Fevereiro

Pomwe Mambo Ezekiya adaduwala kwene-kwene, iye adakumbira Yahova kuti amuthandize kulimba. Ndipo Yahovayo adamupoza. (2 Ama. 20:1-6) Tsono mwakusiyana na bzimwebzi, pomwe mpostolo Paulo adadandaulira Yahova kuti amucosere “munga m’thupi,” Yahova alibe kumucosera bvutolo. (2 Ako. 12:7-9) Mpostolo Tiyago na Pedru akhafuna kuphedwa na Mambo Herode. Tiyago adaphedwa, koma Pedru adapulumusidwa mwakudabwisa. (Mab. 12:1-11) Bzimwebzi pinango bzingaticitise kubzibvunza kuti: ‘Thangwe ranyi Yahova adapulumusa Pedru, koma adalekerera kuti Tiyago aphedwe?’ Bibliya limbalewa lini. Tsono comwe tin’funika kutsimikizira n’cakuti mabasa yentse ya Yahova ‘si yakusaya kulungama.’ (Deut. 32:4) Nthawe zinango, Yahova angatawire lini mipembo yathu ninga momwe ifepano tikhadikhirira. Tsono pakuti timbakhulupira kuti mitawiro yentse ya Yahova pa mipembo yathu njacirungamo ndipo imbalatiza kuti iye ambatifuna, ifepano timbakumbuka lini kuti iye alibe kutitawira. — Djob. 33:13. w23.11 21 ¶6

Mpostolo Tiyago adafuliziridwa kuti anembe kuti wanthu wanzeru ‘mbakukonzeka kubvera.’ Ndokumbukirani kuti bzimwebzi bzin’funa kulewanyi. Kukhala wakukonzeka kubvera kumbathandauza kubvera wale omwe Yahova adawapasa udindo. Tsono Yahova ambafuna lini kuti tibvere wanthu wale omwe ambatiuza kuti tireke kubvera malamulo yace. (Mab. 4:18-20) Bzingakhale bzakupusa kwa ifepano kubvera Yahova kuposa wanthu. Thangwe ranyi? Thangwe rakuti Yahova ambatipasa malamulo yomwe njakulungama. (Sal. 19:7) Bzimwebzi mpsakunesa kwene-kwene kwa wanthu omwe ana udindo. Napo bziri tenepo, Yahova adapasa udindo abereki, atsogoleri wa boma na akulu wa gwere. (Mim. 6:20; 1 Ates. 5:12; 1 Ped. 2:13, 14) Tikambawabvera wanthu amwewa, timbakhala tikubverambo Yahova. w23.10 6 ¶2-3

Njira ibodzi yomwe ingatithandize kulimbisa cikhulupiro cathu ndiyo kumbakumbukira kuti Yahova ngwamphanvu. Iye ana mphanvu yakucita bzinthu bzentse bzomwe adalewa. Iye ni Mulungu Wamphanvu-zentse. (Djob. 42:2; Mar. 10:27; Aef. 3:20) Iye adatsimikizira Abalahamu na Sara kuti iwo angadakhala na mwana napo kuti akhadakalamba. (Gen. 17:15-17) Ndipo iye adalewambo kuti mbadwo za Abalahamuyo zingadadzapasidwa dziko la Kanani. Pakuti mbadwo za Abulahamuyo zidakhala ku Edjipito magole mazinji ninga akapolo, bzikhawoneka ninga kuti Mulunguyo angadacita lini bzomwe adalewa. Tsono bzidadzacitika. Ndipo iye adauzambo Mariya omwe akhali dende kuti angadadzabereka Mwana omwe Yahova akhadamulewa kale-kale mu zunde la Edeni, ndipo bzimwebzi bzidacitikadi! (Gen. 3:15) Tikambakumbukira bzinthu bzentse bzomwe Yahova adalewa na kucita, timbakwanisa kubvesesa kuti iye ana mphanvu yakubweresa dziko lipsa. — Djos. 23:14; Zai. 55:10, 11. w23.04 28 ¶10-12

Yahova adatawira mipembo ya Davide yakuti amupulumuse. (1 Sam. 19:10, 18-20; 2 Sam. 5:17-25) Ifepano tingakhalembo na citsimikizo cimweci. (Sal. 145:18) Yahova angatawire lini mipembo yathu ninga momwe tikhadikhirira. Paulo adakumbira Mulungu kuti amucosere “munga m’thupi.” Paulo adapempherera bvuto limweri katatu-kentse. Kodi Yahova adatawira mipembo imweyi? Inde, koma alibe kuyitawira mu njira yomwe Pauloyo akhaidikhirira. Iye alibe kumucosera munga m’thupi koma adamupasa mphanvu kuti apitirize kumutumikira mwakukhulupirika. (2 Ako. 12:7-10) Ifepanombo tingatawiridwe mpembo wathu mwakusiyana na momwe tikhadikhirira. Ifepano timbakhulupira kuti Yahova ambadziwa njira yabwino yakutithandizira. Iye angakwanise “kucita bzinthu bzikulu kwene-kwene kuposa bzomwe timbakumbira ayai kukumbuka.” (Aef. 3:20) Ndipopa, mtawiro wa mpembo wathu ungabwere pa nthawe na mu njira yomwe ifepano tikhaidikhirira lini. w23.05 8-9 ¶4-6

Nthawe zinango mpsakufunika kumbakumbukira bzomwe Bibliya limbalewa bzakuti wanthu an’dzalamusidwa kutsogoloku. Thangwe ranyi? Thangwe mwakusaya kudikhiririka ifepano tingaduwale mwa penu-penu ayai wadzinza wathu angasaike. (Mpal. 9:11; Tiy. 4:13, 14) Tikakhala na cikhulupiro cakuti wanthu wakufa an’dzalamusidwa, ifepano tin’dzakhala wakulimba tikakhala tikugumana na mabvuto yamweya. (1 Ates. 4:13) Bibliya limbalewa kuti Pai wathu wakudzulu ambatidziwa bwino ndipo ambatifuna. (Luk. 12:7) Cinthu comwe cimbalatiza kuti Yahova ambatidziwa bwino n’cakuti iye an’dzatilamusa na makhalidwe yathu yomwe ifepano tikhanayo pomwe tikhanati kufa. Yahova ambatifuna kwene-kwene, ndipopa adacita makonzedwe yakuti tidzakhale na moyo wakusaya kumala. Napo ticifa, iye an’dzatilamusa! Thangwe ranyi tingakhulupire bza cilamuso? Thangwe timbadziwa kuti ule omwe adapicira bzimwebzi akufunisisa kubzicita ndipo anayo mphanvu yakubzikwanirisa. w23.04 8-9 ¶2-4

Zuze na Mariya akhambacita bzinthu pabodzi kuti alimbise uxamwali bwawo na Yahova. Iwo akhambanamata Yahova pabodzi. (Luk. 2:22-24; 4:16) Bzimwebzi ndibzo bzomwe mabanja yan’funikambo kumbacita. Penu imwepombo muna wana, pinango nthawe zinango bzingakuneseni kumbayenda ku mitsonkhano na kucita kunamata kwa pa banja. Ndipo bzingakhalembo bzakunesa kukhala na nthawe ya kumbapfunza na kupemba pabodzi. Tsono kumbukirani kuti mukambanamata Yahova pabodzi, imwepo mumbakhala naye pa uxamwali bwakulimba ndipo mumbakhalambo wakubverana m’banja. Ndipopa mbawonani kunamata kwanu kukhala cinthu cakufunika kwene-kwene. Penu mukugumana na mabvuto m’banja mwanu, kunamata kwa pa banja kungakhale kwakusaya kudekeza. Penu bziri tenepo, mbacitani bzinthu bzomwe mukuwona kuti mwentse mungakomedwe nabzo. Bzimwebzi bzin’dzacitisa kuti mumbafunane ndipo bzin’dzacitisambo kuti mumbakomedwe pomwe mukucita bzinthu bzauzimu pabodzi. w23.05 22 ¶7-8

Kodi mantha yabwino yomwe Obadiya akhanayo kwa Yahova yadamuthandiza tani? Cakuyamba, mantha yamweya yadamucitisa kuti akhale munthu wakukhulupirika, ndipopa mambo adamuikha kuti ambanyang’anire nyumba yace. (Ndendemezerani na Nehemiya 7:2.) Kugopa Mulungu kudathandiza pomwe Obadiya kuti akhale munthu wakukhwimika pa nthawe yomwe bzimwebzi bzikhali bzakufunikira. Iye adakhala na moyo mu nthawe yomwe dziko la Jirayeri likhatongedwa na mambo wakuipa Akabe. (1 Ama. 16:30) Ndipo mkazi wa Akabeyo, Jezabeli, omwe akhanamata Baala, akhawenga kwene-kwene Yahova ndipo akhafuna kumalisa kunamata kwacadidi mu umambo bwa Jirayeri. Mkazi umweyu adapha apolofeta azinji wa Mulungu. (1 Ama. 18:4) Pomwe Jezabeli adayamba kunyang’ana apolofeta wa Mulungu kuti awaphe, Obadiya adatenga apolofeta 100 aciwabisa “m’magrupo mawiri ndipo akhambawapasa pau na madzi kuti adye.” (1 Ama. 18:13, 14) Bzimwebzi bzingadadziwika, iye angadaphedwa. Obadiya akhali munthumbo ninga ifepano ndipo iye akhafuna lini kufa. Tsono, iye akhafuna kwene-kwene Yahova pabodzi na wanthu omwe akhamutumikira kuposa momwe iye akhafunira moyo wace. w23.06 16 ¶9-10

Yahova akupitiriza kutsogolera wanthu wace ntsiku zino ninga momwe akhacitira m’mbuyomu. Iye akucita bzimwebzi mwakuphatisa basa Bibliya na Mwana wace, omwe ni msolo wa gwere. Kodi mukukwanisa kuwona kuti Yahova akupitiriza kuphatisa basa amuna wakukhulupirika kuti atsogolere wanthu wace? Inde. Mwa ciratizo, onani bzomwe bzidacitika pambuyo pa gole la 1800. Charles Taze Russell na anzace adayamba kubvesesa kuti gole la 1914 lingadakhala gole lakufunika kwene-kwene pa kukhazikisidwa kwa Umambo bwa Mulungu. (Dan. 4:25, 26) Kuti iwo akwanise kubvesesa bzimwebzi, adafufudza polofesiya ya m’Bibliya yakulewa bza nkhani imweyi. Kodi Yahova adawatsogolera pa kufufudza kwawoko? Inde. Bzomwe bzidacitika mu 1914 bzidalatiza padeca kuti Umambo bwa Mulungu bukhadayamba kutonga. Nkhondo Yakuyamba ya pa Dziko Lentse idayambika ndipo kudabwerambo matenda yakusiyana-siyana, bziteke-teke na njala. (Luk. 21:10, 11) Yahova akhaphatisa basa Akristau wakukhulupirika wale kuti athandize wanthu wace. w24.02 22 ¶11

Atumiki wa Yahovafe timbadziwa kuti Yahova ambatifuna ndipo ambafunambo kuti tikhale na moyo wabwino. (Aro. 8:35-39) Ndipo timbadziwa kuti timbagumana phindu tikaphatisa basa mitemo ya m’Bibliya. (Zai. 48:17, 18) Kodi tingacite ciyani tikagumana na mabvuto yomwe tikhayadikhirira lini? Wanthu wa m’banja mwathu angatikhumudwise, tingaduwale matenda makulu yomwe yangatitazise kucita bzinthu bzizinji pakutumikira Yahova, tingabonere na malengwa ya pantsi ayai tingazunzidwe thangwe ra bzomwe timbakhulupira. Bzimwebzi bzikaticitikira, tingabzibvunze kuti: ‘Thangwe ranyi bzimwebzi bzikundicitikira? Ndaphonyanyi? Kodi bzimwebzi bzin’funa kulatiza kuti Yahova akukomedwa lini nande?’ Kodi bzimwebzi bzidakucitikirani kale? Penu munti inde, lekani kubwerera m’mbuyo. Dziwani kuti atumiki azinji wa Yahova adagumanambo kale na mabvuto mabodzi-bodziya. — Sal. 22:1, 2; Hab. 1:2, 3. w23.04 14 ¶1-2

Tikayezedwa kuti ticite cinthu cakuipa timbatcenkha kukumbuka ayai kucita cinthu ciri-centse comwe cingadzonge uxamwali bwathu na Yahova. Yahova ambadikhirira kuti ‘timbamubvere na mtima wentse.’ (Aro. 6:17) Bzomwe iye ambatiuza mpsabwino kwa ifepano nthawe zentse, ndipo malamulo yaceyo yambacinja lini. (Zai. 48:17, 18; 1 Ako. 6:9, 10) Sathani ambaphatisa basa cizunzo kuti atitazise kukhala wakulimba. Cakulinga cace n’cakufuna ‘kutikhudyula’ mwauzimu na kudzonga uxamwali bwathu na Yahova. (1 Ped. 5:8) Akristau wakuyambirira adamenyedwa na kuphedwa thangwe rakuti iwo akhafuna kupitiriza kukhala wakulimba. (Mab. 5:27, 28, 40; 7:54-60) Sathani ambapitiriza kuphatisa basa cizunzo ntsiku zino. Tikukwanisa kuwona bzimwebzi na momwe abale na mpfumakazi zathu akuzunzidwira ku Rússia na m’madziko manango. Kuthimizira pa kuzunzidwa, Sathani ambaphatisambo basa mapumpso. — Aef. 6:11. w23.07 15-16 ¶6-9

Mukambapfunza kwene-kwene Bibliya, lufoyi lanu kwa Yahova lin’dzakula kwene-kwene. Lufoyi limweri lin’dzakucitisani kuti muphatise basa bzomwe mukupfunzabzo. Imwepo mun’dzaphatisa basa nfundo za m’Bibliya pomwe mukufuna kucita cakusankhula pa moyo wanu. Imwepo mun’dzacinja makhalidwe yanu thangwe mukufuna kukondwesa Mulungu. Imwepo mun’dzayezera kutewezera Baba wanu wakudzulu ninga momwe mwana ambatewezerera pai wace. (Aef. 5:1, 2) Imwepo mungabzibvunze kuti: ‘Kodi lufoyi langu kwa Yahova ndamphanvu kusiyana na pomwe ndidakhala Mkristau? Kucokera pomwe ndidabatizidwa, kodi nimbatewezera momwe Yahova ambacitira bzinthu mwa kulatiza lufoyi kwa abale na mpfumakazi zangu?’ Penu ‘lufoyi lomwe mukhanalo pakuyamba’ ladjedjera, lekani kuwofoka. Bzimwebzi bzidacitikirambo Akristau wakuyambirira. Jezu alibe kuwalamba thangwe ra bzomwe iwo adacitabzo ndipo iye an’dzacitambo bzibodzi-bodzibzi kwa ifepano. (Apok. 2:4, 7) Iye ambadziwa kuti tingakhale pomwe na lufoyi ninga lomwe tikhanalo pomwe tidayamba kupfunza cadidi. w23.07 8 ¶2-3

Mpostolo Pedru adaphonya kazinji-kentse. Cakuyamba, Pedru adabzikhulupira kwene-kwene acimbacita magayo kuti angadapitiriza kukhala wakukhulupirika kwa Jezu napo anzace angadamusiya Jezuyo. (Mar. 14:27-29) Caciwiri, Pedru alibe kukhala tceru. (Mar. 14:32, 37-41) Cacitatu, pomwe thimu lomwe likhana xipada lidabwera kudzamanga Jezu, Pedru adamuthawa. (Mar. 14:50) Ndipo cacinai, Pedru adamulamba Jezu katatu ndipo adacita kulumbira kuti akhamudziwa lini. (Mar. 14:66-71) Kodi n’ciyani comwe Pedru adacita pomwe adakumbukira bza pikado yomwe adacita? Iye adaneseka kwene-kwene mu mtima ndipo adayamba kulira. (Mar. 14:72) M’mbuto mwakukumbukira bzakuphonya bza Pedru, Jezu adamuuza xamwali waceyo kuti angadamupasa maudindo yakuthumizirika. (Juw. 21:15-17) Pedru adadziwa kuti adacita pikado ikulu, tsono alibe kubwerera m’mbuyo. Thangwe ranyi? Thangwe iye adatsimikiza kuti Jezu akhakumbukira lini pomwe bza pikado yaceyo. Kodi tikupfunza ciyani? Tikupfunza kuti Yahova an’funa kuti ifepano titsimikizire kuti ambatifuna ndipo ambatilekerera. — Aro. 8:38, 39. w24.03 18-19 ¶13-15

Kucita upombo kungacitise munthu kuti abve manyazi, abziwone kuti ngwakusaya kufunika, akhale na mimba yakusaya kudikhirira na kudzonga mabanja. Ndipopa mpsanzeru kuleka kubvuma kupita “m’nyumba” mwa mkazi wakusaya nzeru. Kuthumizira pa kufa mwauzimu, wanthu azinji omwe ambacita bzimwebzi ambakhala na matenda yomwe yambawacitisa kuti afe mwakamfulumize. (Mim. 7:23) Vesi 18 ya Mimwani kapitulo 9 imbamaliza na mafala yakuti: “Omwe ambabvuma mcemo wace ambakhala ali kufupi na thenje.” Tsono, thangwe ranyi wanthu azinji ambabvuma kupumpsika na mcemo umweyu omwe umbawabweresera mabvuto? (Mim. 9:13-18) Cinthu comwe cimbawacitisa ni pornografia. Wanthu winango ambakumbuka kuti kuwona pornografia kungawadzonge lini. Tsono kuwona pornografia kumbacitisa kuti munthu aleke kubzilemekeza na kulekambo kulemekeza wanthu winango. Munthu omwe ambawona pornografia ambatazira kusiya kuwonako, ndipo bzithunzi-thunzibzo bzimbacoka lini m’makumbukidwe mwace. Ndipo cinango n’cakuti pornografia imbacitisa kuti munthu akulise bzikhumbo bzace bzakuipa. (Akol. 3:5; Tiy. 1:14, 15) Wanthu azinji omwe ambawona pornografia kamale-male kace n’kakuti ambadzacita upombo. w23.06 23 ¶10-11

Napo kuti madziko yanango yambayeza kuphindukira Utongi Bwamphanvu pa Dziko Lentse bwa Anglo-Americana, madzikoyo yan’dzakwanisa lini kubumalisa. Timbadziwa bzimwebzi thangwe “mwala,” omwe umbaimira Umambo bwa Mulungu, ndiwo un’dzaphwanya minyendo ya cifanikisoco, yomwe imbaimira utongi bumwebu. (Dan. 2:34, 35, 44, 45) Kodi mukukhulupira kuti polofesiya ya Daniyeli yakulewa bza minyendo ya simbi yakusanganizikana na dongo njacadidi? Penu ndibzo, bzimwebzi bzin’dzacita mbali ya momwe imwepo mumbacitira bzinthu pa moyo wanu. Imwepo mun’dzakhala lini wakutanganika kuyezera kunyang’ana bzinthu bzakuthupi thangwe mukudziwa kuti tsapanopali dziko lakuipali lin’pfudzidwa. (Luk. 12:16-21; 1 Juw. 2:15-17) Ndipo kubvesesambo polofesiya imweyi kun’dzakuthandizani kuti mumbawone kufunika kwa kucita basa lakupalizira na kupfunzisa wanthu. (Mat. 6:33; 28:18-20) Pambuyo pakupfunza polofesiya imweyi, bzibvunzeni kuti: ‘Kodi bzakusankhula bzangu bzikutsimikizira kuti Umambo bwa Mulungu tsapanopali bun’pfudza maboma yentse ya wanthuya?’ w23.08 11 ¶13-14

Bvumani mwakubzicepesa kuti magole yanu, thanzi lanu na bzakucitika bzinango bzingacitise kuti muleke kukwanisa kucita bzinthu bzinango. Ninga Barzilai, khalani wakukonzeka kulamba mabasa manango penu muna bvuto la thanzi. (2 Sam. 19:35, 36) Ninga Mozeji, mbapasani maudindo wanthu winango omwe mbakuthemera. (Eki. 18:21, 22) Kubzicepesa kumweku kun’dzakuthandizani kuleka kudikhirira bzinthu bzomwe mungakwanise lini kukhala nabzo. Ndipo tin’funikambo lini kubzipasa mulandu pa bzakusankhula bzakuipa bzomwe winango acita. Ifepano tingacitire lini bzakusankhula wanthu winango ndipo tingawakhotcerere lini ku bzakutewera bzomwe angakhale nabzo pa bzakusankhula bzakuipa bzomwe iwo acitabzo. Mwa ciratizo, mwana wacimuna ayai wacikazi angasankhule kusiya kutumikira Yahova. Cakusankhula cimweci cingasunamise kwene-kwene abereki wace. Na tenepo, abereki omwe ambabzipasa mulandu pa bzakusankhula bzakuipa bzomwe wana wawo ambacita ambanyamula mtolo wakulemera. Yahova ambadikhirira lini kuti iwo anyamule mtolo umweyu. w23.08 29 ¶11-12

Samusoni akhali munthu wakuperewerambo ninga ifepano, ndipopa nthawe zinango akhacitambo bzakusankhula bzakuphonyeka. Cinthu cibodzi comwe iye adasankhula kuipa cidamucitisa kuti agumane na mabvuto makulu. Pomwe padapita nthawe kucokera pomwe iye adayamba kutumikira ninga mtongi, “adayamba kufuna mkazi m’bodzi wa ku cigwa ca Soreki, omwe akhacemeredwa Dalila.” Napo kuti ni Samusoni omwe adacita cakusankhula cakufuna kulowola mkazi wacifilisteu, ni Yahova omwe adacitisa bzimwebzo kuti iye agumane mpata wakuti aphe Afilisteuwo. Patsogolo pace, Samusoni adakhala ku nyumba ya mkazi munango omwe akhali puta ku mzinda munango wa Afilisteu wakucemeredwa Gaza. Pa nthawe imweyire, Yahova adapasa mphanvu Samusoni kuti acose misuwo ya litsito la mzindayo, ndipo bzimwebzi bzidacitisa kuti mzindayo uleke kukhala wakukhotcerereka. (Ato. 14:1-4; 16:1-3) Tsono bzikhali bzakusiyana na nkhani ya Dalila, thangwe pinango iye akhali Mjirayeri. Dalila adabvuma kutambira kobiri zizinji zomwe Afilisteu adamupasa kuti apereke Samusoni kwa iwo. w23.09 5 ¶12-13

Nzeru zingatithandizembo kukhala wakuderekha. Munthu wanzeru ambakwanisa kubziphata wanthu akakhala akulewa kuipa bzomwe iye ambakhulupira. Kazinji-kazinji wanthu akakhala akuticita mibvunzo, iwo ambalewa lini thangwe lomwe lawacitisa kucita mibvunzoyo. Ndipopa pomwe tikanati kutawira tin’funika kuzindikira kuti tikudziwa lini bzomwe bzacitisa kuti munthuyo acite mbvunzoyo. (Mim. 16:23) Kumbukirani momwe Gidiyoni adatawirira amuna wa ku Efraimu. Iwo adamubvunza mwakukalipa kuti thangwe ranyi iye alibe kuwacemera pomwe Ajirayeri adayenda kukamenyana na anyamadulanthaka wawo. Tsono, n’ciyani maka-maka comwe cidacitisa kuti iwo akalipe? Pinango iwo akhali wakubzikuza. Tsono Gidiyoni adalatiza kuti akhali wanzeru na wakuderekha pomwe adawatawira. Bibliya limbalewa kuti bzimwebzi bzidacitisa kuti iwo ‘agwese nfuwa.’ — Ato. 8:1-3. w23.09 16 ¶8-9

Yahova na Jezu ali pa uxamwali ninga bomwe bumbakhala bulipo pakati pa pai na mwanace. Ndipopa bzidamuwawa kwene-kwene Yahova pomwe adawona Mwana wace akuboneresedwa na kulambidwa. Pai ali-wentse omwe adafedwa mwana adabva kuwawa kwene-kwene pomwe adaluza mwana waceyo. Napo kuti timbakhulupira kuti wanthu wakufa an’dzamuka, bzimbatiwawa kwene-kwene munthu omwe timbamufuna akafa. Ciratizoci cikutithandiza kubvesesa momwe Yahova adabvera pomwe adawona Mwana wace akubonera acifika pa kufa mu gole la 33 EC. (Mat. 3:17) Pomwe Cikumbuso cikanati kufika, yambani kupfunza bzizinji bza cakulombolera pa pfunziro lanu la pamwekha ayai pa Kunamata kwanu kwa pa Banja. Ndipo pa ntsiku ya Cikumbuso, lekani kudzayebwa kuwona vidiyo ya Kucezerana Vesi la Ntsiku. Tikakonzekeresa mtima wathu pomwe Cikumbuso cikufendera, tin’dzakhala wakukonzeka kuthandizambo wanthu winango kuti adzagumane phindu na Cikumbusoco. — Eza. 7:10. w24.01 11 ¶10-12

Njira ibodzi ya momwe tingatambirire mphanvu kwa Yahova ndiyo kucita mpembo. Pakutawira mipembo yathu, Yahova angatipase “mphanvu yakuposa yacibadwa.” (2 Ako. 4:7) Tingakhalembo na mphanvu tikambawerenga Fala lace na kumbakumbukira bzomwe tawerengabzo. (Sal. 86:11) Mafala ya Yahova yomwe yali m’Bibliya ‘njamphanvu.’ (Aheb. 4:12) Mukambapemba kwa Yahova na kuwerenga Fala lace, imwepo mun’dzatambira mphanvu yomwe in’dzakuthandizani kuti mupirire, mupitirize kukhala wakukondwa na kucita basa lomwe mukhawona kuti mungalikwanise lini. Mbatiwoneni momwe Yahova adapasira mphanvu mpolofeta Djona. Djona akhana mantha kuyenda komwe Yahova akhadamutuma. Iye adapakira xitima ya m’madzi acithawa kuti ayende ku mbuto inango. Thangwe ra bzimwebzo, iye pabodzi na wanthu omwe akhali mu xitimamo akhafuna kufa na conzi. Pomwe wanthuwo adamuthusa m’madzi, cintsomba cikulu cidamukhudyula. N’ciyani comwe Djona adacita kuti atambire mphanvu pomwe akhali m’mimba mwa cintsomba? Iye adapemba kwa Yahova. — Djon. 2:1, 2, 7. w23.10 13 ¶4-6

Napo kuti mpostolo Pedru adanembera matsamba yace Akristau wakuyambirira, Yahova adacitisa kuti matsambayo yacite mbali ya Bibliya. Ndipopa ifepano tingagumanembo phindu na matsamba yaceya. (Aro. 15:4) Ifepano tikukhala pakati pa wanthu omwe ambakhulupira lini mapolofesiya ya m’Bibliya. Anyakutsutsa ambatinyoza thangwe rakuti kuyambira kale-kale ifepano timbalewa kuti dzikoli lin’dzamala. Wanthu winango ambalewa mwakutsimikiza kuti dzikoli lin’dzamala lini. (2 Ped. 3:3, 4) Tikabva mafala ninga yamweya kuna wanthu omwe tikuwapalizira, anzathu wa ku basa na adzinza wathu, bzimwebzi bzingacitise kuti cikhulupiro cathu cimale mphanvu. Mpostolo Pedru adalewa bzomwe bzingatithandize. Bzingawoneke ninga kuti Yahova akucedwa kumalisa dziko lakuipali. Mafala ya mpostolo Pedru yambatithandiza kuti tipitirize kudikhirira thangwe yambatikumbusa kuti kawonedwe ka nthawe ka Yahova kadasiyana na ka wanthu. (2 Ped. 3:8, 9) Kwa Yahova magole 1000 yali ninga ntsiku ibodzi. Yahova ngwakupirira ndipo akufuna lini kuti munthu ali-wentse adzafe. Tsono ntsiku yaceyo ikadzafika, dzikoli lin’dzamala. w23.09 26-27 ¶2-5

Thangwe ranyi mpostolo Paulo adanembera tsamba limweri Akristau wacihebereu omwe akhakhala ku Djudeya? Iye adacita bzimwebzi pinango pa mathangwe mawiri yakufunika kwene-kwene. Cakuyamba, kuti awalimbikise. Azinji wa iwo pomwe akhanati kukhala Akristau akhanamata cipembedzo cacidjuda. Pinango atsogoleri wawo wa cipembedzo akhambawanyoza thangwe ra kukhala Akristau. Thangwe ranyi? Thangwe Akristauwo akhalibe templo yakudeka yakunamatira, guwa la ntsembe kuti ambapereke ntsembe kwa Mulungu na wantsembe kuti ambawatsogolere. Bzimwebzi bzingadawofokesa anyakupfunza wa Jezu bzicicitisa kuti cikhulupiro cawo ciwofoke. (Aheb. 3:12, 14) Pinango winango wa iwo adakhala na nzeru za kufuna kubwerera pomwe ku cipembedzo cacidjuda. Caciwiri, mpostolo Paulo adauza Akristau wacihebereuwo kuti iwo akhacita lini nyongo kuti abvesese bzinthu bzipsa ayai bzakuzika bzomwe iwo adapfunzisidwa bzomwe bzikhali ninga “cakudya cakulimba” cakugumanika mu Fala la Mulungu. (Aheb. 5:11-14) Bzikuwoneka kuti winango wa iwo akhapitiriza kuphatisa basa Lamulo la Mozeji. w23.10 24-25 ¶3-4

Akazi winango ambasankhula kusaya kulowodwa. (Mat. 19:10-12) Khulupirani kuti Yahova na Jezu ambanyozera lini Akristau wakusaya kulowodwa. Pa dziko lentse la pantsi, mpfumakazi zakusaya kulowodwa zimbathandizira kwene-kwene m’gwere. Pakuti izo zimbalatiza lufoyi kuna anzawo zimbakhala ninga mpfumakazi na azimai kwa anzawowo. (Mar. 10:29, 30) Winango ambakhala atumiki wa nthawe zentse. Mpfumakazi zacikristau zimbathandizira kwene-kwene basa la kupalizira pa dziko lentse la pantsi. (Sal. 68:11) Kodi imwepo mungacite makonzedwe yakuti mucite utumiki bwa nthawe zentse? Imwepo mungatumikire ninga mpainiya, mungabzipereke pa basa lakumanga-manga ayai kutumikira pa Beteli. Pemphererani cakulinga canuco. Cezani na wanthu winango omwe adakwanirisa cakulinga cawo kuti mudziwe bzomwe mungafunike kucita kuti mukwanirisembo cakulinga canu. Mukamala konzani ndondomeko ya bzomwe mukufuna kucita. Mukakwanirisa cakulinga canu mun’dzafungula mwayi wakuti mucite bzizinji pa kutumikira Yahova. w23.12 22 ¶16-17

Pomwe citsautso cikulu cikufendera, tikuwona kuti mpsakufunika kwene-kwene kubvera lamulo lakuti ticite basa lakupalizira. Tsono, nthawe zinango bzingatinese kucita bwino basa lakupalizira penu tikugumana na bvuto la kusaya kobiri ayai tikutsutsidwa pa basa lakupaliziralo. Kodi n’ciyani comwe cingatithandize kuti timbaikhe Umambo bwa Mulungu pa mbuto yakuyamba? Comwe cingatithandize ni kupitiriza kukhulupira kuti “Yahova wa anyankhondo” ali ku mbali yathu. Iye an’dzapitiriza kutithandiza tikaikha Umambo bwace pa mbuto yakuyamba ndipo bzinthu bzathu bzicibwera m’mbuyo. Ndipopa, ifepano timbacita lini mantha. (Ag. 2:4) Yahova akufuna kuti tipitirize kucita basa la kupfunzisa wanthu lomwe limbapulumusa wanthu azinji. Agai adauza wanthu wa Mulungu kuti ayambe pomwe kucita basa lakupambulika, ndipo bzimwebzi bzikhali ninga kuti akukonza pomwe papsa aliserse ya templo. Iwo angadacita bzimwebzi, Yahova adawapicira kuti angadawapasa “bzisimbo.” (Ag. 2:18, 19) Ifepanombo tingakhale na citsimikizo cakuti Yahova an’dzatisimbambo tikambaikha basa lomwe iye adatipasa pa mbuto yakuyamba. w23.11 16 ¶8; 17 ¶11

Mu tsamba lomwe Paulo adanembera Akristau wa ku Roma, iye adalewa kuti wanthu wentse ana pikado. Tsono, kodi munthu angawonedwe tani kuti ngwakulungama na wakusaya pikado kuti Mulungu akomedwe naye? Paulo adaphatisa basa ciratizo ca Abalahamu kuti athandize Akristau wentse wacadidi kutawira mbvunzo umweyu. Yahova adalewa kuti Abalahamu akhali wakulungama pomwe Abalahamuyo akhakhala ku Kanani. Thangwe ranyi Yahova adalewa kuti Abalahamu akhali wakulungama? Kodi ni thangwe lakuti iye adateweza bwino-bwino Lamulo la Mozeji? Bzikuwonekeratu kuti ne. (Aro. 4:13) Nfundo njakuti, pomwe Yahova adacemera Abalahamu kuti wakulungama Lamulo la Mozeji kukhalibe. Lamulo limweri lidadzabwera pambuyo pa magole 400. Tsono n’thangwe ranyi Mulungu adalewa kuti Abalahamu akhali munthu wakulungama? Yahova adamulatiza Abalahamu kudeka mtima kukulu ndipo adamucemera wakulungama thangwe ra cikhulupiro cace. — Aro. 4:2-4. w23.12 3 ¶4-5

Usiku bomwe Natani adalewalewa na Mambo Davide, Yahova adauza Natani kuti angadakhala lini Davide omwe angadamanga temployo, koma angadakhala m’bodzi mwa wana wace. (1 Nkha. 17:3, 4, 11, 12) Kodi n’ciyani comwe Davide adacita pomwe adabva mafalaya? Iye adayamba kucita basa la kukonkhobza bzinthu bzomwe mwana wace Salomau angadadzabziphatisa basa pa kumanga temployo. (1 Nkha. 29:1-5) Pomwe Yahova adauza Davide kuti ndiye lini omwe angadamanga templo, adacita naye mpangano. Yahova adauza Davide kuti dzinza lace lingadadzatonga mpaka kale-kale. (2 Sam. 7:16) Ndokumbukirani momwe Davide an’dzakhalira wakukondwa mu dziko lipsa akadzabva kuti Mambo omwe akutonga magole 1000 adacokera mu dzinza lace! Nkhaniyi ikutipfunzisa kuti napo kuti tingakwanise lini kucita bzizinji bzomwe tikhafuna kucitira Yahova, tingakhale na citsimikizo cakuti Yahova an’dzatipasa mabaibai yomwe tikhayadikhirira lini. w23.04 16 ¶8-10

Imwepo mungakwanise kugumana mbali za m’Bibliya zomwe zingakutsangalazeni mukakhala kuti muna mantha. Mwa ciratizo, imwepo mungagumane cilimbikiso m’bukhu la Djobi, Masalimo, Mimwani na mafala ya Jezu yomwe yambagumanika pa Mateu kapitulo 6. Mukambapemba kwa Yahova na kuwerenga Fala lace, imwepo mun’dzakhala wakutsangalazidwa. Tingakhale na citsimikizo centse cakuti Yahova an’dzakhala ku mbali yathu pa nthawe zakunesa za pa moyo wathu. Tin’dzakhala lini tekha. (Sal. 23:4) Yahova akupicira kuti an’dzatikhotcerera, kutithandiza na kutitsangalaza. Pakulewa bza Yahova, Zaiya 26:3 ambati: “Wanthu omwe ana mtima wakusaya kutekenyeka mun’dzawapasa mtendere wakusaya kumala thangwe iwo ambathemba imwepo.” Na tenepo, mbathembani Yahova ndipo mbabvumani thandizo lomwe iye ambakupasani. Mukacita tenepoyo, imwepo mun’dzakhala na mphanvu napo pa nthawe zakunesa. w24.01 25 ¶16-17

Mafala yakufuliziridwaya ya cinembo comwe ciri padzauluci yakukwanisika ntsiku zino. Ndipo pana mafala manango yakutsangalaza yomwe yakuphatambo basa ntsiku zino. Mafalayo yambati: “Wana wanu wentse an’dzapfunzisidwa na Yahova ndipo mtendere wa wanawo un’dzakhala uzinji. . . . Imwepo mun’dzacita lini mantha ndipo palibe cinthu comwe cin’dzakugopswani thangwe cinthuco cin’dzafendera lini pafupi na imwepo.” (Zai. 54:13, 14) Mafalaya yambatitsangalaza thangwe yakutitsimikizira kuti napo “mulungu wa dzikoli,” omwe ni Sathani Dyabu, alibe mphanvu ya kuimisa basa lakupfunzisa wanthu lomwe atumiki wa Yahova akucita. (2 Ako. 4:4) Kunamata kwakucena kudabwezeresedwa ndipo kun’dzapswipizidwa lini pomwe. Iko kun’dzapitiriza kuyenda na kuyenda. Palibe cifuzo ciri-centse comwe cidakonzedwa kuti citidzonge cin’dzakunda! w24.02 4 ¶10

Akristaufe timbawona kuti kubzipereka kwathu kwa Yahova ni cinthu cakufunika kwene-kwene. Bzimwebzi bzimbaticitisa kuti ticinje bzinthu bzinango pa bzakusankhula na bzicito bzomwe timbacita na adzinza wathu. Ifepano timbaphata basa na nyongo kuti tidyese banja lathu, tsono timbalekerera lini kuti bzimwebzi bzikhale patsogolo kuposa kucita bzomwe Yahova ambafuna. (Mat. 10:35, 36; 1 Tim. 5:8) Nthawe zinango timbafunikira kucita bzakusankhula bzomwe wanthu wa m’banja mwathu angakomedwe lini nabzo na cakulinga cakuti tikondwese Yahova. Iye ndiye omwe adayambisa banja, ndipo ambafuna kuti tikhale na banja lakukondwa. (Aef. 3:14, 15) Penu tikufuna kukhala wakukondwa, tin’funika kucita bzinthu mwakubverana na momwe Yahova ambafunira. Lekani kupenukira kuti Yahova ambawona lufoyi lomwe mumbamulatiza pa kumutumikira ndipo pa nthawe ibodzi-bodziyo mucimbasamalirambo wanthu wa m’banja mwanu mwa lufoyi na mwa ulemu. — Aro. 12:10. w24.02 18 ¶11, 13