Agosto

Nkhondoyo ikhali yakunetesa. Acikunda wa Jirayeri mwakutsogoleredwa na muyeruzi Gidiyoni akhadatewera anyamadulanthaka wawo—anyankhondo wa Midiyani pabodzi na madziko yomwe yakhabverana nawo—usiku bwense adafamba mtantho wa (makilometro 32)! Ajirayeri akhadziwa kuti ikhali lini nthawe yakuti abwerere m’mbuyo. Tenepo, kuti apfudze anyamadulanthakawo, ‘iwo adapitiriza kuwathamangisa’ ndipo adakunda Amidiyaniwo. (Way. 7:22; 8:4, 10, 28) Ifembo tiri pa nkhondo yakunetesa. Anyamadulanthaka wathu ankuphatanidza Sathani, dziko lace na kuperewera kwathu. Winango wa ife tinkumenya nkhondo kuyambira kale-kale ndipo na thandizo la Yahova, timbakunda. Nthawe zinango, tingafike pakuneta pomwe tinkumenyana na anyamadulanthaka wathu ndipo tinganetembo, pomwe tinkudikhirira kumala kwa mkonzedwe uno wa bzinthu. Kulewa cadidi, tikanati takundiratu nkhondo yensene. Jezu adacenjeza kuti ife womwe tinkukhala m’nsiku zakumalizira zino tingadadzagumana na mayezo yamphanvu pabodzi na kuboneresedwa, koma iye adalewambo kuti kuwina nkhondoyo kungadathemba kupirira kwathu.—Lu. 21:19. w16.04 2:1, 2

Pa mitsonkhano yathu, Mpfunzisi wathu Mkulu ambatitsogolera mwa kuphatisa basa Bibliya. (Zai. 30:20, 21) Napo anyakusaya kukhulupira omwe ambabwera pa mitsonkhano yathu angatsimikize kuti: ‘Mulungu alidi pakati panu.’ (1 Wak. 14:23-25) Yahova ambasimba mitsonkhano yathu na mzimu wakucena ndipo ambatsogolera ndondomeko ya kupfunza Bibliya. Pomwe tiri pa mitsonkhano yathu, timbabvesera fala la Yahova na kuwona cisamaliro cace ca lufoyi. Tenepo, timbafendera kwa iye. Jezu adati: ‘Pali-pense pomwe an’tsonkhana awiri ayai atatu m’dzina langu, ine ndin’khala ndiri pakati pawo.’ (Mat. 18:20) Ninga msolo wa gwere, Kristu ‘ankufamba pakati’ pa magwere ya wanthu wa Mulungu. (Cibv. 1:20–2:1) Kumbukirani bzimwebzi! Yahova na Jezu ambatenga mbali pa kutilimbisa pa mitsonkhano yacikristau. Kodi munkumbuka kuti Yahova ambabva tani akawona nyongo yathu yomwe timbacita yakumufenderera iye pabodzi na Mwana wace? w16.04 3:13, 14

Abale awiri adatambiridwa na mpfumakazi inango mu njira yakuti m’bodzi wa iwo adabzibva kukhala wakusaya kufunika. Abale awiriwo atakhala pawokha, m’bale wakukalipayo adayamba kutsutsa bzomwe mpfumakaziyo idalewa. Tenepo, m’bale munangoyo adamukumbusa kuti mpfumakaziyo idatumikira Yahova mwakukhulupirika pa nthawe yakunesa kwa magole 40; iye akhana citsimikizo cakuti mpfumakaziyo ikhafuna lini kumukalipisa. Atakumbukira nkhaniyi kwa kanthawe, m’bale akhadakalipayo adatawira kuti, “Iwepo unkulewa cadidi.” Ninga bzakutewera, nkhaniyo idamalira pamwepo. Kodi ciratizoci cinkuthandauza ciyani? Bzimbathemba momwe mungacitire pa bzinthu bzomwe bzimbayambisa kusaya kubvesesana. Munthu walufoyi ambalekerera sikuti kokha pikado zing’ono-zing’ono. (Mim. 10:12; 1 Pe. 4:8) Yahova ambawona kuti ‘mpsakudeka’ kwa iye ‘kumbayebwa bzinthu bzakusunamisa.’ (Mim. 19:11) Tenepo, munthu winango akakucitirani bzinthu mu njira yakuphonyeka ayai mwakusaya kukulemekezani, mun’funika kubzibvunza kuti: ‘Kodi ndingalekerere bzimwebzi? Kodi mpsakufunikadi kulewalewa naye?’ w16.05 1:8, 9

Kodi mbani maka-maka womwe ankupalizira bzipsa bzabwino bza Umambo nsiku zino? Na cikhulupiro censene tingalewe kuti: “Ni Mboni za Yahova!” Thangwe ranyi timbakhulupira tenepa? Thangwe timbapalizira mafala yacadidi, ya bzipsa bzabwino bza Umambo. Tikambayenda kuna wanthu, timbakhalambo tinkuphatisa basa njira za bwino. Timbacita basa lathu lakupalizira na cakulinga cabwino comwe ni lufoyi, sikuti tigumane phindu. Basa lathu linkucitika m’mbuto ikulu, pakuti tinkupalizira wanthu wa mitundu na bzirewedwe bzense. Ifepano tin’dzapitiriza kucita basa limweri mwakusaya kulekeza, gole liri-lense mpaka pomwe cimaliziro cin’dzafika. Mpsakudabwisadi kuwona basa lakukondwesa lomwe wanthu wa Mulungu ankucita nsiku zomwe tinkukhala zino. Kodi bzensenebzi bzinkukwanisika tani? Mpostolo Paulo ankutawira m’vesi la lero. Tensene tipitirize kugumana mphanvu kuna Baba wathu wa lufoyi mwa kucita bzabwino bzomwe tingakwanise na kuteweza mbali zense za utumiki bwathu.—2 Tim. 4:5. w16.05 2:17, 18

Mwa kusankhula kucita kufuna kwa Mulungu na kuphata basa lamphanvu pa kucita bzimwebzo, timbalatiza kuti tina lufoyi likulu kuna Yahova pabodzi na cikhumbo ca kufuna kumukondwesa. Timbalatizambo kuti timbathandizira utongi bwace. Sathani adatsutsa utongi bwakulungama bwa Yahova, tenepo kubzipereka kwathu pabodzi na nyongo yakuthandizira utongibo, mwakusaya kupenukira, ni cinthu cakufunika kwene-kwene kuna Baba wathu wakudzulu. (Djobi 2:3-5; Mim. 27:11) Tsono, bzingadakhala kuti Yahova ambatipasa lini mpata wakuti timbacinje tekha makhalidwe yakuipa, bzingadadziwika lini kuti timbasankhula tekha kukhala ku mbali yace. Ndipopa, Yahova ambatiuza kuti tiyende patsogolo ‘pakucita nyongo’ kuti tikulise makhalidwe ya Mulungu. (2 Pe. 1:5-7; Wakol. 3:12) Iye ambadikhira kuti ifepano timbacite nyongo yakutsogolera makumbukidwe yathu na momwe timbabvera. (War. 8:5) Thangwe ra kucita nyongo pa nkhaniyi, timbadekedwa tikazindikira kuti Bibliya linkupitiriza kucinja moyo wathu. w16.05 4:12, 13

Yahova ambadziwa mtundu wa ‘dongo’ lomwe iye ambafuna ndipo ambaliumba mwakubvenana na kufuna kwace. (Psal. 103:10-14) Iye ambacita nafe bzinthu ninga munthu ali-wense payekha, ambakumbukira kutepa kwathu, bzomwe tingakwanise lini kucita na momwe timbakulira mwauzimu. Momwe iye ambacitira bzinthu na atumiki wace wakuperewera bzidawonekera na Mwana wace. Kumbukirani momwe Jezu adacitira pa kuphonya kwa ateweri wace, maka-maka pomwe akhatsutsana pa nkhani ya udindo. Mungadakhala kuti mukhalipombo pomwe ateweri wacewo akhatsutsana, kodi mungadawawona ninga wanthu wakupfatsa na wakufulumiza kucinja? Tsono Jezu alibe kuwawona mwakuphonyeka. Iye akhadziwa kuti ateweri wace wakukhulupirikawo angadaumbidwa mwa kudeka mtima, mwa malango yabwino na mwa kuwona ciratizo cace ca kubzicepswa. (Mar. 9:33-37; 10:37, 41-45; Lu. 22:24-27) Pambuyo pa Jezu kulamusidwa na kutsanulidwa kwa mzimu wakucena, ateweri wace akhawona si kuti pa udindo ayai kufuna kuwonekera, koma pa basa lomwe iye adawauza kuti alicite.—Mab. 5:42. w16.06 1:10

Palibe Mulungu winango wacadidi koma Yahova yekha basi; palibe wakundendemerana naye. (2 Sam. 7:22) Tsono Mozeji akhakumbusa Ajirayeri kuti kunamata kwawo Yahova kukhafunika kukhala kwakupambulika. Iwo akhafunika lini kutewezera wanthu omwe akhadawazungulira, omwe akhanamata mirungu yakusiyana-siyana yacimuna na yacikazi. Inango mwa mirungu yakunamayo ikhawonedwa ninga ikhatsogolera bzinthu bzinango bzacirengedwe. Mirungu inango ikhana mawonekedwe yakusiyana-siyana yakupambulika. Mwa ciratizo, a Edjipito akhanamata mulungu dzuwa wakucemeredwa Ra, mulungu wacikazi Nut, mulungu dziko Geb, mulungu wa Nilo wakucemeredwa Hapi na wa bzirombo bzakusiyana-siyana bzakupambulika. Izinji mwa mirungu imweyi idapfudzidwa na Yahova pomwe adacitisa Matsoka Khumi. Mulungu Wacikanani akhali Baala, mulungu wa mphanvu ya kubala, omwe akhawonedwambo ninga mulungu wa mulenga-lenga, wa nvula na wa conzi. Baala akhali mulungu mkulu m’deralo. (Mirew. 25:3) Ajirayeri akhafunika kukumbukira kuti Mulungu wawo, ‘Mulungu wa cadidi’ ni ‘Yahova m’bodzi yekha basi.’—Bzak. 4:35, 39. w16.06 3:4, 5

Cikhulupiro ca Jezu kwa Yahova na kwa wanthu wace cikhali cikulu kwene-kwene ndipo cikali tenepo. Inde, mpsakudabwisa tikambakumbukira bzinthu bzomwe iye wacita mwa kuphatisa basa atumiki wace mu nsiku zakumalizira zino. Palibe pomwe wanthu winango omwe ankupalizira cadidi pa dziko lense la pansi, ndipo ankutsogoleredwa lini na Yahova ninga momwe gwere lace lakuphatana limbacitira nsiku zino. Pa Zaiya 65:14 pambalewa bza mkhalidwe wauzimu omwe un’dzapitiriza kukhala pakati pa wanthu wa Mulungu kuti: ‘Atumiki wangu an’dzakuwa mwa cikondweso thangwe ra mkhalidwe wabwino wa mtima wawo.’ Atumiki wa Yahova ankukondwa na bzinthu bzabwino bzomwe iwo ankucita thangwe ankutsogoleredwa na Yahova. Kusiyana na bzimwebzi, tingalewe kuti dziko lakutsogoleredwa na Sathanili linkulira thangwe makhalidwe yankuyenda yacipiratu. Tin’funika kupitiriza kukhala wakukhulupirika kuna Yahova na makonzedwe yace. w16.06 4:10-12

Tingapfunze kuna alindiri wa nthawe za kale omwe akhalindira mizinda. Mizinda mizinji, kuphatanidza Jeruzalemu, ikhadazunguliridwa na mipanda mwakuti anyamadulathaka, angadakwanisa lini kupita mkati mwace. Alindiri akhambakhala pa mipandayo ndipo thangwe ra bzimwebzo, iwo akhakwanisa kuwona kunja kwense kwa mzindayo. Alindiri winango akhambakhala m’bzipata bzakupitira m’mizindamo. Alindiriwo akhafunika kupitiriza kumbakhala tceru masikati na usiku ndipo akawona anyamadulanthaka ankubwera, iwo akhadziwisa wanthu wa mu mzindamo. (Zai. 62:6) Iwo akhadziwa kufunika kwa kukhala wakupenya nthawe zense na kukhala watceru kuti awone bzomwe bzikhacitika. Ndipo angadaleka kukhala tceru, wanthu azinji angadafa. (Zakiy. 33:6) Josephus, nyakunemba nkhani wacidjuda, adafotokoza momwe acikunda wa Aroma adakwanisira kupita mu Jeruzalemu mu gole la 70 pomwe Kristu akhadabwera kale. Alindiri wa mzindayo akhadagona. Thangwe ra bzimwebzi acikunda wa Aroma adakwanisa kupita mu mzindamo. Iwo adayenda ku Tempwlo, ndipo adaixontha na moto acipfudza bzinthu bzense bza mu Jeruzalemu. Imweyi ikhali mbali yakumalizira ya citsautso cikulu comwe mtundu wacidjuda ukhadikhirira. w16.07 2:2, 7, 8

Timbatambira bzisimbo bzizinji thangwe ra kudeka mtima kukulu kwa Yahova. Tsono, tin’funika lini kukuwona kudeka mtima kwa Yahova ninga mpata wakucitira pikado. Pakati pa Akristau wakuyambirira, pakhana winango omwe adayamba ‘kuwona kudeka mtima kukulu kwa Mulungu kukhala thangwe ra kucitira khalidwe la kunyansa.’ (Juda 4) Akristau wakusaya kukhulupirikawa akhakumbuka kuti angadacita pikado ndipo Yahova nthawe zense angadawalekerera. Iwo adafika pa kuyeza kupumpsa abale wawo kuti ambacitembo pikado zawozo. Nsiku zino, ali-wense omwe ambacita bzimwebzi ambakhala ‘ankunyoza mzimu wa kudeka mtima kukulu.’ (Waheb. 10:29) Nsiku zino Sathani ankupumpsa Akristau winango kuti ambakumbuke kuti iwo angambacite pikado utowa ndipo Yahova acimbawalekerera. N’cadidi kuti Yahova ambalekerera pikado za munthu omwe akungula; tsono iye ambafuna kuti timbalimbane na bzikhumbo bzathu bza pikado. w16.07 3:16, 17

Wanthu akalambana pa nkhani yakusaya kukhala ya upombo, alibe kutsudzuka kuti alowolane na munthu munango. Munthu angasankhule kulekerera mwanzace wamalowozi omwe ngwakuphonya koma wakukungula. Bzingandendemerane na mpolofeta Ozeya omwe adalekerera mkazi wace Gomeri na pomwe Yahova adalekerera Jirayeri thangwe adakungula. (Oze. 3:1-5) Kuthumizira bzimwebzi, munthu akadziwa kuti mwanzace wa m’banja wacita bza unzazi, koma acipitiriza kugonana na nyakuphonyayo, bzimbalatiza kuti iye wamulekerera mwanzaceyo. Bzikakhala tenepoyo, palibe pomwe thangwe lakulambana. Pomwe Jezu adalewa mafala ya m’vesi la leroya, iye adafotokozambo bza ‘wale omwe ana mphaso’ ya kukhala wakusaya kulowola ayai kulowodwa. Jezu adalewa kuti: ‘Omwe angakwanise kucita bzimwebzo, mbacite.’ (Mat. 19:10-12) Azinji ambasankhula kuleka kupita m’banja thangwe an’funa kutumikira Yahova mwakutsudzuka ndipopa iwo an’funika kutendedwa. w16.08 1:15, 16

Maswaka yangacite bzizinji mu utumiki bwa Yahova thangwe yana mphanvu na thanzi. (Mim 20:29) Maswaka yanango ku Beteli yambathadiza pa basa la kudinda na kuphatanidza mabukhu na ma Bibliya. Maswaka mazinji, amuna na akazi ambamanga Nyumba za Umambo ayai kuthandizira pa basa la kuzikonza-konza. Winango ambabzipereka pa kuthandizira komwe kwacitika matsoka ya cirengedwe. Ndipo maswaka yanango yomwe ni apainiya, yambapfunza cirewedwe cinango ayai yambayenda ku mbuto zinango kuti yakapalizire bzipsa bzabwino. Nyakunemba psalymo adati: ‘Wale omwe an’linga Yahova an’dzasaya lini cinthu ciri-cense cabwino.’ (Psal. 34:10) Tikapasa Yahova bzabwino bzomwe tingakwanise, tin’dzakhaladi wakukondwa thangwe ra kudziwa kuti tinkumukondwesa. Ndipo iye an’dzapitiriza kutisamalira ninga momwe adapicirira. w16.08 3:5, 8

Yahova ankufunisisa kutithandiza ndipo iye ambatipasa mzimu wace wakucena kuti utilimbise. (1 Nkha. 29:12) Mpsakufunika kwene-kwene kukumbira mzimu wa Mulungu kuti tikwanise kulimbana na Sathani pabodzi na dziko lace lakuipali. (Psal. 18:39; 1 Wak. 10:13) Tinkutendambo thandizo lomwe ndakucokera m’Fala la Mulungu. Kumbukiranimbo bzinthu bzizinji bzomwe timbapfunza m’mabukhu yathu mwezi uli-wense. Mafala ya pa Zakariya 8:9, 13 yadafotokozedwa pa nthawe yomwe tempwlo ya Jeruzalemu ikhamangidwa pomwe, mpaka pano mafalayo yangatithandize. Yahova ambatilimbisambo mwa malango yomwe timbatambira pa mitsonkhano yathu yacikristau, mitsonkhano ya dera na yacigawo kuphatanidza na maxikola yakupfunzisa utumiki. Malangoya yambatithandiza kutumikira Mulungu na cakulinga cabwino, kuti tikwanise bzakulinga na kuti timbakwanise kusamalira maudindo mazinji yacikristau. (Psal. 119:32) Kodi munkufunisisa kugumana mphanvu mwauzimu na malango ya Yahova? w16.09 1:10, 11

Cakutonga ca Mozeji cidalatiza kuti Yahova ana thupo na bzakubvala bzomwe bzikhalatiza lini kusiyana pakati pa mwamuna na mkazi. Nsiku zino kabvalidwe komwe kambatazisa kusiyanisa kabvalidwe ka mwamuna na mkazi wanthu ambati ni moda. (Bzak. 22:5) Na cakutongaci, timbapfunza kuti Yahova ambaipidwa na bzakubvala bzomwe bzimbacitisa mwamuna kuwoneka ninga mkazi ndipo mkazi kuwoneka ninga mwamuna, ayai bzomwe bzimbatazisa kuwona kusiyanisa kwa mwamuna na mkazi. Mitemo ya m’Bibliya ingatithandize kuti ticite bzakusankhula bzabwino pa nkhani ya bzakubvala. Mitemo imweyi imbaphatisidwa basa kuli-kwene mwa kusaya kukumbukira bza dziko, nyengo yomwe tinkukhala ayai cikhalidwe cathu. Tin’funika lini kukhala na ndandanda yakucita kunembedwa ya bzakubvala bzakubvumizika na bzakusaya kubvumizika. Koma tin’funika kuteweza mitemo ya m’Bibliya, yomwe imbatibvumiza kubvala bzomwe timbadekedwa nabzo. w16.09 3:3, 4

Kumbukirani bza kukhwimika na kukhulupirika kwa amuna omwe adanemba Bibliya. Koma anembi wa pa nthawe imweire kawiri-kawiri akhandonemba bzinthu bzabwino bzokha-bzokha bza mtundu wawo na bza atsogoleri wawo. Tsono apolofeta wa Yahova akhanemba lini bzinthu bzabwino bzokha-bzokha koma akhanembambo bzinthu bzakuphonyeka bzomwe Ajirayeri pabodzi na wamambo wawo akhacita. (2 Nkha. 16:9, 10; 24:18-22) Iwo adafotokozambo bzakuphonya bzawo na bza atumiki winango wa Mulungu. (2 Sam. 12:1-14) Thangwe ra nfundo zakugumanika mu Bibliya, wanthu azinji ambabvuma na citsimikizo cense kuti Bibliya ndakufuliziridwa na Mulungu. (Psal. 19:7-11) Nfundo za m’Bibliya zimbatikhocerera kuti tileke kutengeka ayai kucita bzinthu bzakubverana na cipembedzo cakunama na bzikhulupiro bzomwe bzimbaikha wanthu pa ukapolo. (Psal. 115:3-8) Bzikhulupiro bzimwebzi ninga cikhulupiro cakuti bzinthu bzidacita kusanduka, bzimbacitisa wanthu kulemekeza cirengedwe ninga mulungu, m’mbuto mwa kunamata Yahova yekha. Wanthu omwe ambalewa kuti kulibe Mulungu ambalewa kuti tsogolo lawo lense liri m’manja mwawo. Iwo ambapereka lini cidikhiro cabwino ca tsogolo lawo.—Psal. 146:3, 4. w16.09 4:10, 11

Bowazi akhana thupo na Rute pakuti iye akhadziwa kuti kukhala m’lendo m’dziko linango n’kwakunesa. Bowazi adamuuza kuti akhale pabodzi na atsikana wace kuti aleke kuboneresedwa na amuna omwe akhaphata basa m’mundamo. Ndipo iye adawonesesa kuti Rute apasidwe cakudya na madzi yakukwanira, ninga momwe akhacitira na anyabasa wace. Bowazi adalatiza ulemu kuna mkazi wakusauka wakucokera ku dziko linangoyu ndipo adamulimbisa. (Ru. 2:8-10, 13, 14) Bowazi adadekera mtima Rute thangwe ra lufoyi lomwe akhanalo kuna mibzala wace, Naomi. Ndipo thangwe linango ndakuti Rute akhadayamba kutumikira Yahova. Pomwe Bowazi akhadekera mtima Rute, iye akhatewezera lufoyi lacadidi la Yahova. (Ru. 2:12, 20; Mim. 19:17) Mpsibodzi-bodzimbo nsiku zino, tikakhala wakudeka mtima, tingakwanise kuthandiza ‘wanthu wa mtundu uli-wense’ kuti apfunze cadidi aciwona kuti Yahova ambawafuna kwene-kwene.—1 Tim. 2:3, 4. w16.10 1:10-12

Tikambawona kuti Yahova ankutawira mipembo yathu acitipasa bzomwe tikhafunikira pa nthawe yakuthemera, cikhulupiro cathu kwa iye cimbalimba. (1 Ju. 5:14, 15) Tin’funikambo ‘kupitiriza kukumbira’ Yahova kuti atipase mzimu wace wakucena kuti ulimbise cikhulupiro cathu. (Lu. 11:9, 13) Pomwe tinkucita mpembo kwa Yahova, tin’funika lini kumbandomukumbira kuti atipase bzakusaya bzathu. Tin’funikambo kumbamutenda na kumbamutumbiza nsiku zense. Kuthumizira bzimwebzi, iye ambacita bzinthu bzense bzabwino! (Psal. 40:5) Atumiki wa Yahova ambapemberambo abale wawo kuzungulira dziko lense la pansi. Mwa ciratizo, ‘timbakumbukira omwe ali m’kawoko.’ Ndipo ‘timbapemberambo omwe ambatsogolera pakati pathu.’ Tikambawona momwe Yahova ambatawirira mipembo yathu, cikhulupiro cathu kuna iye cimbalimba ndipo timbamufenderera.—Waheb. 13:3, 7. w16.10 3:8, 9

Wanthu wa Yahova nthawe zathu zino ana cikhulupiro pa Umambo bwace ndipo ambabuthandizira. Ndipo iwo ambafunana na mtima wense. Bziri tenepo thangwe iwo ambabvuma kuti mzimu wa Mulungu uwatsogolere pa moyo wawo. (Wag. 5:22, 23) Kodi bzakutewera bzace mpsiponi? Abale na mpfumakazi wakupitirira 8 midyau kuzungulira dziko lense ali pa mtendere ndipo mbakubverana m’magwere mwawo. Mpsakuwonekeratu kuti cikhulupiro na lufoyi ni makhalidwe yamphanvu kwene-kwene! Ciphatanoci cinkukwanisika kokha na thandizo la Mulungu wathu. Iye ngwakuthemera kutumbizidwa thangwe ra bzimwebzi. (Zai. 55:13) Yahova an’dzapitiriza kuthandiza wanthu azinji kuti akhale na cikhulupiro mwa iye. Tenepo pakumalizira, dziko lense lin’dzadzala na wanthu wakukwana, wakulungama na wakukondwa omwe an’dzatumbiza Yahova mpaka muyaya! w16.10 4:18, 19

Akulu ambatipasa malango ya m’Bibliya thangwe iwo ambafuna kukhotcerera na kusamalira gwere. M’magole dzana yakuyambirira, wanthu winango adaleka kucita basa lawo koma adayamba kumbapitira pa bzinthu bzomwe bzikhali lini mbali yawo. Akulu adayeza kuwathandiza, koma iwo alibe kucinja. Paulo adauza magwere momwe yangadacitira bzinthu na wanthu ninga amwewa. Iye adati: ‘Lekani kumbacita naye bzinthu pabodzi.’ Iwo akhafunika kuleka kumbacitira bzinthu pabodzi na munthu umweyu koma akhafunika lini kumbamuwona ninga nyamadulanthaka. (2 Wat. 3:11-15) Nsiku zino akulu ambathandizambo munthu omwe ankusiyana na mitemo ya Mulungu, mwa ciratizo munthu omwe ankucita umakhadzi na munthu wakusaya kukhulupira. (1 Wak. 7:39) Munthuyo akasaya kucinja, akulu angacite makonzedwe kuti pafotokozedwe nkhani yakulewa momwe khalidwero lingacitisire winango kuyamba kulewa kuipa gwere. Kodi imwepo mun’dzacita ciyani akadzakupasani malango? Penu munthuyo munkumudziwa mun’dzatcenkha kucitira naye pabodzi bzinthu? Mwa njira imweyi, iye an’dzazindikira kuti khalidwe lacero lingamudzonge na kuti limbanyansa Yahova, ndipo iye angacinje. w16.11 2:13

Pa Pentekosite wa mu gole la 33 EC, Akristau azinji adadzozedwa na mzimu wakucena. Iwo adakhala ‘mtundu wakusankhulidwa, anyansembe wa umambo, mtundu wakucena, wanthu omwe angadadzakhala cuma cakupambulika.’ (1 Pe. 2:9, 10) Apostolo akhasamalira bwino magwere. Koma pomwe apostolowo adafa, wanthu winango m’magwere adayamba kupfunzisa nzeru zakunama ndipo akhafuna kuti wanthu aleke kuteweza cadidi. Azinji wa iwo akhana maudindo m’gwere, koma akhambafuna kuphatisa basa nzeru za wanthu ayai filozofia ndipo adayamba kupfunzisa nzeru zawo m’mbuto mwa cadidi ca m’Fala la Mulungu. (2 Wat. 2:6-8) Na tenepo, pa nthaweyi padayamba kuwoneka apanduki, liciyambika gulu la atsogoleri wa cipembedzo, napo kuti Jezu akhadauza kale anyakupfunza wace kuti ‘mwensenemwe ndimwe abale.’—Mat. 23:8. w16.11 4:8

Pinango m’mbuyomu tidacita bzinthu bzizinji bzakuphonyeka m’maso mwa Yahova mwa kusaya kudziwa. Tikhali ninga ‘akapolo wa bzakunyansa na wakusaya kubvera bzakutonga,’ ayai ‘akapolo wa pikado.’ (War. 6:19, 20) Koma pomwe tidapfunza m’Bibliya bzomwe tin’funika kucita kuti tikondwese Mulungu, tidacinja moyo wathu, tidabzipereka kuna iye ndipo tidabatizidwa. Tenepo ‘tidatsudzulidwa ku pikado,’ ndipo ‘tidakhala akapolo wacirungamo.’ (War. 6:17, 18) Tingasankhule penu tingatsogolere bzikhumbo bzathu bzakuipa ayai kulekerera kuti ibzo bzititsogolere. Bzibvunzeni kuti: ‘Kodi nthawe zizinji ndimbakhala ndicikumbukira bzinthu bzakuipa ndipo ndimbafika pakucita bzakuipabzo? Ayai ndimbacinjiratu makumbukidweyo yakandibwerera?’ Tikambatenda na mtima wense kudeka mtima kukulu kwa Mulungu, tin’dzacita nyongo yakumukondwesa. w16.12 1:11, 12

Mtendere wa mu mtima umbatithandiza kukhala pa mtendere na wanthu wa m’banja mwathu pabodzi na abale wa m’gwere. Pakuti ndife wakuperewera, nthawe zinango pangawoneke mabvuto pakati pa abale pabodzi na mpfumakazi zathu. Bzimwebzi bzikacitika, timbateweza malango ya Jezu yakuti: ‘Yanjanani na abale wanu.’ (Mat. 5:24) Kumbukirani kuti m’bale wanuyo ankutumikirambo Yahova ‘Mulungu omwe ambapasa mtendere.’ (War. 15:33; 16:20) Ndipo tikaikha ‘makumbukidwe pa bzinthu bzauzimu,’ tin’dzakhalambo pa mtendere na Mulungu. Mpolofeta Zaiya adanemba kuti: ‘Wanthu omwe ana mtima wakusaya kutekenyeka mun’dzawapasa mtendere wakusaya kumala, thangwe iwo ambathemba imwepo [Yahova].’—Zai. 26:3; War. 5:1. w16.12 2:5, 18, 19

Yahova ankusimba wanthu wace, napo nthawe zino zakumalizira za mkonzedwe wakuipa wa Sathani. Iye ankuwonesesa kuti tinkutambira cidziwiso cakufunikira na mtendere ninga mbali ya gulu lense la abale. (Zai. 54:13) Ninga momwe Jezu adapicirira, Yahova ankutisimba na banja la lufoyi la abale na mpfumakazi wa pa dziko lense. (Mar. 10:29, 30) Kuthumizira bzimwebzi, wale omwe ankulinga Mulungu na mtima wense ankusimbidwa na mtendere wa mu mtima, mtsangalazo na cikondweso. (Waf. 4:5-7) Mungatsimikize kuti ‘mukacita bzomwe Mulungu akufuna, mun’dzatambira bzomwe iye adapicira.’ (Waheb. 10:35, 36) Tenepo bwerani tipitirize kulimbisa cikhulupiro cathu na kucita bzense bzomwe tingakwanise kuti titumikire Yahova. Tina citsimikizo cakuti Yahova an’dzatisimba!—Wakol. 3:23, 24. w16.12 4:17, 20

Pakuti ufulu bwathu buna malire, kodi bzingakwanisike nthawe zense kukhala na ufulu bwacaibo? Inde, bzingakwanisike! N’thangwe ranyi? Thangwe kupasidwa malireko kumbatikhotcerera. Mwa ciratizo, pinango mungafune kufambisa kanderendere ku mzinda munango. Tsono tiyezezere kuti kumweko kulibe malamulo ya pamseu ndipo ali-wense angafambe ninga momwe an’funiramo na ku mbali iri-yense ya mseu yomwe iye angafune. Kodi mungafambe mwakutsudzuka mu mseu umweyu? Ne na pang’onopo. Kukhala na malireku n’kwakufunika kuti wense agumane phindu na ufulu caibo. Bzomwe bzidacitika na Adamu bzimbalatiza bzimwebzi. Iye adasankhula kudya cisapo ca muti wakuletsedwa ndipo kucita bzimwebzo kukhali kulamba malire yomwe Yahova adawaikhira. Tsono pakuti Adamu adaphatisa basa mwakuphonyeka ufulu bwace bwa kusankhula, wanthu ankubonera kwene-kwene mpaka pano. (War. 5:12) Kukumbukira mabvuto yomwe yadabwera thangwe ra cakusankhula ca Adamu kungaticitise kuphatisa basa ufulu bwathu bwa kusankhula mwa njira yabwino na kubvuma malire yomwe Yahova adatiikhira. w17.01 2:6, 8

Tikapasidwa udindo bupsa, kucita mpembo na kuikumbukira mwakusamala nkhaniyo, kungatithandize kuzindikira penu tingakwanise ayai ne kusamalira udindo bupswabo. Penu ndife wakubzicepswa, tingalambe. Tsono tikabvuma udindo bupswabo, bwerani timbalinge citsogozo ca Yahova ndipo timbamukumbire kuti atithandize ninga momwe adacitira Gidiyoni. Yahova ambafuna kuti ‘timbafambe mwakubzicepswa’ na iye. (Mik. 6:8) Na tenepo tin’funika kukumbukira bwino bzomwe Yahova ambatiuza mwakuphatisa basa Bibliya pabodzi na gulu lace. Bwerani timbakumbukire kuti bzense bzomwe timbacita mu gulu lace, bzimbakwanisika lini thangwe ra luso lomwe tinalo, koma bzimbakwanisika thangwe rakuti Yahova ngwakubzicepswa ndipo ambafunisisa kutithandiza. (Psal. 18:35) Munthu wakubzicepswa an’funika lini kumbabzikumbukira yekha mwakunyanya. w17.01 3:17, 18

Jezu akhadziwa kuti anyakupfunza wace akhali wanthu wakuperewera, koma napo bzikhali tenepo, iye adakhala na cidikhiro cense cakuti iwo angadakwanisa kumwaza bzipsa bzabwino pa dziko lense. (Ju. 14:12) Iye adawapfunzisa bwino, ndipo anyakupfunzawo adakhala wakukonzeka kupalizira m’madziko yense yomwe iwo angadakwanisa kufika. (Wakol. 1:23) Pambuyo pa Jezu kufa, Yahova adamulamusa, acimupasa basa likulu lakuti acite ninga mtongi wa padzulu ‘kuposa umambo bwense, utongi bwense, wanthu wa mphanvu wense na ambuya wense.’ (Wayef. 1:19-21) Napo ticifa ninga atumiki wakukhulupirika wa Yahova pomwe Armagedo inati kufika, iye an’dzatilamusa kuti tidzakhala pomwe na moyo m’paraizo, ticidzapfatsa na basa labwino. Nsiku zino, tensenefe tinkupfatsa kale na basa lakudekeza kwene-kwene, lomwe ndakupalizira bzipsa bzabwino na kupfunzisa. Tenepo, ali-wense wa ifepano an’funika ‘kucita bzizinji nthawe zense pa basa la Mbuya,’ bziribe basa msinkhu omwe tinawo. w17.01 5:17, 18

Cakulombolera cidalipiridwa kuti ciphate basa kwamuyaya. (Waheb. 9:24-26) Adamu adatibweresera infa koma nsembe ya Jezu in’dzatibweresera moyo wakusaya kumala. Cakulombolera cingatitsudzule ku dziko la Sathaniri ndipo cingaticoserembo mantha ya infa. (Waheb. 2:14, 15) Mapiciro ya Mulungu nthawe zense yan’dzakwanisika. Ninga momwe malamulo ya m’cilengedwe yambacinja lini, Yahova an’dzacinjambo lini. Iye an’dzatisunamisa lini napang’onopo. Yahova ambatipasa bzizinji si kuti kokha mphaso ya moyo. Iye ambatipasa lufoyi lace. ‘Ife tinkudziwa ndipo tinkukhulupira bza lufoyi lomwe Mulungu analo kuna ife. Mulungu ni lufoyi.’ (1 Ju. 4:16) Mapiciro yace nthawe zense yambakwanisikadi. Tsapanopa, dziko la pansi lin’dzakhala paraizo wakudeka. Ali-wense omwe an’dzakhala m’mwemo an’dzatewezera Yahova ndipo an’dzakhala na lufoyi na wanthu winango. Ndipo atumiki wace wense wa kudzulu na wa pa dziko an’dzalewa kuti: ‘Cisimbo, mbiri, nzeru, kutenda, ciremekezo na mphanvu bzikhale bza Mulungu wathu mpaka kale-kale. Ameni.’—Cibv. 7:12. w17.02 2:16, 17

Nsanza ya Mulindiri ya cingerezi ya 1 Junho, 1973 mu gole limweri idabvunza penu “munthu omwe alibe kusiya cizolowezi cace ca kufumali angathemere kubatizidwa.” M’tawiro wace udaperekedwa mwakubverana na nfundo za m’Bibliya ndipo ukhali wakuti ne, angathemere lini! Nsanza ya Mulindiriyo idafotokoza mavesi yakusiyana-siyana ndipo idalewa thangwe race munthu omwe ankusiya lini kufumali an’funikira kucosedwa mu gwere. (1 Wak. 5:7) Revistayo idafotokoza kuti mtemo umweyu ngwakuperekedwa lini na wanthu koma ngwakucokera “kwa Mulungu, omwe ambalewalewa mwakuphatisa basa Fala lace lakunembedwa.” Bukhu linango lomwe lidacosedwa tsapanopa ku Estados Unidos lidalewa tenepa: “Atsogoleri wa bzipembedzo kawiri-kawiri ambayezera kucinja bzipfunziso bzawo kuti bzibverane na bzomwe wanthu azinji ambakhulupira.” Tsono kodi ciripo cipembedzo cinango kupambula Mboni za Yahova comwe cimbakhulupira Fala la Mulungu napo kucita bzimwebzi kumbabweresa mabvuto makulu kwa winango wa iwo? w17.02 4:15

Pakulatiza kuti mbakubzicepswa, akulu ambafuna lini kuti wanthu ambawacitire bzinthu ninga momwe ambacitiridwira wanthu wakubvekera. Tenepo iwo mbakusiyana kwene-kwene na atsogoleri wa bzipembedzo wa nsiku zino na atsogoleri wa bzipembedzo wa nthawe ya Jezu. Iye adalewa bza iwo kuti: ‘Iwo ambafuna mbuto zapadzulu kwene-kwene pa madyo na mipando yakutsogolo m’masinagoga, ndipo ambafunambo kumusidwa na wanthu m’mbuto za malonda.’ (Mat. 23:6, 7) Akulu wacikristau ambabvera mafala ya Jezu yakuti: ‘Lekani kubvuma kumbacemeredwa Rabi, thangwe rakuti mpfunzisi wanu ni m’bodzi yekha basi, ndipo mwensenemwe ndimwe abale. Ndipo lekanimbo kumbacemera munthu ali-wense wa pansi pano kuti Baba, pakuti Baba wanu ni m’bodzi yekha, Omwe ali kudzulu. Lekani kumbacemeredwa atsogoleri, pakuti Mtsogoleri wanu ni m’bodzi yekha basi, Kristu. Koma omwe ni mkulu pakati panu, akhale mtumiki wanu.’ (Mat. 23:8-11) Akulu wa m’magwere yense ya pa dziko la pansi akambakhala wakubzicepswa na kubvera mafala ya Jezu, an’dzafunidwa na kulemekezedwa na abale wawo. w17.03 1:14, 15

Ali-wense wa ife ana ufulu bwakucita bzakusankhula, koma bzakusankhula bzanzeru tingabzicite tikambaphatisira basa nfundo za m’Bibliya. Tenepo tin’funika lini kupasa munthu ali-wense udindo bwakuti aticitire bzakusankhula. M’mbuto mwace, munthu ali-wense an’funika kupfunza bzomwe Mulungu ambalewa kuti mpsabwino acisankhula kucita bzimwebzo. Kodi tingalekerere tani kuti winango ambaticitire bzakusankhula bzathu? Mwa kumbacita cakusankhula cakuipa thangwe ra kukakamizidwa na winango. (Mim. 1:10, 15) Bzimwebzi bzingatibwerese mabvuto. Ni udindo bwathu kutewera cikumbu-mtima cathu cakupfunzisidwa na Bibliya. Tikalekerera kuti wanthu aticitire bzakusankhula, patsogolo pace tin’dzasankhula kutewera iwo. Cakusankhula cimweci cingatibweresere ngozi. Mpostolo Paulo adacenjeza Akristau wa ku Galata kuti aleke kulekerera kuti wanthu ambawacitire bzakusankhula. (Wag. 4:17) Abale winango wa m’gwere la ku Galata akhambafuna kucitira anzawo bzakusankhula. w17.03 2:8-10

Josiya adacita nyongo ya kukondwesa Yahova. Penu imwepo ndimwe tswaka, mungatewezere Josiya mucilinga kudziwa bwino Yahova. Josiya, pinango adapfunza na Mambo Manase, yavu wace, kuti Yahova ambalekerera munthu wakukungula. Imwepo mungapfunzembo na acikulire wa m’banja mwanu ayai m’gwere mwanu. Iwo angakufotokozereni bzinthu bzizinji bzabwino bzomwe Yahova adawacitira. Ndipo kumbukirani momwe Josiya adabvera pomwe adapfunza Bzinembo. Iye adacita bzense bzomwe adakwanisa kuti akondwese Yahova ndipo mwakusaya kucedwa adacinja bzinthu m’dzikomo. Mukambawerenga Bibliya, imwepo mun’dzakhalambo wakutsimikiza kubvera Yahova. Kucita bzimwebzi kun’dzalimbisa uxamwali bwanu na Yahova na kukubwereserani cikondweso. Ndipo mun’dzafunambo kuwuza winango mafala ya Yahova. (2 Nkha. 34:18, 19) Mukambapfunza Bibliya, pinango imwepo mungazindikire njira zinango zakukulisira luso lanu pakutumikira Mulungu. Bzikakhala tenepo, citani bzomwe mungakwanise kuti mucinje bzinthu pa moyo wanu ninga momwe Josiya adacitira. w17.03 3:18, 19