Março

Dziko lipsa likanati kubwera. Kumbukirani bzinthu bzomwe bziripo, ninga nyenyezi, miti, bzirombo na wanthufe. Pa nthawe inango bzinthu bzimwebzi pakhalibe, koma tsapano ibzo bziripo. Bzinthu bzimwebzi bziripo thangwe Yahova adabzilenga. (Gen. 1:1, 26, 27) Mulungu wathu akufunambo kubweresa dziko lipsa. Iye an’dzacita bzomwe adalewa. Mu dziko lipsa wanthu an’dzakhala na moyo wakusaya kumala ndipo an’dzakhala na thanzi labwino. Ifepano tingatsimikize kuti nthawe yace ikadzakwana, Mulungu an’dzabweresa dziko lipsa. (Zai. 65:17; Apok. 21:3, 4) Pomwe mukudikhirira bzimwebzi, phatisani basa mpata uli-wentse omwe mungakhale nawo kuti mulimbise cikhulupiro canu. Nthawe zentse mbatendani Mulungu thangwe ra kutipasa cakulombolera. Mbakumbukirani kuti Yahova ana mphanvu. Mbakhalani na nthawe yakucita bzinthu bzauzimu. Mukacita bzimwebzi, mun’dzakhala pakati pa wanthu “omwe mwa cikhulupiro na kupirira, akutambira utaka bomwe adauzidwa kuti angadadzapasidwa.” — Aheb. 6:11, 12. w23.04 31 ¶18-19

Jezu adanyang’anisa kudzulu ndipo adapemba patsogolo pa wanthu wentse. Iye akhafuna kuti Yahova ndiye apasidwe ulemerero pa bzomwe bzingadacitikabzo. Ndipo Jezu adakuwa kuti: “Lazaro bula!” (Juw. 11:43) Ndipo Lazaroyo adabula m’thenje! Jezu adacita bzinthu bzomwe wanthu akhawona kuti bzingadakwanisika lini. Nkhani imweyi imbalimbisa cikhulupiro cathu pa nkhani ya kulamusidwa kwa anyakufa. Thangwe ranyi tikulewa tenepoyo? Kumbukirani mafala yomwe Jezu adauza Marta. Iye adati: “M’bale wako an’dzamuka.” (Juw. 11:23) Ninga Pai wace, Jezu akufunisisa ndipo ana mphanvu yakucita bzimwebzi. Kulira komwe iye adacita kumbalatiza kuti iye akufunisisa kudzamalisa mabvuto yomwe yambabwera thangwe ra kufedwa. Ndipo kubula kwa Lazaro mu thenjemo, kudalatiza kuti Jezu ana mphanvu yakulamusa wanthu wakufa. Ndipo kumbukiranimbo bzomwe Jezu adamukumbusa Marta bzomwe bziri mu cinembo ca lero. Ifepano tina mathangwe yomwe yambaticitisa kukhulupira kuti bzomwe Mulungu adalewa bzin’dzacitikadi. w23.04 11-12 ¶15-16

Pinango tingafunikire kucinja bzomwe timbakumbira mu mpembo tikabvesesa bwino bzomwe Yahova ambafuna. Ifepano tin’funika kukumbukira kuti Yahova ana cakulinga ndipo cakulingaco an’dzacikwanirisa pa nthawe yace. Cinango comwe iye akufuna kudzacita ndico kumalisa mabvuto yomwe yambacitisa kuti wanthu abonere ntsiku zino, ninga malengwa ya pantsi, matenda na infa. Yahova an’dzacita bzimwebzi mwakuphatisa basa Umambo bwace. (Dan. 2:44; Apok. 21:3, 4) Pomwe nthawe imweyi ikanati kufika, iye walekerera kuti Sathani atonge dzikoli. (Juw. 12:31; Apok. 12:9) Yahova angadamalisa mabvuto yanango yomwe wanthu akugumana nayo ntsiku zino bzingadawoneka ninga kuti utongi bwa Sathani n’bwabwino. Ndipopa pomwe tikudikhirira kuti Yahova adzacite bzomwe adalewa, bzin’funa lini kulewa kuti iye an’dzandotilekerera tenepoyo ne kutithandiza, koma an’dzatithandiza. Yahova an’dzabwera kudzatithandiza. w23.05 8 ¶4; 9-10 ¶7-8

Kodi tingathandize tani winango kuti agumane phindu na Cikumbuso? Njira yakuyamba ni kuwacemerera ku Cikumbusoco. Kuthumizira pa kucemerera wanthu omwe timbawagumana mu utumiki, tingakonze lista ya wanthu omwe timbawadziwa kuti tidzawacemerembo. Wanthuwo angakhale adzinza wathu, anzathu wa ku basa, wa ku xikola na wanthu winango omwe timbawadziwa. Tikakhala tiribe micemo yakukwanira kuti tiwapase, tingawatumizire linki ya mcemoyo mu telefoni zawo. Tingadzadabwe kwene-kwene tikadzawona wanthu azinji akubwera! (Mpal. 11:6) Kumbukirani kuti imwepo mukacemera wanthu kuti abwere ku Cikumbuso, iwo angakhale na mibvunzo, maka-maka bzikakhala kuti akanati kubwera kale pa mitsonkhano yathu. Ndipopa tingacite bwino kukumbukira mibvunzo yomwe iwo angacite ticikonzekera momwe tingawatawirire. Napo pomwe Cikumbuso camala, wanthu anovu angakhale na mibvunzo minango. Tikufunisisa kucita ciri-centse comwe tingakwanise pomwe Cikumbuso cikanati kucitika na pomwe camala kuti tithandize wale “omwe ana mitima yabwino” kugumana phindu na Cikumbusoco. — Mab. 13:48. w24.01 12 ¶13, 15; 13 ¶16

Bibliya limbafotokoza bza wanthu 8 omwe akhadafa ndipo adalamusidwa. Pfunzani nkhani zimwezi mwa kamderekho. Pomwe mukucita bzimwebzi, mbawonani bzomwe mungapfunze na nkhanizo. Mbayezerani kukumbukira kuti nkhanizo zikulatiza tani kuti Mulungu akufuna ndipo ana mphanvu yakulamusa wanthu wakufa. Ndipo kuposa bzentse, mbakumbukirani bza munthu wakufunika kwene-kwene omwe adalamusidwa, Jezu. Kumbukirani kuti pomwe iye adalamusidwa, wanthu wakupitirira 500 adamuwona ndipo bzimwebzi bzimbatipasa cikhulupiro cakuti wanthu omwe adafa an’dzalamusidwadi. (1 Ako. 15:3-6, 20-22) Timbatenda kwene-kwene Yahova thangwe ra kutipasa cidikhiro cakuti wanthu omwe adafa an’dzalamusidwa! Ifepano tin’funika kukhulupira kuti bzimwebzi bzin’dzacitikadi thangwe Yahova akufuna ndipo ana mphanvu yakucita bzimwebzi. Bwerani tipitirize kulimbisa cikhulupiro cathu cakuti wanthu omwe adafa an’dzalamusidwa. Tikacita bzimwebzi, tin’dzakhala wakufendererana na Mulungu omwe akutitsimikizira kuti ‘adzinza wathu an’dzamuka!’ — Juw. 11:23. w23.04 8 ¶2; 12 ¶17; 13 ¶20

Timbalatiza kuti ndife wakubzicepesa tikambabziwona mwakuthemera ticimbazindikirambo kuti pana bzinthu bzomwe tingakwanise lini kubzicita. Ndipo timbalatizambo kuti ndife wakubzicepesa tikambawona anzathu kukhala wakufunika kuposa ifepano. (Afil. 2:3) Munthu omwe ambacita bzimwebzi ngwakubzicepesa. Gidiyoni akhali munthu wakubzicepesa. Pomwe anjo adamuuza kuti akhadasankhulidwa na Yahova kuti atsudzule Ajirayeri m’manja mwa Amidiyani, iye adatawira kuti: “Banja lathu nding’ono kwene-kwene m’dzinza la Manase ndipo m’nyumba ya pai wangu, inepano ndine ng’ono kwene-kwene.” (Ato. 6:15) Iye akhabziwona kuti angadakwanisa lini kucita basalo, tsono Yahova akhadziwa kuti iye angadakwanisa kulicita. Mwakuthandizidwa na Yahovayo, Gidiyoni adakwanisadi kulicita basalo. Akulu ambacita nyongo yakulatiza kuti mbakubzicepesa m’bzinthu bzentse. (Mab. 20:18, 19) Iwo ambabziwonesera lini pa luso lomwe analo na bzinthu bzomwe ambakwanisa kucita; ndipo iwo ambabziwonambo lini kuti mbakusaya kufunika thangwe rakuti aphonyesa bzinthu bzinango. w23.06 3 ¶4-5

Kutsotoledwa msolo kwa Sathani kun’dzakwanisika kuphampha kwa magole 1000 ya utongi bwa Jezu. (Apok. 20:7-10) Pomwe bzimwebzi bzikanati kucitika, cakuyamba, mitundu ya wanthu in’dzalewa kuti “mtendere na mkhomeko!” (1 Ates. 5:2, 3) “Pa nthawe imweyoletu,” citsautso cikulu cin’dzayamba pomwe mitundu ya wanthu in’dzaphindukira magereja yakunama. (Apok. 17:16) Patsogolo pace, Jezu an’dzatonga wanthu wa pa dziko la pantsi acilekanisa mabira na mbuzi. (Mat. 25:31-33, 46) Pa nthawe imweyo, Sathani an’dzapitiriza kutsutsa Yahova. Thangwe ra ciwengo cimweci, iye an’dzatsonkhanisa mbverano wa mitundu ya wanthu, omwe Bibliya limbaucemera kuti Gogi wa dziko la ku Magogi kuti adzapfudze wanthu wa Mulungu. (Ezek. 38:2, 10, 11) Pa nthawe imweyo, anyakudzozedwa omwe an’dzakhala akali pa dziko la pantsi an’dzatsonkhanisidwa aciyenda kudzulu kuti akagumane na Jezu pabodzi na anjo kuti amenye nkhondo ya Armagedo, kuphampha kwa citsautso cikulu. (Mat. 24:31; Apok. 16:14, 16) Nkhondoyo ikadzamala, bun’dzayamba Utongi bwa Magole 1000 bwa Jezu Kristu pa dziko la pantsi pano. — Apok. 20:6. w23.10 20-21 ¶9-10

Ntsiku zino, atumiki azinji wa Yahova ambakhala m’madziko yomwe basa lathu ndakuletsedwa. Iwo ambalemekeza akulu-akulu wa boma, tsono ninga Obadiya, abale na mpfumakazi wakukhulupirikawa ambapasa Yahova bzomwe iye ambafunikira bzomwe n’kunamatidwa. (Mat. 22:21) Iwo ambalatiza kuti ambagopa Mulungu mwa kumubvera sikuti kubvera wanthu. (Mab. 5:29) Iwo ambacita bzimwebzi mwakupitiriza kupalizira mafala yabwino ya Umambo na kucita mitsonkhano yawo mwakabise-bise. (Mat. 10:16, 28) Iwo ambadziwa kuti abale na mpfumakazi zawo akufunikira cakudya cauzimu. Onani bzomwe Henri adacita. Iye ambakhala mu dziko libodzi la ku África komwe basa lathu likhadaletsedwa. Pa nthawe imweyo, Henri adabzipereka kuti ambapase abale na mpfumakazi zathu cakudya cauzimu. Iye adanemba kuti: “Inepano ndine munthu wa mantha. . . . Yahova adandicitisa kuti ndikhale wakukhwimika.” Kodi nthawe inango mudakhala kale wakukhwimika ninga Henri? Imwepo mungakhale wakukhwimika mukakhala kuti mumbagopa Yahova. w23.06 16 ¶9, 11

Pomwe Adamu na Eva adapanduka, bzidawoneka ninga kuti Sathani akhadakwanisa kucitisa kuti cakulinga ca Yahova cakuti pa dziko la pantsi padzale na wanthu wakulungama na wakubvera citazike. Pinango Sathani adakumbuka kuti Yahova akhalibe nzeru ya momwe angadacinjira bzinthu. Pinango iye akhakumbuka kuti bzomwe Yahova angadacita bzikhali kondopha Adamu na Eva acilenga wanthu winango kuti akwanirise cakulinga cace cakuti pa dziko la pantsi pakhale na wanthu wakulungama. Tsono Mulungu angadacita bzimwebzi, Dyabuyo angadalewa kuti Mulungu ngwakunama. Thangwe ranyi? Thangwe pa Genesesi 1:28, Yahova adacita kuleweratu kuti dziko la pantsi lingadadzadzala na mbadwa za Adamu na Eva. Pinango iye adakumbuka kuti Yahova angadalekerera kuti Adamu na Eva abereke wana bzomwe bzingadacitisa kuti bzomwe Mulungu akhafuna bzisaye kucitika thangwe wanawo angadapitiriza kukhala wakuperewera. (Mpal. 7:20; Aro. 3:23) Yahova angadacita bzimwebzi, Sathani angadalewa kuti Mulungu atazira kucita bzomwe akhafuna. Thangwe ranyi? Thangwe bzimwebzi bzingadacitisa lini kuti cakulinga ca Mulungu ca kudzaza dziko la pantsi na mbadwa zakulungamiratu za Adamu na Eva cikwanisike. w23.11 6 ¶15-16

Yahova ambatipasa malamulo yakubveka bwino mwakuphatisa basa Fala lace na gulu lace. Palibe mathangwe yakuthumizirira malamulo yomwe iye adatipasa. (Mim. 3:5-7) Ndipopa, timbacita lini bzinthu bzomwe bziribe kunembedwa ayai kukonzera malamulo abale wathu wacikristau pa nkhani zomwe ziribe kunembedwa. Sathani ambaphatisa basa “mapumpso” na “bzinthu bza m’dzikoli” kuti apumpse wanthu na kuwacitisa kukhala wakusaya kubverana. (Akol. 2:8) Mu nthawe ya Akristau wakuyambirira, iye adaphatisa basa nzeru za wanthu, bzipfunziso bza Adjuda na cipfunziso cakuti Akristau akhafunika kubvera Malamulo ya Mozeji. Yamweya yakhali mapumpso thangwe yakhacitisa kuti wanthu aleke kubvera nzeru yacadidi yakucokera kwa Yahova. Ntsiku zino, Sathani ambaphatisa basa anyakumwaza nkhani na interneti kuti amwaze bzinthu bzakunama bzomwe ambauzidwa na atsogoleri wa ndale. w23.07 16 ¶11-12

Yahova adacita bzinthu mwakusiyana kwene-kwene na momwe Sathani akhakumbukira ndipo bzimwebzi pinango-pentse bzidamudabwisa kwene-kwene Sathaniyo. M’mbuto mwakukhala wakunama, Yahova adalatiza kuti ambanama lini mwa kulekerera kuti Adamu na Eva akhale na wana. Ndipo m’mbuto mwakuti cakulinga ca Yahova cisaye kukwanisika, iye adanyang’ana njira yakuti cakulingaco cikwanisike. Iye adacita bzimwebzo mwakuphatisa basa “munthu” omwe angadadzakwanisa kupulumusa mbadwa zentse za kubvera za Adamu na Eva. (Gen. 3:15; 22:18) Pinango Sathani adadabwa kwene-kwene pomwe adawona makonzedwe ya Yahova yamweya! Thangwe ranyi? Thangwe makonzedwe yamweya yadalatiza kuti Yahova ana lufoyi kwene-kwene na wanthu. (Mat. 20:28; Juw. 3:16) Sathani alibe khalidwe limweri, koma iye ni munthu wadyera. Tsono n’ciyani comwe cin’dzacitika thangwe ra makonzedwe ya cakulombolera yomwe Yahova adakonza? Kuphampha kwa magole 1000 mbadwa zakulungamiratu na za kubvera za Adamu na Eva zin’dzakhala mu Paraizo pa dziko la pantsi ninga momwe Yahova akhafunira pakuyamba. w23.11 6 ¶17

Timbabvera lamulo la Yahova la kulemekeza mulopa. Thangwe ranyi? Thangwe Yahova adalewa kuti mulopa umbaimira moyo ndipo imweyi ni mphaso yakucokera kwa iye. (Lev. 17:14) Pomwe Yahova adauza wanthu kuti ambadye nyama, iye adawauza kuti aleke kumbadya mulopa. (Gen. 9:4) Ndipo iye adapasambo lamulo limweri Ajirayeri. (Lev. 17:10) Iye adatsogolera Bungwe Lakutonga la Akristau wakuyambirira kuti liuze Akristau kuti ‘atcenkhe mulopa.’ (Mab. 15:28, 29) Timbalatiza kuti timbabvera lamulo limweri pomwe timbacita cakusankhula ca thandizo la ulapi lomwe tingatambire. Timbabvera lamulo la Yahova la kutcenkha kucita bzinthu bza upombo. Mwa kuphatisa basa mafala yakuyezezera, mpostolo Paulo akuticenjeza kuti tin’funika kucitisa bziwalo bza thupi lathu kukhala bzakufa na kutcenkha kucita cinthu ciri-centse cakuipa. Timbatcenkha kuwona ayai kucita cinthu ciri-centse comwe cingaticitise kufuna kucita bzinthu bza upombo. — Akol. 3:5; Djob. 31:1. w23.07 15 ¶5-6

Kodi Samusoni alibe kuzindikira bzomwe Dalila akhafuna kucita thangwe rakuti akhamufuna kwene-kwene Dalilayo? Pinango-pentse. Dalila adangingimiza Samusoni kuti amuuze bzomwe bzikhamucitisa kuti iye akhale na mphanvu ndipo pakumalizira pace Samusoniyo adadzalewa. Bzomwe Samusoni adacitabzi bzidamucitisa kuti amale mphanvu na kuti Yahova aleke kumuthandiza. (Ato. 16:16-20) Samusoni adagumana na mabvuto makulu pa moyo wace thangwe rakuti adakhulupira Dalila m’mbuto mwakukhulupira Yahova. Afilisteu adamuphata Samusoni ndipo adamucosa maso. Iwo adamuikha m’kawoko ku Gaza ndipo wanthu adamucitisa kukhala kapolo. Iye adapasidwa manyazi kwene-kwene pomwe Afilisteu adatsonkhana kuti acite festa. Iwo adapereka ntsembe kuna mulungu wawo wakunama wakucemeredwa Dagoni, kukhala ninga kuti Dagoniyo ndiye omwe adacitisa kuti iwo amuphate Samusoni. Iwo adamucosa Samusoni m’kawokomo acimubweresa pomwe pakhana iwopo “kuti amuyese cinthu” cakusekesa. — Ato. 16:21-25. w23.09 5-6 ¶13-14

Pinango mwanzanu wa ku basa ayai wa ku xikola angakubvunzeni kuti thangwe ranyi timbateweza mitemo inango ya m’Bibliya. Mungafotokoze bzomwe timbakhulupira mwakugwa mpfuwa, koma mucilemekezambo bzomwe iye ambakhulupira. (1 Ped. 3:15) M’mbuto mwakukumbukira mathangwe yomwe yacitisa munthu kuti acite mbvunzo, tin’funika kucita bzinthu mwakuderekha. Pinango mtawiro wathu ungacitise munthuyo kucinja makumbukidwe yace. Mwanzanu wa ku basa akakubvunzani kuti thangwe ranyi imwepo mumbasekerera lini ntsiku yakubadwa, bzingakhale bwino kubzibvunza kuti: ‘Kodi iye akukumbuka kuti ifepano timbabvumizidwa lini kucita festa iri-yentse? Ifepano tingathandize mwanzathu wa ku basa kuti aleke kukhala na thupo mwa kumutenda. Bzimwebzi bzingacitise kuti mukwanise kukhala na maceza yabwino na kumuthandiza kudziwa bzomwe Bibliya limbalewa pa nkhani yakusekerera ntsiku yakubadwa. w23.09 17 ¶10-11

Pomwe ntsiku ya Mulungu ikanati kufika, ifepano tina mwayi ukulu kwene-kwene wa kupalizira wanthu wa mitundu yentse. Mpostolo Pedru adaticenjeza kuti tipitirize “kukumbukira” kubwera kwa ntsiku ya Yahova. (2 Ped. 3:11, 12) Kodi tingacite tani bzimwebzi? Tingacite bzimwebzi mwa kumbakumbukira ntsiku zentse bzisimbo bzomwe tin’dzatambira m’dziko lipsa. Mbabziyezezerani kuti muli m’dziko lipsa ndipo mukupuma mphuwe yabwino, mukudya cakudya cakupasa thanzi, mukutambira adzinza wanu omwe akulamusidwa kwa anyakufa na kupfunzisa wanthu omwe adakhala na moyo magole mazinji m’mbuyomu bza mapolofesiya ya m’Bibliya. Kumbakumbukira bzinthu bzimwebzi kun’dzatithandiza kuti tipitirize kudikhirira ntsiku ya Yahova na kuleka kukhala na makumbukidwe yomwe wanthu anayo yakuti dzikoli lin’dzamala lini. Pakuti ‘tikudziwiratu bzimwebzi,’ ifepano ‘tin’dzatengeka’ lini na bzipfunziso bzakunama. w23.09 27 ¶5-6

Maswaka yadazunguliridwa na anzawo omwe ‘ambabvera lini abereki.’ (2 Tim. 3:1, 2) N’thangwe ranyi iwo ambabvera lini? Winango ambakumbuka kuti abereki wawo mbacinyengo. Abereki winango ambacita lini bzinthu bzomwe ambapfunzisa wana wawo. Ndipo bzimwebzi bzimbacitisa kuti wanawo awone kuti aberekiwo mbakusaya cirungamo. Winango ambakumbuka kuti dzikoli lacinja, ndipo malango yomwe abereki wawo ambawapasa njakusaya kuthandiza ndipo njakunesa kwene-kwene. Penu imwepo ndimwe tswaka, kodi mumbabzibvambo tenepoyo? Kwa winango bzimbakhala bzakunesa kubvera lamulo la Yahova. N’ciyani cingakuthandizeni kuti mumbacite bzimwebzi? Imwepo mungapfunze kukhala wakubvera na ciratizo cabwino kwene-kwene ca Jezu. (1 Ped. 2:21-24) Iye akhali munthu wakulungamiratu, tsono abereki wace akhali wakuperewera. Tsono Jezu akhambawalemekeza abereki wacewo napo kuti nthawe zinango iwo akhambaphonya ndipo akhambamubvesesa lini. — Eki. 20:12. w23.10 7 ¶4-5

Paulo adafotokoza kuti ntsembe zomwe Lamulo likhalewa kuti ziperekedwe zingadakwanisa lini kumalisiratu pikado za wanthu. Na thangwe limweri, Lamulo ‘lidacosedwa.’ Patsogolo pace, Paulo adayamba kupfunzisa bzinthu bzinango bzakuzika. Iye adakumbusa Akristau anzace bza “cidikhiro cabwino” comwe cidakwanisika thangwe ra ntsembe ya Jezu yomwe ingadawathandiza kuti akhale ‘wakufendererana na Mulungu.’ (Aheb. 7:18, 19) Paulo adafotokozera abale wace wacihebereuwo kuti thangwe ranyi kanamatidwe kacikristau kakhali kapadzulu kuposa kanamatidwe kawo kacidjuda. Kanamatidwe ka cipembedzo cacidjuda kakhali mthunzi wa “bzinthu bzomwe bzingadabwera, tsono cadidi cace ciri mwa Kristu.” (Akol. 2:17) Mthunzi umbaimira cinthu cacadidi, tsono mthunziyo ndiwo lini cinthuco. Mpsibodzi-bodzimbo na kanamatidwe kacidjuda kakale-kale. Iko kakhali mthunzi wa bzomwe bzingadabwera kutsogolo. Tin’funika kubvesesa makonzedwe yomwe Yahova adayaikha kuti pikado zathu zilekereredwe nakuti kanamatidwe kathu kakhale kakubvumidwa na iye. w23.10 25 ¶4-5

Daniyeli kapitulo 11 ambafotokoza bza amambo awiri, ayai maboma ya ndale, yomwe yambacita mpikisano. Mwa kundendemezera polofesiya imweyi na mapolofesiya manango yomwe yambagumanika m’Bibliya, tikukwanisa kudziwa kuti “mambo wa ku norte” ni Rússia na omwe ambamuthandiza ndipo “mambo wa ku suli” ni Utongi Bwamphanvu pa Dziko Lentse bwa Anglo-Americana. Atumiki wa Yahova omwe ambatongedwa na “mambo wa ku norte” akuzunzidwa kwene-kwene na mambo umweyu. Abale winango ambamenyedwa na kuikhidwa m’kawoko thangwe ra cikhulupiro cawo. M’mbuto mwa kuwacitisa mantha abale wathuwo, kuzunzidwa kwawoko na “mambo wa ku norte” kwacitisa kuti alimbise cikhulupiro cawo kwa Yahova na Fala lace. Thangwe ranyi? Thangwe rakuti abale wathu ambadziwa kuti kuzunzidwa kwa wanthu wa Mulungu kukukwanirisa polofesiya ya m’bukhu la Daniyeli. (Dan. 11:41) Kudziwa bzimwebzi kungatithandize kuti tilimbise cidikhiro cathu na kupitiriza kukhala wakukhulupirika kwa Yahova. w23.08 11 ¶15-16

Pakuti Yahova ambatifuna, iye ambacita thupo na bzinthu bzomwe bzimbaticitikira ndipo ambafunisisa kutikhotcerera. Ifepano tikapwetekeka, bzimbamuwawa kwene-kwene. Ndipopa ifepano tingapembe kuti: “Ndikhotcerereni ninga mboni ya diso lanu.” (Sal. 17:8) Diso ni cinthu cakufunika kwene-kwene kwa munthu. Ndipopa, Yahova akatindendemezera na mboni ya diso lace bzimbakhala ninga akulewa kuti: ‘Munthu omwe an’kucitirani cinthu cakuipa, wanthu wangumwe, iye akucita kuipa cinthu cakufunika kwene-kwene kwa inepano.’ Tsono iye ambadziwa kuti thangwe ra mabvuto yomwe timbagumana nayo, nthawe zinango tingakumbuke kuti iye ambatifuna lini. Ayai pinango tingakhale tikugumana na mabvuto nthawe ino yomwe yangaticitise kukumbuka kuti Yahova ambatifuna lini. Kodi n’ciyani cin’dzalimbisa cikhulupiro cathu? Comwe cin’dzalimbisa cikhulupiro cathu ndico kupfunza momwe Yahova ambalatizira lufoyi kwa Mwana wace, Jezu, kwa anyakudzozedwa na kwa ifepano tentse. w24.01 27 ¶6-7

Ezara adakwanisa kuwona momwe Yahova adathandizira wanthu wace pa nthawe yakunesa. Pomwe gole la 484 AEC likhanati kufika, Ezara akhakhala ku Babiloniya pomwe Mambo Asuwero adaikha lamulo lakuti Adjuda wentse omwe akhakhala mu Utongi bwa Perisiya aphedwe. (Est. 3:7, 13-15) Moyo wa Ezara ukhali pa ngozi! Pomwe Adjuda adadziwa bzimwebzi, adakhala na thupo kwene-kwene. “M’bzigawo bzentse,” iwo adasiya kudya ndipo adalira pomwe akhakumbira thandizo kwa Yahova. (Est. 4:3) Ndokumbukirani momwe Ezara pabodzi na Adjuda anzace adabvera pomwe wale omwe akhadakonza ciwembo cimweci adaphedwa m’mbuto mwa iwo! (Est. 9:1, 2) Bzomwe Ezara adagumana nabzo pa nthawe imweyire bzidamukonzekeresa pa mabvuto yomwe angadadzagumana nayo kutsogolo. Ndipo bzidamucitisambo kukhulupira kuti Yahova ana mphanvu yakukhotcerera wanthu wace. w23.11 17 ¶12-13

Mpostolo Paulo akhalewa bza kubvera “lamulo” la Mozeji, lomwe lidaperekedwa kwa Ajirayeri pa Phiri la Sinai. (Aro. 3:21, 28) Bzikuwoneka kuti mu ntsiku za Paulo, Akristau winango wacidjuda akhakhulupira kuti akhafunika kupitiriza kuteweza Lamulo la Mozeji. Ndipopa Paulo adaphatisa basa ciratizo ca Abalahamu kuti alatize kuti munthu an’funika lini kuteweza “lamulo” kuti akhale wakulungama. M’mbuto mwace, Paulo adafotokoza kuti tin’funika kukhala na cikhulupiro. Bzimwebzi mpsakulimbikisa thangwe bzimbatithandiza kukhala na cikhulupiro cakuti tingakwanise kukhala pa uxamwali na Mulungu. Bzimwebzi bzikulatiza kuti tingakhale na cikhulupiro kwa Mulungu na kwa Jezu Kristu, bzomwe bzingaticitise kuti tingabvumidwe na Mulungu. Tsono “mabasa” yomwe yambafotokozedwa pa Tiyago kapitulo 2 njakusiyana na kubvera “lamulo” la Mozeji lomwe lidafotokozedwa na Paulo. Tiyago akhalewa bza mabasa yomwe Akristau ambacita pa moyo wawo wa ntsiku na ntsiku. (Tiy. 2:24) Mabasa yamweya yambalatiza penu Mkristau ambakhulupiradi Mulungu ayai ne. w23.12 3 ¶8; 4-5 ¶10-11

Mpfumakazi zomwe zin’funa kulowodwa zin’funika kusankhula bwino mwamuna omwe zin’dzalowodwa naye. Kumbukirani kuti imwepo mun’dzatsogoleredwa na mwamuna omwe mun’dzalowodwa nayeyo. (Aro. 7:2; Aef. 5:33) Ndipopa bzibvunzeni kuti: ‘Kodi iye ni Mkristau wakukhwima mwauzimu? Kodi iye akuikha bzinthu bza Umambo pa mbuto yakuyamba pa moyo wace? Kodi iye ambasankhula bzinthu mwanzeru? Kodi iye akaphonya ambabvuma kuphonya kwaceko? Kodi iye ambalemekeza akazi? Kodi iye an’dzakwanisa kundithandiza mwauzimu, kugumana bzakufunikira pa banja na kundithandiza ndikafunikira thandizo?’ Tsono penu imwepo mukufuna kukhala na mwamuna wabwino, imwepombo mun’funika kukhala mkazi wabwino. Mkazi wabwino ni “mthandizi” kwa mwamuna wace ndipo ni “mwanzace wakumuthemera” kwa iye. (Gen. 2:18) Ndipo pakuti iye ambafuna Yahova, ambacita nyongo kuti athandizire kuti bayace akhale na mbiri yabwino. (Mim. 31:11, 12; 1 Tim. 3:11) Kuti imwepo mudzakwanise kucita bzimwebzi, mun’funika kucita nyongo ya kukulisa uxamwali bwanu na Yahova na kuthandiza anzanu pa mui na m’gwere. w23.12 22-23 ¶18-19

Yahova adalewa kuti an’dzatipasa nzeru kuti tikwanise kumbacita bzakusankhula bzabwino. Pana bzinthu bzinango bzakufunika kwene-kwene bzomwe timbafunika kucita bzomwe bzimbafunikira nzeru zakucokera kwa Mulungu. Iye ambatipasambo mphanvu kuti tipirire. Ninga momwe adacitira na mpostolo Paulo, Yahova ambatipasambo mphanvu kuti tipirire pomwe tikugumana na mabvuto. (Afil. 4:13) Njira ibodzi yomwe iye ambaiphatisa basa ni abale wathu wacikristau. Usiku bwakumalizira pomwe Jezu akhanati kuphedwa, iye adapemba kwa Yahova na mtima wentse. Iye adadandaulira Yahova kuti acitise kuti wanthu aleke kumuwona ninga munthu wakuipa. Tsono Yahova alibe kucita bzimwebzi, iye adathandiza Jezu mwa kutumiza anjo m’bodzi kuti adzamulimbikise. (Luk. 22:42, 43) Yahova angatithandizembo mwa kucitisa kuti abale na mpfumakazi atiligariri ayai kubwera kudzatiwona ku mui kwathu. Tentsenefe tin’funika kumbanyang’ana mipata kuti timbalewe “mafala yabwino” kuna abale wathu wacikristau. — Mim. 12:25. w23.05 10-11 ¶9-11

Abale omwe adasiya kutsonkhana akabwera pa Cikumbuso, iwo angacite mantha na bzomwe abale m’gwere angawauze ayai kuwalewa. Tenepo, lekani kumbawacita mibvunzo yomwe ingawacitise kubva manyazi ayai kuwasunamisa. Amwewa ni abale wathu m’cikhulupiro. Ifepano timbakomedwa kwene-kwene kutsonkhana pomwe pabodzi na iwo! (Sal. 119:176; Mab. 20:35) Timbatenda kwene-kwene Jezu Kristu pakutiuza kuti timbakumbukire infa yace gole liri-lentse. Tikacita bzimwebzi, timbagumana phindu ndipo timbathandizambo wanthu winango mu njira zizinji. (Zai. 48:17, 18) Lufoyi lathu kwa Yahova na kwa Jezu limbathumizirika. Timbalatiza kuti timbatenda bzomwe iwo adaticitira. Timbakhala wakuphatana na abale na mpfumakazi zathu zacikristau. Ndipo tingathandizembo winango kupfunza momwe angagumanire bzisimbo bzomwe bzimbabwera thangwe ra cakulombolera. Tenepo, mbaticiteni bzentse bzomwe tingakwanise kuti tidzagumanike pa Cikumbuso comwe cin’citika gole lino, yomwe ni ntsiku yakufunika kwene-kwene ya pa gole! w24.01 14 ¶18-19

Kodi Yahova ambatitsogolera tani? Cakuyamba, iye ambaphatisa basa Fala lace, Bibliya. Tsono iye ambaphatisambo basa wanthu. Mwa ciratizo, iye ambaphatisa basa “kapolo wakukhulupirika na wanzeru” kuti atipase cakudya cauzimu comwe cimbatithandiza kuti ticite bzakusankhula bza nzeru. (Mat. 24:45) Yahova ambaphatisambo basa amuna winango wanzeru kuti atitsogolere. Mwa ciratizo, iye ambaphatisa basa anyakunyang’anira dera na akulu wa gwere kuti atilimbikise na kutipasa malango yakuthandiza kuti tipirire mabvuto yomwe timbagumana nayo. Timbatenda kwene-kwene Yahova thangwe ra kutitsogolera mu ntsiku zakumalizira zino zomwe n’zakunesa! Tsono, nthawe zinango bzingakhale bzakunesa kuteweza malango ya Yahova maka-maka yakakhala kuti yaperekedwa na wanthu wakuperewera. Pa nthawe ninga zimwezi tin’funika kukhala na citsimikizo cakuti Yahova ndiye omwe akutsogolera wanthu wace ndipo kuteweza malango yace kumbabweresa bzisimbo bzizinji. w24.02 20 ¶2-3

Kuti tikulise lufoyi lathu kwa Mulungu, tin’funika kumbapfunza Bibliya mwa nyongo. Mukakhala mukuwerenga Bibliya mbayezerani kuwona bzomwe nkhaniyo ikukupfunzisani pakulewa bza Yahova. Mbabzibvunzani kuti: ‘Kodi nkhaniyi ikulatiza tani kuti Yahova ambandifuna? Kodi n’ciyani comwe cikundicitisa kuti ndifunembo Yahova?’ Cinthu cinango comwe tingacite kuti tikulise lufoyi lathu kwa Yahova ndico kumbapemba kwa iye na mtima wentse. (Sal. 25:4, 5) Tikacita bzimwebzi, Yahova an’dzatawira mipembo yathu. (1 Juw. 3:21, 22) Tin’funikambo kukulisa lufoyi lathu kwa wanthu winango. Pomwe padapita magole pambuyo pa mpostolo Paulo kukhala Mkristau, iye adadziwana na tswaka lakucemeredwa Timotio. Timotio akhafuna Yahova ndipo akhafunambo wanthu. Paulo adanembera abale wa ku Afilipi kuti: “Ndiribe munthu munango wakubzipereka ninga [Timotio] omwe angakusamalireni na mtima wentse.” (Afil. 2:20) Paulo adadabwa kwene-kwene na lufoyi lomwe Timotio akhanalo kwa abale na mpfumakazi zace. Abale wa m’magwere yomwe Timotio akhazungira akhakomedwa kwene-kwene akabva kuti iye aniwazungira. — 1 Ako. 4:17. w23.07 9 ¶7-10

Mozeji adafa pomwe Ajirayeri akhanati kupita mu Dziko Lakupiciridwa. Kodi bzinthu bzingadawafambira lini bwino atumiki wa Mulungu thangwe rakuti munthu wakukhulupirika ule akhadafa? Ne. Iwo angadapitiriza kukhala wakukhulupirika kwa Yahova, Yahovayo angadawathandiza. Pomwe Mozeji akhanati kufa, iye adauzidwa na Yahova kuti aikhe Djoswa kuti atsogolere wanthuwo. Mozeji akhapfunzisa kale Djoswa basa limweri kwa magole mazinji. (Eki. 33:11; Deut. 34:9) Kuthumizira bzimwebzi, pakhana amuna winango omwe akhasankhulidwa kuti atsogolere wanthuwo, omwe akhali atsogoleri wa wanthu 1000, wa wanthu 100, wa wanthu 50 na wa wanthu 10. (Deut. 1:15) Wanthu wa Mulungu akhasamaliridwa bwino. Timbawona ciratizo cakundendemerana na cimweci pa nkhani ya Eliya. Iye adamala magole mazinji akutsogolera kunamata kwakucena pakati pa Ajirayeri. Tsono idafika nthawe yomwe Yahova adamupasa basa linango ku nyantsi kwa Djuda. (2 Ama. 2:1; 2 Nkha. 21:12) Kodi wanthu wakukhulupirika wa madzinza 10 ya Jirayeri adasiyidwa tenepo? Ne. Eliya akhapfunzisa Elizeu. Cakulinga ca Yahova cikhapitiriza ndipo iye akhasamalira atumiki wace wakukhulupirika. w24.02 5 ¶12

Akristau wa ku Efezo adabvuma ceza ca m’Fala la Mulungu. (Sal. 119:105) Iwo adasiya kukhulupira bzinthu bzakunama bzomwe akhakhulupira pakuyamba na kusiyambo makhalidwe yawo ya upombo. Iwo adayamba ‘kutewezera Mulungu’ ndipo adayamba kunamata Yahova na kucita bzinthu bzomwe bzimbamukondwesa. (Aef. 5:1) Mwakundendemerana na iwo, pomwe tikhanati kupfunza Bibliya, tikhalimbo mu mdima thangwe tikhakhulupira bzinthu na kucita bzinthu bza upombo. Winango wa ifepano tikhambacitambo mafesta yomwe magereja yakunama yambacita. Tsono pomwe tidapfunza mitemo ya Yahova pa nkhani ya cabwino na cakuipa, ifepano tidacinja. Tidayamba kukhala na moyo mwakubverana na mitemo yace yakulungama. Bzimwebzi bzidaticitisa kuti tikhale na bzisimbo bzizinji. (Zai. 48:17) Tsono, pana mphitca zinango zomwe tingagumane nazo. Ifepano tin’funika kupitiriza kukhala kutali na mdima “ticifamba ninga wana wa ceza.” w24.03 21 ¶6-7

Pinango imwepo mungabzibve kuti muli lini wakukonzeka kubzipereka kwa Yahova na kubatizidwa. Pinango mukuwona kuti mukufunika kucinja bzinthu bzinango pa moyo wanu kuti mukwanise kubvera malamulo yentse ya Yahova, ayai mukadafunikira nthawe kuti mulimbise cikhulupiro canu. (Akol. 2:6, 7) Anyakupfunza wa Bibliya ambakula lini mwauzimu mwakundendemerana, ndipo maswaka yambakhala lini yakukonzeka kubzipereka kwa Yahova na kubatizidwa na magole mabodzi-bodzi. Yezerani kuwona bzinthu bzomwe mun’funika kucinja ndipo citani bzimwebzo mucitcenkha kubzindendemezera na winango. (Agal. 6:4, 5) Penu mukuwona kuti muli lini wakukonzeka kuti mubzipereke kwa Yahova, pitirizani kucita ciri-centse kuti mudzakwanirise cakulinga cimweci. Pembani kwa Yahova kuti akuthandizeni kucinja bzinthu pa moyo wanu. (Afil. 2:13) Khalani na citsimikizo cakuti iye an’dzabva mpembo wanu ndipo an’dzakuthandizani. — 1 Juw. 5:14. w24.03 5 ¶9-10

Pa nthawe inango, Sara adakalipa ndipo adapasa mulandu Abalahamu pa bzomwe bzikhadacitikabzo. Abalahamuyo akhadziwa kuti Sara akhali mkazi wakubvera, ndipo Sarayo akhamuthandiza pa bzakusankhula bzomwe iye akhacita. Iye adamutetekera ndipo adamalisa bvutolo. (Gen. 16:5, 6) Kodi tikupfunza ciyani na nkhani imweyi? Amuna, imwepo muna udindo bwa kumbacita bzakusankhula m’banja mwanu. (1 Ako. 11:3) Tsono cinthu comwe mungacite pomwe mukanati kucita cakusankhulaco ndico kutetekera mwatceru bzomwe mkazi wanu anilewa. (1 Ako. 13:4, 5) Pa nthawe inango, Abulahamu adatambira alendo mwakusaya kudikhiririka. Iye adauza mkazi wace Sara kuti asiye bzomwe akhacita kuti aphikire cakudya alendowo. (Gen. 18:6) Sara adacitiratu bzomwe bayace Abalahamu adamuuza. Akazi, imwepo mungatewezere Sara mwa kumbathandizira bzakusankhula bza amuna wanu. Mukacita bzimwebzi, banja lanu lin’dzakhala lakulimba. — 1 Ped. 3:5, 6. w23.05 24-25 ¶16-17

Pomwe Gidiyoni adasankhulidwa kuti akhale mtongi, iye akhafunika kulatiza kubvera na kukhwimika. Iye adapasidwa basa lakunesa kwene-kwene, lomwe likhali la kupfudza guwa la ntsembe la Baala lomwe likhali la pai wace. (Ato. 6:25, 26) Pomwe padapita nthawe, Gidiyoni adatsonkhanisa acikunda wace kuti ayende nawo ku nkhondo. Iye adauzidwa kuti akhafunika kupunguza acikundawo kawiri-kentse. (Ato. 7:2-7) Pakumalizira, iye adauzidwa kuti akhafunika kuyenda kukamenyana na anyamadulanthaka wawo pakati pa usiku. (Ato. 7:9-11) Akulu an’funika kukhala ‘wakukonzeka kubvera.’ Mkulu wa gwere omwe ngwakukonzeka kubvera ambacita bzomwe Bibliya limbalewa na kuteweza malango ya gulu la Yahova. Bzimwebzi bzimbacitisa kuti wanthu winango amutewezerembo. Tsono, bzingakhale bzakunesa kuti iye abvere bzinthu bzinango. Nthawe zinango, angabzibvunze penu malango yanango yomwe atambira njakuthandiza ayai angapasidwe basa lomwe ndakunesa kulicita. Kodi akulu angatewezere tani Gidiyoni pa nkhani zimwezi? Mukatambira malango, mbayaphatisani basa. w23.06 4-5 ¶9-11