Akabokisi k’Ebibuuzo

◼ N’oha oshemereire kwijuza endagiriro z’okushaba ebitabo?

Ebitabo byaitu nibiba biriho endagiriro ezi abantu barikubaasa kwijuza reero bakazohereza aha ofiisi y’eitaagi kushaba ebitabo nari kushaba ngu Abajurizi ba Yehova babataayaayire. Kandi n’omukura gwaitu gw’aha Intaneeti ogwa www.watchtower.org nigubaasa kukoresibwa kushaba kwegyesibwa Baibuli. Entebeekanisa ezi nizihwera baingi kwega amazima. Kwonka habaireho oburemeezi ahabw’ababuurizi kukoresa endagiriro ezo kushabira abanyabuzaare baabo nari abandi ebitabo nari kukora entebeekanisa ngu bahwerwe omu by’omwoyo.

Bamwe abu ofiisi y’eitaagi eyoherereize ebitabo batabishabire betomboitsire, barikuteekateeka ngu ekibiina kyaitu nikibateganisa kirikuboherereza ebitabo batabishabire. Ababuurizi abashabirwe kutaayaayira abantu nk’abo abatareeshabiire kutaayaayirwa beeshangire barikuhemuka, omuntu ou bataayaayiire yaabagambira kubi. N’ahabw’ekyo abarikwenda kumanya amazima nibo bashemereire kweshabira ebitabo kurabira aha Intaneeti nari barikukoresa endagiriro eziri aha bitabo, beitu batari ababuurizi kubishabira abandi. Ofiisi y’eitaagi yaamanya ngu omubuurizi niwe ashabiire abandi ebitabo, terikwija kubyohereza.

Mbwenu shi nitubaasa kuhwera tuta omunyabuzaare nari omunywani omu by’omwoyo? Waaba nooyenda ngu atungye ebitabo noobaasa kubimwoherereza nk’ekiconco. Yaaba ayorekire ngu naayenda kumanya amazima kandi ngu naayenda ngu Abajurizi ba Yehova bamutaayaayire kwonka otarikumanya oku orikubaasa kumanyisa abareeberezi b’ekibiina eky’omu kicweka eki arimu, ijuza foomu Please Follow Up (S-43) ogihe omuhandiiki w’ekibiina kyanyu naija kugyohereza aha ofiisi y’eitaagi. Kwonka omuntu nk’ogwo yaaba ari omu kihome nari omu irwariro, toshemereire kuba niiwe waamanyisa ofiisi y’eitaagi ngu bamutaayaayire. Kwonka noobaasa kumuhiga kumanyisa ababuurizi abarikubuurira omu mwanya ogwo nari we kweshabira ofiisi y’eitaagi ngu bamutaayaayire.