Janeiro

Pomwe Jezu “adawona mkaziyo” akulira, Bibliya limbalewa kuti “iye adamubvera ntsisi.” (Luk. 7:13) Tsono, Jezu alibe kundomubvera ntsisi basi, koma adamucitira cinthu. Iye adalalewa naye mwakuderekha acimuuza kuti: “Leka kulira.” Patsogolo pace, iye adacita pomwe cinthu cinango. Iye adalamusa mwanayo ndipo “adamupereka kwa mai wace.” (Luk. 7:14, 15) Kodi tingapfunze ciyani na cakudabwisa comwe Jezu adacita ca kulamusa mwana wa mamsiwa? Tikupfunza kuti tin’funika kumbabvera ntsisi wanthu omwe akubonera. Tsono kuti tilatize ntsisi ninga Jezu, tin’funika kukhala tceru kuti tiwone omwe akutsautsika na mabvuto. Tingawalatize ntsisi mwa kuwacitira cinthu ayai kuwafotokozera mafala yakuwatsangalaza. (Mim. 17:17; 2 Ako. 1:3, 4; 1 Ped. 3:8) Napo mafala yakucepa na cinthu ciri-centse comwe tingacite bzingawathandize kwene-kwene. w23.04 5-6 ¶13-15

Napo kuti Jezu akhadziwa kuti xamwali wace wafa, iye adapitiriza kukhala komwe akhaliko ntsiku ziwiri ndipo patsogolo pace iye adadzayenda ku Betaniya. Pa nthawe yomwe Jezu adafika, Lazaro akhadamala kale ntsiku zinai adafa. Jezu akhafuna kucita cinthu comwe cingadathandiza axamwali wacewo na kutumbizisambo Mulungu. (Juw. 11:6, 11, 17) Nkhani imweyi ikutipfunzisa cinthu cinango comwe axamwali ambacitirana. Pomwe Mariya na Marta adatumiza mafala kwa Jezu, iwo alibe kumukumbira kuti iye ayende ku Betaniya. Iwo akhandofuna kumudziwisa kuti xamwali wace akhaduwala. (Juw. 11:3) Pomwe Lazaro adafa, Jezu angadamulamusa na kutaliko. Tsono, iye alibe kucita bzimwebzo, Jezu adafuna kufendera pafupi, ndipopa iye adayenda ku Betaniya kuti akawonane na axamwali wacewo, Mariya na Marta. Kodi muna xamwali omwe ambabwera kudzakuthandizani napo kuti imwepo mulibe kumukumbira? Penu munaye, ndiye kuti xamwali umweyo mumbamuthemba kwene-kwene pa “[nthawe za] mabvuto.” (Mim. 17:17) Ifepano tin’funika kutewezera Jezu mwa kumbathandiza anzathu napo kuti alibe kutikumbira! w23.04 10 ¶10-11

Tikakhala tikugumana na mabvuto pinango tingakumbuke kuti dziko lipsa lin’bwera lini. Kodi bzimwebzi bzin’funa kulewa kuti tiribe cikhulupiro cakulimba? Ne ndibzo lini. Kumbukirani ibzi. Tikakhala tiri pa nthawe yakudjedjera pinango tingakumbuke kuti kudjedjerako kun’mala lini. Tsono nthawe yakupsa imbadzafika basi. Mpsibodzi-bodzimbo na ifepano. Tikakhala tikugumana na mabvuto, tingawone ninga kuti dziko lipsa likucedwa kubwera. Tsono tikakhala na cikhulupiro cakulimba tin’dzakhala na citsimikizo cakuti bzomwe Mulungu adalewa bzin’dzakwanisikadi. (Sal. 94:3, 14, 15; Aheb. 6:17-19) Bzimwebzi bzin’dzatithandiza kuti tipitirize kumbaikha kunamata Yahova pa mbuto yakuyamba pa moyo wathu. Kuti ticite basa lakupalizira timbafunikambo kukhala na cikhulupiro cakulimba. Wanthu azinji akabva bza “mafala yabwino” yakulewa bza dziko lipsa ambakumbuka kuti bzimwebzi bzingacitike lini. (Mat. 24:14; Ezek. 33:32) Ifepano tin’funika lini kukhala na nzeru ninga zawozi. Ndipopa kuti bzimwebzi bzireke kuticitikira tin’funika kupitiriza kulimbisa cikhulupiro cathu. w23.04 27 ¶6-7; 30 ¶14

Kodi imwepo mudabzibvunza kale penu Yahova ambatawira mipembo yanu? Penu mun’ti inde, muli lini mwekha. Abale na mpfumakazi azinji ambakhalambo na thupo limweri maka-maka akakhala akugumana na mabvuto. Tikakhala tikugumana na mabvuto bzingatinese kukhulupira kuti Yahova akutawira mipembo yathu. N’thangwe ranyi tingakhale na citsimikizo cakuti Yahova ambatawira mipembo ya atumiki wace? Bibliya limbatitsimikizira kuti Yahova ambatifuna kwene-kwene ndipo ambatiwona kuti ndife wakufunika. (Ag. 2:7; 1 Juw. 4:10) Ndipo iye ambatiuza kuti tipembe kwa iye kuti timukumbire thandizo. (1 Ped. 5:6, 7) Iye akufuna kuti tikhale naye pa uxamwali bwakulimba kuti tikwanise kukhala wakulimba pa mabvuto yomwe timbagumana nayo. M’Bibliya kawiri-kawiri ifepano timbawerenga kuti Yahova ambatawira mipembo ya atumiki wace. Kodi imwepo mukukumbukirambo bza ciratizo cibodzi? w23.05 8 ¶1-4

Mariya akhali pa uxamwali bwakulimba na Yahova ndipo iye akhacita ciri-centse kuti alimbise cikhulupiro cace kwa iye. Iye akhadziwa bwino Bzinembo. Ndipo akhakhalambo na nthawe ya kumbakumbukira bzomwe akhapfunza. (Luk. 2:19, 51) Bzimwebzi bzidacitisa kuti iye akhale mkazi wabwino. Bzimwebzi ndibzo bzomwe mpfumakazi zizinji ntsiku zino zomwe ziri pa banja zimbacita. Mpfumakazi inango yakucemeredwa Emiko idalewa kuti: “Pomwe inepano ndikhanati kulowodwa ndikhana ndondomeko yangu yakucita bzinthu bzauzimu. Tsono pomwe ndidalowodwa, mwamuna wangu ndiye akhambapemba na kucitisa kunamata kwa pa banja. Bzimwebzi bzidacitisa kuti nimbathembe iye pa nkhani zauzimu. Ndidazindikira kuti ndikhafunika kucita bzinthu bzinango bzauzimu ndekha kuti ndilimbise uxamwali bwangu na Yahova. Tsapano nimbakhala na nthawe ya kupemba, kuwerenga Bibliya na kukumbukira bzomwe ndawerengabzo.” (Agal. 6:5) Akazi, mukapitiriza kulimbisa uxamwali bwanu na Yahova abayanu an’dzakutumbizani na kukufunani kwene-kwene. — Mim. 31:30. w23.05 22 ¶6

Ifepano timbabadwa lini ticigopa Yahova, koma timbafunika kupfunza kumugopako. Cinthu cibodzi comwe cingatithandize ndico kumbakhala na nthawe ya kumbawona cirengedwe. Tikambawona “bzinthu bzomwe iye adalenga,” timbakwanisa kuwona kuti Yahova ngwa nzeru, ana mphanvu ndipo ambatifuna. Ndipo bzimwebzi bzin’dzaticitisa kuti timufune na kumulemekeza kwene-kwene. (Aro. 1:20) Cinthu cinango comwe tingacite kuti tipfunze kugopa Mulungu, ndico kumbapemba nthawe zentse. Tikambapemba kwene-kwene kwa Yahova, iye ambakhala munthu caiye kwa ifepano. Ndipopa pomwe tikupemba, ticimukumbira kuti atipase mphanvu kuti tipirire mabvuto, bzimwebzi bzimbatikumbusa kuti iye ana mphanvu kwene-kwene. Tikambamutenda thangwe ra kutipasa Mwana wace kuti adzatifere, bzimwebzi bzimbatikumbusa kuti iye ambatifuna kwene-kwene. Ndipo tikambamudandaulira Yahova kuti atithandize pa bvuto lomwe tikugumana nalo, timbalatiza kuti timbamuwona kuti iye ngwanzeru kwene-kwene. Mipembo ninga imweyi imbatithandiza kuti timulemekeze kwene-kwene Yahova. Ndipo imbatithandizambo kuti tikhale wakukhwimika kuti tileke kucita cinthu ciri-centse comwe cingadzonge uxamwali bwathu na iye. w23.06 15 ¶6-7

Yahova ndiye wakuthemera kutipasa malamulo, ndipo malamulo yaceyo nthawe zentse yambakhala yakupusa kuti wanthu wace ayabvesese. Mwa ciratizo, Bungwe Lakutonga la mu nthawe ya Akristau wakuyambirira lidafotokoza bzinthu bzitatu bza momwe Mkristau angakhalire wakulimba: (1) mwakutcenkha kunamata bzifanikiso acinamata Yahova yekha, (2) mwakubvera lamulo la Yahova lakuti mulopa ngwakupambulika na (3) mwakubvera lamulo la m’Bibliya lakutcenkha kucita upombo. (Mab. 15:28, 29) Kodi Akristau wa ntsiku zino angabvere tani Yahova pa bzinthu bzitatubzi? Mwa kubvera Yahova na kumunamata. Yahova adauza Ajirayeri kuti ambanamate iye yekha basi. (Deut. 5:6-10) Ndipo pomwe Jezu adayezedwa na Sathani, iye adalatiza kuti tin’funika kunamata Yahova yekha. (Mat. 4:8-10) Ndipopa, timbaphatisa lini basa bzifanikiso pa kunamata. Ndipo timbanamatambo lini wanthu napo acikhala atsogoleri wa magereja, atsogoleri wa ndale, wanthu omwe ambamenya bola, omwe mbakubvekera ayai wale omwe ambaimba. Timbanamata Yahova yekha basi thangwe ndiye omwe ‘adalenga bzinthu bzentse.’ — Apok. 4:11. w23.07 14-15 ¶3-4

M’dziko la Sathaniri wanthu ambawona ninga kuti kucita upombo na kuwona pornografia ni bzinthu lini bzakuipa. (Aef. 4:19) Ndipopa mpsakufunika kwene-kwene kugopa Mulungu kuti titcenkhe kucita bzinthu bzakuipa. Pa Mimwani kapitulo 9, pambalewa bza nzeru na kusaya nzeru bzomwe bzimbandendemezeredwa na akazi awiri. Mkazi ali-wentse pa akazi awiriwa akucemera wanthu “omwe alibe nzeru,” kuti: ‘Bwera ku mui kwangu kuti udzadye.’ (Mim. 9:1, 4-6) Tsono bzomwe bzikucitikira wanthu omwe akucemeredwawo mpsakusiyana. Onani bza mcemo wa “mkazi wakusaya nzeru.” (Mim. 9:13-18) Iye akucemera mwamphanvu wanthu omwe alibe nzeru kuti: “Bwerani muno” mudzadye. Kodi n’ciyani comwe cimbacitika? “Wale omwe akufuna kufa ambayenda kumweko.” Timbacenjezedwa bza “mkazi wacirendo” na ule omwe ambafuna “bzinthu bza upombo.” Timbauzidwa kuti: “Nyumba yace ikuyenda ku infa.” (Mim. 2:11-19) Ndipo pa Mimwani 5:3-10 pana mcenjezo pomwe wakulewa bza “mkazi wacirendo” omwe “nzayo zace zikuyenda ku infa.” w23.06 21-22 ¶6-7

Akulu an’funika kukhala ciratizo cabwino pa nkhani ya kuleka kumbangingimira nzeru zawo. (1 Tim. 3:2, 3) Mwa ciratizo, mkulu wa gwere an’funika lini kudikhirira kuti nfundo zomwe iye anilewa ndizo zomwe anzace an’ziphatisa basa thangwe rakuti iye ni mkulu kuposa akulu anzacewo. Iye ambazindikira kuti mzimu wa Yahova ungaphatise basa mkulu ali-wentse wa gwere kuti afotokoze nfundo yakuthandiza. Ndipo nfundo yomwe yasankhulidwayo ikakhala ikupitana lini na bzomwe Bibliya limbalewa, akulu omwe ambangingimira lini nzeru zawo ambakhala wakukonzeka kuphatisa basa nfundo yomwe akulu azinji akubverana nayo. Tikakhala wanthu wakusaya kungingimira nzeru zathu timbagumana phindu likulu kwene-kwene. Timbakhala pa uxamwali bwakulimba na abale na mpfumakazi zathu ndipo m’gwere mumbakhala na mtendere. Timbakomedwa kwene-kwene tikambawona makhalidwe yakusiyana-siyana yomwe atumiki wa Yahova anayo. Ndipo kuposa bzentse, timbabva bwino mu mtima tikadziwa kuti tikutewezera Yahova Mulungu wathu omwe ambangingimira lini nzeru zace. w23.07 25 ¶16-17

Daniyeli adapfunza mapolofesiya na cakulinga cakuti adziwe. Iye akhafuna kudziwa cadidi. Ndipo cinango n’cakuti Daniyeli akhali wakubzicepesa. Iye akhadziwa kuti Yahova angadamuthandiza kubvesesa mapolofesiya pokha-pokha iye angadapitiriza kukhala pa uxamwali na Yahovayo na kumubvera. (Dan. 2:27, 28) Daniyeli adalatiza kuti akhali wakubzicepesa mwa kuthemba thandizo la Yahova. (Dan. 2:18) Daniyeli akhacitambo bzinthu mwakusamala kwene-kwene. Iye adafufudza m’Bzinembo bzomwe bzikhalipo pa nthaweyo. (Jer. 25:11, 12; Dan. 9:2) Kodi imwepo mungatewezere tani Daniyeli? Mbakumbukirani cakulinga comwe mukupfunzira mapolofesiya. Kodi imwepo mukupfunza mapolofesiya ya m’Bibliya thangwe mukufuna kudziwadi cadidi? Penu ndibzo, Yahova an’kuthandizani. (Juw. 4:23, 24; 14:16, 17) Wanthu winango ambapfunza mapolofesiya ya m’Bibliya thangwe ra kufuna kuyezera kulatiza kuti Bibliya ndakucokera lini kwa Mulungu. Iwo ambakumbuka kuti Bibliya ndakucokera lini kwa Mulungu ndipo ambafuna kubzicitira okha bzakusankhula pa nkhani ya bzabwino na bzakuipa. Ndipopa tin’funika kupfunza na mathangwe yabwino. w23.08 9 ¶7-8

Tikambabzindendemezera na anzathu tingambakumbukire bzinthu bzomwe tin’kwanisa lini kukhala nabzo. (Agal. 6:4) Tikacita bzimwebzi, tin’dzakhala wa njiru na wa mpikisano. (Agal. 5:26) Tikafuna kucita bzinthu bzomwe anzathu akucita napo kuti tingakwanise lini kubzicita tingabzibweresere mabvuto. Penu ‘cinthu comwe tikhacidikhirira cikasaya kucitika, cimbaduwalisa mtima,’ bzimbatiwawiratu kudikhirira cinthu comwe tingakwanise lini kukhala naco! (Mim. 13:12) Kucita bzimwebzo kungacepese mphanvu yathu ndipo kungaticedwese kuthamanga mu njira ya ku moyo. Yahova ambadziwa bzomwe mungakwanise kucita na bzomwe mungakwanise lini kucita. Iye ambadikhirira lini kuti mumupase bzomwe imwepo mulibe. (2 Ako. 8:12) Khalani na citsimikizo cakuti Yahova ambandendemezera lini bzomwe imwepo mumbacita na bzomwe anzanu ambacita. (Mat. 25:20-23) Iye ambatenda basa lanu lentse, kukhulupirika kwanu na kupirira kwanu. w23.08 29 ¶10-11

Yahova adatawira kulira kwa Samusoni mwakucitisa kuti komwe iye akhaliko kukhale na ntsantsa ya madzi. Pomwe Samusoni adamwa madziyo, “iye adakhala pomwe na mphanvu.” (Ato. 15:19) Bzikuwoneka kuti ntsantsa ya madzi imweyi iribe kumala mpaka pa nthawe yomwe mpolofeta Samuyeli adanemba bukhu la Atongi. Pomwe Ajirayeri akhawona ntsantsa ya madziyo pinango iwo akhakumbusidwa kuti akathemba Yahova, iye angadadzawathandiza akakhala wakukhulupirika. Ifepano tin’funikambo kumbathemba Yahova napo kuti tingakhale na luso ayai tidakwanisa kale kucita bzinthu bzizinji pa moyo wathu. Ifepano tin’funika kukhala wakubzicepesa ticimbakumbukira kuti tin’funika kumbathemba Yahova kuti bzinthu bzitifambire bwino. Ninga momwe Samusoni adakhalira na mphanvu pambuyo pa kumwa madzi yomwe Yahova adamupasa, ifepano tingakhalembo na mphanvu yauzimu tikaphatisa basa bzinthu bzentse bzomwe Yahova ambatipasa. — Mat. 11:28. w23.09 4 ¶8-10

Kodi ifepano tingacite tani tikagumana na munthu omwe akulewa kuipa dzina la Mulungu ayai Bibliya? Tin’funika kupemba kwa Yahova kuti atipase mzimu wace kuti utithandize kukhala na nzeru na kudziwa bzomwe tingacite kuti tikhale wakuderekha. Tsono tani penu tazindikira kuti tiribe kukwanisa kukhala wakuderekha? Tingaipempherere pomwe nkhaniyo ticikumbukira bzomwe tingadzacite bzinthu ninga bzimwebzi bzikadzaticitikira pomwe. Tikacita bzimwebzi, Yahova an’dzatipasa mzimu wace wakucena omwe un’dzatithandiza kucita bzinthu mwakuderekha. Pana mavesi mazinji ya m’Bibliya yomwe yangatithandize penu bzimbatinesa kulalewa mwakuderekha ayai mwakugwa mpfuwa. Mzimu wa Mulungu ungatikumbuse mavesi yamweya. (Juw. 14:26) Mwa ciratizo, nfundo zomwe zimbagumanika m’bukhu la Mimwani zingatithandize kukhala wakuderekha. (Mim. 15:18) Bukhu la m’Bibliya limweri limbalatizambo phindu lomwe timbakhala nalo tikakhala wanthu wakugwa mpfuwa. — Mim. 10:19; 17:27; 21:23; 25:15. w23.09 15 ¶6-7

Mpostolo Pedru akhadziwa kuti akhadasala pang’ono kuti afe. Iye akhadamala magole mazinji akucita basa lace mwakukhulupirika. Iye adafamba pabodzi na Jezu, adayambisambo njira zipsa za kupalizira na kutumikira mu bungwe lakutonga pa nthawe imweyire. Tsono, basa la Pedru likhanati kumala. Kucokera mu gole la 62-64 EC, iye adanemba matsamba mawiri yomwe yambacemeredwa 1 Pedru na 2 Pedru. (2 Ped. 1:13-15) Pa nthawe yomwe mpostolo Pedru adanemba matsamba yaceya, abale wace wacikristau ‘akhabonera na mayezo yakusiyana-siyana.’ (1 Ped. 1:6) Amuna wakuipa akhacita ciri-centse kuti apitise m’gwere bzipfunziso bzakunama na makhalidwe yakuipa. (2 Ped. 2:1, 2, 14) Akristau omwe akhakhala mu mzinda wa Jeruzalemu akhadasala pang’ono kuwona “kumala kwa bzinthu bzentse” bza nthawe imweyire pa nthawe yomwe mzindayo ungadapfudzidwa na acikunda wa Roma. (1 Ped. 4:7) Ndipopa mpostolo Pedru adawona kuti bzikhali bwino kuti athandize Akristau anzace kuwona bzomwe angadacita kuti apirire mabvuto yomwe akhagumana nayo nthawe imweyo na yomwe angadadzagumana nayo kutsogolo. w23.09 26 ¶1-2

Ninga Jezu, kawiri-kawiri timbapfunza kukhala wakubvera pomwe bzinthu bziri lini-bwino. Mwa ciratizo, pomwe matenda ya COVID-19 yadayamba, tidauzidwa kuti tileke kutsonkhana pomwe mu Nyumba za Umambo na kukapalizira nyumba na nyumba. Pinango bzidakunesani kubvera. Tsono kubvera kwanu kudakukhotcererani, kudathandiza kuti gwere likhale lakuphatana ndipo kudakondwesa Yahova. Tentsenefe tsapano ndife wakukonzeka kudzabvera malango yali-yentse yomwe tin’dzatambira pa citsautso cikulu. Kubvera malangoyo kun’dzapulumusa moyo wathu! (Djob. 36:11) Timbasankhula kubvera Yahova maka-maka thangwe ra kumufuna na kufunambo kumukondwesa. (1 Juw. 5:3) Tingakwanise lini kumubwezera Yahova bzentse bzomwe iye waticitira. (Sal. 116:12) Tsono tingamubvere na kubverambo wale omwe ambatitsogolera. Tikabvera, timbalatiza kuti ndife wanzeru. Ndipo wanthu wanzeru ambakondwesa mtima wa Yahova. — Mim. 27:11. w23.10 11 ¶18-19

Bzingadakhala kuti imwepo muna mwayi wakubva anjo akulalewa namwe, kodi mungadatetekera bzomwe iye akulewabzo? Bzimwebzi bzikucitika ntsiku zino. Anjo akulalewa kwa “mtundu uli-wentse, dzinza, cirewedwe na mbumba.” Kodi n’ciyani comwe iye akulewa? Iye akulewa kuti: “Gopani Mulungu ndipo mupaseni ulemerero . . . namatani Ule omwe adalenga kudzulu, [na] dziko la pantsi.” (Apok. 14:6, 7) Mafala yamweya yakuthandauza kuti Yahova ndiye yekha Mulungu wacadidi omwe tentsenefe tin’funika kumunamata. Timbatenda kwene-kwene mwayi omwe iye adatipasa wakumunamata mu templo yace yauzimu! Kodi templo yauzimu n’ciyani, ndipo n’kuponi komwe tingagumane bzinthu bzakufotokoza bza temployo? Templo yauzimu ni nyumba lini yakucita kukonzedwa na wanthu. Ni makonzedwe ya Yahova yakuti timunamate mwakuthemera mwakuphatisa basa ntsembe ya cakulombolera ya Jezu Kristu. Mpostolo Paulo adafotokoza bza makonzedwe yamweya mu tsamba lomwe adanembera Akristau wacihebereu omwe akhakhala ku Djudeya. w23.10 24 ¶1-2

Mu gole la 522 AEC, anyamadulanthaka wa Adjuda adakwanisa kuwaletsa kumanga pomwe templo. Tsono Zakariya adatsimikizira Adjudawo kuti Yahova angadaphatisa basa mzimu wace wakucena kuti acose bvuto liri-lentse. Mu gole la 520 AEC, Mambo Dariyo adabvumiza Adjuda kuti apitirize kucita basa lakumanga pomwe templo ndipo adawapasa kobiri kuti zithandizire basalo. Iye adatongambo kuti maboma ya m’dzikolo yawathandize. (Eza. 6:1, 6-10) Yahova adapicira wanthu wace kuti iye angadawathandiza pokha-pokha iwo angadaikha basa lakumanga templo pa mbuto yakuyamba. (Ag. 1:8, 13, 14; Zak. 1:3, 16) Mafala ya apolofetawa yadalimbikisa kwene-kwene Adjuda. Iwo adayamba pomwe kumanga templo mu gole la 520 AEC, ndipo adamaliza basalo pomwe yakhanati kumala magole 5. Pakuti Adjuda adaikha kufuna kwa Yahova pa mbuto yakuyamba napo kuti akhagumana na mabvuto, iwo adathandizidwa na Yahovayo. Ndipo bzimwebzi bzidacitisa kuti anamate Yahova mwakukondwa. — Eza. 6:14-16, 22. w23.11 15 ¶6-7

Napo kuti wanthu azinji ambabva bza Abalahamu, iwo ambadziwa lini bzizinji bza iye. Koma imwepo mumbamudziwa bwino Abalahamu. Mwa ciratizo, imwepo mumbadziwa kuti Abalahamu adacemeredwa “pai wa wanthu wentse omwe angadalatiza cikhulupiro.” (Aro. 4:11) Tsono pinango mungabzibvunze kuti: ‘Kodi ningatewezerembo Abalahamu ndicikhala na cikhulupiro ninga comwe iye akhanaco?’ Inde, mungamutewezere. Cinthu cibodzi comwe mungacite kuti mukhale na cikhulupiro ninga ca Abalahamu ndico kupfunza bza iye. Pomwe Abalahamu adauzidwa na Mulungu kuti acoke komwe akhakhala kuti ayende ku dziko lakutali, iye adacita bzimwebzo. Iye adakhala m’matendi kwa magole mazinji ndipo adayezera kupereka ntsembe mwana wace Izaki. Abalahamu adacita bzentsenebzi thangwe akhana cikhulupiro cakulimba kwa Yahova. Thangwe ra cikhulupiro na bzicito bzace, iye adakondwesa Yahova ndipo adakhala xamwali wace. (Tiy. 2:22, 23) Yahova akufuna kuti tentsenefe kuphatanidzambo imwepo tibvumidwe na iye ticikhala axamwali wace. Ndipopa, iye adacitisa kuti anembi wa mabukhu ya m’Bibliya Paulo na Tiyago anembe bza Abalahamu. w23.12 2 ¶1-2

Mpfumakazi, pfunzani kutetekera mwatceru na kulewalewa mwakudeka mtima. Akristau an’funika kupfunza kumbalewalewa mwakudeka mtima. Pa nkhani imweyi, nyakupfunza Tiyago adatipasa malango yakuthandiza, pomwe adalewa mafala yomwe yali padzauluya. Imwepo mukambatetekera bwino pomwe anzanu akulewalewa, mumbalatiza kuti mumbawakumbukira anzanuwo, ayai kuti ‘mumbawabvera ntsisi.’ (1 Ped. 3:8) Penu imwepo mukuwona kuti mukubvesesa lini bwino-bwino bzomwe munthuyo ali kulewa, citani mibvunzo mwakuthemera. Ndipo yambani mwadikhira pang’ono pomwe mukanati kulewalewa. (Mim. 15:28) Bzibvunzeni kuti: ‘Kodi bzomwe nin’funa kulewabzi mpsacadidi ndipo mpsakuthandiza? Kodi ibzo mpsaulemu na bzabwino?’ Pfunzani na mpfumakazi zakukhwima mwauzimu zomwe zimbalewalewa bwino. (Mim. 31:26) Tetekerani bwino momwe izo zimbalewalewera. Mukakwanisa kulewalewa bwino, imwepo mun’dzabverana na wanthu azinji. w23.12 21 ¶12

Ntsiku zino, Yahova angaphatise basa wanthu wa m’banja mwathu, axamwali wathu ayai akulu wa gwere kuti atithandize. Tsono, tikakhala kuti tikugumana na mabvuto tingafune kukhala kutali na wanthu winango. Tingandofune kukhala tekha-tekha. Kucita bzimwebzi n’kuphonyeka lini. N’ciyani comwe tingacite kuti titambire thandizo la Yahova? Citani nyongo kuti muleke kumbakhala kwa mwekha. Tikakhala kutali na wanthu winango, kazinji-kazinji timbayamba kubzikumbukira tekha na kukumbukirambo mabvuto yomwe tikugumana nayoyo. Makumbukidwe ninga yamweya yangaticitise kuti tileke kucita bzakusankhula bzabwino. N’cadidi kuti nthawe zinango tingafune kukhala tekha maka-maka tikakhala kuti tikugumana na mabvuto. Tsono tikakhala tekha-tekha nthawe ikulu tingalambe thandizo lomwe Yahova akutipasa mwakuphatisa basa wanthu wace. Na tenepo, bvumani thandizo lakucokera kwa wanthu wa m’banja mwanu, axamwali wanu na akulu. Mbawonani kuti Yahova akuphatisa basa iwo kuti akuthandizeni. — Mim. 17:17; Zai. 32:1, 2. w24.01 24 ¶12-13

Anazireu adalumbira kuti angadagwata lini tsisi lawo. Bzimwebzi bzidalatiziratu padeca kuti iwo akhali wakukonzeka kubvera Yahova. Bzakupasa ntsisi mpsakuti pana nthawe inango yomwe Anazireu akhalemekezedwa lini. Nthawe zinango, M’nazireu akhafunika kukhala wakukhwimika kuti akwanise kukwanirisa lumbiro lace na kukhalambo wakusiyana na wanthu winango. (Amo. 2:12) Tikasankhula kucita kufuna kwa Yahova timbalatiza kuti ndife wakusiyana na wanthu winango. Tin’funikambo kukhala wakukhwimika kuti tibzidziwikise kuti ndife Mboni ya Yahova ku basa ayai ku xikola. Pakuti bzinthu bziniyenda bziciipiratu m’dzikoli, kutsogoloku bzin’dzakhala bzakunesa kuti titeweze malango ya Yahova na kupalizirambo mafala yabwino kwa anzathu. (2 Tim. 1:8; 3:13) Tsono, nthawe zentse mbakumbukirani kuti ‘timbakondwesa mtima wa Yahova’ tikakhala wakukhwimika ticilatiza kuti ndife wakusiyana na wale omwe ambamutumikira lini. — Mim. 27:11; Malak. 3:18. w24.02 16 ¶7; 17 ¶9

Mbatiwoneni kusiyana komwe kukhalipo mu gwere la ku Roma. Mu gwere limweri mukhana Adjuda omwe adapfunzisidwa kuti ambabvere Malamulo ya Mozeji, ndipo mukhanambo Akristau omwe akhali lini Adjuda, koma akhali wa bzikhalidwe bzinango. Akristau winango akhali akapolo, winango akhali apatrau wa akapolowo ndipo winango akhali lini akapolo. Kodi Akristauwo angadapitiriza tani kulatiza lufoyi napo kuti akhali wakusiyana? Mpostolo Paulo adawauza kuti: “Mbatambiranani.” Kodi iye akhafuna kulewanyi na mafala yamweya? Fala lomwe lidasanduliziridwa kuti “mbatambiranani” limbathandauza kutambira bwino munthu, ninga kumutambira ku mui kwathu ayai kumubvuma kuti akhale xamwali wathu. Paulo adauza Filimoni momwe angadatambirira Onezimo omwe akhadathawa patrau wace kuti: “Mutambire bwino.” (Fil. 17) Ndipo Prisila na Akila adatambira Apolo, omwe akhadziwa lini bwino-bwino cipfunziso cacikristau mwa kumutenga “aciyenda naye pa mbali” kuti akamuthandize. (Mab. 18:26) Akristauwo alibe kubvuma kuti kusiyana cikhalidwe kuwacitise kuti aleke kubverana. w23.07 6 ¶13

Thangwe likulu lomwe lingakucitiseni kubzipereka kwa Yahova ni lufoyi lomwe munalo kwa iye. Ni thangwe lini lokhali basi. Imwepo mwamudziwa Yahova ndipo bzimwebzi bzacitisa kuti mukhale na “cidziwiso caico” na “kubvesesa bzinthu bzauzimu” pakulewa bza iye na cakulinga cace. (Akol. 1:9) Pomwe imwepo mudapfunza Bibliya mudatsimikizira kuti: (1) Yahova ni Munthu caiye, (2) iye ndiye omwe adafulizira Bibliya na (3) iye ambaphatisa basa gulu lace kuti akwanirise bzomwe ambafuna. Wanthu omwe an’funa kubzipereka kwa Yahova an’funika kudziwa mapfunziso yakuyambirira ya m’Bibliya ndipo an’funika kuteweza malamulo ya Yahova na kuuzambo wanthu winango bzomwe adapfunza. (Mat. 28:19, 20) Lufoyi lawo kwa Yahova likakula, iwo ambafunisisa kutumikira iye yekha basi. Kodi bzimwebzi ndibzo bzomwe bzakucitikirani? w24.03 4-5 ¶6-8

Abigayeli akhadalowodwa na Nabali, omwe Bibliya limbalewa kuti akhali mwamuna wakuipa mtima na wa makhalidwe yakuipa. (1 Sam. 25:3) Bzikhali bzakunesa kwene-kwene kwa Abigayeli kukhala pa banja na mwamuna umweyu. Kodi pakhana njira inango yomwe Abigayeli angadacita kuti amalise banjalo? Inde ikhalipo. Iye angadakhala na mwayi umweyo angadalekerera kuti Davide aphe mwamuna wace thangwe ra kuti mwamuna waceyo adatukwana Davideyo pabodzi na acikunda wace. (1 Sam. 25:9-13) Abigayeli angadathawa acisiya Davide kuti aphe Nabali. Tsono, iye alibe kucita bzimwebzo, m’mbuto mwace adaceza na Davide kuti aleke kupha Nabaliyo. (1 Sam. 25:23-27) Thangwe ranyi iye adacita bzimwebzi? Abigayeli akhafuna kwene-kwene Yahova ndipo akhalemekeza malamulo yace pa nkhani ya malowozi. Iye akhadziwa kuti Yahova akhawona malowozi kukhala nkhani yakupambulika. Iye akhafuna kukondwesa Yahova, ndipopa adacita ciri-centse kuti athandize banja lace na kupulumusa mwamuna wace, Nabali. w24.03 16-17 ¶9-10

Kodi m’gwere mwanu alipo munthu omwe akuyezera kucinja bzinthu pa moyo wace kuti acite bzizinji pa kutumikira Yahova? Kodi yalipo maswaka yomwe imwepo mumbayadziwa yomwe mwakukhwimika yambalatiza kuti njakusiyana na anzawo wa ku xikola, napo kuti kucita bzimwebzi n’kwakunesa? Kodi tani wale omwe akugumana na mabvuto ninga kutsutsidwa na wanthu wa m’banja mwawo thangwe ra kupitiriza kukhala wakukhulupirika kwa Yahova? Phatisani basa mpata uli-wentse omwe mungakhale nawo kuti mumbalimbikise wanthu amwewa na kuwauza kuti mumbatenda kukhwimika kwawo na bzomwe iwo ambacitira Yahova. (Fil. 4, 5, 7) Yahova ambadziwa kuti ifepano timbafuna kumukondwesa, ndipo tiri wakukonzeka kubvuma kuluza bzinthu bzinango kuti tikwanirise lumbiro lathu lakubzipereka kwa iye. Iye ambatilemekeza mwa kutipasa mwayi wakuti tilatize kuti timbamufuna. (Mim. 23:15, 16) Tenepo, mbatitsimikizeni kupitiriza kutumikira Yahova, ndipo mbatikhaleni wakukonzeka kucita bzizinji pa kumutumikira. w24.02 18 ¶14; 19 ¶16

Kumbukirani kuti bzinthu bzikhali tani mu gole la 29 EC pomwe Jezu adayamba basa lace. Jezu na mai wace adacemeredwa ku kazamento yomwe idacitikira ku Kana. Mariya akhathandizira kutambira wanthu omwe akhabwera ku kazamentoko. Pomwe kazamentoyo ikhali mkati, padacitika cinthu cinango. Vinyu idamala. Mariya adafenderera mwana wace Jezu, acimuuza kuti: “Vinyu yamala.” (Juw. 2:1-3) Kodi n’ciyani comwe Jezu adacita? Iye adacita cakudabwisa; adasandusa madzi kukhala “vinyu yabwino.” (Juw. 2:9, 10) Pomwe Jezu akhali pa dziko la pantsi adacita bzakudabwisa bzizinji kwene-kwene. Iye adaphatisa basa mphanvu yomwe akhanayo yakucita bzakudabwisa kuti athandize wanthu azinji. Pa bzakudabwisa bziwiri bza kudyesa wanthu bzomwe adacita, iye adadyesa amuna 5000 ndipo patsogolo pace adadyesa pomwe amuna 4000. Kuphatanidza akazi na wana omwe akhalipo, akukwana wanthu wakupitirira 27 000 omwe iye adawadyesa. (Mat. 14:15-21; 15:32-38) Pa bzakudabwisa bziwiribzi, Jezu adapozambo wanthu azinji omwe akhaduwala. — Mat. 14:14; 15:30, 31. w23.04 2 ¶1-2

Pambuyo pa kugumana na bvuto, ifepano tingakhale tiribe mphanvu. Ninga Eliya, tingawone ninga kuti mpsakunesa kulamuka, ndipo tingandofune kugona. (1 Ama. 19:5-7) Ifepano tingafunikire thandizo kuti tipitirize kucita bzinthu bzauzimu. Pa nthawe ninga zimwezi, Yahova akutitsimikizira kuti an’dzatithandiza thangwe ndibzo bzomwe vesi la lero likulewa. Mambo Davide adakwanisa kuwona bzimwebzi. Pomwe iye akhagumana na mabvuto na kuteweredwa m’mbuyo na anyamadulanthaka wace, iye adauza Yahova kuti: “Boko lanu lamadidi lin’dzandithandiza.” (Sal. 18:35) Kazinji-kazinji Yahova ambatithandiza mwakucitisa kuti wanthu winango atithandize. Mwa ciratizo, pa nthawe inango pomwe Davide akhalibe mphanvu, xamwali wace Jonatani adamulimbikisa. (1 Sam. 23:16, 17) Mwa njira ibodzi-bodziyo, Yahova adasankhula Elizeu kuti athandize Eliya. — 1 Ama. 19:16, 21; 2 Ama. 2:2. w24.01 23-24 ¶10-12

Yahova ni Mulungu wakupasa. Mu ciratizo ca mkazi omwe akuyezezeredwa na “nzeru yacadidi” pa Mimwani kapitulo 9, timbapfunza kuti Yahova ngwakupasa ndipo iye ambapereka bzinthu bzabwino kuna wanthu. Nkhani imweyi imbafotokoza kuti mkazi umweyu wakonzekera cakudya na vinyu ndipo abziikha pa meza m’nyumba mwace. (Mim. 9:2) Ndipo mwakubverana na mavesi 4 na 5, mkazi umweyu akuyezezeredwa na “nzeru [yomwe] ikuuza wanthu wakusaya nzeru kuti: ‘Bwerani mudzadye pau.’” Thangwe ranyi tin’funika kupita m’nyumba ya nzeru yacadidi ticidya cakudya comwe nzeruyo yapereka? Yahova ambafuna kuti wana wace akhale na nzeru na kukhalambo wakukhotcerereka. Iye an’funa lini kuti tipfunze bzinthu pa moyo pambuyo pa kugumana na mabvuto ticibva kuwawa. Ndipopa wanthu wakulungama “iye an’dzawapasa nzeru zakuthandiza.” (Mim. 2:7) Tikakhala kuti timbagopa Yahova, ifepano tin’dzafuna kucita bzinthu bzomwe iye ambakomedwa nabzo. Tin’dzabva malango yace ya nzeru ndipo tin’dzakomedwa kuyaphatisa basa. — Tiy. 1:25. w23.06 23 ¶14-15

Napo kuti tingakwanise lini kucita bzizinji pa kutumikira Yahova, tingakhale na citsimikizo centse cakuti iye ambawona ndipo ambatenda nyongo yentse yomwe timbacita pa kumutumikira. Kodi timbadziwa tani bzimwebzi? Mu ntsiku za Zakariya, Yahova adakumbira Zakariyayo kuti akonze korowa ya oro na prata yomwe ikhadatumizidwa na Adjuda omwe akhali ku Babiloniya. (Zak. 6:11) “Korowayo” ingadacitisa kuti wanthu “akumbukire” bza mphaso zomwe Adjuda omwe akhali ku Babiloniya adatumiza. (Zak. 6:14) Tingakhale na citsimikizo centse cakuti Yahova an’dzayebwa lini nyongo yomwe timbacita pa kumutumikira pa nthawe zakunesa. N’cadidi kuti tin’pitiriza kugumana na mabvuto mazinji mu ntsiku zakumalizira zino, ndipo bzinthu kutsogolo kuno bzingafike pa kuipiratu. (2 Tim. 3:1, 13) Tsono, tin’funika lini kucita thupo. Kumbukirani mafala yomwe Yahova adauza wanthu wace mu ntsiku za mpolofeta Agai. Iye adati: “Ndinamwe. . . . Lekani kugopa.” (Ag. 2:4, 5) Ifepanombo tingakhale na citsimikizo cakuti Yahova an’dzakhala nafe tikapitiriza kucita bzomwe tingakwanise kuti ticite bzomwe iye ambafuna. w23.11 19 ¶20-21

Yahova angadacitisa kuti bzinthu bzakuphonyeka bzomwe Pedru adacita bzireke kunembedwa m’Bibliya. Tsono iye alibe kucita bzimwebzi. Ibzo bzidanembedwa na cakulinga cakuti bzitipfunzise cinthu cakufunika. (2 Tim. 3:16, 17) Kupfunza bza mwamuna umweyu omwe akhali wakuperewera ninga ifepano kun’dzatithandiza kubvesesa kuti Yahova ambadikhirira lini kuti ifepano tikhale wakulungama. Iye akufuna kuti ifepano tipitirize kukhala wakupirira napo kuti timbaphonyesa bzinthu bzinango. Thangwe ranyi bzimwebzi mpsakufunika? Tikawona kuti takwanisa kukunda bvuto linango lomwe tinalo, tingadzaphonye pomwe, koma timbapitiriza kucita nyongo kuti tikunde bvutolo. Tentsenefe timbalewa ayai kucita bzinthu bzomwe patsogolo pace timbadzakhumbula nabzo. Tsono tikaleka kubwerera m’mbuyo, Yahova angatithandize kuti tikwanise kubzikunda. (1 Ped. 5:10) Ntsisi zomwe Jezu adamulatiza napo kuti iye akhali wakuperewera zingatithandize kupitiriza kutumikira Yahova. w23.09 20-21 ¶2-3

Jezu angadamupoza Lazaro ninga momwe Marta adalewera mu cinembo ca leroci. Tsono Jezu akhafuna kucita cinthu cakudabwisa kwene-kwene. Iye adauza Marta kuti: “M’bale wako an’dzamuka.” Ndipo iye adamuuzambo Marta kuti: “Inepano ndine kumuka na moyo.” (Juw. 11:23, 25) Inde, Mulungu adapasa Jezu mphanvu yakulamusa wanthu wakufa. Iye akhadalamusa kale wanthu wakufa. Iye adalamusa ka mtsikana komwe kakhadafa tsapanopa na mulumbwana omwe bzikuwoneka kuti akhadafa ntsiku imweyo. (Luk. 7:11-15; 8:49-55) Tsono angadakwanisambo kulamusa munthu omwe akhadamala ntsiku zinai wakufa ndipo thupi lace likhadayamba kale kudzongeka? Mariya omwe akhali mpfumakazimbo ya Lazaro adayendambo kukagumana na Jezu. Iye adalewambo mafala yomwe Marta adalewa, yakuti: “Mbuya, bzingadakhala kuti mukhali kuno, m’bale wangu angadafa lini.” (Juw. 11:32) Pomwe Jezu adawona Mariya na wanthu winango akulira, iye adasunamambo kwene-kwene. Bzimwebzi bzidacitisa kuti iye ayambembo kulira. Iye adakwanisa kuwona kuti bzimbakhala bzakuwawa kwene-kwene munthu akafedwa. Ndipopa, iye akhafunisisa kucosa cinthu comwe cikhawacitisa kuti alire! w23.04 10-11 ¶12-13