikibaasa kutuhabisa. Oku Ruhanga arikutureeba nikyo kikuru. (Shoma Abarooma 14:4.) Yehova eki arikutwara nka kikuru n’obwesigwa bwaitu n’okumariirira kwaitu kumuhamiraho beitu bitari ebi turikukora. Kandi noobaasa kuba oine bingi ebi okoreire Yehova nka Eliya kwonka otarikubiteekateekaho. Noobaasa kuba oine abu oteereireho eky’okureeberaho kirungi omu kibiina kandi baingi nibabaasa kuba bamanyire amazima ahabw’okugira ngu niiwe waabahwereire.

18. Yehova ku arikukuha obujunaanizibwa, ekyo nikyoreka ki?

¹⁸ Eky’aha muheru, obujunaanizibwa obu Yehova arikukuha butware nk’obuhame ngu ari naiwe. (Yer. 20:11) Nka Eliya, noobaasa kuhwamu amaani ahabw’okugira ngu ebi orikukora omu buheereza tibirikurugamu karungi nari ahabw’okugira ngu ebigyendererwa byawe tibirikuhikiirira. Kwonka nabwo, noobaasa kwejumba omu murimo ogu buri omwe ahariitwe arikubaasa kwejumbamu ogw’okubuurira amakuru marungi kandi otungye n’omugisha gw’okwetererwa eiziina rya Ruhanga. Guma ori omwesigwa. Nk’oku Yesu yaagambire, noija: ‘Kutaaha omu kushemererwa kwa mukama waawe.’​—Mat. 25:23.

“OKUSHABA KW’OMUNTU ORIKUBONABONESIBWA”

19. Omuhandiiki wa Zaaburi 102 akaba ari mu mbeera ki?

¹⁹ Omuhandiiki wa Zaaburi 102 akaba aine amaganya. Akaba ‘naabonabonesibwa,’ omu mubiri n’omu nyehurira, kandi akaba ataine maani g’okwemera oburemeezi bwe. (Zab. 102, omutwe gw’eshuura) Ebigambo bye nibyoreka ngu akaba ari omu busaasi kandi arikwehurira nk’ori wenka. (Zab. 102:3, 4, 6, 11) Akaba naateekateeka ngu Yehova naayenda kumurugaho.​—Zab. 102:10.

20. Okushaba nikubaasa kuhwera kuta omuntu oine emiteekateekyere etahikire?

²⁰ Kwonka nabwo, omuhandiiki wa zaaburi akaguma naahimbisa Yehova. (Shoma Zaaburi 102:19-21.) Nk’oku turikushoma omu Zaaburi 102, n’abo abarikuba bari omu kwikiriza nibabaasa kugira obusaasi kandi bashoberwe. Omuhandiiki wa Zaaburi akeereeba “nk’ekiteerankumba ekiteekami kyonka aha mutwe gw’enju,” orikushusha oti oburemeezi bwe nibwo bwabaire bumwetoreire bwonka. (Zab. 102:7) Waaba ori omu mbeera nk’egyo, gambira Yehova ebikuri aha mutima nk’oku omuhandiiki wa Zaaburi yaakozire. Okushaba nikubaasa kukuhwera kurwanisa ebiteekateeko ebitahikire. Yehova naaraganisa ngu “aryata omutima aha kushaba kw’enshoberwa; tarigaya kweshengyereza kwabo.” (Zab. 102:17) Yesigye ekiraganiso ekyo.

21. Omuntu oine emiteekateekyere etahikire naabaasa kukora ki kubaasa kugira emiteekateekyere mirungi?

²¹ Kandi Zaaburi 102 neeyoreka oku orikubaasa kugira emiteekateekyere ehikire. Omuhandiiki wa zaaburi akabaasa kugira emiteekateekyere nk’egyo arikuta omutima aha mukago gwe na Yehova. (Zab. 102:12, 27) Kikamuhuumuriza kumanya ngu Yehova butoosha naija kuguma naahwera abaheereza be omu bwire bw’okugyezibwa. N’ahabw’ekyo, emiteekateekyere egwire yaakuremesa kukora bingi omu kuheereza Ruhanga, mushabe kukuha obuhwezi. Yeshengyereze Ruhanga kuhurira okushaba kwawe kugira ngu obaase kutunga oburuhuuko ahabw’oburemeezi obu oine kandi ‘ngu abantu barangye eiziina rya MUKAMA.’​—Zab. 102:20, 21.

22.  Buri omwe ahariitwe naabaasa kushemeza ata Yehova?

²² Buzima, nitubaasa kukoresa Baibuli kweshwijuma kuhamya ngu turi omu kwikiriza kandi ngu Yehova naatutwara nk’ab’omuhendo. N’amazima ngu obunaku obu, titurikubaasa kwetantarira kimwe emiteekateekyere egwire n’okuhwamu amaani. Kwonka nabwo, buri omwe ahariitwe naabaasa kushemeza Yehova kandi acungurwe ahabw’okugumisiriza omu buheereza bwe.​—Mat. 24:13.