Okubuurira Turikukoresa Emeeza Nari Akagaari

Kireebekire ngu okubuurira turikukoresa emeeza nari akagaari nikihwera abacureezi kwega amazima. (Yoh. 6:44) N’ahabw’ekyo, abareeberezi nibahigwa kutebeekanisa kukoresa omuringo gw’okubuurira ogu, omu kicweka ky’ekibiina eky’okubuuriramu omu myanya erikurabwamu abantu baingi. Obu emeeza nari akagaari bitarikuteebwa mu mwanya gumwe kugumamu, obumwe nikiba kitarikwetengyesa kubanza kushaba orusa ab’obushoboorozi. Ni baahi abahikire kwejumba omu muringo gw’okubuurira ogu? Ababuurizi abarikubaasa kukoresa okwetegyereza, bakatwaza omu muringo ogurikuhaisa ekitiinisa, kandi abarikumanya kugaaniira gye n’abantu. Ebiri ahaifo n’ebi ababuurizi barikubaasa kukora hamwe n’ebi batashemereire kukora.

Eby’Okukora:

Yoreka ngu nookunda abantu, obaakiire kandi obahwere. Ababuurizi abamwe nibamwenyera abantu baihire aha mutima kandi baabaramutsya omu muringo murungi. Omuntu yaareeba aha meeza nari aha kagaari, noobaasa kumugira oti: “Noobaasa kutwara eki orikwenda.”
Yemerera hangahari n’akagaari nari emeeza, aharikukubaasisa kwakiira abantu. Omu myanya emwe ababuurizi bashangire nikikora gye bayemerera hangahari n’akagaari nari emeeza. Ababuurizi abandi bashangire ngu abantu obumwe nibatiina kwemerera, n’ahabw’ekyo nibeemerera hareho n’akagaari nari emeeza kandi baategyereza omuntu kuhikaho. Omuntu yaahika aha meeza nari aha kagaari, teeraho kugaaniira nawe, noobaasa kumubuuza oti: “Orateekateekire aha kibuuzo eki?”
Teeraho kuguma nookoresa Baibuli kyaba nikibaasika.
Buri omwe oraatware akatabo aku turikukoresa omu kwegyesa abantu Baibuli nka Niki eki Baibuli Erikwegyesa, mushoboororere entebeekanisa y’okwegyesa abantu Baibuli. Noobaasa kumushaba kumworeka vidiyo Ahabw’enki Oshemereire kwega Baibuli? orikukoresa esimu nari ekindi kyona.
Orikwenda kumanya ebirikukiraho noobaasa kumushaba endagiriro ye. Omuntu yaaba atarikutuura omu kicweka kyanyu, ijuza foomu erikwetwa Please Follow Up (S-43), reero ogihe omuhandiiki w’ekibiina ahonaaho kyaba nikibaasika.