Noija Kutoorana Mwebembezi Ki?—Baibuli Neegamba Ki?

Omu saabiiti nkye ezirikwija, abantu omu mahanga maingi omu nsi yoona nibaija kuba nibateera oburuuru. Boorekyeire okucwamu kukuru aha bikwatiraine n’abeebembezi abu baraatoorane.

Baibuli neegamba ki?

Abeebembezi b’abantu baine obugarukiro

Baibuli neeyoreka obugarukiro obu abeebembezi b’abantu boona baine.

• “Mutaryesiga abanyiginya, n’obu yaakuba omuntu, [otarikubaasa kureeta okujuna] kwona. Omwitsyo ku gumuhwamu, agaruka omu itaka, eryo izooba ebiteekateeko bye bihwaho.”—Zaaburi 146:3, 4.

Nangwa n’abategyeki barungi nibahitsya obwire bafa. Kandi, nibaba bataine buhame ngu abaraabaze omu bigyere nibaija kugumizamu nibakora gye nkabo.—Omubuurizi 2:18, 19.

Amazima gari ngu, Baibuli neegira ngu abantu tibarahangirwe kwetegyeka.

• ‘Omuntu weena orikugyenda tarikubaasa kuhabura [entambwe ze].’—Yeremia 10:23.

Obwire obu shi hariho orikubaasa kuba omwebembezi murungi?

Omwebembezi otoorainwe Ruhanga

Baibuli neeshoboorora ngu Ruhanga atooraine omwebembezi oine okubaasa kw’ahaiguru, kandi omwesigwa: Yesu Kristo. (Zaaburi 2:6) Yesu niwe Mugabe w’Obukama bwa Ruhanga, gavumenti erikutegyekyera omu iguru.—Matayo 6:10.

Noija kucwamu kwikiriza obwebembezi bwa Yesu? Baibuli neeyoreka obukuru bw’okucwamu oku erikugira eti:

• ‘[Muhe Omwana Yesu Kristo ekitiinisa, Ruhanga] atabagirira ekiniga mukahwerekyererera omu muhanda, ahakuba ekiniga kye nikiija kurahuka kwaka. Boona abarikumuhungiraho baine [okushemererwa].’—Zaaburi 2:12.

Hati nibwo bwire obu oine kucwamu. Obunabi bwa Baibuli nibworeka ngu Yesu akatandika kutegyeka omuri 1914, kandi ngu juba Obukama bwa Ruhanga nibwija kuza omu mwanya gwa gavumenti z’abantu zoona.—Danieli 2:44.

Kumanya ebirikukiraho oku orikubaasa kushagika obwebembezi bwa Yesu, shoma ekicweka “Cwamu Kushagika Obukama bwa Ruhanga Hati!”