‘Buurira Hoona Ekigambo’—Orikubuurira omu Byombeko Ebyetooroirwe Engo
1. ‘Okubuurira hoona amakuru marungi’ nikitwariramu ki?
1 Nk’entumwa Paulo, ekyetengo kyaitu ‘n’okubuurira hoona amakuru marungi.’ (Byak. 20:24, NW) N’ahabw’ekyo, nituteeraho kuhitsya amakuru g’Obukama aha bantu baingi nk’oku kirikubaasika. Eki nikitwariramu abantu baingi abarikutuura omu byombeko ebihango ebyetooroirwe engo. Obumwe, nikibaasa kuguma okuhika aha bantu abarikutuura mu byombeko nk’ebyo. Kwonka obu ebyombeko nk’ebyo birikuba birimu abantu baingi, nikituha omugisha gw’okujanjaaza amakuru marungi.
2. Ahabw’enki nikyetengyesa okukoresa obwengye n’okwegyendesereza twaba nitubuurira omu byombeko ebyetooroirwe engo?
2 Ahabw’okutiina abantu ababi n’abashaarizi, amarembo g’ebyombeko ebyo nigakira kuba gakingire kandi gariho n’abarinzi nari zaakamera ezirikutangaaza aha marembo. (2 Tim. 3:1, 2) Bakama babyo nibabaasa kuba bataireho ekiragiro ekirikuzibira abantu abatarikumanywa kutaahamu. Omurinzi nari orikureeberera ekyombeko ekyo naabaasa kutushaba kuruga omu mwanya ogwo na munonga omwe aha barikupangisamu yaayetomboita. N’ahabw’ekyo, okwegyendesereza n’okworeka obwengye ni kikuru.
3. Ni bwire ki oburungi obw’okubuurira omu byombeko ebyetooroirwe engo, kandi n’ahabw’enki?
3 Obu Tushemereire Kubibuuriramu: Nk’omu bicweka ebindi, obwire burungi obw’okubuurira omu byombeko ebi n’obu abarikutuuramu barikukira kuba barimu. Abantu nibabaasa kutwerarikirira twazayo abaingi abarikubituuramu batarimu. Ababuurizi baingi babaasize kushanga abantu omu byombeko nk’ebyo omu mwabazyo hamwe n’omu ihangwe ry’Orwamukaaga na Sande. Okubuurira omu byombeko nk’ebyo kare omukasheeshe, na munonga ahari wiikenda, nikibaasa kureetera abarikubireeberera kwetomboita.
4, 5. Nitubaasa kutaaha tuta omu byombeko ebimwe ebyetooroirwe engo zikingire?
4 Okubitaahamu: Ababuurizi tibashemereire kushaba orusa abarikureeberera ebyombeko nk’ebyo nari ondiijo muntu orikutuura omu kyombeko ekyo batakagireyo kubuurira. Orwigi rw’eirembo ry’ebyombeko ebyo rwaba rukingire, kwonka hariho esimu, nitubaasa kugikoresa kusherura oraatwikirize kutaahamu tukagaaniira nawe. Kurugiirira aha ku ekyombeko ekyo kiraabe kiri, nitubaasa kubuurira orwigi aha rundi omu kyombeko ekyo bwanyima y’okugaaniira n’omuntu owaatwikiriza kutaahamu. Kwonka obumwe, nikiba kiri eky’obwengye okubanza twashohora aheeru y’ekyombeko, tukagaruka tukakoresa esimu eri aha irembo kugamba n’ondiijo muntu orikutuura omu nju endiijo omu kyombeko ekyo. Tushemereire kukoresa obwengye twaba nitucwamu omubaro gw’abantu abu turagaaniireho nabo aha izooba eryo.
5 Abarikupangisa omu byombeko nk’ebyo abamwe nikibashemeza waabagambirira aha simu y’aha irembo ekyakureeta. Kyaba kityo, yeyanjure omu iraka ry’embabazi. Koresa eiziina ry’omuntu ogwo waaba noorimanya. Omu bigufu, mugambire ekyakureeta. Abamwe babaasize kugaaniira n’abantu nk’abo barikushoma enyanjura kuruga omu katabo Reasoning.
6. Tushemereire kukora ki twaba nitubuurira omu byombeko ebiriho omurinzi?
6 Ebyombeko ebyo byaba biriho omurinzi otarikutwikiriza kubuuriramu, nitubaasa kuteeraho kuba niwe twabuurira. Abarinzi baingi nibakunda kushoma ebitabo byaitu. Nitubaasa n’okutandika kwega nawe Baibuli aho aha irembo. Omurinzi yaatwikiriza kutaayaayira omuntu oyorekire ngu naayenda kumanya ebirikukiraho, butoosha ni kirungi ngu omuntu ogwo tube niwe twataayaayira wenka.
7. N’enki eki tushemereire kuguma nitwijuka aha bikwatiraine n’enshaho ezi turikukoresa omu kubuurira?
7 Endebeeka n’Emitwarize: Okugyenda n’enshaho mpango nikituma abantu baatwerarikirira. N’ahabw’ekyo, nitubaasa kutwara enshaho eringaniire. Abamwe nibatwara ebitabo ebi barikuza kugaba omu kashaho kakye kandi Baibuli yaabo bagita omu nshaho y’ebijwaro byabo.
8. Abarikuza kubuurira bashemereire kutebeekanisibwa bata baaba nibabuurira omu byombeko ebyetooroirwe engo?
8 Ti kirungi kwerundanira ahu emotoka zirikwemerezibwa, aha nguuto nari omu bikuubo by’enju ahakuba eki nikituma baingi batwerarikirira. Tushemereire kwegyendesereza munonga twaba nitubuurira omu byombeko ebiri omu myanya erimu abainazi baingi. (Enf. 22:3) Nk’eky’okureeberaho, ababuurizi nka bana nari mukaaga nibabaasa kubuurira aha miryango ehereraine ahu barikubaasa kuhurizana, baihaihane omu kwiguza aha nyigi obwe abandi bategyereize.
9. Nitubaasa kworeka tuta ngu nitufayo aha bandi, kandi ahabw’enki ni kikuru?
9 Waaba nooza kutaaha omu kyombeko nk’ekyo, boneza enkaito zaawe kandi ahonaaho waaheza kutaahamu, kiinga orwigi rw’eirembo. Ku turikworeka okufayo nk’okwo, abarikupangisamu tibarikwija kwetomboita. Twaheza kutaahamu, omu mwanya gw’okwemerera aho, tutandikireho kubuurira. Eki tikirikwija kureetera abarikutureeba kutwerarikirira.
10. Nitubaasa kwetantara tuta okuyomberera abantu twaba nitubuurira omu byombeko?
10 Omu byombeko nk’ebyo ebirikukira obwingi obwako nibugyenda munonga. N’ahabw’ekyo, otakaagamba munonga okayomberera abandi. Na waaba noogamba n’ababuurizi bangyenzi baawe, gambira omu iraka ry’ahansi. Okwenda kutateganisa abarikupangisamu, ababuurizi abamwe nibatandikira aha rubaju rumwe rw’ekyombeko abandi nabo batandikira aha rundi. Kandi ekindi, okwiguza aha rwigi orikukongoota munonga nikibaasa kutiinisa abari omu nda.
11. Ni buhabuzi ki oburikubaasa kukora twaiguza aha rwigi oruriho akahengyere ak’okureeberamu?
11 Orwigi rwaba ruriho akahengyere k’okureeberamu, iwe n’ou orikubuurira nawe mwemerere ahu ori omunda arikubaasa kubareeba gye. Reebera omu kahengyere ako, kandi waareeba ngu hariho oriyo naakureeba, muramutsye n’embabazi reero otandikye n’enyanjura yaawe. Omuntu ogwo yaabuuza ati, ‘Ori oha?’ noobaasa kumugambira eiziina ryawe n’ery’ogwo ou ori nawe. Ekyo nikibaasa kuhiga ou orikwiguza kwiguraho. Kwonka yaaba ataigwireho, nabwe gamba ekyakureeta.
12. Nitubaasa kwetantara tuta oburemeezi twaba nitutsiga ebitabo ahu tutashanga bantu?
12 Ahu Tutaashanga Bantu: Abarikuboneza ebyombeko omu myanya nk’egyo nibakira kwetomboita ngu nibashanga obutabo n’obupapura ahansi omu kyombeko. Kyorobi ebitabo nari obupapura ebi turikutsiga aheeru aha rwigi kutwarwa omuyaga bikagwa ahansi. N’ahabw’ekyo, ebitabo byona ebi turatsige aha nyigi ahu tutaashanga bantu tushemereire kubishonshoreka ahansi y’orwigi.
13. Tushemereire kukora ki ou turikuza kubuurira yaaba atatwakiire?
13 Abatarikutushemerererwa: Twashanga omuntu otatushemerererwa kandi akenda kweta orikuboneza omwanya ogwo, nikiba kiri kirungi kugyenda tukagaruka obundi bwire. Obundi, nikiba kiri eky’obwengye kureka kubuurira omu kyombeko okwetantara kutongana n’orikureeberera ekyombeko ekyo. N’obu omuntu ogwo yaakuba atagizire ngu tutarigarukayo kumubuurira, nikiba kiri kirungi okwijuka omuryango ogwo reero tukahandiika enamba yaagwo aha kaada tukooreka ngu taratuhurikiize. Abantu nk’abo bashemereire kugaruka kutaayaayirwa okureeba eki barikuteekateeka.
14, 15. N’enki eki tushemereire kukora orikureeberera ekyombeko yaatushaba kukirugamu?
14 Waashabwa Kuruga omu Mwanya Ogwo: Waaba noobuurira omu kyombeko okashabwa orikukoramu, omurinzi nari ondiijo muntu okukirugamu, ni kirungi okugyenda ahonaaho. Kyaba nikibaasika, nitwenda kwetantara entongane ezirikubaasa kutuhitsya aha kutwarwa omu b’obushoboorozi nari omu puriisi. Obwire obwingi, abarikurinda ebyombeko nk’ebyo tikugira ngu nibaba nibanga Abajurizi ba Yehova kureka nibaba nibakora omurimo gwabo kwonka.
15 Obumwe, omwe aha barikureeberera ekyombeko yaakushaba ngu ogyende, noobaasa kumushoboororera omu bucureezi kandi omu bwengye enshonga ahabw’enki waija. (1 Pet. 3:15) Nitumanya obujunaanizibwa bwe bw’okurinda ekyombeko n’abarikutuuramu. Obundi naabaasa kukwikiriza kubuurira omu kyombeko ekyo. Kwonka kyaba kitabaire kityo, n’obucureezi, gyenda orugyemu. Kyaba nikibaasika, noobaasa kushaba orusa kuguma noobareetera ebitabo. (Kol. 4:6) Omureeberezi orikukora aha by’obuheereza ashemereire kuguma naamanyisibwa ebintu nk’ebyo.
16. N’enki eki tushemereire kukora twaguma nituzibirwa kubuurira omu kyombeko ekyetooroirwe orugo?
16 Bwanyima y’obwire, omu bwengye ababuurizi nibabaasa kuteeraho kubuurira omu kyombeko ekyo. Kwonka, twaguma nituzibirwa kubuurira omu byombeko ebyetooroirwe engo, abareeberezi bashemereire kusherura obuhwezi kuruga aha ofiisi y’eitaagi omu mwanya gw’ababuurizi bo okuteeraho kweshoboororera enshonga ezo. Ababuurizi baaremwa kubuurira omu kyombeko ekyo, nibabaasa kuteeraho kubuurira abarikukituuramu kurabira omu mihanda endiijo, nk’okukoresa esimu nari kuhandiika amabaruha. Ababuurizi abamwe nibabuurira aha nguuto eziri haihi n’ekyombeko ekyo nari haihi nakyo, omukasheeshe n’omu mwabazyo obu abantu barikuba nibaza kukora nari nibagaruka omuka.
17. Ahabw’enki okubuurira omu byombeko ebyetooroirwe engo kiri kikuru?
17 Omuheru gw’obusingye obu obubi guri haihi kuhika. Abo bonka abarikutakira eiziina rya Yehova nibaija kujunwa. “Mbwenu shi, abantu baryatakira bata, ou batakaikiriize? kandi baryaikiriza bata ou batakahuriraga? kandi baryahurira bata ahatari mubuurizi?” (Rom. 10:13, 14) Baingi ‘abaine ekyetengo ky’okutunga amagara agatahwaho’ nibatuura omu byombeko nk’ebyo. (Byak. 13:48, NW) Omu kukoresa obwengye n’okucwamu gye, nitubaasa kubahitsyaho amakuru marungi.