Akabokisi K’ebibuuzo

◼ Ni Ryari obu turikubaasa kurekyeraho kwegyesa omwegi wa Baibuli?

Omwegi wa Baibuli yaaba atarikutunguuka omu by’omwoyo, noobaasa kukoresa obwengye kurekyeraho kumwegyesa. (Mat. 10:11) Teekateeka ahari ebi: Naaba ariho mwaba muragaine kwega? Mwaba nimuza kwega naaba atebeekaniise? Yaataireho kwija omu nteerane z’ekibiina ezimwe? Naagaaniira n’abandi aha bi arikwega? Naakora empindahinduka ezirikuhikaana n’emisingye ya Baibuli? Kwonka oine kuteekateeka aha myaka ye n’ebi arikubaasa, orikumanya ngu abantu tibarikutunguukira aha rurengo rumwe. Kandi waarekyeraho kumwegyesa Baibuli, noobaasa kumumanyisa ngu omu biro by’omumaisho yaaba naayenda, naabaasa kugaruka kwega.​—1 Tim. 2:4.