Outubro

Yahova ni ‘Mulungu omwe ambapereka mphanvu ya kupirira na mtsangalazo.’ (War. 15:5) Iye ambabvesesa bwino sikuti kokha mabvuto yomwe timbagumana nayo, koma cikhalidwe cathu, makumbukidwe yathu, mpaka na kaumbidwe kathu. Tenepo, iye ngwabwino kwene-kwene pakutithandiza kuti tipirire. Kodi Mulungu an’dzatawira tani mipembo yathu kuti alimbise kupirira kwathu? Tikakumbira Yahova kuti atithandize kulimbana na mayezo, iye ‘an’dzafungulambo njira yakupulumukira.’ (1 Wak. 10:13) Kodi Yahova ambacita ciri-cense kuti amalisiretu mabvuto? Pinango-pense. Kawiri-kawiri iye ambakonza njira ‘yakuti [ife] tikwanise kupirira.’ Inde, Yahova ambatilimbisa kuti ‘tikwanise kupirira bzinthu bzensene ticikhala wakukondwa.’ (Wakol. 1:11) Pakuti iye ambadziwa kakonzedwe ka thupi lathu, makumbukidwe na bzakutsangalaza bzathu bza mkati, Yahova ambalekerera lini mabvuto kukula mpaka pomwe tingakwanise lini kukhala wakukhulupirika. w16.04 2:5, 6

Mafala ya Mulungu yambatiuza kuti timbabvere maboma ya wanthu, tsono yambatipfunzisambo kuti tin’funika kubvera Mulungu kuposa wanthu. (Mab. 5:29; Tito 3:1) Kodi mafalaya yankutsutsana? Ne napang’onopo! Mafalaya yambatithandiza kubvesesa pa nkhani ya kubvera maboma ya wanthu. Jezu adafotokoza bzimwebzi mwacigwatho pomwe adalewa mafala ya mu vesi la lero. Timbabvera maboma ya wanthu yomwe yankutonga, mwa kubvera malamulo yace, kulemekeza wanthu wace na kulipira mitsonkho. (War. 13:7) Tsono, maboma ya wanthu yakatiuza kuti tileke kubvera Mulungu, tin’funika kulamba mwa ulemu kucita bzimwebzo, ticipitiriza kuleka kutenga mbali pa nkhani za ndale za m’dzikoli. (Zai. 2:4) Tenepo, tin’funika lini kutsutsana na maboma ya wanthu yomwe Yahova ankuyalekera kuti yabakatonge; ndipo tin’funika lini kulimbisa kufuna dziko lathu ayai mabasa yace. (War. 13:1, 2) Ifepano timbacita lini cisankho, kuthamangira maudindo ya m’boma ayai kuyeza kucinja maboma. w16.04 4:1, 2

Akristau akambasaya kubvesesana bzimbafunika kawiri-kawiri kuimalisa nkhaniyo pawokha. Tenepo, Jezu adawona kuti nkhani zinango zingafunike kuti gwere liphatanidzidwe. (Mat. 18:15-17) Kodi cingacitike n’ciyani penu nyakuphonyayo walamba kubvera m’bale wace, mboni na gwere? Iye an’funika kuwonedwa ‘ninga munthu wa mitundu ndipo ninga nyakukhomesa mtsonkho.’ Nsiku zino, tilewe kuti iye an’funika kucosedwa m’gwere. Bzimwebzi bzinkulatiza kuti ‘pikado’ ikhali lini nkhani ya kundopitana mafala kwakucepa. M’mbuto mwace, bzimwebzi bzikhathandauza (1) pikado yomwe ingadasamalidwa pakati pa wanthu omwe akhadaphonyeranawo, ndipo bzikhaphatanidzambo (2) pikado ikulu yakuthemera kucosedwa penu yanesa kusamalidwa. Kuphonyaku kungaphatanidze cinyengo ayai kuipisa mbiri ya munthu thangwe ra magunkha. Mbali zitatu zomwe Jezu adafotokoza zakugumanika pa Mateu 18:15-17, zingaphatisidwe basa kokha pomwe mikhalidweyo ingabvume. w16.05 1:14

Bziripo bzinthu bzizinji bzomwe Bibliya limbalewa bzomwe ni bzakutonga lini caibzo. Mwa ciratizo, Bzinembo bzimbalewa lini mtundu wa bzakubvala bzomwe ni bzakuthemera kuna Mkristau. Kodi bzimwebzi bzinkulatiza tani nzeru za Yahova? Cikhalidwe na bzizolowezi bzimbacinja sikuti kokha mu mbali zakusiyana-siyana za dziko koma bzimbacinjambo na kupita kwa magole. Bzingadakhala kuti Bibliya limbalewa ndandanda wa mitundu ya bzakubvala na kubzidekesa, bzimwebzi bzingadakhala bziribe mphanvu nsiku zino. Pa thangwe libodzi-bodzilo, Fala lakufuliziridwa la Mulungu limbapereka lini mitemo ninga bzakutonga kuti Mkristau asankhule pakulewa bza mabasa, kusamalira thanzi na bzakutsangalaza. Kodi tingacite tani pa bzinthu bzomwe cakutonga ca m’Bibliya cimbaleweratu lini kuti mpsakuphonyeka ayai ne? Pa bzinthu ninga bzimwebzi, ni udindo bwathu kupenda mwakusamala ticicita cakusankhula comwe cimbabverana na bzomwe Mulungu ambafuna na bzomwe angasimbe, sikuti kucita cakusankhula cakufuna kwathu.—Psal. 37:5. w16.05 3:2, 6

Mwakusaya kupenukira, tensenefe tina mbali zomwe timbakomedwa nazo m’Bibliya. Winango ambakomedwa na mabukhu ya Mateu, Marko, Luka na Juwau, yomwe yambalatiza khalidwe labwino la Yahova ninga momwe lidawonekera mwa mwana Wace. (Ju. 14:9) Winango ambafuna mbali zomwe zimbalewa bza polofesiya ninga Cibvumbulutso, comwe cimbaleweratu bza ‘bzinthu bzomwe bzin’funika kucitika tsapanopa.’ (Cibv. 1:1) Kodi mbani wa ife omwe akanati agumana mtsangalazo na bukhu la Psalymo ayai kugumana nfundo zakuthandiza m’bukhu la Mimwani? Bibliya ni bukhudi lakuthandiza munthu ali-wense. Pakuti timbafuna Bibliya, timbafunambo mabukhu yathu yakufotoza Bibliya. Mwa ciratizo, timbatenda cakudya cauzimu comwe timbatambira kucokera m’mabukhu, m’mabroxura, m’marevista na bzinthu bzinango. Timbadziwa kuti makonzedwe ya Yahova yamweya yambatithandiza kuti tipitirize kukhala tceru mwauzimu, wakudyesedwa bwino na ‘wathanzi m’cikhulupiro.’—Tito 2:2. w16.05 5:1-3

Mzimu wakucena ungakwanise kutiumba mu njira zizinji. Mwa ciratizo, ungatithandize kukulisa makhalidwe yacikristau, yomwe yambadziwika ninga bzisapo bza mzimu wa Mulungu. Mbali ibodzi ya cisapoci ni lufoyi. Tina lufoyi na Mulungu ndipo timbafuna kumubvera na kubvuma kuti iye atiumbe, ticimbazindikira kuti mitemo yace njakunesa lini. Mzimu wakucena ungatithandizembo mwa kutipasa mphanvu zakuti tikwanise kulimbana na mzimu wakuipa wa dzikoli. (Wayef. 2:2) Mpostolo Paulo, pomwe akhali tswaka akhatsogoleredwa kwene-kwene na mzimu wakubzikuza wa atsogoleri wacipembedzo wacidjuda, tsono na kupita kwa nthawe adadzanemba kuti: ‘M’bzinthu bzense, ndimbagumana mphanvu kucokera kwa ule omwe ambandipasa mphanvu.’ (Waf. 4:13) Na tenepo, mbatikhaleni ninga Paulo, mwa kupitiriza kumbakumbira mzimu wakucena. Yahova an’dzaleka lini kubva mipembo yakucokera pansi pa mtima ya wanthu wakupfatsa.—Psal. 10:17. w16.06 1:12

Kuti Yahova akhale Mulungu wathu m’bodzi yekhayo, tin’funika kunamata iye yekha mwakupambulika. Kunamata kwathu iye kun’funika lini kugawanidwa na mirungu inango ne kupswipizidwa na nzeru ayai bzicito bza kunamata kwa mtundu munango. Tin’funika kukhala na makumbukidwe yakuti Yahova ni Mulungu lini omwe ali pakati pa mirungu mizinji; ndipo iye ngwapadzulu lini na wa mphanvu pakati pawo. Koma Yahova yekha ndiye an’funika kunamatidwa. Kuti tikwanise kunamata Yahova yekha, tin’funika kukhala wakusamala kuti tileke kulekerera cinthu ciri-cense kuti cikhale pa mbuto yomwe Yahova yekha ndiye an’funika kukhala. Kodi bzinthu bzimwebzi bzingakhale ciyani? Mu Bzakutonga Khumi, Yahova adauza padeca wanthu wace kuti an’funika lini kukhala na mirungu inango kupambula iye basi na kuti iwo akhafunika lini kunamata mitundu iri-yense ya bzifanikiso. (Bzak. 5:6-10) Nsiku zino, kunamata bzifanikiso kungacitike mu njira zizinji zomwe zinango mwa izo tingakwanise lini kuzizindikira. Koma bzomwe Yahova ambafuna bzikanati kucinja—iye akali ‘Yahova m’bodzi yekha basi.’—Mar. 12:29. w16.06 3:10, 12

Pomwe Pedru adabvunza penu tingadafunika kulekerera ‘mpaka kanomwe,’ Jezu adatawira kuti: ‘Ndinkuuza lini kuti kanomwe kokha, koma mpaka nthawe 77.’ Mpsakuwonekeratu kuti pamwepa Jezu akhathandauza kuti tin’funika nthawe zense kufunisisa kulekerera; ndipo bzimwebzi bzin’funika kukhala cinthu cakuyamba kucipfunza. (Mat. 6:14, 15; 18:21, 22) Ni bwino kukumbukira kuti tensenefe timbaphonya ndipo tingakalipise winango. Tikakumbukira kuti bzimwebzi bzimbaticitikirambo, tingateweze malango ya m’Bibliya ya kuyenda kwa ule omwe tidamuphonyera ticikayeza kucezerana naye. (Mat. 5:23, 24) Timbatenda pomwe winango ambatikoyera lini cakumtima, tenepo tin’funika kuwacitirambo bzibodzi-bodzi. (1 Wak. 13:5; Wakol. 3:13) Tikambazolowera kulekerera winango, Yahova an’dzatilekererambo. Inde, pakulewa bza kumalisa bzakuphonya bza winango, tin’dzakhala na moyo wacikristau omwe ngwa kutewezera momwe Baba wathu wa nsisi ambacitira na ifepano tikaphonya.—Psal. 103:12-14. w16.06 4:15, 17

Mu nthawe zakumalizira zino, wanthu wa Yahova ana basa la kupalizira ‘bzipsa bzabwino bza Umambo . . . pa dziko lense komwe kuna wanthu, ninga umboni kwa mitundu yense.’ (Mat. 24:14) Bzipsa bzabwino bza Umambo ni ‘bzipsambo bzabwino bza kudeka mtima kwa Mulungu.’ Mwa njira iponi? Bzisimbo bzense bzomwe tin’dzatambira mu Umambo bwa Mulungu, bzin’dzabwera thangwe ra kudeka mtima kwa Yahova. (Mab. 20:24; Wayef. 1:3) Paulo adatenda kwene-kwene kudeka mtima kukulu kwa Yahova mwa kupalizira na nyongo. Kodi tinkutewezera ciratizo ca Paulo? (War. 1:14, 15) Ninga wanthu wakuphonya timbagumana phindu thangwe ra kudeka mtima kukulu kwa Yahova m’mbali zakusiyana-siyana. Pakuti timbagumana phindu likulu, tina udindo bwa kupfunzisa winango momwe Yahova ambalatizira lufoyi lace. w16.07 4:4, 5

Nthawe ing’ono-ng’ono Jezu anati kufa, adacenjeza anyakupfunza wace katatu kense bza nkhani imweyi. (Ju. 12:31; 14:30; 16:11) Dyabu ambaphatisa basa cipembedzo cakunama kuti apumpswe wanthu. Ndipopa wanthu azinji nsiku zino ambabvera lini mapolofesiya ya m’Bibliya yomwe yambalewa mwakubveka bwino kuti cimaliziro ca dzikoli ciri pafupi. (Sof. 1:14) Kulewa cadidi, Sathani ‘ankumpsinkha makumbukidwe ya anyakusaya kukhulupira.’ (2 Wak. 4:3-6) Ninga bzakutewera, tikambayezera kuuza wanthu kuti cimaliziro ca dzikoli ciri pafupi na kuti Kristu tsapano ankutonga, azinji wa iwo ambafuna lini kutetekera. Napo kuti azinji alibe nayo basa mapolofesiya ya m’Bibliya, tin’funika lini kubvuma kuti bzicito bzawo bzititepese. w16.07 2:11, 12

Pa nsiku ya malowozi pomwe mwamuna na mkazi ankuyamba kuwonana, cikondweso cawo cimbakhala cakusaya kuleweka. Yahova, omwe Adayambisa malowozi, ambafuna kuti banja liri-lense likhale lakukondwa na kuti bzinthu bzifambe bwino pa moyo wawo wa banja, ndipopa iye adapereka malango ya nzeru mu Fala lace, Bibliya. (Mim. 18:22) Napo bziri tenepo, Bibliya limbatiuza kuti wanthu wakusaya kulungama omwe ankupita m’banja an’dzakhala na mabvuto, ayai ‘matsautso m’thupi mwawo.’ (1 Wak. 7:28) Kodi anyakulowolana angacepese tani mabvutoyo? Ndipo kodi akristau angacite tani kuti malowozi yawo yambawafambire bwino? Bibliya limbapfunzisa kuti lufoyi ni khalidwe lakufunika kwene-kwene. Koma ziripo njira zizinji za lufoyi zomwe wanthu wakulowolana an’funika kulatiza m’banja. Mwa ciratizo, iwo an’funika kulatizana lufoyi cairo la ubale pabodzi na lufoyi lomwe kokha limbalatizidwa kwa mwamuna na mkazi. Ndipo penu iwo ana wana, lufoyi pakati pawo likhale cinthu cakufunika kwene-kwene. Koma lufoyi lakutsogoledwa na mitemo ya m’Bibliya, ndilo lomwe limbacitisa kuti banja likhaledi labwino. w16.08 2:1, 2

Timotio akhapalizira kale kwa magole mazinji. Kodi n’thangwe ranyi iye akhafunika kukulisa njira yomwe akhapalizirira? Timotio akhadziwa kuti wanthu na mkhalidwe wa bzinthu bzimbacinja. Iye akhafunisisa kuti wanthu apitirize kumbamutetekera, tenepo akhapitiriza kucita bwino na kucinja njira yomwe akhawapfunzisira. Nsiku zino, tin’funika kucitambo bzibodzi-bodzi pakupalizira. M’mbuto zinango, timbagumana lini wanthu pamui tikambapalizira nyumba na nyumba. M’mbuto zinango, wanthu ambakhala ali pamui, koma tingafike lini pamui pawopo, pinango thangwe rakuti mpsakubvumizika lini kuti munthu ali-wense afike pamuipo. Penu ndimo momwe bziriri m’gawo lanu, kodi mungayezere njira inango yakuwafikira? Abale azinji na mpfumakazi ambacita basa laupalizi bwapadeca. Mwa ciratizo, iwo ambayenda ku mbuto zakupakirira komboyo, mbuto zakupakirira kanderendere, mbuto za malonda na mbuto zinango kuti akapalizirebzipsa bzabwino. w16.08 3:14-16

Yahova ambatipasa abale na mpfumakazi wa lufoyi omwe angatilimbise. (Waheb. 12:12, 13) Akristau azinji wakuyambirira adalimbisidwambo na abale wawo wauzimu. Kodi ifepano tingacitembo ciyani nsiku zino? Kukumbukirani momwe Aroni na Hura adathandiza kulimbisa manja ya Mozeji mwa kuphatirira manjayo pomwe Ajirayeri akhamenyana na Amaleki. (Kuf. 17:8-13) Nsiku zino, tinganyang’anembo njira zakuti tithandize wanthu winango. Abale wathu winango ambabonera thangwe ra ukalamba, mabvuto ya thanzi, kuzunzidwa na acibale wawo, kusunama ayai kufedwa. Tingalimbisembo maswaka yomwe kawiri-kawiri yambangingimiridwa kuti yacite bzinthu bzakuphonyeka ayai kuti yalinge bzinthu m’dzikoli. (1 Wat. 3:1-3; 5:11, 14) Nyang’anani njira kuti mulatize lufoyi lacadidi kuna winango pa Nyumba ya Umambo, mu utumiki, pomwe munkudya pabodzi ayai pomwe munkulewalewa pa mtedwe. w16.09 1:13, 14

Ni udindo bwathu kubvala mu njira yakulemekeza Yahova Mulungu wathu wakucena, mafala yomwe timbapalizira, kwa abale na mpfumakazi zathu zacikristau na wanthu wa mu dera lathu. (War. 13:8-10) Bzomwe timbabvala mpsakufunika kwene-kwene maka-maka pomwe tinkuyenda ku mitsonkhano yathu yacikristau na pomwe tinkupalizira. Tin’funika kubvala mu njira yakuthemera ninga wanthu omwe ambanamata Mulungu. (1 Tim. 2:10) Kulewa cadidi, bzakubvala bzinango mpsakuthemera pa mbuto inango koma kwinango bzimbakhala lini bzakuthemera. Bziribe basa komwe timbakhala, ifepano ninga Mboni za Yahova tin’funika kutcenkha kukhumudwisa winango na kabvalidwe kathu. Pomwe tinkuyenda ku mitsonkhano ya dera na yacigawo, bzakubvala bzathu bzin’funika kukhala bzakuthemera na bza saizi yabwino. Mwa njira imweyi tin’dzabzidziwikisa ninga Mboni za Yahova ndipo tin’dzakhala wakukonzeka kucitira umboni nthawe iri-yense. w16.09 3:7, 8

Nyumba caiyo imbatalidwa na kumangidwa na munthu omwe ana nzeru. Na tenepo, bzinthu bza moyo, bzomwe mpsakunesa kwene-kwene kuposa nyumba, alipo munthu wanzeru kwene-kwene omwe adabzitala acibzikonza. Imwepo mungaphatisembo basa kakumbukidwe kamweka kuti muthandize munthu omwe ambapenukira bza Bibliya. Ndipo zindikirani bzomwe iye ambakhulupira pa nkhaniyo. (Mim. 18:13) Penu iye ambakhulupira bza siyensiya, mupaseni bziratizo bza m’Bibliya bzakulatiza kuti bzomwe Bibliyalo limbalewa pa nkhani za siyensiya nthawe zense mpsacadidi. Wanthu winango angatokonyedwe na nkhani zakulatiza kuti Bibliya lina mapolofesiya yomwe yambakwanisikadi. Ayai mungawalatize malango yanzeru ya m’Bibliya yakugumanika mu Nkhani ya pa Phiri. Kumbukirani kuti cakulinga cathu n’kulimbana lini na wanthu, koma ni kuwathandiza kuzindikira cadidi. Abvunzeni mibvunzo yakuwathandizadi kubvesesa, ndipo mbalewalewani nawo mwakuderekha na mwaulemu, maka-maka penu munthuyo ni mkulu kuposa imwepo. Iwo an’dzafuna kulemekeza nzeru zanu. w16.09 4:14-16

Kuti muthandize alendo wakucokera ku dziko linango kukhala wakutsudzuka m’gwere, bzibvunzeni kuti: ‘Ndingadakhala kuti ine ndiri m’dziko lacilendo, kodi ndingadafuna kuti wanthu andicitire ciyani?’ (Mat. 7:12) Pirirani na wale omwe ankucinja cikhalidwe cawo kuti cibverane na cikhalidwe ca dziko lomwe ankukhalalo. Pa kuyamba, bzingakhale bzakunesa kubvesesa kakumbukidwe na kacitidwe kawo ka bzinthu. Koma m’mbuto mwa kudikhira kuti ambacite bzinthu ninga wanthu wa cikhalidwe cathu, ndobvumani momwe iwo aliri. Tikambakhala na nthawe ya kupfunza bza dziko na cikhalidwe ca alendowo, bzingatithandize kuti tiwadziwe bwino. Pa kunamata kwathu ninga banja, tingafufudze bza cikhalidwe ca alendo omwe abwera m’gwere ayai m’dera lathu. Njira inango ndiyo kuwacemera kuti tidzadye nawo ku mui kwathu. Yahova ‘adafungula kwa mitundu ya wanthu msuwo wa cikhulupiro,’ tenepo tingamutewezere mwa kutambira alendo omwe ni ‘abale wathu wa m’cikhulupiro.’—Mab. 14:27; Wag. 6:10; Djobi 31:32. w16.10 1:15, 16

Jezu Kristu adapirira mayezo makulu kwene-kwene ndipo adapitiriza kukhala wakukhulupirika kwa Yahova. Kodi n’ciyani cidamuthandiza kuti apirire? Pa Wahebereu 12:2, mpostolo Paulo adati: ‘Thangwe ra cikondweso comwe adamuikhira patsogolo pace, iye adapirira muti wakuzunzikira, iye alibe kucita thupo na manyazi, ndipo tsapano wakhala pansi ku boko la madidi la mpando wa umambo wa Mulungu.’ Patsogolo pace Paulo adalimbisa Akristau kuti ‘ambakumbukire na tceru’ ciratizo ca Jezu. Ninga Jezu, Akristau azinji wa magole dzana yakutoma adafa thangwe akhali wakukhulupirika kwa Yahova. M’bodzi wa iwo akhali Antipa. (Cibv. 2:13) Akristau amwewa adatambira kale mabaibai yawo, mwakusiyana na atumiki wa Mulungu winango wakale omwe ankudikhirira kudzatambira moyo pa dziko la pansi. (Waheb. 11:35) Pa nthawe yomwe Jezu adakhala Mambo mu 1914, Akristau wakudzozedwa omwe akhadafa adalamusidwa aciyenda kudzulu ndipo iwo pabodzi na Jezu an’dzatonga wanthu wa mitundu yense.—Cibv. 20:4. w16.10 3:12

Abereki winango ambatenda lini wana wawo ne kuwalimbisa thangwe iwo akhalimbisidwambo lini na abereki wawo. Wanthu akulu-akulu ambafunikambo kulimbisidwa, koma kawiri-kawiri bzimwebzi bzimbacitika lini. Tingalimbise winango mwa kuwatenda pa cinthu cinango comwe iwo acicita bwino. Tingalimbisembo winango mwa kuwauza kuti ana makhalidwe yabwino na kuwatsangalaza pomwe adasunama ayai ataya mtima. (1 Wat. 5:14) Pakuti kawiri-kawiri timbakhala pabodzi na abale na mpfumakazi zathu, tina mpata wa kuwauza mafala yakuwalimbisa. (Mpal. 4:9, 10) Bzibvunzeni kuti: ‘Kodi ndimbauza winango thangwe lomwe ndimbawalemekezera na kuwafunira?’ Kumbukirani bzomwe Bibliya limbalewa: ‘Mafala yakulewedwa pa nthawe yakuthemera njabwino kwene-kwene!’—Mim. 15:23. w16.11 1:3-5

Mulungu adaleweratu bza wanthu wace kuti: ‘Ndin’dzawaikha pa mbuto ibodzi ninga mabira m’thanga.’ (Mik. 2:12) Ndipo Iye akhadalewambo kuti wanthu wace angadadzapfunza cadidi ca m’Bibliya na kumutumikira mwakuphatana. Iye adalewa kuti: ‘Ndin’dzapasa wanthu cirewedwe cakucena kuti wense adzacemere pa dzina la Yahova, acimutumikira mwakuphatana.’ (Sof. 3:9) Mpsabwino kwene-kwene kutumikira Yahova mwakuphatana! Pomwe Akristau wa m’magole dzana yakuyambirira akhateweza malango ya m’Fala la Mulungu, magwere yawo yakhakhala yakucena, yamtendere na yakuphatana. (1 Wak. 1:10; Wayef. 4:11-13; 1 Pe. 3:8) Nsiku zino, wanthu wa Yahova mbakuphatana na wakulinganizika, ndipo iwo ankupalizirambo bzipsa bzabwino pa dziko lense la pansi. w16.11 2:16, 18

M’magole dzana yakuyambirira pambuyo pa Kristu, wanthu azinji akhapitiriza kuwerenga Bibliya m’cirewedwe cacigerego ayai cacilatini. Iwo akhandendemeza bzipfunziso bza m’Fala la Mulungu na bzipfunziso bza m’bzipembedzo. Pomwe wanthu winango akhazindikira kuti bzipfunziso bza bzipembedzo bzikhali bzakunama, iwo akhaleka kubziphatisa basa. Koma iwo akhauza lini winango bzimwebzo pakuti angadaphedwa. Na kupita kwa nthawe, wanthu azinji akhalewalewa lini pomwe cirewedwe cacigerego ayai cacilatini. Ndipo atsogoleri wabzipembedzo akhabvumiza lini kuti Fala la Mulungu lisanduliziridwe m’bzirewedwe bzomwe wanthuwo akhabzidziwa. Ali-wense omwe akhabvuma lini bzomwe cipembedzoco cikhapfunzisa akhapasidwa cirango cikulu. Akristau wakudzozedwa wakukhulupirika akhambatsonkhana pabodzi m’tumagulu tung’ono-tung’ono mwakabisira ndipo winango akhakwanisa lini kugumanika pa mitsonkhano yense. ‘Anyansembe wakukhulupirikawa’ akhakwanisa lini kunamata mwakulinganizika. Babulo Mkulu akhambapereka malamulo yakukhwima kwene-kwene! w16.11 4:8, 10, 11

N’cadidi kuti, tin’funika kutcenkha kucita pikado zikulu-zikulu ninga zomwe wanthu winango adazicita ku Kolinto. Tin’funika lini kupitiriza kucita bzinthu ninga bzimwebzi ticimbadikhira kuti Mulungu atilatize kudeka mtima kwace kukulu, acitilekerera. Tsono tani bza pikado zomwe zingawoneke ninga zing’ono-zing’ono? Kodi tinkutsimikiza kucita ciri-cense comwe tingakwanise kuti timbabvere Yahova pa bzinthu bzense? (War. 6:14, 17) Kumbukirani bza mpostolo Paulo. Iye adanemba kuti: ‘Ine ndine wathupi, wakugulisidwa ku pikado. Ndimbabvesesa lini thangwe ranyi ndimbacita bzinthu mwa njira imweyi. Pakuti ndimbacita lini bzinthu bzomwe ndimbafuna koma bzomwe ndimbawenga.’ (War. 7:14, 15) Paulo akhacita lini bzinthu bzakufotokozedwa pa 1 Wakolinto 6:9-11, koma iye adabvuma kuti akhali nyakuphonya. Iye akhafuna kukondwesa Yahova, ndipopa akhacita nyongo kuti aleke kucita bzinthu bzakuipa. (War. 7:21-23) Tin’funika kutewezera ciratizo cace ticicita nyongo kuti timbabvere Yahova. w16.12 1:15, 16

Njira yakuyamba yomwe tingatulire Yahova thupo lathu ndiyo kucita mpembo wakucokera pansi pa mtima. Mukakhala na thupo, baba wanu wakudzulu ambafuna kuti mumuuze bzense bzomwe bziri mkati mwa mtima wanu. Mukamala kucita bzense bzomwe mwakwanisa kuti mumalise bvuto, mpembo wakucokera pansi pa mtima un’dzakuthandizani. (Psal. 94:18, 19) Ninga momwe pa Wafiripo 4:6, 7 pambalewera, kodi Yahova ambatawira tani mipembo yathu yomwe timbaicita nthawe zense mwakucokera pansi pa mtima? Iye ambatithandiza kuti tikhale wakuderekha na kutcenkha makumbukidwe yakuphonyeka. M’mbuto mwa kukhala na thupo pabodzi na mantha, Mulungu ambatithandiza kukhala na mtendere wa mumtima omwe tingadakwanisa lini kukhala nawo. Abale wathu azinji pabodzi na mpfumakazi, ambakhala nawo mtendere wa mumtimayu. Imwepo mungakhale nawombo. ‘Mtendere wa Mulungu’ ungakuthandizeni kukunda cineso ciri-cense! Mungakhulupire kwene-kwene piciro la Yahova lakuti: ‘Leka kunyang’ana uku na uku na mantha, thangwe ine ndine Mulungu wako. Ndin’dzakulimbisa. Cadidi, ndin’dzakuthandiza.’—Zai. 41:10. w16.12 3:3, 4

Mozeji adalamba cuma ca ku Edjipito ndipo ‘adasankhula kuzunzidwa pabodzi na wanthu wa Mulungu, m’mbuto mwakucita bzinthu bzakudekeza bza kanthawe kakucepa bza pikado.’ (Waheb. 11:25, 26) Bwerani timbatewezere cikhulupiro ca atumiki wakukhulupirika wakale, ninga Mozeji, mwa kumbatenda mphaso yathu ya ufulu bwa kusankhula mwa kucita bzomwe Mulungu ambafuna. Bzimbawoneka ninga bzakupusa kuti munthu winango atisankhulire, tsono tikacita bzimwebzi, tingaluze cibodzi mwa bzisimbo bzakufunika kwene-kwene. Kodi cisimbo cimweco n’ciponi? Ni ufulu bwa kusankhula. Bibliya limbafotokoza bzimwebzi pa Bzakutonga 30:19, 20. Pa vesi 19, pambalewa bza ufulu bwakusankula bomwe Mulungu adapasa Ajirayeri. Ndipo pa vesi 20, timbawona kuti Yahova adawapasa mwayi wa momwe iwo angadalatizira lufoyi lawo kwa iye. Ifembo tingasankhule kunamata Yahova. Ndipo tina mwayi wakuphatisa basa ufulu bwathu bwa kusankhula, kuti tilemekeze Yahova na kulatiza kuti timbamufuna kwene-kwene! w17.01 2:10, 11

Yahova ambafuna kuti timbaphatise basa bwino luso lomwe iye adatipasa. N’thangwe ranyi? Thangwe iye ambatifuna ndipo ambadziwa kuti tikaphatisa bwino basa mphaso zomwe adatipasa, tin’dzakhala wakukondwa. Koma iye ambadziwambo bzomwe tingakwanise lini kucita. Mwa ciratizo, tingakwanise lini kumalisa kuperewera kwathu pabodzi na pikado na infa. (1 Wam. 8:46) Ndipo tingakwanise lini kutsogolera munthu winango, thangwe munthu ali-wense ana ufulu bwace bwa kusankhula. Napo penu tina luso ayai timbadziwa bzinthu bzizinji kwene-kwene, tin’dzakwanisa lini kundendemerana na Yahova. (Zai. 55:9) Nthawe zense tin’funika kubvuma kutsogoledwa na Yahova, ticikhulupira kuti iye an’dzaticitira bzinthu bzomwe tingakwanise lini kucita tekha. Tenepo, Yahova ambafunambo kuti timbakumbukire bzomwe tingacite kuti timalise mabvuto na kuthandiza winango. Tin’funika bzinthu bziwiri ‘kukhulupira Yahova, na kucita bzabwino.’ Tin’funikambo ‘kucita bzinthu mwakukhulupirika.’ w17.01 1:2-4

Davide adacemera Barzilai kuti akakhale ku nyumba ya mambo. Napo kuti umweyu ukhali mwayi ukulu, Barzilai adalewa kuti bzikhali bwino kupasa udindobo mwamuna munango wakucemeredwa Kimamu, omwe pinango akhali mwana wace. (2 Sam. 19:31-37) Kubzicepswa kudathandiza Barzilai kucita cakusankhula cabwino. Iye adazindikira kuti bzinthu pa moyo wace bzikhadacinja ndipo angadakwanisa lini pomwe kucita bzinthu ninga momwe akhacitira kale. (Wag. 6:4, 5) Tin’funika kukhala wakubzicepswa ninga Barzilai. Tin’funikambo kucita nyongo yakucitira Yahova bzinthu bzabwino bzomwe tingakwanise m’mbuto mwa kundotsungira bzomwe tin’funa ayai kubzindendemeza na winango. Bzimwebzi bziri bwino kwene-kwene kuposa kukhala na basa labwino ayai kukhala munthu wakubvekera. (Wag. 5:26) Penu ndife wakubzicepswa, tin’dzacita bzinthu pabodzi na abale wathu kuti titumbize Yahova na kuthandiza winango.—1 Wak. 10:31. w17.01 4:5, 6

Yahova ni Mulengi wakudabwisa. Bzinthu bzense bzomwe iye adakonza mpsabwino kwene-kwene. (Jer. 10:12) Yahova adaikha malire pa bzinthu bzense bzomwe adalenga. Iye adaikha malamulo m’cirengedwe na malamulo ya cikhalidwe. Iye adaikha malamuloya kuti cinthu ciri-cense ca m’cirengedwe ciphate bwino basa. (Psal. 19:7-9) Cinthu ciri-cense ca m’cirengedwe cina mbuto yace na basa lace. Mwa ciratizo, mphanvu ya kukwewa ya m’cirengedwe imbacitisa kuti mphepo ikhale pafupi na dziko la pansi ndipo imbasamalira nyanza na mikulo. Pangadasaika mphanvu imweyi, pa dziko la pansi pangadakhala palibe ca moyo ciri-cense. Malire yomwe Yahova adaikha yambacitisa kuti bzinthu bza m’cirengedwe bzikhale bzakulinganizika bwino. Bzimwebzi bzinkulatiza kuti Yahova ana cakulinga na dziko la pansi pabodzi na wanthu. Pomwe tiri mu utumiki, tingathandize wanthu kuti adziwe Mulengi wa bzinthu bzakudabwisa bza m’cirengedwebzi.—Cibv. 4:11. w17.02 1:4, 5

Kodi mbani munango omwe adathandizidwa na anjo? Bibliya limbalewa kuti ‘nduna ya gulu la anyankhondo la Yahova,’ omwe ni anjo adathandiza Djosuwe kuti akunde nkhondo yomwe akhamenyana na Akanani. (Djos. 5:13-15; 6:2, 21) Mu nthawe ya Mambo Ezekiya, acikunda wa Asiriya adafuna kupfudza Jeruzalemu. Tenepo, usiku bubodzi bokha, ‘anjo wa Yahova adabwera acipha amuna wakukwana 185.000.’ (2 Wam. 19:35) Wanjo mbakulungama. Koma wanthu omwe akhawathandiza akhali wakuperewera. Mwa ciratizo, pa nthawe inango Mozeji alibe kulemekeza Yahova. (Mirew. 20:12) Djosuwe alibe kuyamba kubvunza Mulungu bzomwe akhafunika kucita pomwe Agibeyoni adacita naye mpangano. (Djos. 9:14, 15) Pa nthawe inango, Ezekiya adabzikuza. (2 Nkha. 32:25, 26) Napo kuti amunawa akhali wakuperewera, Ajirayeri akhafunika kubvera utsogoleri bwawo. Ajirayeri akhawona kuti Yahova ankuphatisa basa anjo kuti athandize amunawo. Bzimwebzi bzinkulatiza kuti Yahova ndiye omwe akhatsogolera wanthu wace. w17.02 3:7-9

Kodi kulemekeza winango n’ciyani? Ni kucita nawo bzinthu mwaulemu na kulatiza kuti timbawakumbukira. Kawiri-kawiri, wanthu ambalemekeza wale omwe ambacita basa lakufunika ayai wale omwe ana udindo ayai mpando wakufunika kwene-kwene. Tsono pinango tingabzibvunze kuti, Mbani omwe tin’funika kumulemekeza ndipo n’thangwe ranyi tin’funika kumbacita bzimwebzo? Pa Cibvumbulutso 5:13 pambalewa kuti ‘Ule omwe adakhala pa mpando wa umambo’ na ‘Mwana wa Bira’ ambathemera kupasidwa ulemu. ‘Ule omwe adakhala pa mpando wa umambo’ ni Yahova. Bzakulengedwa bzauzimu bzakudzulu bzakulewedwa pa Cibvumbulutso kapitulo 4 bzimbatipasa thangwe libodzi lomwe Yahova, omwe ‘ambakhala na moyo kwa muyaya’ ambathemera kulemekezedwa. Ibzo bzimbalewa kuti: ‘Ndimwe wakuthemera Yahova, inde, Mulungu wathu, kupasidwa mbiri, ulemu na mphanvu, thangwe ndimwe mudalenga bzinthu bzense, ndipo mwa kufuna kwanu bzidawoneka ndipo bzidalengedwa.’—Cibv. 4:9-11. w17.03 1:1, 2

Nsiku zino, wanthu azinji ambatewera bzakufuna bza mtima wawo akambacita bzakusankhula. Koma kucita bzimwebzi kungabwerese ngozi. Bibliya limbaticenjeza kuti tin’funika lini kuthemba mtima wathu wakuperewera ayai makumbukidwe yathu pakucita bzakusankhula. Tin’funika lini kukhulupira mtima wathu thangwe ‘mtima umbapumpsa kwene-kwene kuposa cinthu ciri-cense, ndipo umbafuna kucita cinthu ciri-cense cakuipa.’ (Jer. 17:9) Bibliya limbafotokoza bziratizo bzizinji bza wanthu omwe adakhala na bzakutewera bzakuipa thangwe adathemba mtima wawo wakuperewera. (1 Wam. 11:9; Jer. 3:17; 13:10) Tsono, kodi pakucita bzakusankhula, n’ciyani comwe cingacitike tikatewera mtima wathu ticilekererambo kuti bzomwe tinkubva mu mtima, bzitsogolere makumbukidwe na bzicito bzathu? Mwa ciratizo, mpsakunesa kuti munthu omwe adakalipa ayai omwe ataya mtima acite cakusankhula cabwino. (Mim. 14:17; 24:10; 29:22; Mirew. 32:6-12) Pakucita bzakusankhula bzakufunikira, tin’funika lini kulekerera kuti mtima wathu utitsogolere. w17.03 2:12, 13

Tensenefe timbaphonya thangwe ndife wakuperewera. Timbatenda kwene-kwene Yahova thangwe adapereka cakulombolera ndipo ngwakukonzeka kutikhululukira. Tenepo tikakhala wakubzicepswa na kukungula pikado zathu, tingamukumbire kuti atikhululukire. Tingatsimikize kuti Yahova an’dzaticitira lini bzinthu ‘mwakubverana na bzakuphonya bzathu.’ (Psal. 103:10) Tenepo, tin’funika ‘kumutumikira na mtima wense.’ (1 Nkha. 28:9) Munthu omwe ambatumikira Mulungu na ‘mtima wakusaya kugawanika’ ambafuna kwene-kwene Yahova ndipo ambafuna kumunamata kwa muyaya. Mu Bibliya, fala lakuti ‘mtima’ kawiri-kawiri limbathandauza unthu bwathu bwa mkati. Bzimwebzi bzimbaphatanidza kakumbukidwe kathu, bzomwe timbafuna, bzomwe timbacita pa moyo wathu na thangwe lomwe timbacitira bzinthubzo. Napo ndife wakuperewera, tinganamate Yahova na mtima wakusaya kugawanika. Timbatumikira Yahova thangwe timbamufuna na mtima wense sikuti thangwe ra kungingimizidwa.—2 Nkha. 19:9. w17.03 3:1, 3

Kodi tin’dzacita ciyani, bzikadzakala kuti tacita cinthu cinango cabwino kwene-kwene ndipo wanthu winango acitititumbiza? Pinango Yahova angadzatilekerere pang’ono kuti atiwone. Koma bzomwe tin’dzacita bzin’dzalatiza bzomwe bziri mu mtima mwathu. Mwa ciratizo, m’bale angacite nyongo yakukonzekera bwino nkhani yace kuti akaifotokoze kuna abveseri azinji. Pambuyo pa nkhani yaceyo abale azinji ankumutumbiza thangwe wafotokoza bwino. Kodi iye an’dzacita tani na kutumbizidwako? Kumbukirani kuti pomwe Ezekiya adabzikuza, iye alibe kutenda momwe Yahova akhamuthandizirira. (2 Nkha. 32:24-27, 31) Na tenepo, ifepano tikambatumbizidwa, tingacite bwino kumbaphatisa basa mafala yomwe Jezu adayalewa yakuti: ‘Mukamala kucita bzinthu bzense bzomwe mukhadauzidwa kuti mucite, mbalewani kuti: “Ndife akapolo wapezi-pezi. Tandocita bzomwe tikhafunikira kucita.”’ (Lu. 17:10) Tikambakumbukira bza bzinthu bzizinji bzomwe Yahova adaticitira, bzin’dzatithandiza kutcenkha bzicito bzomwe iye ambawenga. Ndipo bwerani timbalewelewe mwa kutenda bza Yahova omwe ambathandiza wanthu wace na mtima wense. w17.03 4:12