Junho

Yahova ambatilanga ndipo ambatipfunzisa thangwe ambatifuna. Iye ambafuna kuti tikhale naye pa uxamwali nakuti tikhale na moyo wamuyaya. Nthawe zinango malango yambaphatanidza bzinthu bzizinji sikuti kundopereka malangoyo. Ndipo penu munthu wacita pikado ikulu, angamale nthawe itali kuti akhale na udindo m’gwere. Napo bzimwebzi bzikacitika, malango yomwe yambaperekedwa yambalatiza lufoyi la Mulungu kwa munthuyo. Mwa ciratizo, malangoyo yangamuthandize kuwona kufunika kwa kukhala na nthawe izinji yakumbapfunza Bibliya, kumbakumbukira bzomwe ambapfunzabzo na kumbacita mpembo. Ndipo kucita bzimwebzi kungathandize munthuyo kukhala pa uxamwali bwakulimba na Yahova. (Psal. 19:⁠7) Na kupita kwa nthawe, iye angadzakhale pomwe na udindo bomwe akhanabo pakuyamba. Napo munthu akacosedwa m’gwere, cimbakhala ciratizo ca lufoyi la Yahova, thangwe bzimwebzi bzimbacitisa kuti gwere likhale lakukhotcerereka nakuti lireke kutokonyedwa na bzinthu bzakuipa. (1 Wak. 5:​6, 7, 11) Pakuti malango ya Mulungu nthawe zense njakulungama, iyo yambathandiza nyakucosedwayo kubvesesa kuipa kwa pikado yaceyo. Ndipo bzimwebzi bzingacitise munthuyo kukungula pikadoyo.​​—⁠Mab. 3:​19. w18.03 22-23 ¶5-6

Mcikunda wa Roma akhadziwa lini bza Fala la Mulungu. Tenepo, kuti akhale Mkristau, iye akhafunika kupfunza bza mapfunziso yakuyambirira ya m‘Bibliya, kubvesesa bzomwe Yahova ambafuna kwa atumiki wace na kubvera bzomwe Jezu adapfunzisa. (Mab. 16:​25-​33) Tsono, bzomwe iye adapfunza m’kanthawe kakucepa kale, bzidamucitisa kukhala na cikhumbo cakufuna kubatizidwa ndipo mwakusaya kupenukira, iye adapitiriza kupfunza bzizinji pambuyo pakubatizidwa. Tenepo abereki, kodi n’ciyani comwe mungacite mwana wanu akakuuzani kuti an’funa kubatizidwa thangwe rakuti ambafuna Yahova na kumubvera? Pinango imwepo mungamuuze kuti ayende kukafotokozera akulu wa m’gwere, kuti iwo awone penu iye an’themeradi kubatizidwako ayai ne. Ndipo ninga Akristau wense wakubatizidwa, iye an’dzapitiriza kupfunza bzizinji pakulewa bza Yahova pa moyo wace wense.​​—⁠War. 11:​33, 34. w18.03 11 ¶8-9

Tikambacita nyongo yakukula mwauzimu, mzimu wakucena ungatithandize kucinja makumbukidwe yathu, ndipo pang’ono na pang’ono tingayambe kumbakumbuka ninga momwe Kristu akhakumbukira. Mzimu wakucena ungatithandizembo kusiya bzikhumbo bzathu bzakuipa, ticikulisa makhalidwe yomwe yambakondwesa Mulungu. Kukhala na makumbukidwe ninga ya Kristu, kun’dzatokonya momwe timbacitira bzinthu kubasa ayai ku xikola, momwe timbalewalewera na momwe timbacitira bzakusankhula bzathu bza nsiku na nsiku. Ndipo bzakusankhula bzathu bzin’dzalatiza kuti tinkucita nyongo yakutewezera Kristu. Tikakhala wanthu wauzimu, ifepano tin’dzabvuma lini kuti cinthu ciri-cense cidzonge uxamwali bwathu na Yahova. Ndipo tikayezedwa kucita cinthu cakuipa, uzimu bwathu bun’dzatithandiza kuleka kugwa m’mayezoyo. Tinati kucita cakusankhula, tin’dzayamba tabzibvunza kuti: ‘Kodi ni nfundo ziponi za m’Bibliya zomwe zingandithandize pa nkhaniyi? Kodi n’ciyani comwe Kristu angadacita pa nkhaniyi? Kodi ni cakusankhula ciponi comwe cimbakondwesa Yahova?’ w18.02 25-26 ¶12, 14

Mu nthawe ya Inoki, omwe akhali yavu wace wa Nowe, wanthu akhacita bzinthu bzakuipa kwene-kwene. Iwo akhalewa ‘bzinthu bzakunyoza’ Yahova. (Juda 14, 15) Ndipo mu nthawe ya Nowe bzinthu bzikhadaipiratu, mwakuti ‘dziko likhadadzala na ciwembo.’ Pa nthawe imweire, wanjo wakuipa adabwera pa dziko la pansi na thupi la nyama, adalowola akazi acibereka wana omwe akhali waciwembo. (Ciy. 6:​2-4, 11, 12) Koma mwakusiyana na wanthu waciwembowo, Nowe akhacita bzinthu bzabwino. Bibliya limbalewa kuti ‘Nowe akhafunidwa na Yahova.’ Ndipo limbalewambo kuti ‘Nowe adafamba na Mulungu wacadidi.’ (Ciy. 6:​9) Kodi mafalaya yankutiuza ciyani pakulewa bza Nowe? Cakuyamba, kumbukirani bza nthawe yomwe Nowe adamala ankutumikira Yahova mwakukhulupirika m’dziko lakuipa lire, Cigumula ca Madzi cinati kufika. Padapita pafupi-fupi magole 600 sikuti kokha magole 70 ayai 80! (Ciy. 7:​11) Caciwiri, lekani kuyebwa kuti nthawe imweire kukhalibe gwere lomwe lingadamulimbisa ninga momwe bziriri na ife nsiku zino. Ndipo bzinkuwoneka kuti azibale wace akhatumikira lini Yahova. w18.02 4 ¶4-5

Munthu omwe ambafunisisa kobiri, kobiri zomwe anazozo zimbamukwanira lini. Iye ambafuna kobiri zinango ndipo ambacita nyongo ikulu kwene-kwene pa moyo wace kuti agumane zizinji. Bzimwebzi bzimbawabweresera ‘bzakuwawa bzizinji.’ (1 Tim. 6:​9, 10; Mpal. 5:​10) N’cadidi kuti tensenefe timbafunikira kobiri ndipo izo zimbatikhotcerera. (Mpal. 7:​12) Kodi tingakhaledi wakukondwa tikakhala na bzinthu bzakufunikira bzokha? Inde tingakhale! (Mpal. 5:​12) Aguri mwana wa Djake adati: ‘Lekani kundipasa umphawi ne cuma. Ndipaseni kokha cipande cangu ca cakudya.’ Tingabvesese thangwe race Aguri akhafuna lini kukhala wakusauka kwene-kwene. Iye adalewa kuti akhafuna lini kukhala wakusauka kuti aleke kufika pa kuba, thangwe kucita bzimwebzo, kungadanyozesa dzina la Yahova. Tsono, n’thangwe ranyi iye adakumbira Mulungu kuti aleke kumupasa cuma? Iye adati: ‘Kuti ndileke kukhuta ndicifika pa kulewa kuti, “Kodi Yahova ni mbani?” ’ (Mim. 30:​8, 9) Jezu adati: ‘Palibe kapolo omwe angakwanise kuphatira basa ambuya awiri; thangwe, an’dzawenga m’bodzi, acidzafuna munango; ayai an’dzabvera m’bodzi, acidzanyoza munango. Imwepo mungakwanise lini kuphatira basa Mulungu na kuphatira basa Cuma pa nthawe ibodzi-bodzi.’​​—⁠Mat. 6:​24. w18.01 24 ¶9-​11

Tingakulise ciphatano cathu, mwa kulekerera winango na mtima wense. Tikacita bzimwebzo, tin’dzalatiza kuti timbatenda kwene-kwene Yahova thangwe ambatikhululukira pikado zathu mwa kuphatisa basa nsembe ya Jezu. Kuti alatize kufunika kwa kulekerera winango, Jezu adafotokoza bza there la mambo m’bodzi omwe akhana akapolo wace. Taphata minyendo werengani Mateu 18:​23-​34 ndipo bzibvunzeni kuti: ‘Kodi ndimbacita bzomwe Jezu adapfunzisa? Kodi ndine wakupirira ndipo ndimbacita nyongo yakubvesesa momwe abale wangu ankubvera? Kodi ndimbalekerera wale omwe acita ayai alewa bzinthu bzomwe bzandikalipisa?’ N’cadidi kuti wanthu winango ambacita pikado zikulu kwene-kwene, ndipo bzimbakhala bzakunesa kwa ifepano ninga wanthu wakuperewera kuwalekerera na mtima wense. Koma there la Jezu limbatipfunzisa bzomwe Yahova ambafuna kuti ticite. Jezu adalewa kuti tin’funika kulekerera abale wathu akakungula na mtima wense. Ndipo tikasaya kulekerera abale wathu, Yahova an’dzatilekererambo lini. Nfundo imweyi tin’funika kumbaikumbukira bwino. Kuti tikulise ciphatano cathu, tin’funika kumbalekerera winango ninga momwe Jezu adatipfunzisira. w18.01 13 ¶12

Napo kuti kucita bzimwebzi kungadaikha moyo wace pangozi Danyeri adapitiriza kumbacita mipembo padeca kuti wanthuwo awone kuti iye alibe kusiya kutumikira Yahova. Yahova adasimba Danyeri thangwe ra kukhwimika na kukhulupirika kwace, ndipo pomwe iye akhafuna kuphedwa m’dindi mwa mphondolo, Yahova adamupulumusa mwakudabwisa. Bzimwebzi bzidacitisa kuti wanthu wa mu Utongi bwa Amedi na Aperisi apfunze bza Yahova! (Dan. 6:​25-​27) Kodi tingakhale tani na cikhulupiro ninga ca Danyeri? Kuti tikhale na cikhulupiro cakulimba, kundowerenga Bibliya n’kwakukwanira lini. Ifepano tin’funika kumbalibvesesa. (Mat. 13:​23) Ndipo tin’funikambo kudziwa bzomwe Yahova ambakumbuka na momwe iye ambabvera pa nkhani zakusiyana-siyana. Tenepo, kuti bzimwebzi bzikwanisike, ifepano tin’funika kumbakumbukira bzomwe tawerengabzo. Tin’funikambo kumbapemba nthawe zense, maka-maka tikagumana na mabvuto. Tikacita bzimwebzo, tingakhale na cikhulupiro cense cakuti Yahova an’dzatipasa nzeru pabodzi na mphanvu zomwe tamukumbira mu mpembo.​​—⁠Tiy. 1:⁠5. w18.02 12-13 ¶13-​15

Ninga tswaka lakubatizidwa na la kubzipereka kwa Yahova, imwepo mungalawidze muciwona kuti Yahova ngwabwino, akambakuthandizani kukhala wakukhwimika pomwe munkufotokozera winango bza cikhulupiro canu mu utumiki bwa kumunda ayai ku xikola. Bzingakhale bzakunesa kupalizira anzanu wa ku xikola. Pinango mungacite mantha mukakumbukira momwe anzanuwo angakutawirireni. Ndipo mungacitembo mantha kufotokoza bza cikhulupiro canu pamaso pa wanthu azinji. Kodi n’ciyani comwe cingakuthandizeni kuti mukhwimike kuwafotokozera bza cikhulupiro canu? Ni kumbakumbukira bza thangwe lomwe limbakucitisani kukhulupira bzomwe Bibliya limbapfunzisa. Ndipo penu mbali yakuti guias de estudo inkugumanika m’cirewedwe canu pa jw.org, mbaiphatisani basa. Mbali imweyi ingakuthandizeni kubvesesa bzomwe mumbakhulupira, thangwe lomwe mumbakhulupirira bzimwebzo na momwe mungafotokozerere winango bzimwebzo. Mukakonzekera bwino na kutsimikiza kuti bzimwebzo mpsacadidi, mun’dzakhala wakukonzeka kuuza winango bza Yahova.​​—⁠Jer. 20:​8, 9. w17.12 24-25 ¶12, 14-⁠15

Kundopfunzisa wana bza nkhani ayai bza wanthu wakufotokozedwa m’Bibliya, n’kwakukwanira lini. Kumbukirani kuti Timotio ‘akhakhulupira’ bzomwe akhadapfunzisidwa. Fala lakuti ‘kukhulupira’ lomwe Paulo adaliphatisa basa, m’Cigirego limbathandauza ‘kukhala na citsimikizo’ ayai ‘kutsimikizira kuti cinthu n’cacadidi.’ Timotio akhadziwa Bzinembo bza Cihebereu ‘kuyambira ali tcece,’ ayai kuyambira pomwe akhali mng’ono kwene-kwene. Pambuyo pakudziwa bzinembobzo, Timotio adatsimikiza kuti Jezu akhalidi Mesiya. Abereki, kodi mungathandize tani wana wanu kukhala na cikhulupiro ninga ca Timotio, kuti iwombo ‘ambakhulupire’ bzomwe ambapfunza? Cinthu cakuyamba comwe imwepo mun’funika kucita ni kukhala wakupirira, thangwe pambatenga nthawe kuti munthu akhale na cikhulupiro cakulimba. Ndipo dziwani kuti wana wanu sikuti an’dzakhala na cikhulupiro kokha thangwe rakuti imwepo munaco. Mwana ali-wense ambafunika kuphatisa basa ‘luso lace lakukumbuka’ kuti akhulupire bzomwe Bibliya limbalewa. (War. 12:⁠1) Ndipo ninga m’bereki, imwepo mungacite bzinthu bzizinji kuti muthandize wana wanu kulimbisa cikhulupiro cawo, maka-maka akambakubvunzani mibvunzo. w17.12 16 ¶3, 5-6

Marta, xamwali wa pamtima wa Jezu omwe akhalimbo nyakupfunza wace, akhadasunama kwene-kwene thangwe ra kufa kwa m’bale wace Lazaro. Kodi cikhalipo cinthu comwe cingadamutsangalaza? Inde, cikhalipo. Jezu adapicira Martayo kuti: ‘M’bale wako an’dzamuka.’ (Ju. 11:​20-​23) Marta akhakhulupira kuti anyakufa angadadzalamusidwa kutsogolo. Tsono Jezu adacita cakudabwisa. Iye adalamusa Lazaro pa nsiku imweyoletu. Ifepano timbadikhira lini kuti Jezu ayai Baba wace anilamusa anyakufunidwa wathu omwe adafa m’nsiku zathu zino. Koma ninga Marta, kodi imwepo mumbakhulupirambo kuti anyakufunidwa wanu an’dzalamusidwa? Pinango imwepo mudafedwa mwamuna ayai mkazi wanu, mai, pai, yavu ayai mwana wanu. Mwakusaya kupenukira mumbadikhirira na mtima wense nthawe yomwe mun’dzawakumbatira, kuceza nawo na kuseka nawo. Ndipo ninga Marta, imwepo muna mathangwe mazinji yakulewera kuti: ‘Ndin’dziwa kuti nyakufunidwa wangu an’dzalamusidwa.’ Tsono, ni bwino kuti Mkristau ali-wense ambabzibvunze mathangwe yomwe yambamucitisa kukhulupira bzimwebzi. w17.12 3 ¶1-2

Jezu akhafuna Cakutonga ca Mozeji. Bzimwebzi bzimbatidabwisa lini thangwe Cakutongaci cidaperekedwa na Baba wace, Yahova, omwe ni Munthu wakufunika kwene-kwene pa moyo wa Jezu. Lufoyi lamphanvu la Jezu pa malamulo ya Mulungu, likhadalewedweratu kale ninga momwe mafala ya m’vesi la lero yankulewera. Mwa mafala na bzicito, Jezu adalatiza kuti Cakutonga ca Mulungu n’cakulungama, cimbapasa phindu nakuti nthawe zense cimbakwanisika. (Mat. 5:​17-​19) Jezu adawawidwa kwene-kwene pomwe adawona anembi na Afarizeu ankuphatisa basa mwakuphonyeka Cakutonga ca Baba wace, thangwe iwo akhacitisa kuti Cakutonga ciwoneke ninga cakunesa kuteweza. Iye adawauza kuti: ‘Mumbapereka cakhumi ca tumbewu twa minti, diriri, na citowe,’ bzomwe bzikhathandauza kuti iwo akhacita nyongo ya kuteweza tunfundo tung’ono-tung’ono twa Cakutonga. Tsono ndiponi bvuto lomwe iwo akhanalo? Jezu adafotokoza kuti: ‘Tsono mumbanyoza bzinthu bzakufunika bza cirungamo, nsisi na kukhulupirika.’ (Mat. 23:​23) Afarizeu akhabvesesa lini thandauzo la Cakutonga ndipo akhabziwona ninga wakufunika kwene-kwene kuposa winango. Koma Jezu akhabvesesa thandauzo la Cakutonga na bzomwe mtemo uli-wense ukhalewa. w17.11 15 ¶1-2

Wanthu azinji ambalewa kuti: “Tin’funika kupfatsa na moyo ndipo mpsakuphonyeka lini wanthu akagonana napo akanati kulowolana.” Tsono Bibliya limbabvumiza lini upombo. (1 Wat. 4:​ 4-⁠8) Yahova ngwakuthemera kutipasa malamulo thangwe iye ni omwe adatirenga. Iye ambalewa kuti kokha mwamuna na mkazi omwe adalowolana ni omwe angagonane. Yahova adatipasa malamuloya thangwe ambatifuna. Ndipo iye ambadziwa kuti tikayateweza, moyo wathu un’dzatifambira bwino. Mabanja yomwe yambabvera malamulo ya Mulungu yambafunana, yambalemekezana ndipo yambakhala yakukhotcerereka. Koma Mulungu an’dzalanga wale omwe ambadziwa malamulo yace koma ambayaphatisa lini basa. (Waheb. 13:⁠4) Bibliya limbatiuza bzomwe tingacite kuti titcenkhe upombo. Iro limbatiuza kuti tin’funika kusamala na bzomwe timbawona. (Mat. 5:​28, 29) Tenepo, tin’funika kutcenkha kuwona bzinthu bza maika na kubvesera nyimbo zomwe zimbalewa bza unzazi.​​—⁠Wayef. 5:​3-⁠5. w17.11 23-24 ¶9-⁠10

Kuyambira kale-kale, atumiki wa Yahova akhala ankuphatisira basa nyimbo kuti amutumbize. Ndipo pomwe Ajirayeri akhali wakukhulupirika kwa Yahova, kuimba kukhacita mbali yakufunika kwene-kwene pa kunamata kwako. Mwa ciratizo, pomwe Davide adacita makonzedwe ya kumanga templo, iye adakonzekeresa Alevi wakukwana 4.000 kuti aimbe nyimbo zakutumbiza Yahova. Ndipo pakati pa wanthu amwewa, 288 akhali adziwi ‘omwe akhadapfunzisidwa kuimbira Yahova.’ (1 Nkha. 23:⁠5; 25:⁠7) Kuimba nyimbo kudacitambo mbali yakufunika kwene-kwene pa msinda wakufungulira templo. Bibliya limbati: ‘Anyakuliza bzimbututu na anyakuimba akhatumbiza na kutenda Yahova mwakuphatana. Ndipo muwira wa bzimbututu, simbi zakuimbira na bzakuimbira bzinango, ukhabvekera pomwe iwo akhatumbiza Yahova, . . . ndipo umbiri bwa Yahova bukhadadzaza nyumba ya Mulungu wacadidi.’ Ndokumbukirani momwe cikhulupiro ca Ajirayeri cidalimbira pa nthawe imweyi!​​—⁠2 Nkha. 5:​13, 14; 7:⁠6. w17.11 4 ¶4-5

Jezu akhadziwa kuti ni wanthu lini wense omwe angadabvuma bzomwe iye akhapfunzisa. Ndipo iye akhadziwambo kuti anyakupfunza wace akhafunika kukhala wakukhwimika thangwe wanthu winango angadadzawatsutsa. N’cadidi kuti cakulinga ca Jezu cikhali ca kupfunzisa wanthu cadidi ca Mulungu, sikuti kucitisa mabanja kukhala yakugawanika. (Ju. 18:​37) Tsono, anyakupfunza wace akhafunika kudziwa kuti kukhala mteweri wa Jezu kungadakhala kwakunesa, maka-maka penu axamwali wawo wa pa mtima ayai abale angadabvuma lini cadidi. Ndipo azinji wa iwo ambasekedwa ayai kulambidwa na wanthu wa m’banja mwawo, koma iwo ambapirira bzinthu bzensenebzi kuti akondwese Jezu. Ndipo ninga momwe Jezu adapicirira, iwo ambagumana bzinthu bzizinji kuposa bzomwe ambaluza. (Mar. 10:​29, 30) Ifepano timbapitiriza kufuna azibale wathu, napo penu iwo ambatitsutsa thangwe ra kutumikira kwathu Yahova. Tsono, timbakumbukire kuti tin’funika kumbafuna kwene-kwene Mulungu na Kristu kuposa munthu ali-wense. (Mat. 10:​37) Ndipo tirekembo kuyebwa kuti Sathani angaticitise kuleka kukhala wakukhulupirika kwa Yahova thangwe ra kufuna kwene-kwene abale wathu. w17.10 10 ¶3-6

Matsomphenyaya yankutipasa citsimikizo cakuti Yahova cipo acidzalekerera uipi bwa mtundu uli-wense pakati pa wanthu wace. Ndipo Yahova akawona cinthu ciri-cense cakuipa, mwakusaya kucedwa iye ambacita ciri-cense kuti acicose. (1 Wak. 5:​13) Ndipo anjo ule adalatiza bzimwebzi pomwe adagwanankhira combo cire mwakamfulumize na cigwanankhiro cakulemera. Mwakusaya kupenukira, matsomphenyaya yadabweresa mtsangalazo kuna Ajirayeri wa nthawe ya Zakariya, ndipo cikhali citsimikizo cakuti Yahova angadapitiriza kukhotcerera kunamata kwakucena! Matsomphenyaya yadakumbusa Ajuda kuti iwo akhafunikambo kucita mbali yawo kuti akhotcerere kunamata kwawo kwakucena. Uipi bumbabvumidwa lini ndipo bumbalekereredwa lini pakati pa atumiki wa Mulungu. Nsiku zino, Yahova adatipasa mwayi wakucita mbali ya gulu lace lakucena, ndipo m’mwemo timbabzibva kukhala wakufunidwa na wakukhotcerereka na iye. Tenepo ali-wense wa ifepano ana udindo bwakuthandizira kuti gululi lipitirize kukhala lakucena. Uipi bun’funika lini kugumanika pakati pa atumiki wa Yahova. w17.10 19-20 ¶14-15, 17-18

Mabukhu 39 yakuyambirira ya m’Bibliya yadanembedwa na Ajirayeri, wakucemeredwambo kuti Ajuda. Iwo ndiwo omwe adayamba ‘kupasidwa mafala yakupambulika ya Mulungu.’ (War. 3:​1, 2) Pakuyambirira iwo adanemba mabukhuya mu cirewedwe ca Cihebereu na Ciaramaiko. Koma pa kudzafika m’magole ya m’ma 300 Kristu anati kubwera, Ajuda azinji akhadzabvesesa lini Cihebereu. Thangwe ranyi? Thangwe ndakuti Alexandre Mkulu adakunda mbali ikulu ya dziko, tenepo utongi bwa Cigirego budathumizirika kwene-kwene. Patsogolo pace, Cigirego cidadzakhala cirewedwe cakulewalewedwa na wanthu azinji m’mbuto zomwe zikhatongedwa na Grécia ndipo wanthu azinji adayamba kulewalewa Cigirego m’mbuto mwa cirewedwe cawo cakubadwa naco. (Dan. 8:​5-7, 20, 21) Winango mwa wanthu amwewa akhali Ajuda, ndipo na kupita kwa nthawe iwo adadzaneseka kubvesesa Bibliya la Cihebereu. Kodi mamaliziro yace yadadzakhala yaponi? Yadadzakhala kusanduliziridwa kwa Bibliya kucokera m’Ciheberu kuyenda m’Cigirego, pomwe pakhadasala magole 250 kuti Jezu abadwe. Na nthawe, mabukhu manango yense ya Cihebereu yadadzasanduliziridwambo ndipo yadadzadziwika na dzina lakuti Septuaginta ya Cigirego. Limweri lidadziwika ninga Bibliya lakuyamba kusanduliziridwa kucokera mu Bzinembo bza Cihebereu. w17.09 17 ¶7-9

Patrau wanu angambakuuzeni kuti muphate basa na nthawe zakuthumizirika mu nsiku zomwe mumbacita kunamata ninga banja, mumbayenda mu utumiki bwakumunda na nsiku za mitsonkhano ya gwere. Penu bziri tenepo, mun’funika kukhala wakukhwimika kuti muuze patrau wanu kuti bzin’kwanisika lini ndipo mukacita bzimwebzi mun’dzapereka ciratizo cabwino kwa wana wanu. Pambafunika kukhwimika kuti abereki athandize wana wawo kuti akhalembo na bzakulinga bza kutumikira Mulungu acifika pa kubzikwanisa. Mwa ciratizo, abereki winango angacite mantha kuuza wana wawo kuti acite upainiya, kuyenda kukatumikira ku mbuto zomwe kunkufunikira apalizi azinji, kutumikira pa Beteli ayai kutumikira mu cimango. Pinango aberekiwo angacite bzimwebzi thangwe ra kugopa kuti angadzakwanise lini kuwasamalira akadzakalamba. Koma abereki wa nzeru ambakhala wakukhwimika ndipo ambakhulupira kuti Yahova an’dzateweza mapiciro yace. (Psal. 37:​25) Abereki omwe ambalatiza kukhwimika kumweku na kuthemba Yahova, ambathandiza wana wawo kuti ambathembembo Yahova.​​—⁠1 Sam. 1:​27, 28; 2 Tim. 3:​14, 15. w17.09 30 ¶14-⁠15

Kodi mungathandize tani wana wanu kuti ambakhale wakubziretsa? Abereki ambadziwa kuti wana wawo alibe kubadwa na khalidweri. Tenepo, kuti abereki apfunzise wanawo makhalidwe yabwino, an’funika kuyamba ndiwo kupereka ciratizo cabwino. (Wayef. 6:⁠4) Mukawona kuti wana wanu alibe khalidwe la kubziretsa, bzipendeni mwekha kuti muwone penu imwepo ndimwe wakubziretsa. Mungapereke ciratizo cabwino kwa wana wanu mwa kumbayenda mwakukhazikika mu utumiki bwakumunda, ku mitsonkhano ya gwere na kumbacita kunamata ninga banja. Ndipo bzikafunika, lekani kugopa kutsimula wana wanu akacita cinthu cakuphonyeka! Yahova adaikhira malire Adamu na Eva. Malireyo yangadawathandiza kuti ambalemekeze utongi bwa Yahova. Mpsibodzi-bodzimbo na abereki, iwo akambalanga wana wawo na kuwapasa ciratizo cabwino, bzingathandize wanawo kukhala wakubziretsa. Cinthu cinango cakufunika kwene-kwene comwe mungacite ni kupfunzisa wana wanu kuti ambafune utongi bwa Mulungu na kulemekeza malamulo yace.​​—⁠Mim. 1:​5, 7, 8. w17.09 8 ¶17

Atumiki wa Yahova an’dzapitiriza kugumana na mabvuto mpaka dziko la Sathaniri litapfudzidwa. Tensenefe pinango tingagumane na mabvuto ninga kuneseka kugumana basa, matenda makulu, cizunzo, malengwa ya pansi ayai kuberedwa bzinthu bzathu. Tenepo, kuti tikwanise kumbathandizana pa bzakucitika ninga bzimwebzi, ifepano tin’funika kukhala na nsisi. Nsisi zikulu zin’dzatithandiza kucitira bzinthu winango mwakudeka mtima. (Wayef. 4:​32) Makhalidwe yamweya yambacita mbali ya unthu bupsa, ndipo yangatithandize kutewezera Mulungu na kutsangalaza winango. (2 Wak. 1:​3, 4) Kodi tingadekere tani mtima abale wa m’gwere mwathu wakucokera m’dziko linango ayai omwe ankufunikira thandizo linango? Tingacite bzimwebzi mwa kuwatambira bwino, kucita nawo uxamwali na kuwalatiza kuti timbadekedwa kuwawona m’nyumba ya Umambo. (1 Wak. 12:​22) Ndipo Mboni zizinji zimbacitira nsisi wanthu wakucokera m’madziko manango ndipo zimbacita nyongo ya kupfunza cirewedwe cawo. (1 Wak. 9:​23) Nyongo yawo imbakhala na bzakutewera bzabwino. w17.08 23 ¶7-9

Yahova ambafuna kuti tikhale wakupirira na wakukonzeka kudikhirira. Kodi n’ciyani comwe cin’dzatithandiza kucita bzimwebzi? Tin’funika kukumbira mzimu wakucena wa Mulungu mu mpembo. Lekani kuyebwa kuti kupirira ni mbali ya cisapo ca mzimu wakucena wa Mulungu. (Wayef. 3:​16; 6:​18; 1 Wat. 5:​17-​19) Tenepo, timbakumbire Yahova kuti atithandize kukhala wakupirira! Timbakumbukirembo bzomwe bzidathandiza Abalahamu, Zuze na Davide kuti adikhirire kukwanisika kwa mapiciro ya Yahova. Iwo akhana cikhulupiro ndipo akhadziwa kuti Yahova angadateweza mapiciro yace. Ndipo akhambakumbukira lini bza iwo wokha na bzakufuna bzawo basi. Tikambakumbukira bzisimbo bzomwe iwo adatambira, ifembo tin’dzakhala na mtima wakudikhira. Napo tikugumane na bzineso pabodzi na mayezo, ndife wakutsimikiza kulatiza m’tima wakudikhirira mwakupirira. N’cadidi kuti nthawe zinango tingagumane na bzineso bzomwe bzingatiwawe kwene-kwene mpaka kufika pa kubvunza kuti: ‘Mpaka lini, Imwe Yahova?’ (Zai. 6:​11) Koma na thandizo la mphanvu ya mzimu wakucena wa Mulungu, tingalewembo mafala ya Jeremiya ya m’vesi laleroya. w17.08 8 ¶18-​20

Pomwe Jezu akhali mwana, mpsakupenukisa lini kuti iye akhasenzekambo. Ndipopa Bibliya limbalewambo kuti pana ‘nthawe yakuseka’ na ‘nthawe yakubzina.’ (Mpal. 3:⁠4) Jezu akhambapfunza bzinembo kuti alimbise uxamwali bwace na Mulungu. Pomwe iye akhana magole 12, apfunzisi mu tempwlo adadabwa naye thangwe ra ‘kubvesesa kwace bzinthu na matawiridwe yace.’ (Lu. 2:​42, 46, 47) Pomwe adakula, Jezu akhakondwa thangwe ra kucita bzomwe Mulungu adamuuza kuti acite. Mwa ciratizo, Mulungu akhafuna kuti Jezu ‘apalizire bzipsa bzabwino kwa wanthu wakusauka’ na ‘kufungula maso azimola.’ (Lu. 4:​18) Jezu akhakondwa kwene-kwene kupfunzisa wanthu bza Baba wace. (Lu. 10:​21) Pomwe adamala kufotokozera mkazi munango bza kunamata kwacadidi, Jezu adauza anyakupfunza wace kuti: ‘Cakudya cangu ni kucita kufuna kwa ule omwe adandituma na kumaliza basa lace.’ (Ju. 4:​31-​34) Jezu akhakondwa kwene-kwene thangwe akhafuna Mulungu pabodzi na winango. Imwepo mukacitambo bzibodzi-bodzibzi, mun’dzakhalambo wakukondwa. w17.07 22 ¶4-5

Pomwe Jezu akhali pa dziko la pansi, adatewezera makhalidwe yabwino ya Baba wace mwa mafala na m’bzicito. (Ju. 5:​19) Yahova adatumiza Jezu pa dziko la pansi kuti adzatsangalaze wanthu wa ‘mitima yakusweka’ na ‘wense omwe ankulira.’ (Zai. 61:​1, 2; Lu. 4:​17-​21) Wanthu akhadziwa kuti Jezu akhabvesesa kubonera kwawo nakuti iye akhafunisisa kuwathandiza. (Waheb. 2:⁠17) Bibliya limbalatiza kuti Jezu alibe kucinja. Iro limbati: ‘Jezu Kristu ni m’bodzi-bodziyo dzulo, lero mpaka kale-kale.’ (Waheb. 13:⁠8) Iye ambacemeredwa ‘Mtumiki Mkulu wa moyo’ thangwe iye adacitisa kuti tikhale na moyo wakusaya kumala. Jezu ambadziwa kuti kufedwa n’ciyani ndipo ‘angathandize wale omwe ankugumana na mayezo.’ (Mab. 3:​15; Waheb. 2:​10, 18) Jezu ambatokonyedwa akambatiwona tinkubonera. Iye ambabvesesa kusunama kwathu ndipo angatipase mtsangalazo ‘pa nthawe yakuthemera.’​​—⁠Waheb. 4:​15, 16. w17.07 10 ¶6-7; 11 ¶10

Tin’funika kumbawona cuma cathu cauzimu kukhala cinthu cakufunika kwene-kwene kwa ifepano. Tsono, tin’funika kusamala kwene-kwene kuti tireke kubvuma kuti Sathani pabodzi na dziko laceri atepese lufoyi lathu pa cuma cimweci. Tikasaya kusamala, tingapumpsike na bzinthu ninga kufuna basa la kobiri zizinji, kufuna kukhala na moyo wabwino kwene-kwene ayai kuyamba kubziwonesera na bzinthu bzomwe tinabzo. Mpostolo Juwau ambaticenjeza kuti dzikoli lin’pfudzidwa tsapanopapa pabodzi na bzinthu bzace bzense. (1 Ju. 2:​15-​17) Ndipopa, tin’funika kupitiriza kumbatenda cuma cauzimu comwe tinacoci, ticimbacikhotcerera. Citani nyongo yakusiya cinthu ciri-cense comwe cingatepese lufoyi lanu pa Umambo bwa Mulungu. Tsimikizani kupalizira bzipsa bzabwino na nyongo, mucireka kutepesa lufoyi lanu pa basa lakupalizira. Pitirizani kufufudza cadidi ca m’Bibliya. Mukacita bzimwebzi, mun’dzakoya ‘cuma comwe cingamale lini kudzulu, komwe mbava zingafike lini pafupi kuti zibe ne mcenje ungadzonge lini.’​​—⁠Lu. 12:​33. w17.06 14 ¶19-⁠20

Yahova ambatonga lini wanthu wace mwa kuuma mtima. Ndipo wale omwe ambamubvera ambakhala wakutsudzuka na wakukondwa. (2 Wak. 3:​17) Pa kulewa bza Yahova Davide adati: ‘Pamaso pace pana ulemu na umbiri; ndipo pa mbuto yace yakukhala pana mphamvu na cikondweso.’ (1 Nkha. 16:​7, 27) Ndipo nyakunemba bukhu la Psalymo Etani adati: ‘An’kondwa ni wale omwe ambakuwa mwakukondwa. Iwo ambafamba m’ceza ca nkhope yanu, imwe Yahova. Iwo ambakondwa m’dzina lanu nsiku yense ndipo thangwe ra cirungamo canu iwo ambalemekezedwa.’ (Psal. 89:​15, 16) Tikambakumbukira kudeka mtima kwa Yahova, tin’dzathumizira citsimikizo cathu cakuti utongi bwace n’bwabwino kwene-kwene. Yahova ndiye omwe adatilenga, ndipopa iye ambadziwa bzomwe bzingatikondwese. Iye ambatipasa bzinthu bzizinji kwene-kwene kuposa bzomwe tikhafunikira. Ndipo ciri-cense comwe Yahova ambatiuza kuti ticite, cimbabweresa phindu kwa ifepano. Ifepano tin’dzakhala wakukondwa nthawe zense tikambabvera Yahova, napo kuti pangafunike kucita nyongo ikulu kwene-kwene.​—⁠Zai. 48:​17. w17.06 23-24 ¶10-⁠11

Mpfumakazi inango ya ku Inglaterra ikhafunisisa kukhala na mwana. Koma pomwe adadziwa kuti bzingadakwanisika lini kukhala na wana m’dziko la Sathaniri, iye adasunama kwene-kwene. Tenepo mpfumakaziyo na mwamuna wace adapangana bza kuyanya mwana. Koma nsiku zinango iye akhakhala wakukhumudwa. Iye adalewa kuti, “Ndikhadziwa kuti kuyanya mwana kungandendemerane lini na mwana omwe ndingadacita kubereka ndekha.” Bibliya limbalewa kuti mkazi ‘an’dzakhotcerereka mwa kubala wana.’ (1 Tim. 2:​15) Koma bzimwebzi bzinkuthandauza lini kuti mkazi an’dzatambira moyo wakusaya kumala thangwe ra kubereka wana. Tenepo, kodi vesi limweri limbathandauza ciyani? Mai ambakhala wakutanganidwa kwene-kwene na basa la kusamalira pa mui na wana wace. Ndipo bzimwebzi bzingamuthandize kutcenkha magunkha ayai kupitira nkhani za anikaciro.​​—⁠1 Tim. 5:​13. w17.06 4-⁠5 ¶6-8

Kodi na mafalaya Eliu akhafunambo kulewa kuti nyongo yomwe timbacita kuti titumikire Yahova njakusaya phindu? Ne! Iye akhafuna kulewa kuti Yahova ngwakukwana kale, ndipo napo timunamate ayai ne, ifepano tingamudaze lini ne kumuthumizira mphanvu. Ndipopa Yahova alibe kutsimula Eliuyo ninga momwe adacitira na amuna atatu wale. Tenepo, makhalidwe yabwino ayai luso liri-lense lomwe tingakhale nalo, timbapasidwa na Yahovayo, ndipo iye ambawona momwe timbaliphatisira basa. Tikambadekera mtima anzathu omwe ambatumikira Yahova, iye ambawona bzimwebzo, ndipo bzimbakhala ninga tinkucitira iye. Pa Mimwani 19:​17 pambati: ‘Omwe anidekera mtima munthu wakusauka ankukumbiza Yahova, ndipo iye an’dzamubwezera bzomwe wacitabzo.’ Yahova ambawonadi tikambadekera mtima anzathu. Ndipo, napo Yahova ni Mulengi wa cirengedwe cense, iye ambawona bzabwino bzomwe timbacitira anzathu ninga tinkucitira iye, ndipo ambatisimba na bzinthu bzizinji bzabwino. Jezu, Mwana wa Mulungu, adatawirizambo nfundo imweyi.​​—⁠Lu. 14:​13, 14. w17.04 28 ¶3-4

Kodi n’ciyani cinango comwe cingatithandize kukulisa lufoyi lathu pa cadidi ca m’Bibliya? Tin’funika kumbagumanika ku mitsonkhano yathu ya gwere nthawe zense, thangwe kumweko timbapfunzisidwa na Yahova. Ndipo njira ibodzi yomwe Yahova ambatipfunzisira ku mitsonkhano, ni pfunziro la Nsanza ya Mulindiri. Tenepo, kuti timbagumane phindu na pfunziroli, tin’funika kumbakonzekereratu nsiku ya mitsonkhano inati kufika. Nsiku zino, revistayi inkugumanika m’bzirewedwe bzizinji mu webisaite yathu ya jw.org na mu JW Library ndipo azinji angaicose m’mitedwe ya m’manja ayai mu tablet mwakusaya kunesa kuti akonzekere. Pakukonzekerapo, mpsakukwanisika kuwerenga mavesi yomwe yankugumanika m’ndimezo. Tenepo bziribe basa penu tin’konzekera mwa kuphatisa basa tablet ayai revista yakudindidwa, tin’funika kumbawerenga mavesi ya ndimezo mwakamderekho, ticimbayakumbukira. Kucita bzimwebzi kun’dzatithandiza kukulisa lufoyi lathu pa cadidi ca m’Bibliya. w17.05 18 ¶14

Pambuyo pakubatizidwa, tin’funika kupitiriza kukhala na moyo mwakubverana na kubzipereka kwathu mwa kukhala wa kukhulupirika kwa Mulungu. Tikacita piciro la kutumikira Yahova, mpsakukwanisika lini kucinja picirolo. Munthu omwe waneta kutumikira Yahova ayai kukhala na moyo wacikristau, angabweze lini piciro lomwe iye adacita kwa Yahova ne batismo yace. Munthu omwe adabzipereka kwa Yahova akacita pikado ikulu, iye ambaimbidwa mulandu na Yahova pabodzi na gwere. Tin’funika lini kukhala ninga wale omwe Jezu adawauza kuti: ‘Linkumala lufoyi lomwe ukhanalo pakuyamba lire.’ M’mbuto mwace, tin’funika kukhala ninga wale omwe Jezu adalewa bza iwo kuti: ‘Ndikudziwa bwino mabasa yako, lufoyi lako, cikhulupiro cako, utumiki bwako na kupirira kwako ndipo ndikudziwa kuti bzicito bzako bzatsapano n’bzizinji kwene-kwene kuposa bzakale-kale.’ (Cibv. 2:​4, 19) Tin’funika kukondwesa Yahova mwa kukhala na moyo wakubverana na kubzipereka kwathu. w17.04 7 ¶12-⁠13

Nthawe inango Abalahamu adabvunza kuti: ‘Kodi Muyeruzi wa dziko lense la pansi an’dzacita lini bzinthu mwakulungama?’ (Ciy. 18:​25) Pomwe Abalahamu adacita mbvunzoyu sikuti akhapenukira, koma iye akhakhulupira kuti Yahova angadayeruza mizinda ya Sodoma na Gomora mwacirungamo. Iye akhadziwa kuti Yahova angadapha lini ‘munthu wakulungama pabodzi na wakuipa.’ Iye akhakhulupira thangwe rakuti Yahova n’ciratizo cabwino kwene-kwene pa nkhani ya cirungamo. Tenepo, pakuti mitemo ya Yahova nthawe zense njakulungama, iye nthawe zense an’dzayeruza mwacirungamo. Bibliya limbati: ‘Iye ambafuna cirungamo.’​​—⁠Psal. 33:⁠5. w17.04 15 ¶1-2

Abereki, penu imwepo mun’funa kuti wana wanu akhale pauxamwali bwakulimba na Yahova, acidzakhala na moyo wakusaya kumala, perekani ciratizo cabwino kwa iwo. Wana akambawona kuti imwepo mumbaikha ‘Umambo bwa Mulungu’ pa mbuto yakuyamba pa moyo wanu, iwo an’dzapfunza kumbakhulupira Yahova pa bzakucitika bza nsiku na nsiku. (Mat. 6:​33, 34) Mbaikhani bzinthu bzauzimu pa mbuto yakuyamba, m’mbuto mwa kumbafunisisa bzinthu bzakuthupi. Khalani na moyo wakusaya kufuna bzizinji ndipo mbatcenkhani kugwa m’mangawa. Khalani na ‘cuma kudzulu,’ comwe ni kubvumidwa na Yahova, m’mbuto mwa kufuna kobiri, ayai ‘umbiri bwa wanthu.’ (Mar. 10:​21, 22; Ju. 12:⁠43) Lekani kumbatanganika mpaka kusaya nthawe yakuceza na wana wanu. Alatizeni kuti imwepo mumbawatenda thangwe ra kuikha Yahova pa mbuto yakutoma pa moyo wawo, m’mbuto mwa kufuna kobiri zizinji ayai kukhala wakubvekera. Lekani kukhala na makumbukidwe yakuti wana wanu an’funika kuphata basa kuti adzakuthandizeni kukhala na moyo wabwino. Ndipo kumbukirani kuti ‘bzimbadikhiridwa lini kuti wana akonkhanisire abareki wawo cuma, koma abereki akonkhanisire wana wawo.’​​—⁠2 Wak. 12:⁠14. w17.05 9-10 ¶3-4