Mubahikyeho Ahonaaho

Kuruga obu Omukura gwaitu omusya gwatandika kukoresibwa, abantu abarikushaba kwegyesibwa Baibuli aha mukura beyongyeire munonga. Okubuurira omu myanya erimu abantu baingi nakwo kwongyeire aha mubaro gw’abantu abarikushaba kwegyesibwa Baibuli. Ofiisi y’eitaagi neegarukamu okushaba kwabo ahonaaho. Nk’eky’okureeberaho, omuntu yaashaba kwegyesibwa Baibuli arikukoresa jw.org, abareeberezi abari omu kicweka kye nibatunga okumanyisibwa kuruga aha ofiisi y’eitaagi bwanyima y’ebiro bibiri byonka. Kwonka kishangirwe ngu bamwe abarikushaba kwegyesibwa Baibuli nibamara obwire buraingwa hataine waabahikireho. Mbwenu shi nitubaasa kukora ki kureeba ngu abantu nk’abo baahikwaho ahonaaho bakiine ekihika ky’okwenda kumanya ebirikukiraho?​—Mak. 4:14, 15.

Omuntu yaayoreka ngu naayenda kumanya ebirikukiraho kwonka atarikutuura omu kicweka eki orimu, ahonaaho ijuza foomu erikwetwa Please Follow Up (S-43) reero ogiihe omuhandiiki w’ekibiina aha ruteerane rwanyu oruraakurateho. Omuhandiiki w’ekibiina ashemereire kwohereza foomu egyo ekibiina ekirikubaasa kumuhwera nari ofiisi y’eitaagi kurabira aha jw.org obutarenzya eizooba rimwe nari abiri. N’ahabw’ekyo abareeberezi bashemereire kuguma nibaza aha Mukura butoosha. Abareeberezi baamanyisibwa ngu hariho omuntu orikwenda kwegyesibwa Baibuli, bashemereire kumuhikaho ahonaaho. Omubuurizi weena oraashabwe kusherura orikwenda kwega Baibuli aine kurahuka kukikora. Omuntu ogwo waashanga atariyo, noobaasa kutsigaho endagiriro yaawe.