Abril

Kodi tingagumane tani phindu na basa lomwe akulu wa gwere ambacita? Ifepano tingacite bzimwebzi mwa kumbatewezera cikhulupiro na ciratizo cawo cabwino, ticimbateweza malango yomwe iwo atipasa kucokera m’Bibliya. (Waheb. 13:​7, 17) Akulu ambatifuna ndipo ambafunambo kuti ifepano tikhale pa uxamwali bwakulimba na Mulungu. Ndipo iwo akawona kuti tinkumbalova ku mitsonkhano ayai tinkutepa mwauzimu, iwo an’dzacita nyongo yakutithandiza mwakamfulumize. Iwo an’dzaceza nafe acititetekera, ndipo an’dzatilimbisa na kutipasa malango kucokera m’Bibliya. Kodi imwepo mumbawona thandizo lomwe akulu ambapereka ninga ciratizo cakuti Yahova ambakufunani? Nthawe zinango, bzingakhale bzakunesa kuti akulu atipase malango. Tenepo, kodi n’ciyani comwe tingacite kuti akulu ambatipase malango mwakusaya kunesa? Tin’funika kuhala wanthu wakubzicepsa, wakutenda na wakucezeka, ticimbawona thandizo la akuluwo ninga ciratizo ca lufoyi lomwe Mulungu analo kwa ifepano. Tikacita bzimwebzi, ifepano tin’dzagumana phindu na malangoyo ndipo akuluwo an’dzacita basa lawo mwakukondwa. w18.03 31 ¶15-⁠16

Mwana ali-wense ngwakusiyana na mwanzace, ndipo ali-wense ambakhwima mwakusiyana na mwanzace. Mwa ciratizo, wana winango ambabvesesa cadidi ca m’Bibliya mwakusaya kunesa, ambacita bzakusankhula bza nzeru ndipo ambabatizidwa akali ang’ono, pomwe winango ambadzabatizidwa atakula. Ndipopa, abereki wanzeru ambangingimiza lini wana wawo kuti abatizidwe, m’mbuto mwace, iwo ambawathandiza kuyenda patsogolo mwauzimu mwakubverana na luso lawo lakubvesesa bzinthu. Abereki ambadekedwa kwene-kwene wana wawo akambaphatisa basa mafala ya pa vesi ya nsiku ya lero. Tsono, iwo an’funika kumbakumbukira kuti cakulinga cawo n’cakuthandiza wana wawowo kukhala ateweri wa Jezu. Tenepo aberekiwo an’funika kumbabzibvunza kuti: ‘Kodi mwana wanguyu wafika pa msinkhu wakuti angabzipereke kwa Yahova na kubatizidwa?’ w18.03 10 ¶6

Tenepo, tikabvuma mcemo wa munthu omwe waticemera, tin’funika kucita nyongo ya kuuteweza, koma tingaleke kuuteweza kokha tikakhala na mathangwe yakubveka yakucitira bzimwebzo. Bzimwebzi mpsakufunika, thangwe munthuyo pinango wakonzekera kale kuti adzatitambire, tsono tikasaya kuyenda, nyongo yense yomwe wacita in’dzayenda papezi. (Mat. 5:​37) Wanthu winango akapasidwa mcemo na munthu ambaubvuma koma patsogolo pace ambadzaulamba thangwe rakuti acemeredwa pomwe na munthu munango omwe ambatsudzuka naye ayai omwe anabzo. Kodi kucita bzimwebzo kungakhale ciratizo ca lufoyi na ulemu? Ifepano tin’funika kumbatenda cinthu ciri-cense comwe munthu omwe adaticemerayo watipasa. (Lu. 10:⁠7) Ndipo tikawona kuti tin’kwanisa lini kuyenda kumui kwa m’bale omwe adaticemera, bzingakhale bwino kumudziwisa pakana nthawe, bzomwe bzin’dzalatiza kuti tinaye lufoyi. Mpsakufunika kwene-kwene kumbalemekeza cikhalidwe ca komwe timbakhala. M’madera manango, munthu ambalamba mcemo wakuyamba ayai waciwiri, pomwe manango, kulamba mcemo n’kusaya ulemu. Tenepo, ninga alendo, ifepano tin’funika kucita bzense bzomwe tingakwanise kuti tikondwese munthu omwe aticemerayo. w18.03 20 ¶20-⁠21

Kuti tikhale wanthu wauzimu, tin’funika kucita bzizinji kuposa kundokhala na cidziwiso ca m’Bibliya. (1 Wam. 4:​29, 30; 11:​4-⁠6) Tsono pakuti kundokhala na cidziwiso ca m’Bibliya n’kwakukwanira lini, kodi n’ciyani comwe tin’funika kucita? Tin’funika kupitiriza kulimbisa cikhulupiro cathu. (Wakol. 2:​6, 7) Njira ibodzi yakufunika kwene-kwene ni kupfunza bukhu lakuti Pitirizani Kufunidwa na Mulungu. Iro lingatithandize kuwona momwe tingaphatisire basa nfundo za m’Bibliya pa moyo wathu. Penu imwepo mudapfunza kale bukhuli, mungapfunze mabukhu manango yomwe yangakuthandizeni kukhala wakulimba m’cikhulupiro. (Wakol. 1:​23) Tin’funikambo kumbakumbukira nfundo zomwe tapfunzazo, ticimbakumbira Yahova kuti atithandize kuziphatisira basa pa moyo wathu. Tikapambula nthawe yakupfunza na yakukumbukira bzomwe tapfunzabzo, cakulinga cathu cimbakhale ca kufuna kukondwesa Yahova na kumubvera. (Psal. 40:⁠8; 119:​97) Ndipo tin’funikambo kumbatcenkha cinthu ciri-cense comwe cingatitazise kukula mwauzimu.​​—⁠Tito 2:​11, 12. w18.02 23-24 ¶7-9

Kuti tikhale na cikhulupiro ninga ca Nowe tin’funika kupfunza Fala la Mulungu, n’kwakufunika kwene-kwene kuti timbafune bzomwe tapfunzabzo, ticimbabziphatisira basa pa kucinja unthu bwathu na pakucita bzakusankhula bzabwino pa moyo wathu. (1 Pe. 1:​13-​15) Tikacita bzimwebzo, cikhulupiro cathu pabodzi na nzeru za Mulungu bzin’dzatikhotcerera ku mapumpso ya Sathani pabodzi na dziko laceri. (2 Wak. 2:​11) Wanthu azinji m’dzikoli, ambafuna bzinthu bza ciwembo pabodzi na bzinthu bzakuipa ndipo ambandofuna kukwanirisa bzikhumbo bzawo bzakuipa. (1 Ju. 2:​15, 16) Iwo alibe nabzo basa kuti tinkukhala kuphampha kwa dziko lakuipali. Tikasaya kukhala na cikhulupiro cakulimba, ifepano tingayambembo kukumbuka ninga iwo. Tsono lekani kuyebwa kuti pomwe Jezu adandendemeza nthawe yomwe tinkukhalayi na nsiku za Nowe, iye alibe kulewa bza ciwembo ayai makhalidwe yakuipa, koma adalewa bza ngozi ya kuleka kuikha bzinthu bzauzimu patsogolo. (Mat. 24:​36-⁠39) Bzibvunzeni kuti: ‘Kodi bzomwe ndimbacita pa moyo wangu, bzimbalatiza kuti ndimbadziwadi Yahova? Kodi cikhulupiro cangu cimbandithandiza kucita bzomwe mpsabwino pa maso pa Yahova na kupfunzisa winango bzomwe Mulungu an’funa kuti iwo acite?’ Mitawiro yanu pa mibvunzoyi, in’dzakuthandizani kuwona penu munkufambambo na Mulungu wacadidi ninga momwe Nowe adacitira ayai ne.​​—⁠Ciy. 6:⁠9. w18.02 11-12 ¶8-​10

N’cadidi kuti tingatalikiraneletu lini na munthu ali-wense omwe ana makhalidwe yakuipa, pakuti winango timbaphata nawo basa, kupfunza nawo ayai kukhala nawo m’nyumba ibodzi. Tsono tin’funikira lini kumbakumbuka ayai kumbacita bzinthu ninga iwo. Kodi n’ciyani cin’dzatithandiza kucita bzimwebzi? Kulimbisa uxamwali bwathu na Yahova mwa kupfunza Bibliya na kucitambo uxamwali na wanthu omwe ambafuna Mulungu. Ifepano tin’funikambo kuthandiza wanthu kupfunza bza Yahova. Tenepo, mbanyang’anani mipata yakuti mumbapalizire wanthuwo, ndipo mukakumbira thandizo kwa Yahova, mun’dzakwanisa kuthandiza wanthu pa nthawe yomwe iwo ankufunikiradi thandizolo. Tin’funika kumbabzidziwikisa kwa wanthu kuti ndife Mboni za Yahova, ndipo makhalidwe yathu yabwino yan’dzapasa mbiri Mulungu. Yahova ambatipfunzisa ‘kulamba makhalidwe yakuipa na bzikhumbo bza dziko, kuti tikhale wa makumbukidwe yabwino, wacirungamo na wakubzipereka kwa Mulungu’ m’dziko lino. (Tito 2:​11-​14) Tikatewezera Yahova, ticicitambo bzomwe iye ambafuna, wanthu an’dzawona bzimwebzo, ndipo winango angafike pakulewa kuti: ‘Tiniyenda namwe thangwe tabva kuti Mulungu anamwe.’​​—⁠Zak. 8:​23. w18.01 32 ¶17, 18

Kodi na mafalaya Paulo akhafuna kulewa kuti n’kuphonyeka kubzifuna tekha? Ne. Kubzifuna n’kwacibadwa ndipo ni Yahova caiyeyo omwe adatilenga tenepo. Jezu adati: ‘Umbafune mwanzako ninga momwe umbabzifunira wekha.’ (Mar. 12:​31) Kulewa cadidi, bzingakwanisike lini ifepano kufuna winango penu timbabzifuna lini tekha. Bibliya limbalewambo kuti: ‘Amuna ambafune akazi wawo ninga momwe ambafunira mathupi yawo. Omwe ambafuna mkazace, ambabzifunambo yekha, pakuti palibe munthu omwe adawenga kale thupi lace, koma ambalidyesa na kulisamalira.’ (Wayef. 5:​28, 29) Tenepo, bzinkuwonekeratu kuti n’kuphonyeka lini kumbabzifuna tekha. Khalidwe la kubzifuna lomwe limbalewedwa pa 2 Timotio 3:⁠2, ndacibadwa lini. Iro limbapitirira pa lufoyi lacibadwa lomwe tinalo ndipo limbasanduka dyera. Munthu omwe ambabzifuna kwene-kwene, ambabzikumbukira mwakunyanya kuposa momwe an’funika kubzikumbukirira. (War. 12:⁠3) Iye ambandocita thupo na iye yekha kuposa anzace. Ndipo bzinthu bzikasaya kufamba bwino, iye ambapasa mulandu anzace, m’mbuto mwakuzindikira kuphonya kwace. Munthu ninga umweyu ambakhala lini wakukondwa. w18.01 22 ¶4-5

Pomwe tinkupfunza Bibliya, timbakhala tinkutetekera Yahova ndipo tikambapemba timbakhala tinkulewalewa naye. Tin’funika lini kuwona mpembo ninga ‘cithumwa’ comwe cingatipase mwayi wakuti bzinthu bzitifambire bwino. Koma timbawone mpembo kuti ni njira yomwe timbalewalewera na Mulengi wathu. Kumbukirani kuti Yahova ambafuna kubva bzomwe imwepo mun’funa kulewa! (Waf. 4:⁠6) Tenepo, mukakhala na thupo ayai mukasunama thangwe ra cinthu cinango, tewezani malango ya m’Bibliya yakuti ‘pereka thupo lako kuna Yahova.’ (Psal. 55:​22) Abale wathu azinji ambawona kuti kucita bzimwebzi kumbawathandiza kwene-kwene. Ndipo bzimwebzi bzingakuthandizenimbo! Tin’funika lini kumbapemba kwa Yahova kokha pomwe tin’funa kukumbira thandizo. Nthawe zinango, timbakhala na thupo kwene-kwene thangwe ra mabvuto yomwe tinkugumana nayo mpaka timbayebwa bzinthu bzabwino bzomwe tinabzo. Tenepo, yezerani kucita ibzi: Nsiku zense mbakumbukirani bzinthu bzitatu bzomwe mungatendere Yahova, patsogolo pace mbacitani mpembo wakutenda bzinthu bzimwebzo. w17.12 24 ¶10-⁠11

Anyakupfunza wa Bibliya bzulu na bzulu ambabzipereka kwa Yahova, acibatizidwa. Ndipo azinji wa iwo, ni maswaka yomwe yakulira n’cadidi ndipo yambasankhula moyo wabwinoyu. (Psal. 1:​1-⁠3) Penu ndimwe m’bereki, pinango mumbadikhirira na mtima wense nsiku yomwe mwana wanu an’dzabatizidwa. (Onanimbo 3 Juwau 4.) Ndipo ninga m’bereki, imwepo mumbafuna kuti wana wanu ambadziwembo bzinembo bzakupambulika, bzomwe tsapano bzimbaphatanidza Bzinembo bza Cihebereu na bza Cigirego. Ndipo napo wana ang’ono, angapfunze bza wanthu na nkhani zomwe zimbafotokozedwa m’Bibliya. Ndipo gulu la Yahova limbakonza mabukhu, mabroxura na mavidiyo yomwe abereki angayaphatisire basa kuti apfunzise wana wawo. Wana wanu an’funika kudziwa bzomwe Bibliya limbalewa kuti akwanise kulimbisa uxamwali bwawo na Yahova. w17.12 15 ¶1; 16 ¶4

Pinango ndimwe mpfumakazi ndipo mwamuna wanu ambatumikira lini Yahova. Kodi n’ciyani comwe mungacite penu munkuwona kuti mwamuna wanuyo ankukucitirani lini bzinthu bzomwe akhafunika kucita ninga msolo wa banja? Pinango imwepo mungam’kalipire, koma kodi kucita bzimwebzo kungamalise bvutolo? Ndipo napo mucikhaladi na mathangwe yakubveka yakucitira bzimwebzo, kodi mungacitise mwamuna wanuyo kufuna kutumikira Yahova? Kulewa cadidi, iye angafune lini. Koma mucipitiriza kumulemekeza ninga msolo wanu wa banja, imwepo mungathandize banja lanulo kukhala la mtendere, mucilemekezesa Yahova. Ndipo ciratizo canu cabwino cingacitise mwamuna wanuyo kufuna kutumikira Yahova, mucidzatambira mabai-bai yanu pabodzi ninga banja. (1 Pe. 3:​1, 2) Ayai, pinango ndimwe m’bale ndipo mkazi wanu ambatumikira lini Yahova. Kodi n’ciyani comwe mungacite penu munkuwona kuti mkazi wanu ankukulemekezani lini? Penu imwepo munim’kalipira pakufuna kulatiza kuti ndimwe omwe mumbatonga pamuipo, kodi mkazanuyo angakulemekezenidi? Mpsakudziwikiratu kuti ne! Mulungu ambafuna kuti amuna ambafune akazawo ninga momwe Jezu ambacitira na gwere. Jezu omwe ni msolo wa gwere, nthawe zense akhapirira na kulatiza lufoyi kwa anyakupfunza wace. (Lu. 9:​46-​48) Mukatewezera Jezu, pinango na kupita kwa nthawe mkazi wanu angadzafunembo kutumikira Yahova. w17.11 30-31 ¶13-⁠14

Wanthu omwe ana makumbukidwe ya dziko, ambateweza lini mitemo ya Yahova ndipo tikasaya kusamala, nzeru zawozo zingayambe pang’ono na pang’ono kudzonga cikhulupiro cathu, ticiyamba kumbakhulupira nzeru zathu kuposa za Mulungu. Makumbukidweya yambagumanika pense-pense ninga m’ma TV ayai cikasi ca bzithunzi-thunzi, pa interneti, ku basa na ku xikola. Ndipo nsiku zino, wanthu azinji m’madziko manango ambalewa kuti ambakhulupira lini Mulungu. Tsono wanthu omwe ambakumbuka tenepoyo pinango ambakhala kuti anati akumbuka bwino bzakuti Mulungu alipodi, koma ambandokomedwa na ufulu bomwe iwo anabo bwa kucita bzomwe ankufuna. (Psal. 10: 4) Ndipo winango ambakumbuka kuti munthu wanzeru an’funika lini kukhulupira Mulungu kuti amutsogolere. Kodi mpsanzeru kukhulupira kuti kulibe Mulengi? Wanthu winango anganeseke kubvesesa mtawiro wa mbvunzoyo akaunyang’ana ku siyensiya. Koma mtawiro wace ngwakusaya kunesa. Kodi nyumba ingabzimange yokha? Ne na pang’onopo! Pambafunika munthu kuti aimange. w17.11 21-22 ¶2-4

Kodi n’thangwe ranyi mpsakufunika kwene-kwene kugumanika pa Cikumbuso? Thangwe libodzi ndakuti kugumanika pa mitsonkhano, ni njira ibodzi yakunamatira Yahova. Tinkutsimikiza kuti Yahova pabodzi na Jezu, ambawona nyongo yomwe ali-wense ambacita kuti akagumanike pa msinda wakupambulikayu, omwe umbacitika kabodzi pa gole. Tin’funa kuti Yahova na Jezu awone kuti tin’kucita bzense bzomwe tingakwanise kuti tidzagumanike pa Cikumbuso, kupambula penu bzinthu bzaneseratu. Tikambalatiza kuti mitsonkhano njakufunika kwene-kwene pa moyo wathu, tin’dzacitisa kuti Yahova apitirize kukoya dzina lathu mu ‘bukhu la cikumbuso.’ Bukhu limweri limbacemeredwambo ‘bukhu la moyo.’ Ndipo m’bukhuli muna madzina ya wanthu wense omwe Yahova an’funa kudzawapa moyo wakusaya kumala. (Cibv. 20:​15) Zikasala nsiku zakucepa kuti Cikumbuso cicitike, tin’funika kumbapambula nthawe ya kupemba na kukumbukira mwakusamala bza kufunika kwa uxamwali bwathu na Yahova.​​—⁠2 Wak. 13:⁠5. w18.01 10 ¶4-5

Nyakupha munthu mwa ngozi akhakhala wakukhotcerereka akapita mu mzinda wakuthawira. Pakulewa bza mizindayi, Yahova adati: ‘Mizindayo in’dzakhala yakuti mumbathawire.’ (Djos. 20:​2, 3) Yahova akhafuna lini kuti munthuyo adzatongedwe pomwe pa nkhani ibodzi-bodziyo. Ndipo nyakubwezera mulopa akhabvumizidwa lini kupita mu mzinda wakuthawirayo kuti akamuphe. Nyakuphayo akapita mu mzindamo akhakhotcereredwa na Yahova ndipo akhakhala wakutsudzuka. Iye akhaphata basa mu mzindamo, kuthandiza winango na kutumikira Yahova mwa mtendere. Ndipo akhakhalambo na moyo wabwino na wakukondwa! Atumiki winango wa Yahova omwe adacita pikado ikulu, ambapitiriza kubzipasa mulandu napo pambuyo pa kukungula. Ndipo winango mpaka ambafika pa kukumbuka kuti Yahova an’dzawalekerera lini na mtima wense pa bzomwe iwo adacitabzo. Penu imwepo mumbakumbukambo tenepo, taphata minyendo, dziwani kuti Yahova akalekerera munthu, iye ambacita bzimwebzo na mtima wense. Tenepo, lekani kumbabzipasa mulandu. w17.11 11 ¶6; 12-13 ¶13-⁠14

Njira yomwe ingatithandize kukulisa ciphatano cathu, ndiyo kukumbukira bza thandauzo la mkate na vinyu omwe umbaphatisidwa basa pa Cikumbuso. Tingacite bzimwebzi nsiku ya Cikumbuso inati kufika na pa nsiku ya cikumbusoyo. (1 Wak. 11:​23-​25) Mkate wakusaya bzakufufumisa, umbaimira thupi lakulungamiratu lomwe Jezu adapereka ninga nsembe. Ndipo vinyu mfuira ambaimira mulopa wace. Tin’funika kumbakumbukira kuti nsembe ya cakulombolera ya Jezu, imbalatiza lufoyi likulu lomwe Yahova na Mwana wace analo kwa ife. Mwa ciratizo, Yahova adapereka Mwana wace kwa ife ndipo Jezu na mtima wense adabvumambo kupereka moyo wace. Tenepo, tikambakumbukira bza lufoyi lawo, lufoyi lathu kuna iwo lin’dzathumizirika. Ndipo lufoyi lomwe tinalo kwa Yahova, lin’dzalimbisa ciphatano cathu. w18.01 13 ¶11

Yahova ambafuna kwene-kwene wanthu ndipo ambawawona kuti mbakufunika. Timbadziwa bzimwebzi thangwe iye adatumiza Mwana wace na cakulinga cakuti tidzakwanise kukhala na moyo wakusaya kumala. (Ju. 3:​16) Bzingadakhala kuti Yahova alibe kutipasa mapiciro ya bzinthu bzakutsogoloya, Sathani na anyakutsutsa winango angadawoneka ninga kuti akhalewa cadidi. Sathani adalewa kuti Yahova ambanama ndipo ambafunira lini wanthu bzinthu bzabwino nakuti ambatonga lini mwacirungamo. Anyakutsutsa ambanyozera mapiciro ya Yahova mwa kulewa kuti: ‘Kuli kuponi kukhala kwace kwakupiciridwako? Onani, kucokera nsiku yomwe abereki wathu adafa, bzinthu bzense bzinkupitiriza kukhala ninga momwe bzikhaliri paciyambi ca cirengedwe.’ (2 Pe. 3:​3, 4) Koma Yahova an’dzacita ninga momwe adapicirira. Iye ankutsimikizira kuti kudziwikisidwa kwa utongi bwace kun’dzaphatanidza kupulumusa wanthu wakubvera. (Zai. 55:​10, 11) Utongi bwa Yahova bumbatsogoleredwa na lufoyi. Na tenepo tingatsimikize kuti iye nthawe zense an’dzafuna ndipo adzalemekeza atumiki wace.​​—⁠Kuf. 34:⁠6. w17.06 16 ¶7

Pomwe Yahova adapicira bza cakulombolera, ninga momwe bzidanembedwera pa Ciyambo 3:​15, Iye akhawona ninga kuti nsembeyo ikhadaperekedwa kale. Ndipo pomwe padapita magole 4,000, Yahova adapereka Mwana wace wakubadwa-yekha kuna wanthu. (Ju. 3:​16) Timbatenda kwene-kwene Yahova thangwe ra lufoyi lace! Pakuti ndife wakuperewera, kodi tingakwanise kulatiza lufoyi lacadidi limweri? Inde, tingakwanise. Yahova adatirenga m’cifanikiso cace, lomwe ni luso la kumutewezera. N’cadidi kuti kwa ifepano, mpsakunesa kulatiza lufoyi lacadidi, koma mpsakukwanisika. Abeli adalatiza lufoyi lacadidi kwa Mulungu pomwe adapereka mphaso yabwino kwene-kwene pa bzinthu bzomwe akhanabzo. (Ciy. 4:​3, 4) Nowe adalatiza lufoyi lacadidi pomwe adapitiriza kupalizira mafala ya Mulungu kwa magole mazinji napo kuti wanthu akhamutetekera lini. (2 Pe. 2:⁠5) Ndipo Abalahamu adalatizambo kuti lufoyi lace kwa Mulungu likhali la mphanvu kuposa cinthu ciri-cense mwa kubvuma kupereka nsembe mwana wace wakufunidwa Izaki. (Tiy. 2:​21) Mwakundendemerana na amuna wakukhulupirikawa, ifepano tin’funikambo kulatiza lufoyi napo pomwe kucita bzimwebzo kungakhale kwakunesa. w17.10 4 ¶3-4

Mabasa ya Mkulu wathu wa Ansembe, Jezu, yambatipasa citsimikizo cakuti pikado zathu zin’dzalekereredwa nakuti angaticitire ‘nsisi na kutilatiza kudeka mtima kukulu pa nthawe yomwe tikufunikira thandizo.’ (Waheb. 4:​16) Tenepo, ifepano tin’funika kumbakhulupira nsembe ya Jezu. Mbakhulupirani kuti imwepo mungagumanembo nayo phindu. (Wag. 2:​20, 21) Ndipo mbakhulupirani kuti thangwe ra cakulomboleraco, Yahova ambalekerera pikado zanu. Mbakhulupiranimbo kuti cakulomboleraco cimbakupasani cidikhiro cakudzakhala na moyo wakusaya kumala. Kulewa cadidi, cakulombolera ni mphaso ya Yahova kwa imwepo! Ndipo Yahova akatilekerera pikado zathu, tin’funika lini kucita mantha kuti iye anganyan’gane mathangwe yakukumbukira pomwe pikado zomwe tidacita m’mbuyo ayai atiyeruze thangwe ra pikadozo. (Psal. 103:​8-​12) Tenepo tingakhale na citsimikizo cakuti Yahova an’dzatilekerera. w17.11 13-14 ¶14-​17

Usiku bwa Cilaliro ca Mbuya, Jezu adacita mpembo wakupambulika. Ndipo mu mpemboyo iye adalewa bza ciphatano comwe ciripo pakati pa iye na Baba wace. Iye adakumbira kuti anyakupfunza wace wense akhalembo wakuphatana. Yahova adatawira mpembo omwe Mwana wace adaucitayu. Kuposa mitsonkhano yense, Cikumbuso cimbalatiza kuti Mboni za Yahova n’zakuphatana, nakuti zimbakhulupira kuti Yahova adatumizadi Mwana wace. M’madziko manango, mpsacirendo wanthu wa mitundu yakusiyana-siyana kucitira mitsonkhano ya cipembedzo pabodzi ndipo napo bzicicitika, winango angawone ninga kuti mpsakusaya kuthemera. Tsono Yahova na Jezu ambawona bzinthu mwakusiyana na wanthu amwewa. Iwo ambadekedwa kwene-kwene akambawona ciphatano cathu pa nsiku ya Cikumbuso. Tsono ife ninga atumiki wa Yahova, timbadabwa lini na ciphatano cathu, thangwe Yahova akhadalewa kale bzimwebzi.​​—⁠Zakiy. 37:​15-​17; Zak. 8:​23. w18.01 11 ¶7-9

‘Anyakumanga’ omwe adalamba Mesiya ni atsogoleri wa Ajuda. Ndipo iwo adacita bzinthu bzizinji kwene-kwene sikuti kumulamba kokha ninga Kristu. Ajuda azinji adamulamba mpaka adangingimiza Pirato kuti amuphe. (Lu. 23:18-23) Kulewa cadidi, iwo ndiwo adacitisa kuti Jezu aphedwe. Penu Jezu adalambidwa aciphedwa, kodi iye angadakhala tani ‘mwala wakufunika wapakhona?’ Bzimwebzi bzingadacitika kokha penu iye angadalamusidwa. Mpostolo Pedru adawauza kuti: ‘Jezu Kristu Mnazareti ule, omwe imwepo mudamukhomerera pa muti, Mulungu adamulamusa kwa anyakufa.’ (Mab. 3:​15; 4:5-11; 1 Pe. 2:5-7) Pomwe Jezu adalamusidwa, adakhala mpulumusi wa wanthu.—Mab. 4:12; Wayef. 1:20. w17.12 matsa. 10-11 ¶6-9

Pakulewa bza citsautso cikulu comwe cinifika tsapanopapa, Jezu adati: Iwo an’dzawona Mwana wa munthu ankubwera m’dzaulu m’mitambo na mphanvu pabodzi na mbiri. Ndipo iye an’dzatumiza wanjo wace na kulira kwa mphanvu kwa cimbututu, ndipo iwo an’dzakonkhanisa anyakusankhulidwa.’ (Mat. 24:​29-​31) Jezu ‘an’dzakonkhanisa anyakusankhulidwa’ akadzatenga Akristau wense wakudzozedwa omwe an’dzakhala akali pansi pano, aciyenda nawo kudzulu. Bzimwebzi bzin’dzacitika kuphampha kwa citsautso cikulu koma nkhondo ya Armagedo inati kuyamba. Pa nkhondoyi, Jezu pabodzi na wa 144.000, an’dzamenyana na wamambo wa pa dziko la pansi, acidzakunda. (Cibv. 17:​12-​14) Cikumbuso comwe cin’dzacitika Jezu anati ‘kubwera’ kudzakonkhanisa Akristau wakudzozedwa, ndico cin’dzakhala cakumalizira. w18.01 14 ¶15

Kudzulu, Jezu ana moyo wamuyaya. (War. 6:⁠9; Cibv. 1:​5, 18; War. 6:⁠9; Wakol. 1:​18; 1 Pe. 3:⁠18) Ndipo Jezuyo adapicira anyakupfunza wace wakukhulupirika kuti iwo angadadzatonga naye pabodzi kudzuluko. (Lu. 22:​28-​30) Paulo adanemba kuti: ‘Kristu adalamusidwa kwa anyakufa, acikhala cisapo cakuyambirira kwa wale omwe adagona mu infa.’ Paulo adalewa kuti alipo winango omwe angadalamusidwa aciyenda kudzulu. Iye adati: ‘Ali-wense pa nthawe yace: Pakuyamba Kristu ninga cisapo cakuyambirira, patsogolo pace wale omwe mba Kristu pa nthawe ya kukhala kwace.’ (1 Wak. 15:​20, 23) Kuyambira mu 1914, ifepano tiri mu nsiku za ‘kukhala’ kwa Kristu ninga momwe bzidapiciridwira. Mpaka pano, nsikuzi zinkupitiriza ndipo tsapano dziko lakuipa lino linkufika kuphampha caiko. w17.12 11-12 ¶11; 13 ¶14-​16

Baba wathu wa lufoyi adasunamambo kwene-kwene thangwe ra infa ya atumiki wace ninga, Abalahamu, Izaki, Djakobi, Mozeji na Mambo Davide. (Mirew. 12:​6-⁠8; Mat. 22:​31, 32; Mab. 13:​22) Bibliya limbafotokoza kuti Yahova ankudikhira na mtima wense nthawe yomwe iye an’dzalamusa atumiki wace wakukhulupirikawa. (Djobi 14:​14, 15) Pa nthaweyo, iwo an’dzakondwa na moyo wa thanzi. Yahova adawawidwa kwene-kwene na infa ya Mwana wace wakuyamba kubadwa. Bibliya limbalewa kuti Mulungu ‘akhambakondwa kwene-kwene’ na Jezu. (Mim. 8:​22, 30) Kumbukirani msunamo omwe Yahova akhanawo pomwe adawona mwana wace ankufa na infa yakuwawa. (Ju. 5:​20; 10:⁠17) Tingatsimikize na mtima wense kuti Yahova an’dzatithandiza. Tenepo, tin’funika nthawe zense kupemba kuna iye ticimufotokozera momwe tinkubvera. Mpsakutsangalaza kwene-kwene kudziwa kuti Yahova ambabvesesa mabvuto yomwe timbagumana nayo nakuti ambatipasa mtsangalazo omwe timbafuna!​​—⁠2 Wak. 1:​3, 4. w17.07 10 ¶3-5

Wanthu bzulu na bzulu nsiku zino, ambakondwa kupereka kwa iye ‘bzinthu bzawo bzakufunika,’ ninga nthawe yawo, mphanvu na bzinthu bzakuthupi. Mwa njira imweyi, iwo ambakhala ankuthandizira templo yauzimu ya Yahova. (Mim. 3:⁠9) Yahova an’dzayebwa lini basa lathu na lufoyi lomwe timbaliratiza kwa iye. Mu nsiku zakumalizira zino, atumiki wa Yahova ankucita basa lakufunika kwene-kwene. Bzimwebzi bzinkukwanisika thangwe ra bzisimbo bza Yahova pabodzi na citsogozo ca Kristu. Timbakondwa kwene-kwene kucita mbali ya gulu la Yahova lomwe ndakuphatana, lakukhotcerereka na la muyaya. Na tenepo, mbatendani mwayi omwe munawo wakukhala pakati pa atumiki wa Yahova, ndipo ‘mbapitirizani kubvera fala la Yahova Mulungu wanu.’ (Zak. 6:​15) Mukacita bzimwebzo, imwepo mun’dzakhotcereredwa na Mambo wathu omwembo ni Mkulu wa Ansembe. Mbacitani bzense bzomwe mungakwanise kuti mumbathandizire kunamata kwacadidi, ndipo Yahova an’dzapitiriza kukusamalirani kuyambira lero mpaka kale-kale! w17.10 26 ¶18-⁠19

Wanthu wa ndale, wa bzipembedzo na anyamalonda wa m’dziko la Sathaniri, animala tsapanopapa. Mpolofeta Zakiyeri na Sofoniya, adaleweratu kuti oro na siriva, bzinthu bzomwe wanthu ambawona kuti ni bzakufunika kwene-kwene, bzin’dzakhala bzapezi-pezi. (Zakiy. 7:​19; Sof. 1:​18) Kodi mungabve tani mucifika kuphampha kwa moyo wanu m’dziko la Sathaniri, muciwona kuti mwaluza cuma canu cauzimu, thangwe ra kulinga cuma cakusaya kulungama ca m’dzikoli? Mwakusaya kupenukira, mungabzibve ninga munthu omwe adaphata basa kwa moyo wace wense kuti agumane kobiri zizinji, koma patsogolo pace wazindikira kuti kobiri zense zomwe anazo n’zacinyengo. (Mim. 18:​11) Bzinthu bzakuthupi bza m’dzikoli bzin’dzamala. Tenepo, mun’funika lini kuluza mwayi wa kuphatisa basa cuma canu cakuthupi kuti mukhale na axamwali kudzulu. Ndipo tikambathandizira Yahova pabodzi na Umambo bwace, tin’dzagumana cikondweso caico. w17.07 8 ¶16

Akristau winango ambabisa akacita pikado zikulu-zikulu. Pinango iwo ambacita bzimwebzi thangwe ra manyazi ayai kusaya kufuna kusunamisa winango. (Mim. 28:​13) Koma kubisa pikado ni kusaya lufoyi thangwe kumbabweresa mabvuto kwa nyakucita pikadoyo na winango. Thangwe ranyi tinkulewa tenepoyo? Thangwe ndakuti pakacitika pikado, Yahova angasiye kusimba gwere na mzimu wace wakucena, bzomwe bzingacitise kuti gwerero lireke kukhala pa mtendere. (Wayef. 4:​30) Tenepo Mkristau akacita pikado ikulu, penu ana lufoyi lacadidi an’dzayenda kukafotokozera akulu wa gwere bza pikadoyo, acipasidwa thandizo lomwe ankufunikira. (Tiy. 5:​14, 15) Lufoyi ni khalidwe lakufunika kwene-kwene kuposa mikhalidwe yense. (1 Wak. 13:​13) Iro limbathandiza wanthu kuzindikira ateweri wacadidi wa Jezu, na kuwona omwe ambatewezera Yahova, mwenekaciro wa lufoyi. Paulo adalewa kuti angadakhala kuti alibe lufoyi, akhali lini cinthu. (1 Wak. 13:⁠2) Ndipopa tensenefe tin’funika kupitiriza kulatiza lufoyi, sikuti na ‘mafala’ yokha koma ‘m’bzicito bzathu na mwacadidi.’​​—⁠1 Ju. 3:​18. w17.10 8 ¶17-⁠18

Zuze adakhala wakukhwimika pomwe mkazi wa Potifari akhamuyeza kuti agone naye. Iye akhadziwa kuti moyo wace ungadakhala pa ngozi angadalamba kugona nayeko. Koma m’mbuto mwa kubvuma bzomwe mkazi wa Potifari akhafuna, iye adakhwimika acilambiratu nthawe ibodzi-bodziyo. (Ciy. 39:​10, 12) Ciratizo cinango cakukhwimika, ni Rahabi. Pomwe azondi wa Jirayeri adafika ku mui kwace mu mzinda wa Jeriko, iye mwakukhwimika adapulumusa amuna awiriwo mwa kuwabisa pa mbuto yakukhotcerereka bwino. (Djos. 2:​4, 5, 9, 12-​16) Apostolo wakukhulupirika wa Jezu akhawona kukhwimika komwe Jezuyo akhakulatiza, na tenepo, pomwe Asaduki adadzawaletsa kupfunzisa bza Jezu, apostolowo alibe kubvuma bzimwebzo. (Mab. 5:​17, 18, 27-​29) Zuze, Rahabi, Jezu na apostolo adatsimikiza kucita bzinthu bzabwino. Iwo adakhala wakukhwimika, sikuti thangwe akhathemba luso lawo, koma thangwe rakuti akhathemba Yahova. Ifepanombo pa nthawe zomwe tingafunikire kukhala wakukhwimika, tin’funika kumbathemba Yahova, sikuti kubzithemba tekha.​​—⁠2 Tim. 1:⁠7. w17.09 28 ¶6-9

Tingakwanise lini kukunda unthu bwathu bwakale mwa mphanvu zathu zokha. Wanthu omwe adakwanisa kucita bzibwebzi adafunika kucita nyongo. Ndipo mphanvu ya Fala la Mulungu na mzimu wace wakucena, bzidawathandiza kuti acinje makhalidwe yawo. (Lu. 11:​13; Waheb. 4:​12) Kuti tigumane phindu na mphanvu imweyi, tin’funika kuwerenga Bibliya nsiku zense, kukumbukira bzomwe tawerengabzo, kupemba nthawe zense kuna Yahova kuti atipase nzeru ticicita nyongo ya kuphatisa basa bzomwe tapfunzabzo. (Djos. 1:⁠8; Psal. 119:​97; 1 Wat. 5:​17) Tingagumanembo phindu na Fala la Mulungu na mzimu wace wakucena tikambakonzekera na kugumanika pa mitsonkhano ya gwere. (Waheb. 10:​24, 25) Tin’funikambo kumbaphatisa basa njira zakusiyana-siyana zomwe Gulu la Yahova limbatipasira cakudya cauzimu pa dziko lense la pansi. (Lu. 12:⁠42) Tsono kukhundula unthu bwakale n’kwakukwanira lini, kuti tibvumidwe na Mulungu. Tin’funikambo kubvala unthu bupsa.​​—⁠Wakol. 3:​10. w17.08 20 ¶16-⁠17

Mambo Davide adacitiridwa bzinthu bzakusaya cirungamo kazinji kense. Yahova adasankhula Davide kuti akhale mambo wa Jirayeri pomwe iye akhali tswaka. Koma padapita magole 15 kuti Davide akhale mambo wa dzinza lace. (2 Sam. 2:​3, 4) Mkati mwa magole yamweya, Davide akhakhala wakubisala thangwe Mambo Sauli akhafuna kumupha. Bzimwebzi bzidacitisa kuti Davide aleke kukhala na nyumba. Iye akhakhala m’dziko lacirendo ayai mphako za m’dambo. Koma na kupita kwa nthawe Sauli adadzaphedwa ku nkhondo. Bzimwebzi bzitacitika, Davide adadikhira pomwe kwa magole manomwe kuti akhale mambo wa Jirayeri. (2 Sam. 5:​4, 5) N’thangwe ranyi Davide akhali wakukonzeka kudikhira mwakupirira? Iye akhadziwa kuti Yahova akhamufuna nakuti iye angadamuthandiza nthawe zense. Iye akhakumbukira bza momwe Yahova akhadamuthandizira mu nthawe za m’mbuyo na kumbakumbukira mabai-bai yomwe angadadzatambira pambuyo pa Yahova kumalisa mabvuto yomwe akhagumana nayo. (Psal. 13:⁠6) Davide akhadziwa kuti bzikhali bwino kudikhira bzisimbo bza Yahova. w17.08 7 ¶14-⁠15

Bzirewedwe bzimbacinja na kupita kwa nthawe, ndipo mafala manango yambadzakhala na thandauzo lakusiyana na momwe yakhaliri kale. Bzimwebzi bzidacitikambo na bzirewedwe bzakale-kale. Mwa ciratizo, Cihebereu na Cigirego comwe cinkulewalewedwa nsiku zino n’cakusiyana na comwe cikhalewalewedwa pomwe Bibliya lidanembedwa. Wanthu azinji ambabvesesa lini Bibliya lomwe lidanembedwa pakuyambirira, tsono kuti abvesese akhafunika kusandulizira. Winango akhawona kuti akhafunika kupfunza Cihebereu na Cigirego cakale kuti abvesese bwino Bibliyalo. Koma bzomwe iwo akhakumbuka bziribe kuwathandiza ninga momwe iwo akhafunira. Tinkukondwa kwene-kwene thangwe Bibliya lidasandulizidwa lense lathunthu ayai m’bzipande bzace pafupi-fupi m’bzirewedwe bzakukwana 3.000. Bzimwebzi bzinkulatiza kuti Yahova an’funa kuti wanthu wa ‘mitundu yense, madzinza yense na bzirewedwe bzense’ agumane phindu na Fala lace. (Cibv. 14:⁠6) Ndipo bzimbaticitisambo kuti tifune kwene-kwene Mulungu wathu, omwe ngwa lufoyi na wakusaya tsankhulo. w17.09 16 ¶4

Penu imwepo muna acibale omwe adacosedwa mu gwere, mun’funika kubziretsa kuti mutcenkhe kumbaceza nawo mwakusaya mathangwe. Kucita bzimwebzi kungakhale kwakusaya kunesa mukakumbukira kuti mun’funika kutewezera ciratizo ca Yahova na kucita bzomwe iye ankukuuzani kuti mucite. Ciratizo cinango cabwino n’ca Mambo Davide. Pomwe Sauli na Simeyi akhamuzunza, Davide alibe kukalipa ne kuphatisa basa mphanvu zace kuti awabwezere. (1 Sam. 26:​9-​11; 2 Sam. 16:​5-​10) Koma Davide akhali lini wakubziretsa nthawe zense. Timbadziwa bzimwebzi tikambawerenga bza pikado yomwe iye adacita na Bateseba na momwe adacitira bzinthu na Nabali pomwe adamuumira mtima. (1 Sam. 25:​10-​13; 2 Sam. 11:​2-⁠4) Na ciratizo ca Davide tingapfunze bzinthu bzizinji bzakufunika. Cakuyamba, omwe ambatsogolera wanthu wa Mulungu an’funika kukhala wakubziretsa kuti aleke kuphatisa basa mwakuphonyeka udindo bwawo. Caciwiri, munthu an’funika lini kubzithemba mwa kunyanya mwakukumbuka kuti angagwe lini na mayezo.​​—⁠1 Wak. 10:⁠12. w17.09 6 ¶12-⁠13