Himbisa Kristo, Omugabe ow’Ekitiinisa

1, 2. Ahabw’enki twine ekihika ky’okushwijuma ebiri omu Zaaburi 45?

OMUGABE ow’Ekitiinisa naarwanirira amazima n’okuhikiirira kandi naagumizamu kusingura abazigu be. Bwanyima y’okuheza kusingura orugamba rw’aha muheru, naagambwaho nk’orikwija kushwera omugore murungi munonga. Omugabe ogu naija kwijukwa kandi ahimbisibwe obusingye bwona. Ekyo nikyo kintu kikuru ekirikugambwaho omu Zaaburi 45.

² Ebiri omuri Zaaburi 45 nibishemeza kandi nibitukwataho. Nibitukwataho hati kandi nibikwata n’aha biro byaitu by’omumaisho. N’ahabw’ekyo, ka tushwijume ebiri omu zaaburi egi.

“OMUTIMA GWANGYE GWIJWIRE EBIGAMBO BIRUNGI NIBISHEESHEKA”

3, 4. (a) “Ebigambo birungi” ebirikutukwataho ni biiha, kandi nibitukwataho bita? (b) Ebigambo byaitu nibikwata bita aha mugabe, kandi ni mu muringo ki ogu orurimi rwaitu ruri nk’ekaraamu y’omuhandiiki orikurahutsya?

³ Shoma Zaaburi 45:1. Omuhandiiki wa zaaburi akashemezibwa “ebigambo birungi” ebirikukwata aha mugabe. Niyo nshonga ahabw’enki omutima gwe gukaba ‘gwijwire’ omujinya n’orurimi rwe ruri ‘nk’ekaraamu y’omuhandiiki orikurahutsya.’

⁴ Kandi shi itwe? Amakuru marungi agarikukwata aha Bukama bwa Mesia buzima n’ebigambo birungi. Amakuru g’Obukama okukira munonga gakaba marungi omuri 1914. Kuruga obwo, amakuru ago tigarikukwata aha Bukama oburikwija kuteebwaho omu biro by’omumaisho kureka nigakwata aha Bukama oburiyo nibutegyeka omu iguru. Aga nigo makuru marungi ag’Obukama agu turikubuurira omu nsi yoona okuba eky’okuhamya aha mahanga goona. (Mat. 24:14) Mbwenu shi amakuru g’Obukama aga nigakureetera kushemererwa? Noobuurira amakuru marungi g’Obukama oine omujinya? Nk’omuhandiiki wa zaaburi, ebigambo byaitu ‘ebihimbiirwe omugabe’ nibikwata ahari Yesu Kristo. Nitumubuuriraho nk’oyemekirwe kuba Omugabe w’Obukama bwa Ruhanga. Kandi abategyeki b’ensi n’abu barikutegyeka, nibeetwa kworobera obutegyeki bwa Kristo. (Zab. 2:1, 2, 4-12) Kandi orurimi rwaitu niruba ruri ‘nk’ekaraamu y’omuhandiiki orikurahutsya’ ahabw’okugira ngu nitukoresa Ebyahandiikirwe omu kubuurira.

‘EBIGAMBO BIRUNGI NIBIRUGA OMU KANWA K’OMUGABE’

5. (a) Yesu akaba ari “murungi” mu muringo? (b) Ni mu muringo ki ogu ebigambo birungi byabaire nibiruga omu kanwa k’Omugabe, kandi nitubaasa kumutooreza tuta?

⁵ Shoma Zaaburi 45:2. Ebyahandiikirwe tibirikugamba munonga aha ndeebeka ya Yesu. Ahabw’okugira ngu akaba ari ohikiriire tihariho kubanganisa akaba ari “murungi” munonga. Kwonka okukira munonga, akaba ari murungi ahabw’okugira ngu akaguma ari omwesigwa ahari Yehova. Okwongyera ahari ekyo, Yesu akakoresa “ebigambo by’embabazi” arikubuurira amakuru g’Obukama. (Luk. 4:22; Yoh. 7:46) Mbwenu shi nooteeraho kumutooreza waaba noobuurira orikukoresa ebigambo ebirikuhika abantu aha mutima?​—Kol. 4:6.

6. Ni mu muringo ki ogu Ruhanga yaahaire Yesu omugisha ogw’ebiro n’ebiro?

⁶ Ahabw’okugira ngu Yesu akaguma ari omwesigwa, Yehova akamuha emigisha omu buheereza bwe omu nsi na bwanyima y’okuhayo ekitambo kye. Entumwa Paulo akahandiika ati: “Ku yaareebirwe ari omu muringo gw’omuntu, yaayecureeza, yaayoroba okuhika aha kufa.” Paulo naagumizamu agira ati: “Nikyo Ruhanga yaamukuriize munonga, akamuha eiziina eririkukira amaziina goona, ngu boona abari omu iguru n’omu nsi n’okuzimu batsimbire amaju eiziina rya Yesu, kandi endimi zoona zaature ku Yesu Kristo ari Mukama, Ruhanga Tataitwe ahimbisibwe.” (Fil. 2:8-11) Yehova akaha Yesu omugisha gw’ebiro n’ebiro arikumuzoora kutunga amagara agatarikufa.​—Rom. 6:9.

OMUGABE AKAHINDURWA MUKURU OKUKIRA ‘BAGYENZI BE’

7. Ni mu muringo ki ogu Yehova yaashukire ahari Yesu amajuta okukira ‘bagyenzi be’?

⁷ Shoma Zaaburi 45:6, 7. Yehova akatoorana Yesu kuba Omugabe w’Obukama bwe ahabw’okugira ngu akaba naakunda okuhikiirira kandi arikwanga ekintu kyona ekirikujumisa Ishe. Yesu ‘akashukwaho amajuta g’okushemererwa okukira bagyenzi be,’ nibo bagabe ba Yuda abaarugire omu runyiriri rwa Daudi. Mu muringo ki? Yehova niwe yaamushukireho amajuta. Okwongyerera ahari ekyo, Yehova akeemeka Yesu kuba Omugabe kandi Omunyamurwa. (Zab. 2:2; Heb. 5:5, 6) Kandi Yesu tarashukirweho majuta genyine kureka akashukwaho omwoyo gurikwera, kandi Obugabe bwe ti bw’omu nsi beitu n’obw’omu iguru.

8. Ahabw’enki turikubaasa kugira ngu Yesu aine obushoboorozi, kandi ahabw’enki turikuhamya ngu naija kutegyeka omu kuhikiirira?

⁸ Yehova akeemeka Omwana we kuba Omugabe w’Obukama bwe omu iguru omuri 1914. ‘Enkoni ye y’obukama n’ey’okuhikiirira,’ n’ahabw’ekyo obutegyeki bwe nibwija kubamu okuhikiirira n’oburingaaniza. Ahikire kugira obushoboorozi ahabw’okuba Ruhanga niwe musingye gw’obutegyeki bwe. Kandi ekitebe kya Yesu nikiija kuba ‘eky’ebiro n’ebiro.’ Tikirikukwesiimisa kuheereza Yehova orikwebemberwa Omugabe ou atooraine?

OMUGABE ‘AHAGATIIRE RURARA YE’

9, 10. (a) Yesu akahagatira rurara ye ryari, kandi ahonaaho akagikoresa ata? (b) Kandi rurara egyo naija kugikoresa ata?

⁹ Shoma Zaaburi 45:3. Yehova naaragiira Omugabe ‘kuhagatira rurara ye,’ ekirikumanyisa okuha Yesu obushoboorozi bw’okurwanisa abarikuhakanisa Yehova kandi akabacwera orubanja. (Zab. 110:2) Ahabw’okugira ngu Yesu n’Omugabe otarikubaasa kusingurwa, naagambwaho ‘nk’emanzi.’ Akahagatira rurara ye omu 1914 arikusingura Sitaane na baadaimoni be obu yaababinga omu iguru akabanaga omu nsi.​—Kush. 12:7-9.

¹⁰ Egi ekaba eri entandikiro y’obusinguzi bw’Omugabe. Kandi naija kugumizamu “kusingurira kimwe.” (Kush. 6:2) Yehova yaataireho entebeekanisa y’okucwekyereza Sitaane, ensi ye, na baadaimoni be. Babulooni Orukuru orurikujwekyera ediini zoona ez’ebishuba nirwo ruraabanze kucwekyerezibwa. Yehova naija kukoresa ab’eby’obutegyeki kucwekyereza “maraaya ogwo.” (Kush. 17:16, 17) Bwanyima, Omugabe naija kugumizamu acwekyereze entebeekanisa y’eby’obutegyeki yoona. Kristo orikwetwa “maraika w’ekiina ekitaine bugarukiro,” naija kusingurira kimwe arikuboha Sitaane na baadaimoni be. (Kush. 9:1, 11; 20:1-3) Ka tureebe oku Zaaburi 45 yaagambire aha bintu ebi.

OMUGABE ‘NAARWANIRIRA AMAZIMA’

11. Ni mu muringo ki ogu Kristo arikurwanirira ‘amazima’?

¹¹ Shoma Zaaburi 45:4. Omugabe tarikurwana rutaro rw’okukwata emyanya n’ari abantu. Aine enshonga zihikire kuza omu rugamba. Naagumizamu ‘kugyenda ari omusinguzi, arikurwanirira amazima, obucureezi n’okuhikiirira.’ Amazima agarikukirayo obukuru againe kurwanirirwa n’ago agarikukwata aha bushoboorozi bwa Yehova obw’okutegyeka byona. Sitaane akahakanisa obushoboorozi bwa Yehova bw’okutegyeka obu yaamugomera. Kuruga obwo, amazima ago gatwire nigahakanisibwa baadaimoni n’abantu. Obunaku buhikire Omugabe otoorainwe kurwana orutaro kworeka ngu Yehova niwe ahikire kutegyeka byona.

12. Ni mu muringo ki ogu Omugabe arikurwanirira ‘obucureezi’?

¹² Omugabe naarwanirira “n’obucureezi.” Yesu Omwana wa Ruhanga nyamunegyere ataireho eky’okureeberaho ky’obucureezi n’okworobera obushoboorozi bwa Ishe. (Isa. 50:4, 5; Yoh. 5:19) Boona abari ahansi y’obutegyeki bw’Omugabe ogwo baine kumutooreza kandi bakoorobera Yehova omu bintu byona. Abo bonka abarikukora ekyo nibo baraikirizibwe kutuura omu nsi ensya.​—Zek. 14:16, 17.

13. Ni mu muringo ki ogu Kristo arikurwanirira ‘okuhikiirira’?

¹³ Kandi Kristo naarwanirira ‘n’okuhikiirira.’ Okuhikiirira’ kwa Ruhanga nikwo Omugabe arikurwanirira, ekirikumanyisa emisingye ya Yehova erikukwata aha kihikire n’ekigwire. (Rom. 3:21; Bir. 32:4) Isaaya akagamba aha Mugabe Yesu Kristo ati: “Haryayema omugabe oritegyekyera omu kuhikiirira.” (Isa. 32:1) Obutegyeki bwa Yesu nibwija kureetaho ‘eiguru erisya n’ensi ensya, ebirituurwamu okuhikiirira.’ (2 Pet. 3:13) Abaraatuure omu nsi egyo nikiija kubetengyesa kworobera emitindo ya Yehova.​—Isa. 11:1-5.

OMUGABE NAIJA KUKORA EBIRIKUTIINISA

14. Ni mu muringo ki ogu omukono gwa Yesu guraakore ebirikutiinisa? (Reeba ekishushani aha kutandika.)

¹⁴ Omuhandiiki wa zaaburi naagira ngu Omugabe naagyenda ahagatiire rurara ye. (Zab. 45:3) Obunaku nibwija kuhika akwate rurara ye omu mukono gwa buryo. Omuhandiiki wa zaaburi naagira ati: “Omukono gwawe guryarasha, batiine.” (Zab. 45:4) Yesu Kristo ku araije akaboha Sitaane ahari Haramagedoni, naija kuba yaakora ebirikutiinisa aha bazigu be. Omuringo ogu araakorese kucwekyereza ensi ya Sitaane titurikugumanya. Kwonka, omuringo gwona ogu araakorese nigwija kutiinisa abantu abangire kukuratira okurabura okurikuruga ahari Ruhanga okurikukwata aha kworobera obutegyeki bw’Omugabe. (Shoma Zaaburi 2:11, 12.) Yesu arikugamba aha biro by’emperu akagira ngu ‘abantu baryahahaaza emitima ahabw’obwoba n’okutegyereza ekirikwenda kwija aha nsi; ahabw’okuba eby’amaani eby’omu iguru biryatengyetsibwa.’ Akongyeraho ati: “Bwanyima y’ebyo baryareeba Omwana w’omuntu naizira omu kicu aine obushoboorozi n’ekitiinisa kingi.”​—Luk. 21:26, 27.

15, 16. Ni baahi abaraabe bari omu ‘mahe’ agaraayejumbe omu rugamba na Kristo?

¹⁵ Ekitabo kya Okushuuruurwa nikigamba aha kwija kw’Omugabe “aine obushoboorozi n’ekitiinisa kingi” kucwa orubanja kiti: “Ku naimukize amaisho, naareeba eiguru rikinguukire n’embaraasi kisa. Ogishutamiho naayetwa Mwesigwa kandi Mazima. Niwe acwa emanja kandi niwe arwana engamba omu kuhikiirira. Amahe ag’omu iguru gaamukurata gatembire embaraasi zirikwera, bajwaire emyenda ya kitaani erikwera kandi emirungi munonga. Omu kanwa ke harugamu rurara y’obwogi ey’okutemesa amahanga; kandi aryabategyekyesa enkoni y’ekyoma, abaribatiirire omu inyuukiro ry’obushaarizi bw’ekiniga kya Ruhanga ow’obushoboorozi bwona.”​—Kush. 19:11, 14, 15.

¹⁶ Abarwani ‘b’amahe ag’omu iguru’ abaraabe nibakuratira Yesu omu rugamba ni baahi? Obu Yesu yaabanza kuhagatira rurara ye arikubinga Sitaane na baadaimoni be kuruga omu iguru, akaba ari na “baamaraika be.” (Kush. 12:7-9) N’ahabw’ekyo, kihikire kugira ngu aha rugamba rwa Haramagedoni, amahe ga Kristo nigaija kuba garimu baamaraika abarikwera. Mbwenu shi amahe ge nigaija kuba garimu n’abandi? Yesu akaraganisa abashukirweho amajuta ati: “Orikusingura, akaguma naakora emirimo yangye okuhitsya aha muheru, ndyamuha obutegyeki aha mahanga goona, kandi aryabategyeka n’enkoni y’ekyoma, nk’oku omuntu ayatagura enyabya z’eibumba, nkaanye oku naahairwe Tata obutegyeki.” (Kush. 2:26, 27) N’ahabw’ekyo amahe ga Kristo ag’omu iguru nigaija kuba garimu n’abashukirweho amajuta, abaraabe batungire omugabo gwabo omu iguru. Abashukirweho amajuta abo, nibaija kuba bari nawe ku araabe naakora ebirikutiinisa aine enkoni y’ekyoma.

OMUGABE NAIJA KUSINGURIRA KIMWE

17. (a) Embaraasi erikwera ei Kristo ashutamiho neejwekyera ki? (b) Rurara n’obuta nibijwekyera ki?

¹⁷ Shoma Zaaburi 45:5. Embaraasi erikwera ei Omugabe ashutamiho, neejwekyera orugamba orurikwera kandi oruhikiriire omu maisho ga Yehova. (Kush. 6:2; 19:11) Oyihireho rurara, aine n’obuta. Ekyahandiikirwe nikigira kiti: “Ku naimukize amaisho, naareeba embaraasi erikwera, kandi owaabaire agishutamiho akaba aine obuta; yaaheebwa ekirunga, yaagyenda naasingura omu kurwana ngu abone kusingurira kimwe.” Rurara n’obuta nibijwekyera eki Kristo araakorese kucwekyereza abazigu be.

18. Nikimanyisa ki okugira ngu “Emyambi” ya Kristo neija kuba ‘ey’obwogi’?

¹⁸ Omuhandiiki wa zaaburi akagira ngu Omugabe akaba aine ‘emyambi y’obwogi’ erikucumita emitima y’abazigu be kandi ngu ‘amahanga nigagwa omu maisho ge.’ Eki nikimanyisa ngu okucwekyereza nikwija kuhika omu nsi yoona. Obunabi bwa Yeremia nibugira buti: “Abariitwa MUKAMA eryo izooba baryashangwa hoona okuruga aha muheru gumwe gw’ensi okuhika aha gundi.” (Yer. 25:33) Obunabi oburikushushana nabwo nibugira buti: “Naareeba maraika ondiijo ayemereire omu izooba, yaayeta n’eiraka rihango, naagambira amahungu goona agarikuzereera ahaiguru omu mwanya, ati: Mwije, muteeranire aha bugyenyi bukuru obwa Ruhanga, murye enyama z’abagabe n’ez’abakuru b’amahe n’ez’amamanzi, ez’embaraasi n’ez’abazigyenderaho, n’ez’abantu boona, ab’obusingye n’abahuuku, abato n’abakuru.”​—Kush. 19:17, 18.

19. Kristo naija kugyenda ata naasingura akahika aha kusingurira kimwe?

¹⁹ Bwanyima y’okucwekyereza ensi egi embi, Kristo ‘omu bukuru bwe’ naija kugumizamu ‘naasingura.’ (Zab. 45:4) Naija kusingurira kimwe arikuboha Sitaane na baadaimoni be kumara emyaka rukumi. (Kush. 20:2, 3) Bwanyima y’okubohwa kw’Omuregi na baamaraika be, ekirikumanyisa okutagaruka kugira eki baakora bari nk’abafiire, abaraatuure omu nsi nibaija kuba batakiteganisibwa Sitaane. Kureka nibaija kuba bari ahansi y’obutegyeki bw’Omugabe waabo omusinguzi. Ensi etakahindwirwe paradiso, haine ekindi ekiraabareetere kushemererwa n’Omugabe waabo hamwe n’abu araategyeke nabo omu iguru. Ekintu ekyo ekirikushemeza nikiija kugambwaho omu kicweka ekirikukurataho.