Oruteerane Oruhango orw’Abajurizi ba Yehova Orwa 2009
1. (a) Ni birungi ki ebi turikwija kutunga twaba omu ruteerane oruhango orw’ebiro bishatu? (b) Ni ntebeekanisa ki ezi tushemereire kukora hati?
1 Twena twine ekihika ky’okuba omu Ruteerane Oruhanga orw’Ebiro Bishatu orwa 2009 n’okuba hamwe n’abaramya ba Yehova ‘abarikufayo aha kyetengo kyabo eky’eby’omwoyo.’ (Mat. 5:3) Nk’oku ekiro kya Yehova kiriyo nikiirira haihi, nituhiga buri omwe kuba omu ruteerane oru ebiro byona bishatu kubaasa kugasirwa omu kuba hamwe n’Abakristaayo bagyenzi baitu n’okugarurwamu amaani omu by’omwoyo kubaasa kuguma tuhamire omu kwikiriza. (Zef. 1:14) Manyisa abashomesa nari ou orikukorera ku oruteerane oruhango oru ruri ekicweka kikuru omu kuramya kwanyu. Kora entebeekanisa kare kandi shaba Yehova kukuhwera; gira obwesigye ngu naza kukuhwera.—Isa. 50:10.
2. Nitubaasa kugira kihika ki n’obu turaabe tuteesirwe kuza omu nteerane empango ez’ensi yoona?
2 Enteerane Empango ez’Ensi Yoona: Obu enteerane empango ezi zirikwija kuba omu mahanga makye n’omu tauni zimwe, abo bonka abaikiriziibwe nibo bashemereire kuzizamu. Omu ntebeekanisa egi twakwatanisa titurikwija kureetaho omwijuro. (1 Kor. 14:40; Heb. 13:17) Kwonka, enteerane ez’ebiro bishatu niziija kuba zirimu ebirungi nk’ebiraabe omu nteerane ez’ensi yoona, obu abamiisani, ababeseeri abarikuheereza omu mahanga gatari g’owaabo hamwe n’abaheereza abandi barikwija kuza omu nteerane ezi omu mahanga g’owaabo.
3. Nitubaasa kworeka tuta rukundo y’Ekikristaayo ahari bamwe omu kibiina kyaitu?
3 Hwera Abandi Okurwijamu: Omu kibiina kyanyu hariho abarikwetenga obuhwezi kubaasa kuba omu ruteerane orw’ebiro bishatu? Ku orikuhwera abandi kurwijamu, nooba ‘otarikweta aha byawe wenka, kureka n’aha by’abandi.’—Fil. 2:4.
4, 5. N’enki eki oshemereire kukora waaba nooyenda kumanya ebirikukwata aha buraaro omu ruteerane orutari oru ekibiina kyanyu kirikwija kuzamu?
4 Okutunga Ebirikurukwataho: Okubaasa kutuubya aha masimu agarikuteerwa aha ofiisi y’eitaagi aha bikwatiraine n’ebiro hamwe n’emyanya y’enteerane empango, mureebe ebiri omu The Watchtower eya Maaci 1, 2009, Obuheereza Bwaitu obw’Obukama aka Febwari 2009 nari mubuuze omuhandiiki w’ekibiina kyanyu kubaasa kutunga ebi murikwenda kumanya.
5 Ku oraabe noija kuza omu ruteerane orutari oru ekibiina kyanyu kiraije kuzamu, noobaasa kumanya ebirikukwata aha buraaro orikuhandikira ab’aha ofiisi abarikukora aha by’oburaaro aha nteerane empango orikukoresa endagiriro eri enyima ahari foomu erikwetwa Special Needs Room Request. Zaafoomu ezi niziza kwohererezibwa abahandiiki b’ebibiina. Okubaasa kugarukwamu, hamya ngu ebaruha eriho n’endagiriro yaawe hamwe na sitampu.
6. N’enki ekishemereire kukorwa, omubuurizi ahabw’embeera ze yaayetenga obuhwezi aha bikwatiraine n’oburaaro?
6 Ebyetengo eby’Omutaano: Omubuurizi yaashaba kuhwerwa kutunga oburaaro, Akakiiko k’Obuheereza ak’Ekibiina kashemereire kucwamu yaaba omubuurizi ogwo ahikire kwijuza foomu erikwetwa Special Needs Room Request. Omuhandiiki w’ekibiina atakooherereize foomu egyo abarikukora aha by’Oburaaro aha ruteerane oruhango, ashemereire kubanza yaashoma obuhabuzi oburi ahari foomu egyo hamwe n’oburi omu baruha erikwohererezibwa obukiiko bw’abareeberezi bwona eya Desemba 14, 2008.
7. Nitubaasa kukora ki okubaasa kutunga oburaaro omu hoteeri?
7 Okukwata Oburaaro omu Hoteeri: Waaba nooyenda ngu abarikukora aha by’Oburaaro bakuhwere kutunga hoteeri nungi, bahandiikire hakirikuburayo obwire. Yoreka empiiha ezi oyeteekateekire kushashura buri izooba, ebiro ebi oraamaremu kandi oyorekye yaaba nooyenda kuriirayo kyamushana, kyakiro na kyantsya, yaaba nooyenda n’ekitanda nari oburaaro bwonka.
8. Nitubaasa kukwatanisa tuta n’Abarikukora aha by’Oburaaro?
8 Nyabura ‘we, otakaakwatisa ebishengye ebi otarikuza kukoresa nari aha shaaha y’aha muheru kuhindura okaza kuraara omu hoteeri endiijo. Waagyendera aha ntebeekanisa egi noija kuhwera buri omwe kutunga oburaaro aha mpiiha nungi.—1 Kor. 10:24.
9. N’enki eki tushemereire kutaho omutima twaba nitwetebeekanisa kuza omu ruteerane orw’ebiro bishatu orwa 2009 na ku turaabe tururimu?
9 Ebikorwa Ebirikuhimbisisa Ruhanga: Twayoreka ebyana by’omwoyo omu bi turikukora byona, tukafayo aha migambire n’oku turikutwariza abarikukora omu hoteeri n’abari omu tauni ahu enteerane ezi zirikuba, nitwongyera kusiimisa abantu ba Yehova kandi nitwetantara kuteeza abandi entsibo. (1 Kor. 10:31; 2 Kor. 6:3, 4) Emitwarize yaawe n’okuba omu ruteerane orwo ka bihimbisise Ruhanga omu miringo nk’egyo aha ruteerane rw’ebiro bishatu orwa 2009!—1 Pet. 2:12.
[Akabokisi aha rupapura 5]
Eshaaha za Puroguramu:
Orwakana (Enteerane Empango ez’Ensi Yoona Zonka)
7:20 ez’eihangwe. - 10:55 ez’omwabazyo.
Orwakataano n’Orwamukaaga
3:20 ez’akasheeshe - 10:55 ez’omwabazyo.
Sande
3:20 ez’akasheeshe - 10:00 ez’omwabazyo.