OMUTWE OGURI AHA MUNAARA | RUHANGA NAAKUFAHO?
Ruhanga Naakwetegyereza
“Ai MUKAMA, okancaaka, wammanya.”—ZAABURI 139:1.
“Amaisho gaawe gakaba gandeebera omunda, nkiri amaizi.”—ZAABURI 139:16
ENSHONGA AHABW’ENKI ABAMWE NIBABANGANISA: Baingi nibateekateeka ngu Ruhanga naareeba abantu nk’abasiisi abatashemeire, abu atarikubaasa kutaho omutima. Kendra, owaabaire naabonabona ahabw’amaganya, akaba naahurira arikweshinja ahabw’okugira ngu akaba atarikubaasa kuhikiiriza gye ebi Ruhanga arikwenda ngu akore. Ekyarugiremu, naagira ngu akarekyera aho kushaba.
EKI EKIGAMBO KYA RUHANGA KIRIKWEGYESA: Yehova tarikuta mutima aha kutahikiirira kwawe kandi naakwetegyereza gye. Baibuli neegira eti: “Naamanya obuhangwa bwaitu, naijuka ku turi omucuucu.” Kandi, tarikututwariza “nk’ebibi byaitu oku biri,” kureka naatugirira embabazi atusaasira twayeteisa.—Zaaburi 103:10, 14.
Teekateeka ahari Daudi omugabe wa Israeli owaagambwaho omu kicweka ekirikubanza. Daudi arikushaba Ruhanga, akagira ati: “Amaisho gaawe gakaba gandeebera omunda, nkiri amaizi; omu kitabo kyawe hahandiikirwemu ebiro byangye byona . . . Oncaakye, ai Ruhanga, omanye omutima gwangye.” (Zaaburi 139:16, 23) Buzima, Daudi akaba naahamya ngu n’obu obumwe yaabaire ashiisha munonga, Yehova akaba naabaasa kureeba omutima gwe ogweteisize.
Yehova naakwetegyereza gye kukira ondiijo muntu weena. “Abantu bareeba emireebekyere y’aharuguru, kwonka MUKAMA areeba omutima.” (1 Samueli 16:7) Ruhanga naamanya ngu obuhangwa bwawe, oku waakuziibwe, n’ei okuriire, nibikureetera kutwaza nk’oku orikutwaza. Naareeba emitwarize mirungi ei orikuteeraho kugira, n’obu obumwe oraabe nookora enshobe.
Mbwenu shi, Ruhanga naakuhuumuriza ata ahabw’okugira ngu naakwetegyereza gye?