Akabokisi k’Ebibuuzo

◼ Ababuurizi nibabaasa kukoresa Intaneeti kubuurira nari kwegyesa Baibuli abantu abarikutuura omu ihanga erindi?

Ababuurizi abamwe bakoreise Intaneeti kutunga abeegi ba Baibuli omu mahanga ahu omurimo gwaitu gurikuzibirwa nari ahu ababuurizi bari bakye. Obumwe, harugiremu ebirungi. Kwonka, ababuurizi nibatunga oburemeezi ku barikwohereza obutumwa nari ku barikugaaniira n’abantu abu batarikumanya barikukoresa Intaneeti. (Reeba Our Kingdom Ministry aka Gyuraayi 2007, rup. 3.) N’obu Intaneeti eraabe neekoresibwa kuhika aha barikwenda kwega amazima, omuringo ogu nigubaasa kureetera ow’eishe-emwe nari munyaanyazi-itwe kugaaniira n’abantu abaine emitwarize mibi, otwariremu n’abaayehagwire aha mazima. (1 Kor. 1:19-25; Kol. 2:8) Ekindi, omu mahanga ahu omurimo gw’Obukama gurikuzibirwa nari gwemereziibwe, ab’obushoboorozi nibabaasa kureeba obutumwa obu turikwohereza. Ekyo nikibaasa kureetera ab’eishe-emwe na banyaanyazi-itwe abariyo oburemeezi. N’ahabw’ekyo, ababuurizi tibashemereire kukoresa Intaneeti kusherura abantu b’okwegyesa amakuru marungi omu ihanga erindi.

Twabuurira omuntu orikuruga omu ihanga erindi kitaraariire, nitubaasa kumworeka oku arikubaasa kukoresa Jw.org yaaba naayenda kumanya ebirikukiraho nari oku arikubaasa kumanyisa ofiisi y’eitaagi ey’omu ihanga eri arikurugamu. Titushemereire kuhwera omuntu ogwo kwongyera kumanya ebirikukiraho yaaba yagarukireyo, okwihaho haaba hariho obuhabuzi obutuhairwe kuruga aha ofiisi y’eitaagi. Kwonka nitubaasa kumuhiga kutaayaayira Ekyombeko ky’Obukama ekiri haihi n’ahu arikutuura. Obumwe omu mahanga agamwe nihaba hatariyo Byombeko by’Obukama. Yaaba naayenda ngu Abajurizi ba Yehova abari omu kicweka kye bamutaayaayiire, twine kwijuza foomu erikwetwa Please Follow Up, reero tukagiha omuhandiiki w’ekibiina oraagyoheereze arikukoresa jw.org. Ofiisi y’eitaagi erikureeberera omurimo gw’okubuurira omu ihanga ahu omuntu ogwo arikutuura neeyetegyereza gye embeera eziriyo kandi neija kumuhwera omu by’omwoyo.​—Reeba Obuheereza Bwaitu obw’Obukama aka Gyuni 2014, rup. 7, na Obuheereza Bwaitu obw’Obukama aka Novemba 2011, rup. 2.

Twaba twine omuntu ou turikuteeraho kutandika kwegyesa Baibuli nari ou turikwegyesa Baibuli ori omu ihanga erindi, ou twamanyire aha Intaneeti, twine kugyendera aha buhabuzi obwaheebwa aharuguru. Kwonka, nitubaasa kugumizamu nitumuhwera kuhitsya obu turaatungye omubuurizi ori omu kicweka kye orikubaasa kugumizamu nawe. Kwonka, yaaba naatuura omu ihanga ahu omurimo gwaitu gw’okubuurira gurikuzibirwa nari gwemereziibwe, twine kukoresa obwengye twaba nitugaaniira aha biri omu Baibuli turikukoresa ebaruha, esimu, nari Intaneeti.​—Mat. 10:16.