Noija Kugarukamu Ota?
1. Ahabw’enki tushemereire kutooreza eky’okureeberaho kya Yesu baagira eki baatubuuza?
1 Okuhitsya na hati, abantu nibatangarira omuringo murungi ogu Yesu yaabaire agarukamu abantu baagira eki baamubuuza. Twabuuzibwa ebibuuzo bitari bimwe na bimwe turikubuurira, ni kirungi kutooreza omuringo ogu Yesu yaabaire agarukamu abantu.—1 Pet. 2:21.
2. Niki ekirikubaasa kutuhwera kugarukamu ekibuuzo omu muringo guhikire?
2 Banza Ohurikize: Yesu akaba afayo kumanya ahabw’enki omuntu yaabuuza. Obumwe ekyo nikyetengyesa okubuuza omuntu ebibuuzo okumanya ekigyendererwa ky’ekibuuzo kye. Omuntu orikukubuuza ngu, “Noikiririza omuri Yesu?” naabaasa kuba naayebuuza ahabw’enki otarikukuza Noiri. Waamanya ekyareetera omuntu kubuuza, noobaasa kumugarukamu omu muringo oguhikire.—Luk. 10:25-37.
3. Twine ki ebirikubaasa kutuhwera kutunga eby’okugarukamu abo abarikutubuuza?
3 Garukamu Orikukoresa Ekigambo kya Ruhanga: Butoosha nikiba kiri kirungi kworeka omuntu oku Baibuli erikugarukamu ekibuuzo eki yaabuuza. (2 Tim. 3:16, 17; Heb. 4:12) Akatabo Reasoning hamwe n’ekicweka “Enshonga za Baibuli ezirikushoboororwaho” ekiri omu New World Translation of the Holy Scriptures bihweraire munonga omu kugarukamu gye ebibuuzo. N’obu owaabuuza yaakuba atarikwikiririza mu Baibuli, omu bwengye noobaasa kugaaniira nawe aha ki Ebyahandiikirwe birikwegyesa. Muhige kushwijuma obwengye oburikwesigwa oburikushangwa omuri Baibuli. Waatooreza Yesu, ebi orikugarukamu abaakubuuza nibiija kuba “nk’amapeera g’ezaabu agari omu kiibo ky’efeeza”—biri birungi kandi eby’omugasho.—Enf. 25:11.
4. Ni ryari obu kirikuba kitarikwetengyesa kugarukamu buri kibuuzo?
4 Twine Kugarukamu Buri Kibuuzo? Waaba otarikumanya eky’okugarukamu ky’eki baakubuuza, otatiina ngu noija kuhemuka waagira oti: “Tindikumanya, kwonka nimbaasa kucoondoza nyije nkugarukyemu.” Obucureezi nk’obwo n’okufayo aha muntu nk’okwo nikubaasa kuhiga ou orikubuurira kukushaba ngu ogarukye ogundi murundi. Waayetegyereza ngu owaakubuuza naayenda kuhakana kwonka, tooreza Yesu orikugarukamu bikye. (Luk. 20:1-8) Nikyo kimwe, omuntu otarikwenda kumanya amazima yaayenda kureetaho empaka, omu bucureezi noobaasa kurekyeraho kugaaniira nawe reero osherure abarikwenda kumanya amazima.—Mat. 7:6.
5. Yesu akataho ky’okureeberaho ki omu kugarukamu ebibuuzo?
5 Yesu akaba naamanya ngu okwesiga Yehova kikaba kiri kikuru omu kuhikiiriza omurimo gwe ‘ogw’okuhamya amazima’ ogwabaire nigutwariramu n’okugarukamu ebibuuzo by’abantu abacureezi. (Yoh. 18:37) Ka twine omugisha gw’okutooreza Yesu omu kugarukamu abo boona ‘abaine ekyetengo ky’okutunga amagara agatahwaho’!—Byak. 13:48, NW.