Ekyanda ky’Amaani—Baibuli Neegamba Ki?

“China niyo ‘ekizireyo’ kugira obutagatsi bw’amaani kandi eya kashatu omu kwoma munonga.”—The Guardian, Seputemba 7, 2022.
“Ebicweka bimwe omuri Africa kumara emyaka etaano ekurataine nibiija kugumizamu nibiteerwa ekyanda.”—Amakuru ga UN, Agusto 26, 2022.
“Omwanya ogurengire kimwe kya kabiri kya Europe guri omu kabi k’okuteerwa ekyanda, kandi nikibaasa kukirayo kuba eky’akabi omu myaka 500.”—Amakuru ga BBC, Agusto 23, 2022.

Abahangu baingi nibateebereza ngu ebyanda nk’ebi nibiija kugumizamu nibibaho nangwa n’okukiraho. Hariho amatsiko g’ebiro by’omumaisho? Baibuli neegamba ki?

Ekyanda n’Obunabi bwa Baibuli

Baibuli ekagamba kare aha bwire bwaitu:

‘Nihaija kubaho enjara omu myanya mingi.’—Luka 21:11.

Ekyanda nikikira kureetaho eibura ry’eby’okurya. Eibura ry’eby’okurya, n’ebirikurugamu nk’okubonabona n’okufa, nibihikiiriza obunabi bwa Baibuli.—Okushuuruurwa 6:6, 8.

Ekirikureetera ebyanda kweyongyera

Baibuli neeha enshonga nkuru ahabw’enki ebyanda nibyeyongyera amaani. Neegira eti:

‘Omuntu weena orikugyenda tarikubaasa kwehabura mu rugyendo rwe.’—Yeremia 10:23.

Eki nikimanyisa ngu abantu tibarikubaasa kuba abasinguzi omu ‘kuhabura’ entambwe zaabo, nari kwetegyeka. Enkoresa mbi yaabo ey’obuhangwa niyo erikukira kureetaho ebyanda n’eibura ry’amaizi.

Abanyasaayansi nibaikiriza ngu ebikorwa by’abantu nibyo bireetsireho obutagatsi bw’amaani omu nsi yoona, kikarugamu ebyanda omu nsi yoona.
Omururu n’obutaranzya hare kirugiremu okutema ebibira, okurofahaza ensi, n’okukoresa kubi obuhangwa, eki kyashiisha obukomooko bw’amaizi.

Kwonka Baibuli neeha amatsiko.

Hariho amatsiko ga nyentsya?

Baibuli neeraganisa ngu Ruhanga naija kugonjoora oburemeezi bw’amaizi. Mu muringo ki?

1. Ruhanga naija ‘kucwekyereza’ abarikushiisha ensi. (Okushuuruurwa 11:18) Naija kwihaho oburemeezi bumwe oburikureeta eibura ry’amaizi, nibo abantu babi abaine omururu abu ebikorwa byabo birikushiisha ensi.—2 Timoseo 3:1, 2.
2. ‘Ensi ekarangataine neija kuhinduka ey’enshuro z’amaizi.’ (Isaaya 35:1, 6, 7) Ruhanga naija kwihaho akabi akareetsirweho ekyanda, reero ahindure ensi ebe paradiso.
3. Noija kureeberera ‘ensi, kandi ogigwisize enjura, ngu ogihindure erikweza munonga.’ (Zaaburi 65:9) Ahabw’emigisha ya Ruhanga, ensi neija kwijura eby’okurya birungi, n’amaizi marungi.