Fevereiro

Nowe pomwe adauzidwa na Yahova kuti amange cingalawa, iye akhadziwa lini momwe angadacimangira. Tenepo, iye akhafunika kukhulupira Yahova ndipo Bibliya limbalewa kuti iye ‘adacitadi tenepoyo,’ Nowe adacita bzense ninga momwe Yahova akhadamuuzira. Kodi n’ciyani comwe cidacitika patsogolo pace? Nowe pabodzi na banja lace lense adapulumukira m’cingalawaco. Nowe, akhalimbo m’bereki wabwino. Kodi n’ciyani comwe cidamuthandiza? Ni kukhulupira nzeru za Mulungu. Nowe adapfunzisa bwino wana wace, aciperekambo ciratizo cabwino kwa iwo napo kuti kucita bzimwebzi kukhali kwakunesa m’nthawe imweire, cigumula ca madzi cinati kufika. (Ciy. 6:⁠5) Penu imwepo ndimwe m’bereki, kodi mungatewezere tani Nowe? Mwa kumbatetekera Yahova na kubvuma thandizo lace pakulera wana wanu. Ndipo mbaphatisani basa malango yakucokera m’Fala lace na yakuperekedwa na gulu lace. N’cadidi kuti nthawe zinango, mwana angasiye kutumikira Yahova, napo kuti abereki wace adacita nyongo yakumupfunzisa cadidi ca m’Bibliya. Tsono bzimwebzi bzikacitika, aberekiwo angakhale na cikumbu-mtima cakucena pakudziwa kuti adacita bzense bzomwe angadakwanisa kuti athandize mwana wawoyo, acimbadikhira kuti nsiku inango, mwanayo an’dzabwerera pomwe kwa Yahova. w18.03 30 ¶10-⁠11

Kodi imwepo mumbafuna kutambira alendo koma pa nthawe ibodzi-bodziyo mumbawona kuti mungakwanise lini? Pinango imwepo mumbacita manyazi ndipo muna thupo lakuti mulendoyo an’dzakomedwa lini na bzomwe mun’dzamucitira. Ayai pinango mulibe kobiri zizinji ndipo munkucita thupo kuti mun’kwanisa lini kutambira mulendoyo ninga momwe abale na mpfumakazi zinango zimbacitira. Tsono, dziwani kuti alendowo an’dzadekedwa lini na mawonekedwe ya nyumba yanu, koma na khonkho la pa muipo pabodzi na msangala zanu. Siyani kuti lufoyi likucitiseni kukhala na mzimu wakutambira alendo na kuti muleka kucita thupo. Dziwani kuti cinthu cakufunika kwene-kwene nthawe zense ni kumbalatiza msangala kwa alendo omwe abwera kumui kwanu. (Waf. 2:⁠4) Wanthu azinji ambakomedwa kufotokoza bzomwe adagumana nabzo pa moyo wawo, ndipo njira yabwino ya momwe tingadziwire bzimwebzi ni kumbawacemera kumui kwathu. Mkulu munango adati: “Kumbacemera abale wa m’gwere kuti abwere kumui kwangu kumbandithandiza kuwadziwa bwino, ndipo ndimbakhala na mpata wakudziwa momwe iwo adadziwira cadidi.” Mukambalatiza thupo kwa alendo wanu, mun’dzawona kuti wense an’dzakhala wakukondwa. w18.03 18 ¶15-​17

Abereki wacikristau azinji ambafuna kuti wana wawo ambacite bzakusankhula bzanzeru. Tsono wanawo akacedwa kubatizidwa mwakusaya mathangwe yakubveka, uxamwali bwawo na Yahova bungadjedjere. (Tiy. 4:​17) Koma wanawo anati kubazitidwa, abereki wanzeru an’funika kumbatsimikizira penu wana wawowo akonzekadi kukhala mteweri wa Kristu. Anyakunyang’anira dera winango, ambawona kuti wana azinji ambapfitsa magole 10 ayai 20 anati kubatizidwa napo kuti akulira m’banja lacikristau. Kawiri-kawiri, wanawa ambabziwona kukhala Mboni za Yahova, thangwe ambayenda ku mitsonkhano na mu utumiki bwakumunda mwakukhazikika. Pana mathangwe mazinji yomwe yambacitisa kuti wanawa aleke kubzipereka kwa Yahova na kubatizidwa. Mwa ciratizo, nthawe zinango abereki ambakumbuka kuti wana wawo akali ang’ono kwene-kwene, mwakuti angabatizidwe lini. w18.03 9 ¶1-2

Kuti tikhale ninga Kristu, tin’funika kumbakumbuka, kumbabvera nsisi winango na kumbacita bzinthu ninga momwe iye akhacitira. Jezu akhawona uxamwali bwace na Mulungu kukhala bwakufunika kwene-kwene kuposa cinthu ciri-cense. Tenepo, kutewezera Jezu kungaticitise kutewezerambo Yahova. Ndipopa mpsakufunika kwene-kwene kumbakumbuka ninga momwe Jezu akhakumbukira. Kodi tingacite tani bzimwebzi? Anyakupfunza wa Jezu akhawona momwe iye akhacitira bzakudabwisa, akhatetekera pomwe iye akhapfunzisa thimu la wanthu, akhawona momwe iye akhacitira bzinthu na wanthu wakusiyana-siyana ndipo akhawonambo momwe iye akhatsogoleredwera na makumbukidwe ya Yahova. (Mab. 10:​39) Nsiku zino, tingamuwone lini Jezu. Koma tikambawerenga na kukumbukira bza mabukhu ya Mateu, Marko, Luka na Juwau, timbafika pa kumudziwa bwino Jezuyo pabodzi na makumbukidwe yace. Bzimwebzi bzimbatithandiza kutewera ‘mathanya ya Jezu,’ bzomwe bzingaticitise kukhala ‘na makumbukidwe’ ninga yace.​​—⁠1 Pe. 2:​21; 4:⁠1. w18.02 20-21 ¶15-⁠16

Kucokera pa nthawe yomwe Adamu na Eva adayamba kukhala na wana, wanthu adapfunza bza Yahova mwa njira zitatu izi: Mwa kuwona cirengedwe, kucokera kwa atumiki winango wakukhulupirika wa Mulungu na kuwona bzakutewera bzabwino bzomwe akhakhala nabzo akambamubvera. (Zai. 48:​18) Mwa kuwona cirengedwe, Nowe adawona umboni bwakulatiza kuti Mulungu alipodi ndipo adapfunzambo bza makhalidwe yabwino yomwe Mulunguyo anayo. Mwa njira imweyi, Nowe adawona kuti Yahova ngwamphanvu, nakuti ndiye yekha Mulungu wacadidi. (War. 1:​20) Bzimwebzi bzidacitisa kuti Nowe aleke kundokhulupira kuti Mulungu alipodi, koma kumukhulupirambo na mtima wace wense. Iye adabva bza Yahova kucokera kwa adzinza wace. Lameki baba wace wa Nowe akhakhulupira Mulungu ndipo iye adabadwa pa nthawe yomwe Adamu akhana moyo. Yavu wace wa Nowe akhali Metusela, ndipo yavu wa Metuselayo akhali Jarede, omwe adadzafa patapita magole 366 pambuyo pa Nowe kubadwa. (Lu. 3:​36, 37) Nowe adakomedwa kwene-kwene na bzomwe adapfunzabzo ndipo bzimwebzi bzidamucitisa kufuna kutumikira Yahova.​​—⁠Ciy. 6:⁠9. w18.02 10 ¶4-5

M’bale ayai mpfumakazi akalewa ayai akacita cinthu comwe catikalipisa, ifepano tingasuname kwene-kwene. Tsono tani penu tinkuneseka kuyebwa bzomwe bzacitikabzo? Kodi tin’dzaphatisa basa nfundo za m’Bibliya ticimalisa bvutolo mwakamfulumize, ayai tin’dzakoya cakumtima? Tikatenga nthawe itali kuti tikhazikise mtendere na m’baleyo, na kupita kwa nthawe bzin’dzaneseratu kucita bzimwebzo. Kodi n’ciyani comwe mungacite kuti mukhazikise mtendere? Cakuyamba, imwepo mun’funika kupemba kwa Yahova. Mukumbireni kuti akuthandizeni kukalewalewa na mwanzanuyo mwa mtendere. Ndipo lekani kuyebwa kuti mwanzanuyo ni xamwalimbo wa Yahova. (Psal. 25:​14) Ndipo Yahova ambacita bzinthu na axamwali wace mwa lufoyi, tenepo iye ambafuna kuti ifepano ticitembo bzibodzi-bodzibzo. (Mim.  15:​23; Mat. 7:​12; Wakol. 4:⁠6) Caciwiri, munati kuyenda kukacezerana na mwanzanuyo, yambani mwakumbuka bwino bzomwe munkalewa. Ndipo lekani kukumbuka kuti iye adacita utowa kuti akukalipiseni. Ndipo kumbukirani kuti pinango imweyo mudacitambo cinthu comwe cidamucitisa kuti iye acite bzinthu bzomwe bzidakukalipisanibzo. w18.01 7 ¶15-⁠16

Atumiki wa Yahova adasiyana kwene-kwene na wanthu wa ku dzikoku, pakuti iwo ambalatiza lufoyi lacadidi kwa anzawo. Jezu adalewa kuti cakutonga caciwiri cakufunika kwene-kwene ni kufuna mwanzathu. (Mat. 22:​38, 39) Ndipo iye adalewambo kuti Akristau wacadidi angadadziwika thangwe ra kufunana wokha-wokha. (Ju. 13:​35) Tsono si bzokhabzi, iwo angadafika mpaka kufunambo anyamadulanthaka wawo. (Mat. 5:​43, 44) Jezu adalatiza kuti iye akhafunadi wanthu. Iye adalatiza bzimwebzo mwa kumbayenda mzinda na mzinda kuti akawapalizire bzipsa bzabwino bza Umambo bwa Mulungu. Ndipo iye adapenyesa azimola, adapoza anyakulemala na anyamapere na kufungulambo makutu ya ankhuthu. Jezu adalamusambo anyakufa. (Lu. 7:​22) Iye adapereka moyo wace kuti apulumuse wanthu. Jezu adatewezera bwino-bwinoletu lufoyi la Pai wace. Ndipopa, pa dziko lense la pansi, Mboni za Yahova zimbatewezera Jezu mwa kulatizambo lufoyi kwa anzawo. w18.01 30 ¶11-⁠12

Pinango imwepo mudabatizidwa pomwe mukhali tswaka, tsono cadidi n’cakuti palibe ali-wense wa ife omwe ambadziwa mabvuto yomwe an’dzagumana nayo kutsogolo. Tenepo, kuti mupitirize kukhala wakukhulupirika, nthawe zense mun’funika kumbakumbukira kuti piciro lomwe mudacita kuna Yahova, n’cinthu comwe mungacicinje lini. Bzimwebzi bzimbathandauza kuti mudapicira kutumikira Mtongi Mkululetu, bziribe basa bzomwe bzingacitikebzo, napo axamwali ayai abale wanu acisiya kumutumikira. (Psal. 27:​10) Pa cakucitika ciri-cense, mbakumbirani Yahova kuti ambakuthandizeni kupitiriza kuteweza piciro lomwe mudacita kuna iye. (Waf. 4:11, 12) Yahova ambafuna kuti mukhale xamwali wace. Koma pambafunika nyongo kuti mupitirize kulimbisa uxamwali bwanu na iye mucipitiriza kukonza cipulumuso canu. Pa Wafiripo 2:​12 pambati: “Pitirizani kukonza cipulumuso canu na mantha na kutetemera.’ Tenepo, tin’funika kukumbukira mwakusamala bzomwe tingacite kuti tipitirize kukhala pa uxamwali na Yahova nakuti tipitirizembo kukhala wakukhulupirika kwa iye. Ndipo tin’funika lini kumbandolewa kuti tin’cita bzimwebzo. Lekani kuyebwa kuti napo wanthu winango omwe adatumikira Yahova kwa magole mazinji alibe kupitiriza kukhala wakukhulupirika. w17.12 22 ¶4, 6-7

Yahova ambatipasa mwayi ukulu wakuthandizira basa la Umambo. Ndipo iye ambatitsimikizira kuti tikacita bzimwebzi, iye an’dzatisimba. (Malak. 3:​10) Yahova ambatipicira kuti tikakhala wanthu wakupasa, bzinthu bzin’dzatifambira bwino. (Mim. 11:​24, 25) Iye ambatiuzambo kuti tikakhala wanthu wakupasa, tin’dzakhala wakukondwa, thangwe ‘kupasa kumbabweresa cikondweso cikulu kuposa kutambira.’ (Mab. 20:​35) Tingapfunzise wana wathu pabodzi na anyakupfunza Bibliya, kukhala wanthu wakupasa mwa mafala na bzicito bzathu, acitambirambo bzisimbo bzizinji. Bzinthu bzense bzomwe tinabzo bzimbacokera kwa Yahova. Tenepo, tikambamubwezera, timbalatiza kuti timbamufuna nakuti timbalemekeza bzinthu bzense bzomwe iye adaticitira. Pomwe Ajirayeri adacita bzakupereka kuti amangire templo, iwo ‘akhakomedwa kucita bzakupereka bzaufulu, ‘ (1 Nkha. 29:⁠9) Tenepo, bwerani tipitirize kugumana cikondweso na mtsangalazo mwa kumbabwezera kwa Yahova bzinthu bzomwe iye adatipasa. w18.01 20 ¶18-⁠19

Cilamuso cakuyenda kudzulu cidayamba kucitika pambuyo pa Kristu kukhazikisidwa ninga mambo ayai pa nthawe ya kukhala kwace. Ndipo anyakudzozedwa omwe an’dzakhala akana moyo pa nthawe ya citsautso cikulu ‘an’dzatengedwa m’mitambo.’ (1 Wat. 4:​13-​17; Mat. 24:​31) Iwo akadzafa, ‘an’dzasandulika, m’tumphindi twakucepa, pa kupoira kwa maso, pa kulira kwa cimbututu cakumalizira.’ (1 Wak. 15:​51, 52) Nsiku zino, Akristau azinji wakukhulupirika mbakudzozedwa lini ndipo alibe kusankhulidwa kuti akatonge pabodzi na Kristu kudzulu. M’mbuto mwace, iwo ankudikhira ‘nsiku ya Yahova,’ nthawe yomwe iye an’dzamalisa uipi bwense pa dziko la pansi. Palibe omwe ambadziwa kuti ni lini maka-maka pomwe cimaliziro ca dzikoli cin’dzafika, koma bzakucitika bzinkulatiza kuti ciri pafupi. (1 Wat. 5:​1-⁠3) Mulungu akadzabweresa Dziko lace lipsa, kun’dzacitika cilamuso cinango. Pa nthaweyo, wanthu an’dzalamusidwa kuti akhale na moyo pansi pano, acidikhira kudzakhala wakulungamiratu ndipo an’dzafa lini pomwe. w17.12 13 ¶15, 18-⁠19

Tikambacita nyongo yakukhala wanthu wa lufoyi na wakudeka mtima, ifepano tin’dzakhala lini na njiru. Bibliya limbati: ‘Lufoyi limbapirira, licidekera mtima. Lufoyi liribe nsanje.’ (1 Wak. 13:⁠4) Kuti tireke kukhala na njiru, ifepano tin’funika kumbacita nyongo yakuwona bzinthu ninga momwe Yahova ambabziwonera. Tin’funika kumbawona abale na mpfumakazi zathu ninga bziwalo bza thupi libodzi, lomwe ni gwere lathu. Bibliya limbati: ‘Ciwalo cibodzi cikatumbizidwa, bziwalo bzinango bzense bzimbakondwambo naco pabodzi.’ (1 Wak. 12:​16-​18, 26) Tenepo, penu cinthu cabwino cacitikira m’bale wathu, ifepano tin’dzamucitira lini njiru, koma tin’dzadekedwa naye pabodzi. Kumbukirani ciratizo cabwino ca Jonatani, omwe akhali mwana wa Mambo Sauli. Jonatani alibe kucitira njiru Davide pomwe iye adasankhulidwa kukhala mambo m’mbuto mwa Jonataniyo. Koma iye adalimbisa Davideyo, acimuthandiza. (1 Sam. 23:​16-​18) Kodi tingatewezerembo lini ciratizo ca Jonatani? w17.11 29 ¶10-⁠11

Yahova adakoya mpangano wa cakutonga mu Bibliya kucitira ifepano. Iye alibe kucita bzimwebzo na cakulinga cakuti timbacite kupenda kacinthu kabozi-kabobzi ka mu cakutongaco ne, koma iye an’funa kuti timbakumbukire bwino-bwino nakuti timbaphatise basa ‘nfundo za cakutongaco,’ ayai mitemo yace. (Mat. 23:​23) Cakutonga ca Mozeji cina ‘bzinthu bzakubveseseka bwino na cadidi’ bzomwe bzimbatipfunzisa bzizinji pakulewa bza Yahova na mitemo yace. (War. 2:​20) Mwa ciratizo, mizinda yakuthawira yomwe imbafotokozedwa m’Cakutongaci, inkupfunzisa akulu wa gwere momwe angambayeruzire mwa ‘cirungamo cacadidi,’ ndipo inkutipfunzisambo kufunika kwa kumbalatizana ‘lufoyi lacadidi na nsisi.’ (Zak. 7:⁠9) Napo nsiku zino timbateweza lini cakutongaci, Yahova alibe kucinja. Tenepo, iye akadawona cirungamo na nsisi kukhala bzinthu bzakufunika kwene-kwene. Ni mwayi ukulu kwene-kwene kumunamata. Bwerani titewezere mikhalidwe yace yabwinoyi kuti iye atikhotcerere! w17.11 15-16 ¶2-3; 20 ¶18-⁠19

Abale omwe ambafotokoza nkhani pa pulatifomu an’funika kuwona Bibliya ninga cinthu cakufunika kwene-kwene comwe cimbatsogolere nkhani zawo. (Ju. 7:​16) Tenepo, mbasamalani kwene-kwene kuti muleke kumbacitisa wanthu kumbandokomedwa na kafotokozedwe kanu ka nkhani, bziratizo ayai mathere yomwe mumbayafotokoza pa nkhani yanu m’mbuto mwa kubvekesa nfundo za m’Bibliya. Ndipo mbakumbukiranimbo kuti kuwerenga mavesi ya m’Bibliya n’kwakusiyana na kupfunzisa mwakuphatisa basa Bibliya. Kuwerenga mavesi mazinji, kungacitise kuti wanthu aleke kuyakumbukira. Ndipopa, mun’funika kumbasankhula bwino mavesi yomwe mun’funa kuyaphatisa basa. Ndipo khalani na nthawe ya kuyawerenga na kuwona momwe mungayafotokozere bwino, muciwona bziratizo bzomwe bzingabverane na mavesiyo. (Neh. 8:⁠8) Ndipo mbawonani momwe nkhaniyo inkubveranira na mavesiyo. Ndipo kuposa bzense, kumbirani Yahova kuti akuthandizeni kuti mukafotokoze bwino makumbukidwe yace kucokera m’Bibliya.​​—⁠Eza. 7:​10. w17.09 24 ¶11-⁠12

Mu gole la 537 Kristu anati kubadwa, wanthu wa Yahova adatsudzulidwa ku ukapolo bwa ku Babulo bwa magole 70. Iwo akhafunisisa kubwerera ku Jeruzalemu kuti akamange pomwe templo na kukanamata Yahova mwakutsudzuka. Patapita gole libodzi, Ajirayeri adayamba kumanga pomwe templo. Padapita magole 16, koma templo ya Yahova ikhanati kumala kumangidwa. Na thangwe limweri wanthu wa Mulungu akhafunika kukumbusidwa kuti abwerere kwa Yahova acileka kumbandokumbukira bza iwo okha. Mu gole la 520, Yahova adatumiza mpolofeta Zakariya kuti akakumbuse Ajirayeriwo bza thangwe lomwe iye akhadawatsudzulira ku ukapolo bwa ku Babulo. Bzimwebzi bzinkubverana na dzina la mpolofetayu lomwe limbathandauza kuti “Yahova Adakumbukira.” Napo kuti Ajirayeri akhadayebwa bzomwe Yahova akhadawacitira, Mulungu adapitiriza kuwakumbukira. (Zak. 1:​3, 4) Yahova akhadapicira kuti angadawathandiza kubwezeresa kunamata kwakucena. Koma iye adawacenjeza kuti angadabvuma kunamata kwawoko kokha penu iwo angadamunamata mu njira yakuthemera. w17.10 15-16 ¶2-3

Adziwi wa nkhani za makumbukidwe ya munthu ambalewa kuti munthu akambalatiza nsisi ambakhala na thanzi labwino ndipo ambakhalambo pa uxamwali bwabwino na winango. Tikambathandiza wanthu omwe ankubonera, ifepano tin’dzakhala wakukondwa, tin’dzakhala na cidikhiro camphanvu, tin’dzakhala lini wakumbasunama ndipo tin’dzabzibva kukhala munthu wakufunika. Kulatiza nsisi kuli ninga mankhwala yakuciza. Tikambathandiza winango thangwe ra lufoyi, timbakhala na cikumbu-mtima cakucena thangwe timbadziwa kuti tinkucita bzomwe Yahova ambafuna. Nsisi zingatithandizembo kukhala abereki wabwino, kukhala mwamuna ayai mkazi wabwino m’banja na kukhala pa uxamwali bwabwino na anzathu. Ndipo munthu omwe ambalatiza nsisi kwa winango, kawiri-kawiri anzace ambamuthandizambo pomwe iye ankufunikira thandizo. (Mat. 5:⁠7; Lu. 6:​38) N’cadidi kuti kulatiza nsisi n’kwakuthandiza kwene-kwene kwa ifepano, tsono thangwe likulu lomwe timbalatizira nsisi ndakuti timbafuna kutewezera Yahova na kumupasa mbiri. Iye ni nsansa ya lufoyi na nsisi.​​—⁠Mim. 14:​31. w17.09 14 ¶16-⁠17

Ninga Mambo na Mkulu wa Ansembe, Jezu adapasidwambo basa ‘lakumanga templo ya Yahova.’ Mu 1919, Jezu adacita basa lakumangali mwa kutsudzula atumiki wa Mulungu ku bzipfunziso bzakunama bza Babulo Mkulu. Jezu adabwezeresa kunamata kwacadidi acisankhula ‘kapolo wakukhulupirika na wanzeru.’ Gulu la abale wakudzozedwali, limbatsogolera basa lakufunika kwene-kwene lomwe linkucitidwa pa bwalo la templo yauzimu la pa dziko la pansi pano. (Mat. 24:​45) Ndipo Jezu wakhala ankuthandizambo atumiki wa Mulungu kumbanamata mu njira yakubvumizika na yakucena. (Malak. 3:​1-⁠3) Jezu pabodzi na Akristau wakudzozedwa wakukwana 144.000, an’dzatonga ninga wamambo na wansembe kwa magole 1.000. Pa nthaweyo, iwo an’dzathandiza wanthu wakukhulupirika kukhala wakulungamiratu. Kuphampha kwa magole 1.000, atumiki wa Yahova okha ni omwe an’dzasala pansi pano, ndipo kunamata kwacadidi kun’dzakhazikisidwa pa dziko lense la pansi! w17.10 25 ¶15-⁠16

Munthu omwe wapha mwanzace mwa ngozi, akhafunika kuthawa mwakamfulumize kuti alekereredwe, aciyenda ku mzinda wakuthawira wa pafupi. (Djos. 20:⁠4) Iye akhafunika kupulumusa moyo wace mwa kuthawira mu mzindamo, acikhala m’mwemo mpaka kufa kwa mkulu wa ansembe. Kucita bzimwebzo kukhali kwakunesa kwa nyakupha munthuyo thangwe iye akhafunika kusiya basa lace na nyumba yace ndipo akhalibe pomwe ufulu bwakuyenda ku mbuto zinango. Koma kucita bzimwebzi kukhapulumusa moyo wace. Munthu omwe wakungula pa bzakuphonya bzace nsiku zino, ambafunikambo kucita bzinthu bzinango kuti alekereredwe na Mulungu. Iye an’funika kusiyiratu kucita bzinthu bzakuipabzo. Bzimwebzi bzimbaphatanidza kutcenkha bzinthu bzomwe bzingamutsogolere ku pikado ikulu. Tikacita nyongo yakusiya kucita pikado, tin’dzalatiza Yahova kuti tinkuzindikira kuphonya kwathuko nakuti timbadziwa kuti Yahova an’dzaticitira nsisi kokha tikasiya kucita bzakuipabzo.​​—⁠2 Wak. 7:​10, 11. w17.11 12 ¶10-⁠11

Yahova ambafuna kuti timbathandize abale wathu pa bzakusaya bzawo. (1 Ju. 3:​17) Koma tin’funika kukhala na mathangwe yabwino yakukhala na mtima wakutambira alendo. Tingabzibvunze kuti: ‘Kodi ni wanthu aponi omwe ndimbawacemera kumui kwangu, axamwali wa pa mtima okha na wale omwe ndimbawawona ninga kuti mbakufunika m’gwere? Kodi ndimbacemera kokha wale omwe ndimbawona kuti nsiku inango an’dzandicemerambo? Ayai ndimbacemera abale na mpfumakazi omwe ndimbawadziwa lini bwino na wale omwe akanati kundicitirambo cinthu ciri-cense?’ (Lu. 14:​12-​14) Kumbukirani bzakucitikabzi: Kodi mungathandize tani m’bale omwe wacita cakusankhula mwa kusaya kukumbuka bwino? Ayai tingacite ciyani penu munthu omwe tidamucemera kumui kwathu alibe kutitenda? Yahova ambatiuza kuti tin’funika kumbaphatisa basa malango ya m’vesi la lero. Tin’dzakhala wakukondwa tikambathandiza winango na mathangwe yabwino.​​—⁠Mab. 20:⁠35. w17.10 6 ¶12

Mkazi wa Potifari akhasirira Zuze thangwe iye akhali ‘mulumbwana wakudeka na wa thupi la mphanvu’ ndipopa iye adayeza kupumpsa Zuze kazinji kense. Tsono Zuze alibe kubvuma kupumpsidwako napo kuti adayezedwa kazinji kense. Ndipo pomwe mkazi ule akhanyanyiratu, Zuze adamuthawa. Kodi tingapfunze ciyani na ciratizo ca Zuze? Tinkupfunza kuti tin’funika kulimbana na mayezo yomwe yangaticitise kupswa malamulo ya Mulungu. (Mim. 1:​10) Winango pomwe akhanati kukhala Mboni za Yahova, adacita nyongo kuti asiye bza unzazi, kuledzera, kufumali, kumwa mankhwala yakudzungulumwisa msolo na bzinthu bzinango. Napo pambuyo pa kubatizidwa, iwo nthawe zinango angayezedwe na bzinthu bzimwebzi. Bzimwebzi bzikakucitikirani, kumbukirani momwe uxamwali bwanu na Yahova bungadzongekere, mukabvuma kupumpsidwa na mayezoyo. Mungacite bwino kukumbukira bzinthu bzomwe bzingakuikheni pa mayezo mucinyang’ana njira yakubzitcenkhera. (Psal. 26:​4, 5; Mim. 22:⁠3) Penu pana mayezo yomwe munkulimbana nayo kwa nthawe itali, kumbirani Yahova kuti akupaseni nzeru na kubziretsa kuti mukwanise kukunda mayezoyo. w17.09 5 ¶8-9

Tingakhalembo axamwali wa Yahova, tikakhala wacikati-kati pa nkhani za cuma ca m’dzikoli, ticimbatsungira kugumana cuma cauzimu. Bzimwebzi ndibzo bzomwe adacita Abalahamu. Pakuti akhafuna kukhala xamwali wa Yahova, iye adabvera Yahovayo ndipo adasiya mzinda wakudala wa Uri, acikakhala m’matendi. (Waheb. 11:​8-​10) Nthawe zense, iye akhakhulupira Mulungu, m’mbuto mwa cuma comwe akhanaco. (Ciy. 14:​22, 23) Jezu, adauza wanthu kuti ambatewezere cikhulupiro ninga cimweci. Iye adauza tswaka linango lomwe likhali lakudala kwene-kwene kuti: ‘Penu un’funa kukhala wakulungamiratu, ndoko ukagulise bzinthu bzako, ndipo kobirizo ukapase anyakusauka. Ukacita tenepoyo, un’dzakhala na cuma kudzulu, patsogolo pace ubwere udzakhale mteweri wangu.’ (Mat. 19:​21) Tsono tswakali likhalibe cikhulupiro ninga ca Abalahamu. Koma alipo wanthu winango omwe adakhulupira Mulungu. w17.07 6 ¶12

Na kupita kwa nthawe mbadwo za Abalahamu zidadzakhala mtundu ukulu zicikakhala m’dziko lakupiciridwa, koma bzimwebzi bzidacitika magole 430 pambuyo pa Abalahamu kuyambuka Mkulo wa Efrate. (Kuf. 12:​40-​42; Wag. 3:⁠17) Abalahamu adadikhira Yahova thangwe akhakhulupira kuti iye angadateweza mapiciro yace. Iye akhakhulupira Yahova. (Waheb. 11:​8-​12) Abalahamu adadikhira mwakukondwa napo kuti iye alibe kuwona kukwanisika kwa mapiciro yense ya Mulungu. Ndokumbukirani momwe Abalahamu an’dzakondwera m’paraizo akadzawerenga m’Bibliya nkhani ya moyo wace na ya banja lace. Ndokumbukiranimbo momwe iye an’dzakondwera akadzadziwa kuti adacita mbali yakufunika kwene-kwene pa kukwanirisa cakulinga ca Yahova pa nkhani ya Mesiya wakupiciridwa! Mwakusaya kupenukira Abalahamu an’dzawona kuti adacita bwino kudikhirira bzisimbobzo. w17.08 6 ¶10-⁠11

Mu Bibliya, ‘bzinthu bzakupswipiza’ bzimbaphatanidza bzinthu bzizinji kuposa bzakugonana. Ndipo bzingathandauze bzinthu ninga kufumali ayai kulewalewa nkhani zapezi-pezi. (2 Wak. 7:⁠1; Wayef. 5:⁠3, 4) Bzingathandauzembo bzinthu bzakuipa bzomwe munthu angacite pomwe ali yekha, ninga kuwerenga mabukhu yomwe yana nkhani zomwe zingamupase cikhumbo ca kugonana ayai kuwona mavidiyo ya bza maika. Ndipo bzinthu bzimwebzi bzingacitise munthu kufika pa kusenzekesa cidzo. Wanthu omwe kawiri-kawiri ambawona bzinthu bza maika ambakuza ‘bzikhumbo bza kugonana’ ndipo ambafika pa kuzolowera. Anyakufufudza nkhani winango, adalewa kuti munthu omwe adazolowera kuwona bzinthu bza maika ngwakundenderana na munthu omwe adazolowera kumwa mowa ayai na omwe ambaphatisa basa mankhwala yakudzungulumwisa msolo. Tenepo, mpsakudabwisa lini kuti cizolowezi ca kuwona bzinthu bza maika cimbakhala na bzakutewera bzakuipa ninga, kukhala wamanyazi, wa utofu pa basa, wakusaya cikondweso m’banja, kulambana ndipo nthawe zinango mpaka kufika pa kubzipha. w17.08 17 ¶8-9

Nyakunemba psalymo adanemba mafala yomwe yali padzuluya pakukumbukira bza kubwezeresedwa pomwe kwa Jeruzalemu. Kudziwa kuti Yahova angalimbise misuwo ya mzinda, kudacitisa nyakunemba psalymoyu kubzibva kukhala wakukhotcerereka. Bzimwebzi bzidamutsimikizirisa kuti Yahova angadakhotcerera wanthu wace. Pinango imwepo mungakhale na thupo thangwe ra mabvuto yomwe munkugumana nayo, tsono Yahova angakupaseni nzeru kuti mulimbane na mabvutoyo. Nyakunemba psalymo adalewa kuti Mulungu ‘ambatumiza lamulo lace pa dziko; fala lace limbathamanga mwa liwiro.’ Patsogolo pace nyakunemba psalymoyu adalewa bza matalala, acibvunza kuti: ‘Mbani omwe angalimbikire pa mphepo yace yakudjedjera?’ Iye adalewambo kuti Yahova ‘ambatumiza fala lace, matalalayo yacisungunuka.’ (Psal. 147:​15-​18) Mulungu wathu ambadziwa cinthu ciri-cense ndipo iye ambanyang’anira matalalayo na mphepo yakudjedjera kwene-kweneyo ndipopa, mwakusaya kupenukira, iye an’dzakuthandizani kulimbana na bvuto liri-lense lomwe mungagumane nalo. w17.07 19 ¶14-⁠15

Katongedwe ka Yahova n’kabwino kwene-kwene nakuti iye an’funika thandizo lathu. Iye ndiye wakuthemera kutonga cirengedwe cense. N’thangwe ranyi? Ni thangwe rakuti ndiye adalenga bzinthu bzense, kudzulu na pansi pano. Ndipopa iye ngwakuthemera kutonga wanthu wense na anjo wense. Sathani alibe kulenga cinthu na cibodzico. Tenepo iye alibe kuthemera kutonga cirengedwe cense. Ndipo Sathani pabodzi na Adamu na Eva adakhala apsiru pa kupandukira utongi bwa Yahova. (Jer. 10:​23) Kodi kukhala na ufulu bwakusankhula likhali thangwe lakuti iwo alambe utongi bwa Yahova? Ne. Ufulu bwakusankhula bumbapasa munthu ali-wense mpata wakucita bzakusankhula sikuti thangwe la kupandukira Mulengi wathu, Yahova. Kulewa cadidi, kupandukira Mulungu n’kuphatisa basa kuipa ufulu bwa kusankhula. Ninga wanthu, ifepano tin’funikira kutongedwa na kutsogoleredwa na Yahova. w17.06 21-22 ¶2-4

Tikambafuna kwene-kwene basa lathu lakupalizira, tin’dzakhala ninga mpostolo Paulo, ndipo tin’dzapitiriza kupalizira napo tigumane na cizunzo. (Mab. 14:​19-​22) Ciratizo pa nkhaniyi ni abale wathu wa ku Estados Unidos. Kuyambira m’gole la 1930 mpaka 1944, abalewa adazunzidwa kwene-kwene, koma iwo adapitiriza kumbapalizira. Pomwe atsogoleri wa boma adayeza kuwaletsa, abalewa adayenda ku nyumba ya mphala, ndipo adawina mirandu izinji. Mu gole la 1943, m’bale Knorr, adafotokoza bza mulandu ubodzi omwe tidawina ku nyumba ya mphala ya ku Estados Unidos. Iye adalewa kuti kuwinako kudakwanisika thangwe ra nyongo ikulu yomwe abale adacita yakukhala wakulimba mwauzimu pa nthawe ya mabvutoyi. Inde, lufoyi lathu pa basa lakupalizira lin’dzatithandiza kuleka kusiya basali napo pomwe tinkuzunzidwa. Tikambafuna kwene-kwene utumiki bwathu, tin’dzandocita lini thupo na nthawe zomwe timbapereka pa relatoriyo yathu, koma tin’dzacitambo ciri-cense kuti tipereke ‘umboni bwakukwanira bwa bzipsa bzabwino.’​​—⁠2 Tim. 4:⁠5. w17.06 12 ¶11-⁠12

Kukhala na lufoyi na Mulungu, kumbatithandiza kubvera malamulo yace, kupirira na kumbawenga bzinthu bzakuipa. (Psal. 97:​10) Tsono Sathani na dziko laceri ambacita nyongo yakutepesa lufoyi lathu kwa Mulungu. Wanthu wa m’dzikoli ambawona lufoyi m’njira yakuphonyeka. M’mbuto mwakufuna Mulungu, wanthu azinji ‘mbakubzifuna.’ (2 Tim. 3:⁠2) Iwo ambafuna kuteweza ‘cikhumbo ca thupi, cikhumbo ca maso na kubziwonesera pa bzinthu bzomwe munthu anabzo.’ (1 Ju. 2:​16) Mpostolo Paulo adacenjeza bza bvuto la kumbabzikondwesa tekha. Iye adati: ‘Kuikha makumbukidwe pa bzinthu bzakuthupi kumbathandauza infa.’ Thangwe ranyi? Thangwe omwe ambacita bzimwebzi ambakhala anyamadulanthaka wa Mulungu. (War. 8:​6, 7) Wanthu omwe ambamala nthawe izinji ya moyo wawo ankufuna cuma na kukwanirisa bzikhumbo bzawo bzakugonana, kawiri-kawiri ambakhala lini wakukondwa.​​—⁠1 Wak. 6:​18; 1 Tim. 6:​9, 10. w17.05 16 ¶5-6

Wanthu omwe ankukhala m’dziko lacirendo angadikhire lini kuti tiwacitire bzense, koma iwo angatende thandizo lathu. Kuthumizira bzimwebzi, alendowo an’funikambo kumbacita nyongo yakubzisamalira okha. Kucita bzimwebzi, kungawathandize kukhala wakulemekezeka acikhala pa uxamwali bwabwino na abale wawo. (2 Wat. 3:​7-​9) Tsono napo bziri tenepo, iwo an’funika basi thandizo lathu. Tin’funika lini kukhala na kobiri zizinji kuti tiwathandize. Bzomwe iwo angafune ni nthawe na lufoyi lathu. Mwa ciratizo, mungawalatize komwe angapakirire xapa ayai mbuto zomwe angagule bzakudya bzakusaya kuumira na bzakupasa thanzi. Mungawalatizembo komwe iwo angagule makina yakusonera ayai yakugwatira tsisi, kuti ayambe na basa lomwe lingawathandize kugumana kobiri. Ndipo mungawathandizembo kuti ambabzibve kuti mbakufunika mu gwere lawo lipsalo. Bzikakwanisika, mbayendani nawo pabodzi ku mitsonkhano. Mungawafotokozere njira yabwino yakupalizirira mu deralo ndipo mungambayende nawo mu utumiki bwa kumunda. w17.05 6 ¶11-⁠12

Wanthu azinji ambandolinga bzikhumbo bzawo na bzinthu bzakutsangalaza ndipo ambawona ninga kuti mpsakunesa kuikha bzinthu bzakuthupi pa mbuto yakuthemera. (1 Wak. 2:​14) Pakuti iwo ambakwanisa lini kukumbuka bwino-bwino, bzingakhale bzakuwanesa kusiyanisa bzabwino na bzakuipa. (Waheb. 5:​11-​14) Cikhumbo cawo pa bzinthu bzakuthupi cimbayenda cicithumizirika. Akambabzigumana bzomwe ambakhumbabzo, ndipo pomwe ambabzifunisisa. (Mpal. 5:​10) Koma pana cinthu cinango comwe tingacite kuti tilimbane na makumbukidwe yamweya. Kuwerenga Fala la Mulungu mwakukhazikika kun’dzatithandiza kuti tikwanise kukunda bvuto la kufunisisa bzinthu bzakuthupi. Jezu akhambakumbukira nzeru za Yahova ndipo bzimwebzi bzikhamuthandiza kulimbana na mayezo ya Dyabu. (Mat. 4:​8-​10) Nsiku zino, tin’funikambo kuphatisa basa Fala la Mulungu pa moyo wathu penu tin’funa kumalisa bvuto la kufunisisa bzinthu bzakuthupi. Bzimwebzi bzin’dzalatiza kuti timbafuna kwene-kwene Jezu kuposa bzinthu bzakuthupi. w17.05 26 ¶17