‘Eiziina rya Ruhanga Ryezibwe’
1. Omutwe gw’oruteerane rw’ekyanga orw’omwaka gw’obuheereza 2012 niguuha, kandi gwihirwe nkahi?
1 Ka twine omugisha kwetererwa eiziina ry’Omutegyeki wa Byona, Yehova! Niwe yaatuhaire eiziina rye kuryetererwa, na munonga kuruga omu mwaka 1931, tutwire nitwetwa Abajurizi ba Yehova. (Isa. 43:10) Omwana wa Ruhanga omwe nyamunegyere, Yesu, akatwara eiziina rya Ruhanga nk’ery’omuhendo arikurita omu mwanya gw’okubanza omu shaara ei yaayegyeise abakuratsi be. (Mat. 6:9) Ebigambo bya Yesu nibyo birugirwemu omutwe gw’oruteerane rw’ekyanga orw’omwaka gw’obuheereza 2012. Omutwe ogwo ni: ‘Eiziina rya Ruhanga Ryezibwe.’
2. Twine ekihika kuhurikiza ki omu ruteerane rw’ekyanga?
2 Embazo Ezi Turaahurire: Aha Rwamukaaga, orubazo orwine omutwe “Mumanyise Eiziina rya Ruhanga nk’Abaheereza b’Obwire Bwona” nirwija kushoboorora ahabw’enki obuheereza bw’obwire bwona nibureeta okumarwa. Nitwija kuhurikiza omutwe ogurimu ebicweka ogurikugira ngu “Manya Ebirikubaasa Kukureetera Kujumisa Eiziina rya Yehova,” oguraije kutuhwera kwetantara kugwa omu mitego ena. Niki ekiraatuhwere kubuurira n’obweziriki n’obu abantu baakuba batarikukunda gye mazima? Niki ekiraatuhwere kubuurira gye? Ebibuuzo ebi nibiija kugarukwamu omu rubazo “Ahabw’enki Eiziina rya Ruhanga Rishemereire Kwezibwa.” Aha Sande nitwija kuhurikiza omutwe ogurimu ebicweka bina ebirikukwata aha ku turikubaasa kweza eiziina rya Ruhanga omu miteekateekyere yaitu, emigambire, ebi turikucwamu, n’emitwarize. Abasya nibaija kushemererwa kuhurikiza orubazo rw’abantu boona orwine omutwe, “Yehova Naija Kweza Eiziina Rye Erikuru Ahari Haramagedoni.”
3. Twine mugisha ki, kandi oruteerane rw’ekyanga nirwija kutuhwera kukora ki?
3 Juba Yehova naija kugira eki yaakora kweza eiziina rye. (Ezk. 36:23) Ekyo kitakabaireho, omu buheereza bwaitu n’omu bikorwa, twine omugisha gw’okworeka ngu nitushagika ebirikukwata aha iziina rya Yehova eririkwera. Twine amatsiko ngu oruteerane rw’ekyanga oru nirwija kuhwera buri omwe ahariitwe kuhikiiriza obujunaanizibwa obu twine ahabw’okwetererwa eiziina rya Ruhanga.