Junho

Djafeti akhalibe mwana munango; mwana waceyo ndiye yekha akhali cidikhiro ca mbadwa yace, omwe angadasunga dzina lace na utaka bwace mu Jirayeri. (Way. 11:34) Na tenepo, Wayeruzi 11:35 ambalewa mafala ya Djafeti yakuti: ‘Ndafungula kale mulomo wangu kuna Yahova, ndipo ndin’kwanisa lini kubwerera m’mbuyo.’ Kukhulupirika kwawo napo bzingadakhala bzakunesa kucita bzimwebzo bzidawacitisa kuti afunidwe na Mulungu acisimbidwa. Kodi mungadakhala ndimwepo mungadacitambo cakusankhula cibodzi-bodzici? Pomwe tidapereka moyo wathu kwa Yahova, tidalumbira kuti tingadacita kufuna kwace na moyo wense. Tikhadziwa kuti kukhala mwakubverana na piciro limweri kungadafuna kubzipereka. Na tenepo, kubzipereka kwathu kumbakhala pa mayezo tikakumbiridwa kucita bzinthu bzomwe tikhafuna lini. Tikambabzipereka mwa njira imweyi na kutumikira Mulungu mu njira yomwe tikhaidikhirira lini, timbalatiza cikhulupiro cathu. Bzisimbo bzomwe bzimbabwera mpsizinji kwene-kwene kuposa nyongo iri-yense yomwe tingacite.—Malak. 3:10. w16.04 1:11, 14, 15

Jezu ambatsogolera gwere Lacikristau na mzimu wakucena. Ifepano timbafunika mzimu wakucena kuti utithandize kulimbika pa mapumpso, utilimbise na kutikonzekeresa kucita utumiki, na kucita bzakusankhula bzabwino. Kodi tin’funika lini kugumana phindu pa makonzedwe yense kuphatanidza mitsonkhano ya gwere kuti titambire mzimu umweyu? M’mitsonkhano yathuyi, kazinji timbapfunza bza kukwanisika kwa mapolofesiya ya m’Bibliya. Bzakutewera bzace mpsakuti, citsimikizo cathu cakuti mapiciro ya Yahova yan’dzakwanisika cimbalimbisidwa. Tenepo, afotokozi wa nkhani ndiwo lini wokha omwe ambalimbisa ifepano. Akristau anzathu omwe ambapereka mitawiro na kuimba na mtima wense, iwombo ambatilimbisa. (1 Wak. 14:26) Ndipo tikambaceza na abale pabodzi na mpfumakazi pomwe mitsonkhano ikanati kuyamba ayai pomwe yamala, timbatsangalazidwa ndipo timbabzibva kuti timbacita mbali m’gulu la Mulungu.—1 Wak. 16:17, 18. w16.04 3:6, 7

Jezu adafotokoza kuti bzipsa bzabwino bzin’dzapaliziridwa ‘pa dziko lense komwe kuna wanthu.’ (Mat. 24:14) Jezu adalewa kuti anyakupfunza wace angadacokera kwa ‘wanthu wa mitundu yense.’ Limweri lingadakhala basa lakucitika pa dziko lense la pansi. Kuti tibvesese momwe Mboni za Yahova zinkukwanisira polofesiya ya Jezu pakulewa bza mbuto yomwe basa lakupalizira lingadacitikira, bwerani tiwone nfundo zinango. Ku Estados Unidos kuna atsogoleri pafupi-fupi wakukwana 600.000 m’mbuto zakusiyana-siyana, tsono kuna Mboni za Yahova zakukwana 1.200.000. Pa dziko lense la pansi cipembedzo Cacikatolika cina anyansembe wakukwana 400.000. Tsapano kumbukirani mulewengo wa Mboni za Yahova zomwe zinkucita basa lakupalizira bza Umambo. Pa dziko lense la pansi, atumiki wakubzipereka wakupitirira 8 midyau ankupalizira wanthu m’madziko yakukwana 240. Basali linkucitika mwakudabwisa kwene-kwene, bzensene na cakulinga ca kutumbiza na kulemekeza Yahova!—Psal. 34:1; 51:15. w16.05 2:13, 14

Dziko ladzala na wanthu wakutsogoleredwa na mzimu wakubziimira pawokha bzomwe bzimbabweresa kubzikuza, dyera na mzimu wa mapici. Ali-wense omwe an’lekerera kutsogoleredwa na mzimu umweyu ambakhala ankubvuma bzomwe Sathani adalewa na cakulinga ca kucita bzakufuna bzace, bziribe basa momwe bzingatokonyere winango. (Ciy. 3:1-5) Bzimwebzi bzimbayambisa kusaya kubvesesana. Mwa kusiyana na Sathani, Jezu adapfunzisa wanthu kuti alinge mtendere, napo penu bzomwe adapfunzisabzo bzingadawoneka ninga bzakuipa pa bzakufuna bzawo. Pa Nkhani yace ya pa Phiri, Jezu adapereka malango yabwino ya kumalisira kusaya kubvesesana ayai mabvuto yomwe yangabwere. Mwa ciratizo, iye adacenjeza anyakupfunza wace kuti akhale wakupfatsa, wakukhazikisa mtendere, wakumalisa bzomwe bzimbayambisa ukali, wakumalisa mwakamfulumize kusaya kubvesesana na kufuna anyamadulanthaka wawo.—Mat. 5:5, 9, 22, 25, 44. w16.05 1:4, 5

Azinji wa ifepano timbafunikira kucinja bzinthu bzinango tinati tabatizidwa kuti tikhale na moyo mwakubverana na nfundo za m’Bibliya. Titabatizidwa, tidazindikira bzomwe tin’funika kucita kuti tipitirize kucinja, napo pa bzinthu bzomwe mpsakunesa kuti titewezere Mulungu na Kristu mwa pafupi. (Wayef. 5:1, 2; 1 Pe. 2:21) Mwa ciratizo, tingazindikire kuti tina mzimu wakunesa, kugopa wanthu, khalidwe la magunkha ayai bzinthu bzinango bzakuipa. Kodi kucinja bzimwebzi kukhali kwakunesa kuposa momwe tikhadikhirira? Kumbukirani kuti tikali wakuperewera. (Wakol. 3:9, 10) Tenepo bzingakhale lini bwino kudikhirira kuti pambuyo pa batismo—napo titakhala magole mazinji m’cadidi—tin’dzacita lini pomwe pikado, kutepa, ayai kusunama na bzikhumbumbo bzakuipa ayai nzeru zakuphonyeka. Bzikhumbo bzinango bzingapitirize kwa magole.—Tiy. 3:2. w16.05 4:3-5

Pinango mudabva kale munthu ankulewa mafala ninga yakuti: ‘Ndikhanati kuwona cirango comwe ndikhatambira na abereki wangu kukhala cakufunika kwene-kwene mpaka pomwe ndidadzakhalambo na wana wangu.’ Tikambadziwa bzizinji pa moyo, tingawone malango mu njira yabwino ndipo timbayamba kuwona bzimwebzi ninga momwe Yahova ambawonera. Iye ambatilanga thangwe ambatifuna. (Waheb. 12:5, 11) Inde, kuthumizira pa lufoyi kwa wana wace, Yahova mwakupirira ambatiumba. Iye ambafuna kuti tikhale wanzeru na wakukondwa ndipo ticimufuna na lufoyi ninga lomwe iye analo kwa ifepano. (Mim. 23:15) Iye ambakomedwa lini na kubonera kwathu; iye ambafuna lini na pang’onopo kuti timbafe thangwe ra pikado yomwe tidatengera kwa Adamu. (Wayef. 2:2, 3) Thangwe ra pikado, ifepano tikhambalatiza makhalidwe mazinji yomwe yakhalemekeza lini Mulungu, pinango mwa bzicito bzakuipa! Koma tinkutenda kuti tidacinja na thangwe ra kuumbidwa na Yahova; tidakhala ninga mabira.—Zai. 11:6-8; Wakol. 3:9, 10. w16.06 1:7, 8

Wana azinji ambafunisisa kupfunza ndipo ambakhala wakubzicepswa. (Mat. 18:1-3) Mwakubverana na bzimwebzi, abereki wanzeru ambalimbikira kukhomereza cidziwiso ca cadidi m’makumbukidwe na m’mitima mwa wana wawo ang’ono-ang’ono na kuti ambacifune. (2 Tim. 3:14, 15) N’cadidi kuti abereki an’funika kuikha cadidi m’mitima mwa wana wawo cakuyamba kuti wanawo bziwafambire bwino, acicitisa cadidico kukhala njira ya moyo wawo. Abereki akacita bzimwebzi, wana wawo an’dzandobva lini kokha cadidico koma an’dzacitewezambo. Kuthumizira bzimwebzi, iwo an’dzapfunza kuwona cirango ca abereki ninga njira ya lufoyi yomwe imbalatiza lufoyi la Yahova. Tikakhala wakubzicepswa kwa Yahova na kukhala wakubvera pa moyo wathu, iye an’dzatiwona ninga wakufunika kwene-kwene, ninga momwe iye adacitira na mpolofeta Danyeri. (Dan. 10:11, 19) Kuthumizira bzimwebzi, Yahova an’dzapitiriza kutiumba mwa kuphatisa basa Fala lace, mzimu na gulu lace. w16.06 2:14, 17

Davide akhafunidwa na Yahova, omwe adasankhulidwa kuti akhale munthu ‘wakukondwesa mtima wace.’ (1 Sam. 13:13, 14) Koma Davide patsogolo pace adacita upombo na Bateseba, ndipo Batesebayo adakhala na mimba. Bzimwebzi bzidacitika pomwe mwamuna wace, Uriya, akhali ku nkhondo. Pomwe iye adabwerera kumui mwa kanthawe kakucepa, Davide adayeza kumupumpsa kuti akagonane na mkazi wace Bateseba ndipo bzimwebzi bzingadawoneka ninga kuti mimbayo nja Uriya. Uriya adalamba kucita bzomwe mambo adamuuza, tenepo Davide adacita makonzedwe kuti Uriyayo akafe ku nkhondo. Davide adadzagumana na mabvuto thangwe ra pikado yaceyo, yomwe yadatokonya iye pabodzi na banja lace. (2 Sam. 12:9-12) Na tenepo, Mulungu adalatiza nsisi kwa mwamunayu omwe adafamba na Yahova moyo wace wense ‘na mtima wakukhulupirika.’ (1 Wam. 9:4) Mungadakhala na moyo pakati pa wanthu wa Mulungu pa nthawe imweire, kodi mungadacita tani? Kodi khalidwe lakuipa la Davide lingadakucitisani kukhala wakukalipa? w16.06 4:7

Mboni za Yahova zimbaphatisisa mafala ya cenjezo yomwe Jezu adapereka. Timbadziwa kuti tinkukhala mu ‘nthawe yakumalizira’ na kuti panipita lini nthawe ikulu cinati kuyamba ‘citsautso cikulu’! (Dan. 12:4; Mat. 24:21) Ninga momwe Jezu akhadaleweratu, wanthu wa Yahova ankupalizira bzipsa bzabwino bza Umambo pa dziko lense la pansi. Pa nthawe ibodzi-bodziyo, timbawona nkhondo, matenda, bziteketeke na njala m’mbuto zizinji. Kunesana kwa bzipembedzo kuphana ayai ciwembo, bzinkucitika kwene-kwene kuposa kale-kale. (Mat. 24:7, 11, 12, 14; Lu. 21:11) Tinkudikhirira mwa tceru nthawe yomwe Jezu an’dzabwera acidzakwanisa cakulinga ca Mulungu. (Mar. 13:26, 27) Tenepo, bzingakwanisike lini kwa ife kudziwa nthawe caiyo yomwe citsautso cikulu cin’dzayamba.w16.07 2: 2-4

Thangwe ra kudeka mtima kwace kukulu, tingakwanise kupemba kuna Yahova. Tingapembe kwa iye nthawe iri-yense mwa Jezu. Cadidi, umweyu ni mwayi ukulu! Paulo adati: ‘Tina ufulu bwa kulewalewa na kufenderera Mulungu na mtima wense thangwe ra cikhulupiro cathu mwa Kristu.’ (Wayef. 3:12) Paulo adatilimbisa kuti timbapembe kwa Yahova nthawe iri-yense yomwe tingafune, ‘kuti aticitire nsisi na kutilatiza kudeka mtima kukulu pa nthawe yomwe tikufunikira thandizo.’ (Waheb. 4:16b) Pali-pense pomwe tingagumane na bzineso pa moyo wathu tingakumbire Yahova kuti atithandize. Iye ambangingimizidwa lini kutawira mipembo yathu, koma ambaitawira mwa kufuna kwace. Iye kawiri-kawiri ambaphatisa basa abale na mpfumakazi zathu kuti atithandize. Yahova ambatawira mipembo yathu ‘tenepo tin’funika kukhala wakulimba mtima ticilewa kuti: “Yahova ndiye mthandizi wangu, cipo ndicidzacita mantha. Munthu angandicitenyi?”’—Waheb. 13:6. w16.07 3:12, 13

Nowe pabodzi na wana wace atatu, ali-wense akhana mkazi m’bodzi-m’bodzi. Na tenepo, Cigumula citapita, amuna azinji adakhala na akazi azinji. M’mbuto zizinji, kugonana mwakusaya mtemo kukhali cinthu cakuzolowereka mpaka cidakhala mbali ya bzizolowezi bza cipembedzo. Pomwe Abalahamu na Sara adayenda ku Kanani, iwo akhakhala pakati pa wanthu wakuipa omwe akhalemekeza lini malowozi. Yahova adapfudza mizinda ya Sodoma na Gomora thangwe wanthuwo akhacita bzinthu bzakuipa kwene-kwene. Abalahamu akhali munthu wakusiyana na iwo. Iye akhali msolo wa banja wabwino ndipo Sara akhali ciratizo cabwino ca mkazi wakubvera. (1 Pe. 3:3-5) Abalahamu adawonesesa kuti mwana wace Izaki alowole mkazi omwe akhanamata Yahova. Izaki adacitambo bzibodzi-bodzi na mwana wace Djakobi ndipo wana wa Djakobiyo adadzakhala abereki wa madzinza 12 ya Jirayeri. w16.08 1:10

Mafalaya yankukwanisika nsiku zakumalizira zino. Inde, mu gole la 2015 pakhana mulewengo wakukwana 8.220.105 wa atumiki wa Yahova omwe akhapalizira bzipsa bzabwino bza Umambo kuzungulira dziko la pansi! Mulungu adalewa bza kuthumizirika kwa wanthu wace kuti: ‘Inepano Yahovane, ndin’dzafulumizisa bzimwebzi pa nthawe yaceyo.’ Na tenepo, pomwe nthawe inkuyenda, pan’kufunikambo basa likulu kuti tensenefe tilicite. Kodi tsapano tinkucita bzense bzomwe tingakwanise kuti tipalizire na kupfunzisa bzipsa bzabwino? Abale azinji pabodzi na mpfumakazi ankutumikira kale ninga apainiya wakuthandiza ayai wakukhazikika. Winango ambayenda ku mbuto zinango kukathandiza pa basa lakupalizira, ndipo winango ankucita basa mwamphanvu la kumanga Nyumba za Umambo. Penu ndife m’bale ayai mpfumakazi tinkufunika ‘kucita bzizinji pa basa la Mbuya.’—1 Wak. 15:58. w16.08 3:1, 2

Patapita nsiku zakucepa kucokera pomwe Ajirayeri adalomboledwa ku ukapolo ku Edjipito, mtundu wa Amaleki udabwera kudzamenyana nawo. Mozeji adauza Djosuwe, mwamuna wakukhwimika, kuti atsogolere Ajirayeri ku nkhondoyo. Patsogolo pace Mozeji adatenga Aroni na Hura aciyenda pa phiri. Na pa phiripo iwo angadakwanisa kuwona mbuto yakumenyeranayo. Mozeji adateweza malango yomwe yadathandiza Ajirayeri kukunda nkhondo na Amalekiwo. Iye adaphatirira mpsimbo ya Mulungu wacadidi na manja yace aciidzusa m’dzulu. Pomwe Mozeji adacita bzimwebzi, Yahova adapasa mphanvu Ajirayeri kuti amenyane na Amaleki. Tsono pomwe manja ya Mozeji yakhalemedwa ndipo yakhayamba kugwa, Ajirayeri akhakundidwa na Amaleki. Aroni na Hura mwakamfulumize adathandiza Mozeji. ‘Iwo adatenga mwala kuti iye aukhalire. Ndipo Aroni na Hura akhadakhala winango ku mbali iyi winango ku mbali inangoyo, acimbaphatirira manja ya Mozeji ndipo manja yace yadapitiriza kukhala m’dzulu mpaka dzuwa kumira.’ Ndipo thangwe ra mphanvu ya boko la Mulungu, Ajirayeri adakunda nkhondoyo.—Kuf. 17:8-13. w16.09 1:5-7

Paulo adatsimikiza kuti angadakwanisa kukunda nkhondoyo mwa kupemba kuna Yahova, kukhulupira thandizo lace na kulatiza cikhulupiro pa msembe ya Jezu Kristu. Apa tani bza ifepano? Kodi tingakwanise kukunda nkhondo ya kulimbana na kutepa kwathu? Inde, mwa kutewezera mpostolo Paulo, kukhulupira Yahova na mtima wense na kukhulupirira cakulombolera, sikuti kuthemba mphanvu zathu. Nthawe zinango Mulungu angatilekerere kuti tilatize momwe tinkuwonera nkhani inango. Mwa ciratizo, kodi timbacita tani penu ifepano ayai munthu wa m’banja mwathu wagumana na matenda makulu ayai wacitiridwa bzinthu mwakusaya cilungamo? Tikakhulupira Yahova na mtima wense, tin’dzamukumbira kuti atipase mphanvu zomwe tinkufunikira kuti tikhale wakukhulupirika ticipitiriza kukhala wakukondwa na kulimbisa uxamwali bwathu na iye. (Waf. 4:13) Bziratizo bzizinji bza akristau, wakale na watsapano, bzimbalatiza kuti mipembo ingatilimbise na kutithandiza kukhala wakukhwimika kuti tipitirize kupirira. w16.09 2:14, 15

Pomwe gwere lacikristau likhayamba kukula, padacitika cinthu cinango. Ajuda wakulewalewa cigirego adandandaula kuti amansiwa wawo akhacitiridwa lini bzinthu mwacilungamo. Kuti amalise bvutoli, apostolo adasankhula amuna anomwe kuti ayende kukatsimikizira kuti munthu ali-wense acitiridwe bzinthu mwacirungamo. Apostolo adasankhula amuna omwe akhana madzina yacigirego, pinango kuti akazi wa mansiwawo akatsangalazidwe. (Mab. 6:2-6) Napo tizindikire khalidwe la tsankhulo ayai ne, tensenefe timbatokonyedwa kwene-kwene na mtundu wathu. (War. 12:2) Tingabvembo kuna omwe tidafendererana nawo mui, anzathu wakubasa ayai wa kuxikola ankulewa bzinthu bzakuipa bza wanthu wa cikhalidwe cinango, dzinza ayai mtundu wakusiyana na wathu. Kodi timbatokonyedwa tani na nzeru zakuipa ninga zimwezi? Ayai kodi timbabva tani munthu akanyoza dziko lathu ayai cikhalidwe cathu? w16.10 1:7, 8

Tikambanyang’anisa cirengedwe na kumbacikumbukira, tingawone kuti cinthu ciri-cense cidakonzedwa mwakudabwisa. ‘Na cikhulupiro timbazindikira’ kuti kuna Mulengi, napo kuti iye ambawoneka lini. Timbazindikira kuti iye ana khalidwe labwino kwene-kwene na nzeru zizinji. (Waheb. 11:3, 27) Tingapfunze bzizinji pa bzinthu bzomwe iye adalenga mwa kuwerenga bzinthu bzomwe masiyentista yadazindikira. Zinango mwa nkhani zimwezi mungazigumane mu bzinthu bzakufufudzira nkhani ninga vidiyo yakuti As Maravilhas da Criação Revelam a Glória de Deus na mabroxura yakuti A Vida Teve um Criador? na A Origem da Vida—Cinco Perguntas Que Merecem Resposta pabodzi na bukhu lakuti Existe um Criador Que Se Importa com Você? M’marevista ya Galamukani! kawiri-kawiri mumbakhala na nkhani za masiyentista na za wanthu winango omwe ambafotokoza thangwe race iwo tsapano ankukhulupira Mulungu. Ndipo nkhanizi zimbacemeredwa kuti “Kodi Zinangochitika Zokha?” zimbaphatanidza nkhani za bzirombo na bzinthu bzinango bzacirengedwe pabodzi na momwe masiyentista yambatewezerera momwe bzinthu bzimwebzi bzimbaphatira basa. w16.09 4:4, 5

Atumiki wakukhulupirika omwe ambafotokozedwa m’kapitulo 11 ya bukhu la Wahebereu, adafa pomwe Jezu omwe ni ‘mbeu’ yakupiciridwa, akhanati kufungula mwayi wakuti wanthu alamusidwe kuti akakhale kudzulu. (Wag. 3:16) M’mbuto mwace, iwo akhadikhirira kukhala na moyo wakusaya kumala pa dziko la pansi m’paraizo wakudeka. (Psal. 37:11; Zai. 26:19; Oze. 13:14) Pa Wahebereu 11:13 pambalewa bza atumiki wa Yahova wakukhulupirikawa kuti: ‘Wensenewa adafa na cikhulupiro, napo kuti iwo alibe kuwona kukwanisika kwa mapiciroyo; koma iwo adayawona na patali aciyabvuma.’ Iwo akhadikhirira dziko lipsa ndipo akhambabziwona ninga ali m’mwemo. M’bodzi wa iwo akhali Abalahamu. Jezu adalewa kuti Abalahamu ‘akhakomedwa kwene-kwene na kudikhirira kuwona’ nthawe imweyi. (Ju. 8:56) Sara, Izaki, Djakobi na atumiki winango adadikhirirambo kuwona nthawe yomwe Umambo ‘bwakukonzedwa na Mulungu,’ bun’dzatongera dziko lense.—Waheb. 11:8-11. w16.10 3:4, 5

Yahova adaphatisa basa mzimu wace wakucena kuti utithandize kubvesesa cadidi cakulewa bza iye na Mwana wace na kuti utithandize kukhala na cikhulupiro mwa iye. (Lu. 10:21) Kodi tingalatize tani kuti timbatenda Yahova pa bzense bzomwe iye ankucita? Tin’funika lini kuleka kumutenda pa kubvuma kuti tikhale pa mbverano na iye mwakuphatisa basa Jezu omwe ni ‘Mtumiki Mkulu na Wakucitisa cikhulupiro cathu kuti cikhale cakukwana.’ (Waheb. 12:2) Ndipo tin’funika kupitiriza kulimbisa cikhulupiro cathu mwa kumbapemba nthawe zense kuna Yahova na kumbapfunza Fala lace. (1 Pe. 2:2) Tin’funika kupitiriza kumbalatiza na bzicito bzathu kuti timbakhulupira kwene-kwene mapiciro ya Yahova. Mwa ciratizo, timbapitiriza kupalizira wanthu bza Umambo bwa Mulungu ticiwathandiza kuti akhale anyakupfunza wa Jezu. Timbapitirizambo kumbacitira ‘wense bzabwino ndipo maka-maka abale wathu wa m’cikhulupiro.’ (Wag. 6:10) Ndipo tinkucita nyongo ya ‘kukhundula unthu bwathu bwakale na mabasa yace.’—Wakol. 3:5, 8-10. w16.10 4:11, 12

Yahova adalinganiza bzense bza m’cirengedwe mu njira yakudabwisa. Ndipopa iye ambafuna kuti wanthu wace ambamunamate mu njira yakulinganizika. Tenepo Yahova adapereka Bibliya kuti litipfunzise momwe tingamunamatire. Tingakhale na moyo wakukondwa na wabwino kokha tikateweza citsogozo comwe iye ambatipasa kucokera m’Bibliya pabodzi na gulu lace. Pomwe Ajirayeri akhateweza Cakutonga comwe Mulungu adawapasa iwo akhakhala mwakulinganizika. Mwa ciratizo, pakhana ‘akazi omwe akhadalinganizidwa kuti atumikire pa cipata ca tendi la mkonkhano.’ (Kuf. 38:8) Patsogolo pace, Mambo Davide adalinganiza kuti ansembe na Alevi ambacite basa linango mu tempwlo. (1 Nkha. 23:1-6; 24:1-3) Magwere ya m’magole dzana yakuyambirira yakhadalinganizidwambo bwino. Pakhana thimu la amuna ayai Bungwe Lakutonga lomwe likhapereka malango m’magwere, ndipo pakuyamba gulu limweri likhana apostolo basi. (Mab. 6:1-6) Ndipo iwo akhapereka malangoyo mwakunembera magwere matsamba.—1 Tim. 3:1-13; Tito 1:5-9. w16.11 2:3, 6, 8, 9

Mu 607 Kristu akanati kubwera, Mambo Nabokadinezori waciwiri pabodzi na thimu likulu la acikunda wa ku Babulo adakapfudza mzinda wa Jeruzalemu. Bibliya limbalewa kuti mamboyo adapha alumbwana mwakuphatisa basa mphanga. ‘Iye alibe kubvera nsisi tswaka ne dende, wacikulire ne mkhalamba.’ Pakumalizira pace, ‘iye adatentha nyumba ya Mulungu wacadidi, adagwesa mpanda wa Jeruzalemu, adatentha mzinda wenseneyo na moto, acipfudziratu bzinthu bzense bzakufunika.’ (2 Nkha. 36:17, 19) Ajuda akhafunika lini kudabwisika na kupfudzidwa kwa mzinda wa Jeruzalemu. Thangwe kwa magole mazinji, Mulungu adatumiza apolofeta kuti akadziwise wanthu kuti penu iwo angadapitiriza kusaya kumubvera, angadadzapfudzidwa na Ababulowo. Ajuda azinji angadaphedwa na mphanga ndipo wale omwe angadapulumuka angadadzakhala akapolo ku Babulo. w16.11 4:1, 2

Pakuti Adamu adaphonya, pikado na infa idafikira munthu ali-wense. Ndipopa Bibliya limbalewa kuti ‘infa idatonga thangwe ra pikado ya munthu m’bodzi.’ Koma Yahova adalatiza kudeka mtima kukulu ndipo adakonza njira ya kuti apulumuse wanthu wense mwa kuphatisa basa ‘munthu m’bodzi, Jezu Kristu.’ (War. 5:12, 15, 17) ‘Thangwe ra kubvera kwa munthu m’bodziyu, wanthu azinji an’dzakhala wakulungama.’ Ndipo iwo angadikhirire ‘moyo wakusaya kumala mwa Jezu Kristu.’ (War. 5:19, 21) Yahova alibe kukakamizika kuti apereke Mwana wace ninga cakulombolera. Koma iye adalatiza kudeka mtima kukulu mwa kukonza njira ya kutipulumusira ku pikado na infa. Palibe ne na m’bodziyo wa ifepano omwe akhathemera bzomwe Mulungu na Jezu adaticitira. Mpsakukondwesa kwene-kwene kudziwa kuti iwo adacitisa bzimwebzi kuti tilekereredwe bzakuphonya bzathu na kuti tidzakhale na moyo wakusaya kumala! Tingalatize kutenda kwathu kuna Mulungu mwa kucita bzomwe iye ambafuna nsiku zense. w16.12 1:1, 6, 7

Paulo adacenjeza kuti: ‘Kuikha makumbukidwe pa bzinthu bzakuthupi kumbathandauza infa.’ (War. 8:6) Kodi iye akhathandauza ciyani na bzimwebzi? Tikakhala na moyo ‘wakuteweza bzicito bza thupi,’ tingaluze uxamwali bwathu na Yahova tsapano lino ndipo kutsogolo ticidzaluza moyo wakusaya kumala. Koma bzimwebzi bzingacitike lini munthuyo akacinja. Kodi munkukumbukira bza munthu omwe akhacita upombo ku Kolinto omwe akhafunika kucosedwa? Iye adacinja acileka kutewera bzikhumbo bzace bzakuipa ndipo adayamba pomwe kutumikira Yahova mu njira yakuthemera. (2 Wak. 2:6-8) Munthuyo akhali ciratizo cakuipa ca kukhala na moyo ‘wakutewera bzicito bza thupi’ koma iye adakwanisa kucinja. Nsiku zino penu Mkristau ankuyamba kutewera bzikhumbo bzace bza pikado m’mbuto mwa kuteweza mitemo ya Yahova, iye angakwanisembo kucinja. Kukumbukira cenjezo la Paulo kungatithandize kucinja pa bzomwe tin’funikira kucinja. w16.12 2:5, 12, 13

Mpsakukondwesa kudziwa kuti Yahova an’dzatisamalira tikamutulira thupo lathu! Tingatsimikize na mtima wense kuti Mulungu angacite ‘bzinthu bzikulu kwene-kwene kuposa bzense bzomwe timbakumbira.’ (Wayef. 3:20) Yahova an’dzatithandiza, sikuti mwa kutipasa bzinthu bzikulu kokha, koma ‘bzinthu bzikulu kwene-kwene’! Kuti titambire mabaibai, tin’funika kukhala na cikhulupiro camphanvu kuna Yahova na kumbabvera malango yace. Mozeji adauza mtundu wa Jirayeri kuti: ‘Yahova an’dzakusimbanidi ku dziko lomwe Yahova Mulungu wanu ankukupasani kuti likhale ninga utaka bwanu, koma kokha mukabvera mafala ya Yahova Mulungu wanu na kusunga mwakusamala malamulo yense yomwe ndikukuuzani leroya. Yahova Mulungu wanu an’dzakusimbani ninga momwe iye adakupicirirani.’ (Bzak. 15:4-6) Kodi munkutsimikiza na mtima wense kuti Yahova an’dzakusimbani mukapitiriza kumutumikira mwakukhulupirika? Muna mathangwe yakubveka yakukhulupira bzimwebzi. w16.12 4:8, 9

Iye akhana mathangwe yakucitira bzimwebzi. Yahova adafunisisa kuteweza piciro lomwe adacita kuna xamwali wace Abalahamu. (Ciy. 22:15-18) Kuthumizira bzimwebzi, Yahova nthawe zense ambaphatisa basa ufulu bwace bwa kusankhula mwa lufoyi na mwa kulungama. Timbawona bzimwebzi na momwe adacitira na dzinza la Jirayeri pomwe lidamuphonyera. Pomwe iwo adazindikira kuphonya kwawo, Yahova adawalatiza lufoyi na nsisi. Iye adati: ‘Ndin’dzamalisa kusaya kukhulupirika kwawo. Ndin’dzawafuna na mtima wangu wense.’ (Oze. 14:4) Yahova ankutipasa ciratizo cabwino mwa kuphatisa basa ufulu bwace bwa kusankhula kuti athandize winango! Yahova adalenga wanjo na wanthu aciwapasa ufulu bwa kusankhula. Jezu ngwakuyamba kulengedwa pa bzinthu bzense. Iye adalengedwa mu cifanikiso ca Mulungu na ufulu bwa kusankhula. (Wakol. 1:15) Kodi Jezu ambaphatisa tani basa ufulu bwacebu? Pomwe Jezu akhanati kubwera pansi pano, iye adasankhula kukhala wakukhulupirika kuna Mulungu ndipo alibe kuphatana na Sathani pakupandukira Mulungu. w17.01 2:3, 4

Nthawe zinango udindo bwathu bungacinje thangwe ra bzakucitika pa moyo wathu. Tsono penu ndife mwana ayai mkulu, wathanzi ayai ne, Yahova ambadziwa bzomwe ali-wense wa ife tingakwanise kucita pa kumutumikira. Iye ambafuna kuti ticite bzomwe tingakwanise. Ndipo iye ambakomedwa na cabwino ciri-cense comwe timbamucitira. Jezu akhakondwa na udindo buli-bwense bomwe Yahova akhamupasa, ifepano tingakondwembo na udindo bwathu. (Mim. 8:30, 31) Munthu wakubzicepswa ambakondwa na mbali iri-yense ayai udindo buli-bwense bomwe anabo mu gwere. Ndipo ambandokhalira lini kunyang’anisa bzomwe wanthu winango ankucita mu gwere. M’mbuto mwace iye ambakondwa na mbali yomwe anayo mu gulu la Mulungu. Iye ambawona mbali yomwe anayo kuti njakucokera kwa Yahova. Munthu wakubzicepswa ambalemekezambo winango ndipo ambafuna kuwathandiza. Iye ambadziwa kuti Yahova adawapasambo udindo.—War. 12:10. w17.01 3:13, 14

Nthawe zinango, maswaka yambapasidwa udindo bwakunyang’anira mabasa yakucitidwa na acikulire, omwe ambadziwa bzizinji kuposa iwo. Bzingakhale bwino kupfunza na wanthu amwewa. Mpostolo Paulo akhali mkulu kwene-kwene kuposa Timotio, koma napo bzikhali tenepo, iwo adaphata basa pabodzi kwa magole mazinji. Paulo adauza Akristau wa m’gwere la Kolinto kuti: ‘Ndinkukutumizirani Timotio, pakuti iye ni mwana wangu wakufunidwa ndipo ngwakukhulupirika mwa Mbuya. Iye an’dzakukumbusani momwe ndimbacitira bzinthu pakutumikira Kristu Jezu.’ (1 Wak. 4:17) Na bzimwebzi tingawone kuti Paulo na Timotio akhaphata basa pabodzi mwakuphatana ndipo akhathandizana. Paulo akhapambula nthawe yakupfunzisa Timotio ‘momwe iye ambacitira bzinthu,’ ndipo Timotio adapfunza bzizinji kucokera kwa iye. Paulo akhafuna Timotio, ndipo akhakhulupira kuti iye angadakwanisa kusamalira abale na mpfumakazi za ku Kolinto. Akulu angatewezerembo mpostolo Paulo mwa kumbapfunzisa winango kukhala na udindo m’gwere. w17.01 5:13, 14

Yahova ambafuna lini kuti wanthu ambafe, koma kuti akhale na moyo. Iye ndiye Mwenikaciro wa moyo, tenepo, akadzabwezeresa wanthu ku moyo, iye an’dzakhala Baba wawo. (Psal. 36:9) Mu mpembo wace wa ciratizo, Jezu adalewa kuti Yahova ni ‘Baba wathu kudzulu.’ (Mat. 6:9) Yahova adapasa Jezu basa lakufunika kwene-kwene, la kulamusa anyakufa. Jezu adati: ‘Inepano ndine kumuka na moyo’. (Ju. 6:40, 44; 11:25) Jezu adalewambo kuti: ‘Omwe an’cita kufuna kwa Mulungu, umweyo ni m’bale wangu na mai wangu.’ (Mar. 3:35) Ni kufuna kwa Mulungu kuti wanthu wakucokera ku mitundu, madzinza, na bzirewedwe bzense akhale anamati wace. Iwo ambacemeredwa kuti ni ‘thimu likulu la wanthu lomwe palibe munthu angakwanise kulilewenga.’ Iwo ambalatiza cikhulupiro pa cakulombolera ndipo ambafuna kubvera Mulungu. Iwo ambamutumbiza kuti: ‘Cipulumuso cathu cacokera kwa Mulungu wathu, omwe adakhala pa mpando wa umambo pabodzi na kwa Mwana wa bira.’—Cibv. 7:9, 10. w17.02 2:10, 11

Kuti athandize wanthu kudziwa cadidi ca m’Bibliya m’bzirewedwe bzakusiyana-siyana, gulu la Zion’s Watch Tower Tract Society lidakhazikisidwa mwa lamulo mu 1884, ndipo Charles Taze Russell adakhala prezidenti. Iye adapfunza Bibliya mwakusamala kwene-kwene ndipo alibe kucita mantha kuuza winango kuti mapfunziso ya bzipembedzo ninga yakuti Utatu na yakuti moyo umbafa lini yakhacokera lini mu Bibliya. Iye adapfunza kuti kubwera pomwe kwa Kristu kungadadzawoneka lini na maso, na kuti ‘nthawe zakuikhidwiratu za wanthu wa mitundu’ zingadadzamala mu 1914. (Lu. 21:24) M’bale Russell adaphatisa basa nthawe, mphanvu na kobiri zace kuti apfunzise cadidi winango. Mpsakuwonekeratu kuti Yahova pabodzi na Jezu adaphatisa basa m’bale Russell kuti atsogolere pa nthawe yakufunika kwene-kwene mu mbiri ya wanthu. M’bale Russell akhafuna lini kupasidwa ulemu bwakupambulika na wanthu. Mu 1896, iye adanemba kuti iye pabodzi na amuna winango wa udindo akhafuna lini kupasidwa mbiri pa bzense. Iwo alibe kufuna kupasidwa madzina yali-yense ya ulemu ndipo alibe kufunambo kuti gulu liri-lense licemeredwe na dzina lawo. Iye na kupita kwa nthawe adanemba kuti: “Limweri ni basa lini la munthu.” w17.02 4:8, 9

Tensenefe timbacita bzakusankhula pa moyo wathu. Ndipo bzakusankhula bzinango mpsakufunika kwene-kwene pomwe bzinango ne. Tenepo, bzakusankhula bzathu bzizinji bzingatokonye kwene-kwene moyo wathu. Tikambacita bzakusankhula bzabwino, tin’dzacepesa mabvuto ndipo tin’dzakhala na mtendere wa mu mtima pa moyo wathu. Koma tikacita bzakusankhula bzakuipa, moyo wathu un’dzadzala na mabvuto ndipo tin’dzakhala wakusunama. Kodi n’ciyani comwe cin’dzatithandiza kuti ticite bzakusankhula bza nzeru? Tin’funika kukhulupira kuti Mulungu ambafuna kutithandiza ndipo an’dzatipasa nzeru zakufunikira kuti timbacite bzakusankhula bzabwino. Tin’funikambo kukhulupira Fala lace pabodzi na malango yace. (Tiy. 1:5-8) Tikakhala wakufendererana na Yahova na kufuna kwene-kwene Fala lace, bzin’dzatithandiza kukhulupira kuti iye ambadziwa bzomwe mpsabwino kuna ife. Ndipo pakucita bzakusankhula, tin’dzayamba kuwona bzomwe Bibliya limbalewa. w17.03 2:2, 3

Ninga baba wace Aza, Jehosafati adakhulupira Yahova pomwe thimu la anyankhondo lidabwera kudzamenyana na Juda. (2 Nkha. 20:2-4) Iye adabva mantha ndipo adakumbira thandizo kuna Yahova. Mu mpembo wace, Jehosafati adalewa padeca kuti iwo angadakwanisa lini kukunda anyamadulanthakawo. Jehosafatiyo adalewambo kuti iye pabodzi na wanthu wace akhadziwa lini kuti angadaphata muti wanyi. Ndipo iye akhapenukira lini kuti Yahova angadawathandiza. Iye adalewa mafala yomwe yali mu vesi la nsiku ya leroya. Ninga Jehosafati, nthawe zinango tingadziwe lini bzakucita pa bvuto lomwe tingagumane nalo, ndipo tingacite mantha. (2 Wak. 4:8, 9) Koma kumbukirani bzomwe Jehosafati adacita. Iye adapemba kuna Yahova pamaso pa wanthu wense ndipo adamuuza bza kutepa kwawo. (2 Nkha. 20:5) Misolo ya banja ingatewezerembo ciratizo ca Jehosafati. Kumbirani Yahova kuti akuthandizeni pabodzi na wanthu wa m’banja mwanu kuti mulimbane na bvuto lomwe munalo na kudziwa bzomwe mungacite. Lekani kucita manyazi kuti wanthu wa m’banja mwanu abve mipembo imweyi. Bzimwebzi bzin’dzawacitisa kuti azindikire kuti imwepo mumbathemba Yahova. Ninga momwe Yahova adathandizira Jehosafati, iye an’dzakuthandizanimbo. w17.03 3:12, 13