Julho

Mwana wa Djafeti adabvuma kuluza cikhumbo cace cakukhala na mwamuna na wana kuti athandizire kunamata kwa cadidi. Kodi tingatewezere tani kubzipereka kwaceku? Maswaka mazinji yacikristau yacimuna ayai yacikazi njakufunisisa kuleka kukhala na banja ayai kukhala na wana—maka-maka pakali pano—kuti yatumikire Yahova mwakukwanira. Wanthu wacikulire angaperekembo nthawe yawo yomwe angadamala na wana na azukulu wawo kuti atumikire mu cimango ayai kugumanika pa Xikola ya Apalizi wa Umambo na kutumikira mu mbuto zomwe kulibe apalizi wa Umambo azinji. Winango ambasiya kumbali bzinthu bzawo kuti acitembo mbali pa basa la kugawira micemo. Basa lakucitidwa na mtima wenseli limbabweresa cikondweso kuna Yahova, omwe an’dzayebwa lini basa lawo na lufoyi lawo. (Waheb. 6:10-12) Kodi mungacitembo bzimwebzi mwa kuthumizira kubzipereka kwanu kuti mucite utumiki bwa Yahova mwakukwanira? w16.04 1:16, 17

Jezu adabzindendemeza na m’busa ndipo ateweri wace ninga thimu la mabira. Tsono tilewe kuti, mabira mawiri yali pa phiri, yanango mawiri yali m’cigwa, ndipo bira munango m’bodzi ankudya pa mbuto inango, kodi tingalewe kuti mabira maxanuya ni thimu libodzi? Kulewa cadidi, thimu la mabira limbakhala pabodzi pomwe linkuusidwa. Mpsibodzi-bodzimbo, tingakwanise lini kutewera m’Busa wathu penu timbabzipambula. Tin’funika kumbatsonkhana pabodzi na Akristau winango kuti tikhale mbali ya ‘thimu libodzi’ lakutsogoledwa na ‘m’busa m’bodzi.’ Tikambagumanika pa mitsonkhano, timbathandizira ciphatano cathu ca gulu lense la abale. (Psal. 133:1) Akristau anzathu winango, adalambidwa na abereki wawo pabodzi na abale wawo. Tsono, Jezu adapicira kuti angadadzawapasa banja lauzimu lomwe lingadawafuna na kuwasamalira. (Mar. 10:29, 30) Mukambatsonkhana mwakukhazikika, imwepo mun’dzakhala baba, mai, m’bale, ayai mpfumakazi ya m’bodzi wa Akristau amwewa! Kodi bzimwebzi bzimbatilimbisa lini kuti timbagumanike pa mitsonkhano yense? w16.04 3:9, 10

Nyongo yathu pa kutumikira Mulungu yomwe imbaphatanidza mipembo, kugumanika pa mitsonkhano, utumiki bwa kumunda na mbali zinango za kunamata kwathu, ingakhale yakusaya phindu tikasaya kukhala pa mtendere na anzathu. Tingakhale lini xamwali wa Mulungu tikambasaya kulekerera bzakuphonya bza winango. (Lu. 11:4; Wayef. 4:32) Mkristau ali-wense an’funika kumbakumbukira bwino bza kulekerera na kukhala pa mtendere na winango. Kodi mumbalekerera Akristau anzanu na mtima wense? Kodi mumbakhala wakutsudzuka kubverana nawo? Yahova ambafuna kuti atumiki wace akhale wakulekerera. Penu cikumbu-mtima canu cikukuuzani kuti mucinje pa nkhani imweyi, kumbirani thandizo la Yahova kucokera mu mpembo, kuti mukhale na khalidweri! Baba wathu wakudzulu an’dzatetekera mipembo yakucokera pansi pa mtimayi ndipo an’dzaitawira.—1 Ju. 5:14, 15. w16.05 1:6, 7

Kodi basa lakupalizira lomwe likhadalewedwa kale lingadapitiriza kucitidwa mpaka lini? Jezu adalewa kuti basa lakucitika pa dziko lenseneli lingadapitiriza kucitidwa mpaka mu nsiku zakumalizira, ‘pamwepo cimaliziro cin’dzafika.’ Kodi ni gulu linango liponi lacipembedzo lomwe linkupitiriza kupalizira bzipsa bzabwino mkati mwa nsiku zakumalizira zino? Wanthu winango omwe timbagumana nawo mu utumiki angalewe kuti: “Tina mzimu wakucena, koma imwepo ndimwe munkucita basali.” Kodi limweri ni thangwe lini lakutilimbisa lakulatiza kuti tina mzimu wa Mulungu? (Mab. 1:8; 1 Pe. 4:14) Nthawe na nthawe magulu ya bzipembedzo yayezera kucita ninga momwe Mboni za Yahova zimbacitira nthawe zense, koma atazira. Winango ambacita mabasa ya umisiyonario kwa kanthawe koma ambabwerera aciyamba pomwe moyo wawo wa nsiku na nsiku. Kuthumizira bzimwebzi, winango ayezera kufamba nyumba na nyuma, tsono kodi iwo ambapalizira ciyani? Mtawiro wa mbvunzoyu umbawonesa padeca kuti iwo ambacita lini basa lomwe Kristu adaliyambisa. w16.05 2:13, 16

Kupitiriza kulatiza nyongo kumbafuna ‘kucinja nzeru’ na kulatiza ‘unthu bupsa.’ Paulo adakumbusa Akristau anzace kuti: ‘Kuti mukhundule unthu bwakale bomwe bumbabverana na khalidwe lanu lakale-kale bomwe bunkuipisidwa mwa kubverana na bzikhumbo bzakunyenga bza unthubo. Ndipo mupitirize kukhala wapsa mu mphanvu ya kutsogolera makumbukidwe yanu, na kubvala unthu bupsa bomwe budalengedwa mwakubverana na kufuna kwa Mulungu m’cirungamo caico na cikhulupiro.’ (Wayef. 4:22-24) Mafala yakuti ‘kupitiriza kukhala wapsa’ yankulatiza kuti kubvala unthu bupsa ni nkhani yomwe in’funika kucitidwa nthawe zense. Bzimwebzi mpsakulimbisa, pakuti bzimbatitsimikizira kuti bziribe basa nthawe yomwe takhala tinkutumikira Yahova, tingapitirize kuyenda patsogolo mwa kukulisa makhalidwe yacikristau yomwe yangaticitise kubvala unthu bupsa. Inde, Bibliya lingapitirize kucinja moyo wathu. w16.05 4:8, 9

Njira yomwe Yahova ankutiumbira tsapano imbawonedwa ninga paraizo wauzimu omwe ulipo nsiku zino. (Zai. 64:8) Timbabva kuti tidakhotcerereka napo tiri m’dziko lakuipa. Timbafika pa kumudziwa Yahova na kubva lufoyi lace ninga baba. (Tiy. 4:8) Mu dziko lipsa, tin’dzakondwa mwakukwanira na bzisimbo bza paraizo wauzimu. Patsogolo pace, paraizo wathu wauzimu un’dzakhala pabodzi na paraizo wakuthupi pansi pa utongi bwa Umambo bwa Mulungu. Mkati mwa nthawe imweyi ya kubwezeresedwa kwa bzinthu kwa pa dziko lense, Yahova an’dzapitiriza kuumba wanthu wakukhala pa dziko, kuwapfunzisa mu njira yomwe tingakwanise lini kuikumbukira. (Zai. 11:9) Kuthumizira bzimwebzi, Mulungu an’dzacitisa makumbuikidwe yathu na mathupi yathu kuti tidzakwanise kuphatisisa mapfunziso yace na kucita kufuna kwace mwakulungamiratu. Na tenepo, mbatikhaleni wakutsimikiza kupitiriza kukhala kumbali ya Yahova. Ndipo bwerani timbalatize kuna iye kuti timbazindikira kutiumba komwe iye ambacita kuti ni njira yomwe iye ambalatizira lufoyi lace kuna ife. w16.06 1:8, 9

Mafala yamweya ni mbali ya mafala ya Mozeji yomwe adauza mtundu wa Jirayeri bza makonzedwe yakulewa bza Moabe mu gole la 1473 AEC. Ajirayeriwo akhadasala pang’ono kuti ayambuke mkulo wa Joridano acikakhala mu Dziko Lakupiciridwa. (Bzak. 6:1) Mozeji omwe adakhala mtsogoleri wawo kwa magole 40, akhafuna kuti wanthuwo akhale wakukhwimika thangwe ra mabvuto yomwe angadagumana nayo. Iwo akhafunika kuthemba Yahova na kukhala na cikhulupiro pa iye ninga Mulungu wawo. Mafala yakumalizira ya Mozeji yadadawatokonya kwene-kwene wanthuwo. Pambuyo pa kufotokoza Bzakutonga Khumi na mitemo minango yomwe Yahova adaipereka kuna mtunduyo, Mozeji adalewa mafala yamphanvu yakugumanika pa Bzakutonga 6:4, 5. Kodi pomwe Ajirayeri akhadakonkhana na Mozeji akhadziwa lini kuti Yahova Mulungu wawo ni ‘Yahova m’bodzi yekha basi?’ Kulewa cadidi, iwo akhadziwa. Ajirayeri wakukhulupirika akhadziwa ndipo akhanamata Mulungu m’bodzi yekha—Mulungu wa abereki wawo Abalahamu, Izaki na Djakobi. w16.06 3:2, 3

Jezu adalewa mafala yamweya pomwe akhali pa dziko la pansi pano. Koma iye adapasidwa mphanvu kuti adzatsogolere nkhondo ya Armagedo. (Cibv. 19:11-16) Mpsakubveka kulewa kuti iye tsapano ankudziwa nsiku yomwe nkhondoyo in’dzacitika. Tsono ife tin’dziwa lini basi nsiku ne nthawe yomwe cimaliziro cin’dzafika. Ndipopa mpsakufunika kuti tipitirize kukhala tceru. Yahova adasankhula kale nthawe yomwe citsautso cikulu cin’dzayamba ndipo nsiku iri-yense ikambapita, nsikumbo ya cimaliziro imbakhala inkufendera. ‘Bzin’dzacitikadi mwakusaya kucedwa!’ (Hab. 2:1-3) Kodi n’thangwe ranyi tingakhale na cikhulupiro cimweci? Mapolofesiya ya Yahova, nthawe zense yambakwanisika pa nthawe yace yakuthemera! Yahova adapicira kuti an’dzapulumusa wanthu wace pa citsautso cikulu aciwapasa moyo wakusaya kumala mu dziko lipsa. Na tenepo, tingakhale na cikhulupiro cakuti piciro limweri lin’dzacitikadi. Tsono penu tin’funa kudzakhalambo m’dziko latsapanolo, tin’funika kupitiriza kukhala tceru. w16.07 2:4-6

Pa nthawe yakunesa apostolo adathawa Jezu. Pakuyamba Pedru akhadatsimikiza kuti napo winango angadacita bzimwebzi, iye angadacita lini. (Mar. 14:27-31, 50) Napo bzikhali tenepo, pomwe Jezu adaphatidwa na anyamadulanthaka, apostolo wense—kuphatanidza Pedru—adamuthawa. Pedru adalamba Jezu kazinji kense napo kuti akhamudziwa. (Mar. 14:53, 54, 66-72) Na tenepo, Pedru adasunama na bzomwe adacitabzo koma Yahova adapitiriza kumuphatisa basa. Mungadakhala kuti ndimwe nyakupfunza, kodi bzicito bza Pedru bzingadatokonya kukhulupirika kwanu kwa Yahova? Lero lino, kodi imwepo mun’dzazindikira kuti Yahova angapereke nthawe kuti wanthu wakuphonya akungule nakuti iye an’dzakonzesa bzakuphonyabzo acicita bzimwebzi mu njira yakulungama? Mwakusiyana na bzimwebzi, nthawe zinango wale omwe ambacita pikado zikulu ambalamba nsisi za Yahova ndipo ambakungula lini. Pa nkhani ninga zimwezi, kodi mungakhulupire kuti Yahova an’dzayeruza wanthu wakucita bzakuipa, pinango mwa kuwacosa mu gwere? w16.06 4:8, 9

N’cisimbo cikulu kwene-kwene cakuti Yahova ambatitsangalaza napo pomwe tidasunama. (Psal. 51:17) Pomwe Akristau Wakutesalonika akhali pa cizunzo, Paulo adawanembera mafala yakugumanika m’vesi la lero. Mpsakutsangalaza kudziwa kuti Yahova ambatifuna ndipo ambatisamalira thangwe ra kudeka mtima kwace kukulu! Pakuti ndife wakuphonya, tingakhale lini na cidikhiro ciri-cense mwakusaya kuthandizidwa na Yahova. (Psal. 49:7, 8) Tsono Yahova adatipasa cidikhiro ca bwino kwene-kwene. Kodi n’cidikhiro ciponi? Jezu adati: ‘Cakulinga ca Baba wangu n’cakuti, ali-wense wakuzindikira mwana na kumukhulupira akhale na moyo wakusaya kumala.’ (Ju. 6:40) Tenepo tina cidikhiro cakudzakhala kwa muyaya thangwe ra kudeka mtima kukulu kwa Yahova. Paulo adati: ‘Kudeka mtima kukulu kwa Mulungu kudawonekera, kucibweresa cipulumuso kwa wanthu wa mitundu yense.’—Tito 2:11. w16.07 3:14, 15

Nsiku zino, kusaya kukhulupirika m’banja n’kwakuletsedwa pakati pa wanthu wa Yahova ndipo kumbacitika lini kawiri-kawiri. Tiyezezere kuti munthu wakubatizidwa wacita upombo ndipo walambana na mwamuna ayai mkazi wace kuti alowole munango. Penu munthuyo ngwakusaya kukungula, iye angafunike kucosedwa kuti gwere lipitirize kukhala lakucena. (1 Wak. 5:11-13) Munthu ambafunika ‘kubala bzisapo bzakulatiza kukungula’ anati kubvumidwa kubwerera mu gwere. (Lu. 3:8; 2 Wak. 2:5-10) Palibe nthawe yakuikhidwa yomwe in’funika kumala kuti munthu abwezeresedwe. Ingakhale gole libodzi ayai mazinji kuti nyakuphonya alatize kuti wakunguladi kuti abwezeresedwe m’gwere. Napo munthuyo abwezeresedwe, iye an’dzapitiriza ‘kuima patsogolo pa mpando wakuyeruzira mirandu wa Mulungu.ʼ—War. 14:10-12. w16.08 1:12, 13

Mpostolo Paulo adatenda abale omwe ‘akhalimbikira’ kuti akhale anyakunyang’anira. Kuti munthu afikire cinthu comwe ciri patali, iye an’funika kucita nyongo ndipo pinango kufuthula boko lace kuti aciphate. Tsapano ndokumbukirani kuti m’bale munango ankufuna kukhala mtumiki wakuthandiza. Koma iye ankuzindikira kuti an’funika kucita nyongo kuti akhale na makhalidwe yabwino yacikristau. Tsono, akayamba kutumikira ninga mtumiki wakuthandiza, iye an’funika kupitiriza kuphata basa na nyongo kuti athemere kukhala nyakunyang’anira. Abale winango na mpfumakazi ankucinja bzinthu bzinango pa moyo wawo pakufuna kucita bzizinji mu utumiki bwa Yahova. Mwa ciratizo, iwo angafune kukhala apainiya, kutumikira pa Beteli ayai kuthandiza kumanga Nyumba za Umambo. w16.08 3:3, 4

Kodi n’ciyani comwe Nehemiya adagumana pomwe adayenda ku Jeruzalemu? Iye adawona kuti anyamadulanthaka wa m’madziko yakutali akhagopswa Ajuda, mwakuti iwo akhadaleka kumanga mpanda wa Jeruzalemu. Mzindayo ukhali lini wakukhotcerereka ndipo Ajuda akhadataya mtima. Kodi Nehemiya adabva tani? Kodi iye adatayambo mtima acilekerera manja yace kutepa? Ne! Nehemiya nthawe zense adakhulupira Yahova ninga momwe Mozeji, Aza na atumiki winango wakukhulupirika wa Yahova adacitira. (Kuf. 17:8-13; 2 Nkha. 14:8-13) Pa cakucitika cimwecimbo, Nehemiya adapemba kuna Yahova kuti amuthandize ndipo Yahova adamutawira. Mulungu adaphatisa basa ‘mphanvu zace’ pabodzi na ‘boko lace la mphanvu’ kuti alimbise Ajuda. (Neh. 2:17-20; 6:9) Kodi mumbakhulupira kuti Yahova ambaphatisa basa ‘mphanvu zace’ pabodzi na ‘boko lace la mphanvu’ kuti alimbise atumiki wace nsiku zino? w16.09 1:9

Jornal inango ya ku Holanda idafotokoza momwe atsogoleri wa ma gereja akhadabvalira pa mtsonkhano wawo unango. Jornaleyo idati: “Azinji adabvala bzakubvala bzakutairira, thangwe rakuti kukhapswa.” Tsono, jornal ibodzi-bodziyo idalewa kuti Mboni za Yahova zimbabvala mwakusiyana zikakhala pa mitsonkhano yawo ya cigawo. Mboni za Yahova zimbatumbizidwa na kabvalidwe kawo. Mpostolo Paulo adalewa kuti kabvalidwe ka akristau kakhafunika kulatiza ‘ulemu na nzeru,’ bzomwe n’bzakuthemera kwa atumiki wa Mulungu. (1 Tim. 2:9, 10) Napo Paulo akhalewa bza akazi, koma mtemo ubodzi-bodziyu umbaphatambo basa kwa amuna. Mitemo yabwino ya kabvalidwe njakufunika kwa ifepano ninga wanthu wa Yahova ndipo njakufunikambo kwa Mulungu omwe timbamunamata. (Ciy. 3:21) Bibliya limbalatiza padeca kuti Yahova, Mkulu wa cirengedwe cense ana mitemo yomwe iye ambafuna ya momwe atumiki wace angambabvalire. Tenepo, bzomwe timbasankhula kuti tibvale bzin’funika kukondwesa Mbuya wathu Mkulu, omwe ni Yahova. w16.09 3:1, 2

Wanthu winango ambakomedwa kupfunza mapolofesiya ya m’Bibliya. Ndipo winango ambafuna kundendemeza nkhani za m’Bibliya na nkhani zakulewedwa na afotokozi wa nkhani za kale, masiyentista ayai na amisiri wakufufudza bzinthu bzakale. Mwa ciratizo, onani Ciyambo 3:15. Yahova adalewa polofesiya yakufunikayi pomwe Adamu na Eva adapandukira iye pabodzi na utongi bwace. Imweyi ni polofesiya yakuyambirira pa mapolofesiya mazinji ya m’Bibliya, yomwe yangatithandize kubvesesa momwe Umambo bwa Mulungu bumbalatizira kuti katongedwe ka Mulungu n’kabwino na momwe iye an’dzamalisira kubonera kwense. Kodi mungapfunze tani Ciyambo 3:15? Munganembe mavesi ya m’Bibliya yomwe yambafotokoza bwino momwe polofesiyayo in’dzakwanisikira. Patsogolo pace, zindikirani nthawe yomwe mavesiyo yadanembedwa ndipo yandandaliseni mwakubverana na nthaweyo. Mwakusaya kucedwa mun’dzazindikira kuti anembi wa Bibliya adakhala na moyo mu nthawe zakusiyana-siyana koma bzomwe ali-wense adanemba ni bzinthu bzomwe bzidacitisa kuti mapolofesiya yakhale yakubveka bwino. Bzimwebzi bzingakuthandizeni kuzindikira kuti “mzimu wakucena wa Yahova ukhawatsogolera.” w16.09 4:8

Pa nthawe zinango, mpostolo Pedru adacitira tsankhulo wanthu omwe akhali lini Ajuda. Koma pang’ono na pang’ono iye adacinja makumbukidwe yakuipaya. (Mab. 10:28, 34, 35; Wag. 2:11-14) Mpsibodzi-bodzimbo, tikawona kuti tinalo khalidwe la tsankhulo ayai la kutumbiza mtundu wathu, tin’funika kucita nyongo kuti timalisiretu khalidwero. (1 Pe. 1:22) Kodi n’ciyani comwe cingatithandize kucita bzimwebzi? Kumbukirani kuti tensenefe ndife wakuperewera, bziribe basa dziko lomwe tacokera ndipo tensene tin’funika kupulumusidwa. (War. 3:9, 10, 21-24) Tiribe thangwe lakubzibva kukhala wakufunika kuposa winango! Tin’funika kubzibva ninga momwe mpostolo Paulo adabvera. Iye adauza akristau anzace kuti iwo akhali ‘lini pomwe alendo’ koma akhali ‘wanthu wa m’banja la Mulungu.’ (Wayef. 2:19) Kuti tibvale unthu bwatsapano, tensenefe tin’funika kucita nyongo kuti timalise khalidwe liri-lense lomwe nda tsankhulo.—Wakol. 3:10, 11. w16.10 1:9

Kodi n’ciyani comwe cin’dzatithandiza kuti tipitirize kulimbisa cikhulupiro cathu? Yahova adatipasa Bibliya kuti tipfunze bza mapiciro yace yakutsogolo. M’Bibliyamo, iye ambatilatiza bzomwe tin’funika kucita kuti tikhale wakukondwa. Ndipopa tin’funika kuwerenga Bibliya nsiku zense na kuteweza malango yace. (Psal. 1:1-3; Mab. 17:11) Yahova ambatipasambo ‘cakudya pa nthawe yakuthemera’ mwakuphatisa basa ‘kapolo wakukhulupirika na wanzeru.’ (Mat. 24:45) Ninga atumiki wakale wa Mulungu, tin’funika nthawe zense kumbawerenga bza mapiciro ya Mulungu na kumbayakumbukira mwakusamala. Bzimwebzi bzin’dzatithandiza kupitiriza kukhala wakukhulupirika kuna Mulungu na kudikhirira na mtima wense nthawe yomwe Umambo bwace bun’dzatonga dziko lense la pansi. (Waheb. 11:1) Kupemba kuna Yahova kudathandiza atumiki wakale kulimbisa cikhulupiro cawo. Pomwe iwo akhawona kuti iye ankutawira mipembo yawo, cikhulupiro cawo n’pomwe cikhalimba.—Neh. 1:4, 11; Psal. 34:4, 15, 17; Dan. 9:19-21. w16.10 3:7, 

Jezu adalewa kuti ‘cakutonga cikulu’ ndico kulatiza lufoyi kuna Mulungu. (Mat. 22:35-40) Cikhulupiro na lufoyi ni makhalidwe yakufunika kwene-kwene ndipo anembi wa Bibliya kawiri-kawiri akhayalewera pabodzi. Paulo adalimbisa abale wace kuti ‘abvale cakubzikhotcerera pa cifuwa ca cikhulupiro na lufoyi.’ (1 Wat. 5:8) Juwau adanemba kuti cakutonga ca Mulungu n’cici: ‘Tikhale na cikhulupiro m’dzina la mwana wace Jezu Kristu na kumbafunana.’ (1 Ju. 3:23) Tsono kutsogolo, tin’dzafunikira lini kukhala pomwe na cikhulupiro pa mapiciro ya Mulungu yakulewa bza dziko lipsa thangwe yan’dzakhala yakwanisika kale. Tin’dzakhala na moyo wabwino kwene-kwene omwe Bibliya limbalewa. Koma tin’dzafunika nthawe zense kukhala na lufoyi kuna Mulungu na wanthu anzathu. Paulo adanemba kuti: ‘Tenepo, tsapano, bzinkusala bzinthu bzitatubzi: cikhulupiro, cidikhiro na lufoyi; koma cikulu pa bzensene ni lufoyi.’ (1 Wak. 13:13) Kulewa cadidi, lufoyi lathu kuna Mulungu na anzathu lin’dzapitiriza kukula mpaka muyaya. w16.10 4:15-17

Abale winango akhazungira magwere kuti ambakalewe ‘bzinthu bzomwe apostolo na akulu ku Jeruzalemu akhadasankhula,’ ayai bzomwe Bungwe Lakutonga likhadasankhula. (Mab. 16:4) Magwere yakhateweza malangoyo ndipo ‘yakhalimbisidwa m’cikhulupiro ndipo yakhathumizirika nsiku na nsiku.’ Kodi tin’funika kucita ciyani tikatambira malango yakucokera m’gulu la Mulungu? Bibliya limbatiuza kuti tensenefe tin’funika kumbabvera wale omwe ambatitsogolera. (Bzak. 30:16; Waheb. 13:7, 17) Wale omwe mbakukhulupirika kwa Yahova ambaphonyera lini mitemo yace, ndipo ambadandaula lini na malango yomwe ambatambira. Tin’funika lini kukhala ninga Diotrefe, omwe akhalemekeza lini abale omwe akhatsogolera. (3 Ju. 9, 10) Tikambateweza malango yomwe timbapasidwa, timbathandiza kuti gwere lipitirize kukhala la mtendere na ciphatano. Tenepo tingabzibvunze kuti: ‘Kodi ndimbalimbisa abale na mpfumakazi kuti akhale wakukhulupirika kwa Yahova? Kodi ndimbakulumiza kuteweza malango yomwe ndimbatambira m’gulu la Mulungu?’ w16.11 2:10, 11

Ajuda omwe adatengedwa kuyenda ku ukapolo, omwe adateweza malango ya Yahova, adakhala na moyo wabwino ku ukapoloko. Ababulo adabvumiza Ajuda kuti ambacite bzinthu bzizinji bzomwe bzikhabverana na moyo wawo na kuti ambazunge m’dziko lensenelo mwakutsudzuka. Pa nthaweyo, Babulo likhali dziko likulu lakucitira malonda. Matsamba yakale yambalatiza kuti Ajuda pomwe akhali ku ukapolo, azinji wa iwo adapfunza kucita malonda na mabasa manango ya manja. Ndipo Ajuda winango adakhala na cuma. Moyo wa ukapolo ukhali lini wakunesa ninga momwe ukhaliri kwa Ajirayeri pomwe akhali akapolo ku Edjipito kwa magole mazinji. (Kuf. 2:23-25) Tsono kodi Ajirayeri angadadzakwanisa pomwe kunamata Mulungu mu njira yakuthemera? Pa nthawe imweyo, bzikhawoneka ninga kuti bzingadakwanisika lini thangwe Ababulowo akhatsudzula lini akapolo wawo. Koma Yahova Mulungu akhadapicira kale kuti wanthu wace angadatsudzulidwa ndipo ndibzo bzomwe bzidadzacitika. Nthawe zense mapiciro ya Mulungu yambakwanisika!—Zai. 55:11. w16.11 4:3, 5

Kodi Akristauwo akhali wakufa m’njira iponi? Na cakulombolera, Mulungu adalekerera pikado za Paulo pabodzi na Akristau winango wa m’magole dzana yakutoma. Yahova adawadzoza na mzimu wakucena kuti akhale wana wace. Iwo angadapitiriza kukhala wakukhulupirika, angadadzakhala na moyo kudzulu acidzatonga pabodzi na Kristu. Napo kuti iwo akhana moyo, Paulo adalewa kuti iwo ‘akhadafa ku pikado.’ Paulo adandendemeza bzimwebzi pakufuna kulatiza kuti moyo wawo ukhadacinja. Iye adalewa kuti pomwe Jezu adafa, adalamusidwa ninga mzimu na moyo wakusaya kufa. Ndipopa infa ‘iribe pomwe mphanvu kuna iye.’ Mwakundendemerana na bzimwebzi, bzikhali ninga kuti Akristauwo akhadafambo. Moyo wawo ukhadacinja kwene-kwene pakuti iwo alibe kubvuma kuti bzikhumbo bzawo bza pikado bzitsogolere moyo wawo. Kuyambira pamwepo, iwo akhacita ciri-cense comwe angadakwanisa kuti akhale na moyo omwe ungadakondwesa Mulungu. Iwo akhali ninga ‘wakufa ku pikado koma wamoyo kuna Mulungu mwa Jezu Kristu.’—War. 6:9, 11. w16.12 1:9, 10

Bzimwebzi bzinkuthandauza lini kuti munthu an’funika lini kukumbuka bzinthu bzakuthupi. Ndipo bzinkuthandauzambo lini kuti munthuyo an’funika kumbandokumbuka na kulewalewa bza Yahova na bza m’Bibliya bzokha basi. Mwa ciratizo, atumiki wa Mulungu wa m’magole dzana yakuyambirira akhalibe moyo wakusiyana na wa wanthu winango. Iwo akhakomedwambo na bzakudya, bzakumwa, akhalowolana, akhabereka ndipo akhacitambo mabasa yawo yakuthupi. (Mar. 6:3; 1 Wat. 2:9) Tsono Paulo pabodzi na akristau winango alibe kulekerera kuti mabasa yawo na bzinthu bzinango bzikhale bzinthu bzakufunika kwene-kwene pa moyo wawo. Mwa ciratizo, timbadziwa kuti Paulo akhakonza matendi kuti akwanise kubzisamalira pa moyo. Tsono iye akhawona lini basalo ninga cinthu cakufunika kwene-kwene pa moyo wace. Koma cinthu comwe akhaikha pakuyamba cikhali kutumikira Mulungu. Nthawe zizinji Paulo akhapalizira na kupfunzisa. (Mab. 18:2-4; 20:20, 21, 34, 35) Abale na mpfumakazi wa ku Roma akhafunika kutewezera ciratizo ca Paulo, ndipo ifepano tin’funikambo kumutewezera.—War. 15:15, 16. w16.12 2:5, 15, 16

Dziwani kuti Yahova ambatenda bzinthu bzense bzomwe timbacita kuti timutumikire. Iye ambadziwa kuti nthawe zinango tingabziwone ninga ndife mtazi. Iye ambatisamalira pomwe tinkugumana na bzineso ku basa ayai tikakhala na thupo na momwe tingasamalirire banja lathu. Ndipo iye ambabvesesa tikatazira kucita bzinthu ninga momwe tikhafunira mu utumiki bwace thangwe ra kuduwala ayai kusunama. Tingatsimikize kuti Yahova ambatenda kukhulupirika kwathu napo kuti timbagumana na mabvuto. (Waheb. 6:10, 11) Lekani kuyebwa kuti Yahova ni ‘Mbveseri wa mpembo.’ Tingatsimikize kuti tikapemba, iye an’dzatibva. (Psal. 65:2) ‘Baba wa nsisi zikulu na Mulungu omwe ambatitsangalaza mu njira iri-yense’ an’dzatipasa bzinthu bzense bzomwe mpsakufunika kuti tipitirize kukhala axamwali wace. Nthawe zinango iye angaphatise basa abale na mpfumakazi zathu kuti atithandize. (2 Wak. 1:3) Yahova ambatenda tikambacitira nsisi winango. (Mat. 6:3, 4) Ndipo iye ankupicira kutibaira thangwe ra kudeka mtima kwathuko. w16.12 4:13, 14

Pomwe Jezu akhali pansi pano, iye adalamba kupumpsidwa na Sathani. (Mat. 4:10) Ndipo, usiku bomwe mangwana yace angadafa, Jezu adacita mpembo wakulatiza kuti akhafunisisa kubvera Baba wace. Iye adati: ‘Baba, penu mun’funa, ndicosereni kopoyi. Tsono kufuna kwanu kucitike, sikuti kwangu.’ (Lu. 22:42) Kodi bzingakwanisike kuna ife kutewezera Jezu na kuphatisa basa ufulu bwathu bwa kusankhula kuti tilemekeze Yahova na kucita bzomwe iye ambafuna? Ifepano tingatewezere Jezu thangwe tidalengedwambo m’cifanikiso ca Mulungu. (Ciy. 1:26) Tsono, tiribe ufulu bwakundendemerana na bwa Yahova. Fala la Mulungu limbafotokoza kuti Yahova adaikha malire pa ufulu bwathu bwa kusankhula nakuti iye ambafuna kuti timbacite bzinthu mwakubverana na malireyo. Mwa ciratizo, m’banja, akazi an’funika kumbabvera amuna wawo ndipo wana an’funikambo kumbabvera abereki.—Wayef. 5:22; 6:1. w17.01 2:4, 5

Tinkukhala mu nthawe yakudekeza kwene-kwene. Gulu la Yahova pansi pano, linkukula mu njira zakusiyana-siyana, bzomwe bzinkuthandauza kuti bzinthu bzin’pitiriza kucinja. Kucinja kumweku kungatitokonye ndipo kungakhale kwakunesa kulimbana nako. Bzimwebzi bzikacitika, bzingakhale bwino kukumbukira bzomwe mpostolo Paulo adauza Akristau wa ku Roma. Iye adati: ‘Ninga momwe bziwalo bzense bza m’thupi bzina basa lace, mpsibodzi-bodzimbo mu gwere munthu ali-wense ana mbali yace.’ (War. 12:4, 5) Ninga atumiki wa Yahova, tensenefe timbafuna kuphatisidwa basa na Yahovayo, kuti tithandizire Umambo bwace. Acikulire angapfunzise maswaka kumbasamalira maudindo yawo mwaulemu na mwakuthemera. Ndipo amuna ambatenda kwene-kwene azikazi wawo akawathandiza pa nthawe zomwe bzinthu bzacinja pa moyo. Akazi amwewa ambatewezera ciratizo ca Prisila omwe akhaphata basa mwakukhulupirika pabodzi na mwamuna wace Akila.—Mab. 18:2. w17.01 5:15, 16

Gidiyoni ni ciratizo cabwino pa nkhani ya kubzicepswa. Pomwe iye adatambira udindo bwakucokera kwa Yahova, iye adakhulupira Yahova ndipo adabvuma udindobo. Patsogolo pace Gidiyoni adafuna kubvesesa bzomwe Yahova akhafuna kuti iye acite ndipo adapemba kukumbira kuti amutsogolere. (Way. 6:36-40) Gidiyoni akhali mwamuna wamphanvu na wakukhwimika ndipo iye akhacita bzinthu mwanzeru na mwatceru. (Way. 6:11, 27) Na kupita kwa nthawe, wanthu akhafuna kuti iye akhale mtongi wawo, koma Gidiyoni adalamba. Ndipo pomwe iye adacita bzomwe Yahova adamuuza, iye adabwerera kumui. (Way. 8:22, 23, 29) Munthu akatambira udindo bwatsapano ayai akafuna kucita bzizinji mu gwere, bzingathandauze lini kuti iye ngwakubzikuza. Bibliya limbalewa kuti bzimbakhala bwino kwene-kwene penu mtumiki wa Yahova angafune kucita bzizinji kuti atumikire abale wace ayai kuyenda patsogolo mwauzimu. (1 Tim. 4:13-15) Kodi kukula mwauzimu, kumbafuna kukhala na udindo bupswa? Ne. Tensenefe tingakuze makhalidwe yathu yauzimu na maluso yomwe Yahova ambatipasa, kuti tikwanise kumutumikira bwino na kuthandiza winango. w17.01 3:15, 16

Yahova adapereka cakulombolera cakuumira kwene-kwene. (1 Pe. 1:19) Iye adatifuna kwene-kwene mwakuti adapereka Mwana wace wakufunidwa kuti adzatifere. Tingalewe kuti, Jezu adakhala baba wathu m’mbuto mwa Adamu. (1 Wak. 15:45) Jezu adacitisa kuti tikwanise kudzakhala na moyo wakusaya kumala na kuti nsiku inango tidzakhalembo mbali ya banja la Mulungu. Thangwe ra cakulombolera, wanthu an’dzakhala wakulungama ndipo Yahova an’dzawabvumiza kuti akhale mu banja lace mwakusaya kuswa malamulo yace. Ndokumbukirani momwe bzin’dzakhalira bzakudekeza pomwe wanthu wense omwe mbakukhulupirika kuna Yahova an’dzakhala wakulungama! Pakumalizira, wana wakudzulu wa Mulungu na wanthu wa pa dziko la pansi an’dzakhala wakuphatana ninga banja libodzi. Tensenefe tin’dzakhala wana wa Mulungu. (War. 8:21) Tenepo kutenda kwathu cakulombolera kuticitise kuuza wanthu winango kuti iwo angagumanembo phindu na mphaso yakufunikayi. w17.02 1:17, 19

Nsanja ya Olonda ya 15 Julho, 2013, idafotokoza kuti ‘kapolo wakukhulupirika na wanzeru’ ni kagulu kang’ono ka abale wakudzozedwa wa m’Bungwe Lakutonga. Abale wa m’Bungwe Lakutonga ambatsonkhana pabodzi m’mdzinga uli-wense kuti acite bzakusankhula bzakufunika kwene-kwene. Kugumana kumweku, kumbawathandiza kuti akhale na maceza yabwino na kuti apitirize kukhala wakuphatana. (Mim. 20:18) Palibe munthu wa m’Bungwe Lakutonga omwe ngwakufunika kwene-kwene kuposa mwanzace ndipo m’bale ali-wense m’gululi ambatsogolera pa mitsonkhanoyi kwa gole lathunthu. (1 Pe. 5:1) Makomiti matanthatu ya Bungwe Lakutonga yambacitambo bzibodzi-bodzibzi. Palibe m’bale wa m’Bungwe Lakutonga omwe ambabziwona ninga mtsogoleri wa abale wace. Ali-wense payekha ni nyabasambo wa pamui ndipo ambafunika kutambirambo cakudya cauzimu cakucokera kuna kapolo wakukhulupirika na kuteweza citsogozo cace. Bungwe Lakutonga, ndakufuliziridwa lini ndipo ndakulungama lini. Iro lingaphonye pakufotokoza nfundo zinango za m’Bibliya ayai pakutsogolera gulu. w17.02 4:10-12

Mwa kuphatisa basa cakulombolera, Yahova ambacemera wanthu kuti akhale mbali ya banja lace. Timbatenda thangwe ra mcemo umweyu. Munthu ambabvuma mcemoyu akabzipereka na kubatizidwa. Batismo yathu imbawonesa padeca kuti ‘ndife wa Yahova.’ (War. 14:8) Ciri-cense comwe Yahova ambacita, ambacicita thangwe ra lufoyi lace likulu, ndipo iye ambafuna kuti wense omwe ali mu banja lace amutewezere. (1 Ju. 4:8-11) Tikambafuna wanthu, maka-maka abale wathu, timbalatiza kuti timbatenda nsembe ya cakulombolera na kuti timbafuna kukhala m’banja la Yahova. (Mat. 5:43-48) Timbatewezera bzakutonga bziwiri bzikulu-bzikulu bzomwe ni kufuna Yahova na kufuna anzathu. (Mat. 22:37-40) Tingalatize lufoyi lathu kuna wanthu mwa kuwapfunzisa bzipsa bzabwino bza Umambo bwa Mulungu. Tikabvera cakutonga ca Yahova ca kufuna winango, lufoyi lathu kuna iye ‘lin’dzakhala lakukwana.’—1 Ju. 4:12, 20. w17.02 2:13, 14

Bzikhawoneka ninga kuti bzikhali bzakupusa kucita cakusankhula thangwe kutumikira Yahova nthawe zense n’kwabwino. Ndipo munthu wa nzeru angatumikire lini mulungu wakusaya moyo. Koma bzikhali bzakunesa kuti wanthuwo acite cakusankhula cabwino. Bibliya limbalewa kuti Ajirayeri adaneseka kucita cakusankhula pa nkhaniyi. Ndipopa Eliya adalimbisa wanthuwo kuti asankhule kunamata Mulungu wa cadidi, Yahova. N’thangwe ranyi Ajirayeri adaneseka kucita cakusankhula canzeru? Cakuyamba, iwo adataya cikhulupiro cawo kuna Yahova ndipo adalamba kumutetekera. Iwo akhathemba lini Yahova ndipo alibe kukhala na nthawe yakupfunza bza iye ne nzeru zace. Bzingadakhala kuti adapfunza bza Yahovayo, kupfunzako kungadawathandiza kucita bzakusankhula bza nzeru. (Psal. 25:12) Caciwiri, wanthu wa mitundu inangoyo adacitisa Ajirayeriwo kukhala na makumbukidwe ninga yawo ndipo adafika mpaka kumbawacitira bzakusankhula. Tenepo, Ajirayeri adayamba kutewezera wanthu wa mitunduwo acinamatambo mirungu yawo yakunama, napo kuti Yahova akhadawacenjeza kale kwa magole mazinji.—Kuf. 23:2. w17.03 2:6, 7

Kodi ni mu njira inango iponi yomwe tingatewezerere Ezekiya? Pinango pana cinthu cinango comwe cinkuphingiza uxamwali bwanu na Yahova ayai cinkukucitisani kuti muleke kukhala na nthawe yakukwanira kuti mumutumikire. Mwa ciratizo, nsiku zino wanthu azinji ambawona wanthu winango wakubvekera ninga mulungu wawo. Iwo ambalemekeza mwakunyanya wanthu amwewa na wanthu winango omwe ambawadziwa lini. Ndipo ambamala nthawe yawo ankuwerenga bza wanthu amwewa na kumbawona bzithunzi-thunzi bzawo. Ayai iwo kawiri-kawiri ambaphatisa basa bzikasi bzakumwazira nkhani na njira zinango kuti alewelewe pa interneti. Kulewa cadidi, timbakhala wakukondwa kuphatisa basa njira zimwezi kuti tilewelewe na abale wathu ayai axamwali wathu. Koma tingadzonge nthawe yathu izinji pomwe tinkuphatisa basa njira zimwezi. Pinango tingayambe kubzikuza penu wanthu azinji ankulewa kuti akomedwa na bzithunzi-thunzi ayai mafala yomwe tayanemba pa interneti. Ayai tingakhumudwe penu tazindikira kuti wanthu winango aleka kuwona bzithunzi-thunzibzo ayai ankuwerenga lini pomwe mafala yathuyo. Mungabzibvunze kuti: ‘Kodi ndimbasamala kuti ndileke kuwona wanthu winango wakubvekera ninga mulungu? Kodi ndimbatcenkha kumala nthawe izinji ndinkucita bzinthu bzomwe mpsakufunika lini?’—Wayef. 5:15, 16. w17.03 3:14, 17