Abril

Atumiki wa Yahova wakale-kale adagumana na mabvuto yakusaya kudikhiririka. Kumbukirani bza Djakobo. Iye adauzidwa na pai wace kuti akalowole mwana wa Labani thangwe akhatumikira Mulungu, ndipo pai wacewo adamutsimikizira kuti Yahova angadamusimba. (Gen. 28:1-4) Djakobo adacita bzinthu mwanzeru. Iye adacoka ku Kanani ndipo adacita ulendo bwa kuyenda ku mui kwa Labani. Ndipo Labaniyo akhana wana awiri wacikazi omwe akhali Leya na Rakeli. Djakobo akhafuna kulowola Rakeli omwe akhali ng’ono, ndipo adabvuma kuphatira basa pai wace wa Rakeliyo magole 7 kuti amulowole. (Gen. 29:18) Tsono bzinthu bziribe kucitika ninga momwe iye akhafunira. Labani adamunamiza Djakobo mwa kumupasa Leya m’mbuto mwa Rakeli. Ndipo Labaniyo adauza Djakobo kuti penu akhafuna kutenga pomwe Rakeli, akhafunika kumuphatira pomwe basa magole 7. (Gen. 29:26, 27) Labani adamucitirambo bzinthu bzakusaya kulungama Djakobo pomwe akhamuphatira basa. Djakobo adakhala kapolo wa Labani magole 20! — Gen. 31:41, 42. w23.04 15 ¶5

N’kuponi komwe tingagumane mtsangalazo na malango yomwe yangatithandize pa moyo wathu? Ifepano tikudziwa mtawiro wa mbvunzo umweyu. Tingagumane mtsangalazo na malango mwa kupemba kwa Yahova Mulungu. Iye ambafuna kuti timbapembe kwa iye “nthawe zentse.” (1 Ates. 5:17) Tingapembe kwa iye mwakutsudzuka ticimukumbira malango yomwe yangatithandize pa moyo wathu. (Mim. 3:5, 6) Yahova ambatipasa lini malire pakucita mipembo yathu kwa iye thangwe ngwakudeka mtima. Jezu akhadziwa kuti Yahova ambawona kuti mipembo yathu njakufunika kwene-kwene kwa iye. Pomwe iye akhanati kubwera pa dziko la pantsi akhawona Baba wace akutawira mipembo ya amuna na akazi wakukhulupirika. Mwa ciratizo, Jezu akhali ku mbali kwa Baba wace pomwe Baba wacewo akhatawira mipembo ya wanthu wakukhulupirika ninga Ana, Davide, Eliya na winango. (1 Sam. 1:10, 11, 20; 1 Ama. 19:4-6; Sal. 32:5) Ndipopa, Jezu adapfunzisa ateweri wace kuti ambapembe nthawe zentse na citsimikizo cakuti Mulungu aniwabva! — Mat. 7:7-11. w23.05 2 ¶1, 3

Mkulu wa Antsembe Jehoyada akhagopa Yahova. Bzimwebzi bzidawonekera padeca pomwe mwana wacikazi wa Jezabeli, Ataliya, adayamba kutonga mu umambo bwa Djuda. Iye akhali munthu wakuipa kwene-kwene ndipo akhalibe ntsisi mwakuti adayezera kupha azukulu wace wentse! (2 Nkha. 22:10, 11) Tsono, mwana m’bodzi wakucemeredwa Jehowasi alibe kuphedwa thangwe rakuti mkazi wa Jehoyada, Jehozabeti, adamubisa. Iye pabodzi na bayace adatenga mwanayo acimufuwa mwakabise-bise. Bzimwebzi bzidacitisa kuti Jehoyada na Jehozabeti athandizire kuti mzere wa Davide wa amambo uleke kumala. Jehoyada akhali wakukhulupirika kwa Yahova, ndipo alibe kubvuma kuti mantha na Ataliya yamutazise kucita bzinthu bzabwino. Pomwe Jehowasi adakwanisa magole 7, Jehoyada adalatiza pomwe kuti akhali wakukhulupirika kwa Yahova. Iye adakonza manera yakuti aikhe Jehowasi kuti akhale mambo. Tsono bzimwebzi bzingadasaya kukwanisika, Jehoyada angadaphedwa. Koma thangwe ra kuthandizidwa na Yahova, bzidakwanisika. w23.06 17 ¶12-13

Mambo Nabukadinazori angadakumbuka kuti Daniyeli akhali nyamadulanthaka wace ndipo angadamupha. Tsono Daniyeli adalatiza kukhwimika ndipo adamuuza thandauzo la malotoyo. N’ciyani cidathandiza Daniyeli kuti akhale wakukhwimika pa moyo wace wentse? Pomwe Daniyeli akhali tswaka, iye adapfunza na bzomwe pai wace na mai wace akhacita. (Deut. 6:6-9) Daniyeli akhandodziwa lini bza Malamulo Khumi basi, koma akhadziwambo nfundo zakuthimizirika za malamuloyo. Mwa ciratizo, iye akhadziwa bzomwe Ajirayeri akhafunika kudya na kusaya kudya. (Lev. 11:4-8; Dan. 1:8, 11-13) Ndipo Daniyeli adapfunza bzomwe bzidacitikira wanthu wa Mulungu pomwe iwo adasiya kubvera malamulo yace. (Dan. 9:10, 11) Bzomwe Daniyeli adagumana nabzo pa moyo wace bzidamutsimikizira kuti Yahova na anjo wace wa mphanvu angadamuthandiza. — Dan. 2:19-24; 10:12, 18, 19. w23.08 3 ¶5-6

Rebeka akhali mkazi wanzeru omwe adalatiza pa moyo wace wentse kuti akhali wakukhwimika mwa bzomwe akhacita. (Gen. 24:58; 27:5-17) Tsono, iye akhalimbo waulemu na wakubvera. (Gen. 24:17, 18, 65) Imwepo mukakhala wakubzicepesa ninga Rebeka, mucithandizira makonzedwe ya Yahova, mun’dzathandizira kuti bzinthu bzifambe bwino m’banja mwanu na m’gwere. Kuzindikira malire ni khalidwe lomwe Akristau wentse wakukhwima an’funika kukhala nalo. Esteri akhali mkazi omwe akhazindikira malire ndipo akhagopa Mulungu. Kuzindikira malire kudamuthandiza kuti aleke kucita bzinthu mwakubzikuza. Iye adabvera malango yomwe adapasidwa na Mordekai ndipo adayaphatisa basa. (Est. 2:10, 20, 22) Imwepo mungalatizembo kuti mumbazindikira malire mwakumbafufudza malango yomwe yangakuthandizeni na kumbayaphatisa basa. (Tito 2:3-5) Esteri adalatizambo kuti akhazindikira malire mu njira inango. Iye akhali “wakuwoneka bwino na wakudeka kwene-kwene”; tsono, iye akhambabziwonesera lini thangwe ra bzimwebzo. — Est. 2:7, 15. w23.12 19-20 ¶6-8

Kubzipasa mulandu mwakunyanyira ni mtolo omwe tin’funika lini kuunyamula. Tikazimbula pikado zathu, kukungula na kutcenkha kubwerezera pomwe pikadozo, tingakhale na citsimikizo cakuti Yahova atilekerera. (Mab. 3:19) Tikateweza njira zimwezi, Yahova an’funa lini kuti tipitirize kumbabzipasa mulandu. Iye ambadziwa kuti kubzipasa mulandu kwene-kwene kungatidzonge. (Sal. 31:10) Tikabzipasa mulandu mwakunyanyira tingasiye kuthamanga mu njira ya ku moyo. (2 Ako. 2:7) Penu mukubzipasa mulandu mwakunyanyira, kumbukirani kuti Mulungu “ambalekereradi.” (Sal. 130:4) Pa nkhani yakulekerera wale omwe akungula na mtima wentse, iye adapicira kuti: “Nin’dzakumbukira lini pomwe pikado zawo.” (Jer. 31:34) Bzimwebzi bzimbathandauza kuti Yahova an’dzakupasani lini pomwe mulandu thangwe ra pikado zomwe mudacita kale-kale. Lekani kumbabzipasa mulandu, thangwe pikado zanu za m’mbuyo zingakutaziseni kucita bzizinji pa kutumikira Yahova. Yahova ambakhala lini akukumbukira pikado zanu ndipo imwepo lekani kumbazikumbukirambo. w23.08 30-31 ¶14-15

Pa nthawe ya matenda ya COVID-19, Mboni za Yahova zikhabvera malango yomwe gulu likhapereka ndipo bzimwebzi bzikhacitisa kuti aleke kukhala na thupo na nkhani za kunama zomwe zikhaperekedwa. (Mat. 24:45) Tin’funika kumbacita “bzinthu bzomwe mpsakufunika kwene-kwene.” (Afil. 1:9, 10) Tikakhala wakusokonezeka tingamale nthawe izinji na mphanvu zathu tikucita bzinthu bzakusaya kufunika. Tin’funika lini kulekerera kuti bzinthu ninga kudya, kumwa, masenzeka na basa lathu bzikhale bzinthu bzakufunika kwene-kwene pa moyo wathu. (Luk. 21:34, 35) Ntsiku iri-yentse timbabva manotisiya ya nkhani za ndale na wanthu omwe ambakhala akucezerana nkhani za ndalezo. Tin’funika lini kulekerera kuti maceza ninga yamweya yatisokoneze. Tikambawona nkhani zimwezi tingayambe kumbatawirira mbali ibodzi. Sathani ambaphatisa basa njira zakusiyana-siyana na cakulinga cakuti atitazise kucita bzinthu bzomwe mpsabwino. w23.07 16-17 ¶12-13

Kwa wanthu wa Yahova, ntsiku ya Cikumbuso njakufunika kwene-kwene pa gole. Ni msinda umweyu okha omwe Jezu adauza ateweri wace mwakubveka bwino kuti ambaucite. (Luk. 22:19, 20) Bzimwebzi bzimbatikumbusa momwe tingalatizire kuti timbatenda ntsembe yomwe Jezu adaipereka. (2 Ako. 5:14, 15) Ndipo Cikumbusoco cimbatipasambo mwayi wakuti ‘tilimbikisane’ na abale na mpfumakazi zathu. (Aro. 1:12) Ndipo wanthu azinji ambadabwa na bzomwe ambawona, kubva, ndipo ambafunisisa kupfunza Bibliya. Tikufunisisambo kudzayenda ku Cikumbuso thangwe tikudziwa kuti pa ntsiku imweyi timbakhala wakuphatana na abale wathu pa dziko lentse. Bzentsenebzi bzimbacitisa kuti Cikumbuso cikhale cakufunika kwene-kwene kwa ifepano! w24.01 8 ¶1-3

Tikambakumbukira bzinthu bzomwe Yahova na Jezu adaticitira, tin’dzakwanisa kuzindikira kuti iwo ambatifuna kwene-kwene. (Agal. 2:20) Cakulombolera ni mphaso ya lufoyi. Ndipo Yahova adalatizambo kuti ambatifuna mwakubvuma kupereka cinthu comwe ni cakufunika kwene-kwene kwa iye comwe ni Mwana wace, Jezu. Yahova adabvuma kuti Mwana wace abonere na kutifera. Yahova ambandobva lini ntsisi kwa wanthu, koma iye ambalatiza ntsisizo. (Jer. 31:3) Iye adatibweresa m’gulu lace thangwe rakuti ambatifuna. (Ndendemezerani na Deuteronomiyo 7:7, 8.) Palibe munthu ayai cinthu comwe cingakwanise kutilekanisa na lufoyi lace. (Aro. 8:38, 39) Kodi imwepo mumbabva tani mukambakumbukira bza lufoyi limweri? w24.01 28 ¶10-11

Akristau wakudzozedwa ambakomedwa na cidikhiro cawo cakuyenda kudzulu. M’bodzi wa anyakudzozedwawo, M’bale Frederick Franz, adalewa momwe akhabvera na cidikhiro cawoci. Iye adati: “Cidikhiro cathu cin’dzakwanisikadi. M’bodzi na m’bodzi wa ifepano wa 144 000 an’dzatambira bzomwe Mulungu adapicira.” Mu 1991, M’bale Franz adalewa kuti: “Tikadawona kuti cidikhiro cathu n’cakufunika kwene-kwene. Pomwe tikudikhirira bzimwebzo, timbapitiriza kutenda. . . . Ndipo ni cinthu comwe tin’funika kucidikhirira . . . Kuposa kale-kale, cidikhiro cangu nimbaciwona kuti n’cakufunika kwene-kwene.” Bziribe basa penu tikudikhirira kudzatambira moyo wakusaya kumala kudzulu ayai pa dziko la pantsi pano, tina cidikhiro cabwino kwene-kwene comwe cimbatipasa mathangwe yakukhalira wakukondwa. Ndipo cidikhiro cathuco cingapitirize kukhala cakulimba. w23.12 9 ¶6; 10 ¶8

Kunja kwa tendi la mkonkhano kukhana guwa la ntsembe la mkuwa lomwe akhaliphatisa basa kuti aperekere ntsembe za bzifuwo kwa Yahova. (Eki. 27:1, 2; 40:29) Tsono ntsembe zimwezi zingadakwanisa lini kumalisiratu pikado zentse za wanthuwo. (Aheb. 10:1-4) Kuperekedwa kwa ntsembe za bzifuwo kawiri-kawiri pa tendi la mkonkhano kukhalatiza kuti pakhafunika ntsembe ibodzi yomwe ingadakwanisa kumalisiratu pikado za wanthu wentse pa dziko la pantsi. Jezu akhadziwa kuti Yahova adamutumiza pa dziko la pantsi kuti adzapereke moyo wace ninga ntsembe kwa wanthu wentse. (Mat. 20:28) Ndipopa, pomwe Jezu adabatizidwa, iye adabzipereka kuti acite bzomwe Yahova akhafuna. (Juw. 6:38; Agal. 1:4) Moyo wa Jezu udaperekedwa “kabodzi kokha mpaka kale-kale” kuti umalise pikado za wanthu wentse omwe an’khulupira iye. — Aheb. 10:5-7, 10. w23.10 26-27 ¶10-11

Palibe bzomwe ifepano tingadacita kuti tibzipulumuse ku pikado na infa. (Sal. 49:7, 8) Ndipopa Yahova adacita makonzedwe yakuti Mwana wace apereke moyo wace kuti atipulumuse. Tingalewe kuti Yahova na Jezu adacita cinthu cakufunika kwene-kwene. Tikambakumbukira bzomwe Yahova na Jezu adaticitira, ifepano tin’dzapitiriza kutenda ntsembe ya cakulombolera. Mwamuna wakuyamba, Adamu, akhali wakulungamiratu pomwe adalengedwa. Pomwe iye adacita pikado, adaluza mwayi wakuti akhale na moyo wakusaya kumala ndipo adacitisambo kuti wana wace wentse aluzembo mwayi umweyu. Kuti Jezu agule pomwe bzomwe Adamu adaluza, iye adapereka moyo wace ninga ntsembe. Pomwe Jezu akhali pa dziko la pantsi pano, iye “alibe kucita pikado ndipo pamulomo pace palibe kucoka mafala yakunama.” (1 Ped. 2:22) Pomwe Jezu adafa, iye akhali wakulungamiratu ninga momwe Adamu akhaliri pomwe akhanati kucita pikado. Na tenepo, pakupereka moyo wace, Jezu adapagali moyo omwe Adamu adaluza. — 1 Ako. 15:45; 1 Tim. 2:6. w24.01 10 ¶5-6

Pomwe Jezu adalamusidwa, iye adapita mu Cipinda Cakucenesesa ca mu templo yauzimu. Pamwepa tikukwanisa kuwona kuti makonzedwe ya Yahova ya kunamata kwakucena mwakuphatisa basa ntsembe ya cakulombolera na untsembe bwa Jezu Kristu njapadzulu kwene-kwene. Mkulu wa antsembe mu nthawe ya Ajirayeri akhambapita mu Cipinda Cakucenesesa cakukonzedwa na wanthu na mulopa wa bzifuwo bza kuperekedwa ntsembe. Tsono Jezu “adapita kudzulu,” yomwe ni mbuto yakucena kwene-kwene, kuti akawonekere kwa Yahova. Kumweko iye adakapereka pereso ya moyo wace wakulungamiratu m’mbuto mwa ifepano “kuti acose pikado mwakuphatisa basa ntsembe yace.” (Aheb. 9:24-26) Bziribe basa penu cidikhiro cathu n’cakuyenda kudzulu ayai n’cakudzakhala pa dziko la pantsi pano, tentsenefe tin’funika kunamata Yahova mu templo yace yauzimu. w23.10 28 ¶13-14

Kumbukirani bzomwe Jezu akuticitira kudzulu pomwe akutonga ninga Mambo na Mkulu wa Antsembe wa ntsisi. Thangwe ra iye “[tingafenderere] ku mpando wa Umambo wa Mulungu omwe ambatilatiza kudeka mtima kukulu” mu mpembo ticikumbira ntsisi na thandizo “pa nthawe yomwe tikufunikira [thandizolo].” (Aheb. 4:14, 15) Ntsiku zentse bwerani timbakumbukire bzomwe Yahova na Jezu adaticitira na bzomwe akuticitira. Lufoyi lawo kwa ife liticitise kubzibva bwino mu mtima na kuticitisambo kuti ticite bzizinji pa kutumikira Yahova. (2 Ako. 5:14, 15) Njira ibodzi ya momwe tingalatizire kutenda ndiyo kuthandiza wanthu winango kuti akhale Mboni za Yahova na ateweri wa Jezu. (Mat. 28:19, 20) Bzimwebzi ndibzo bzomwe mpostolo Paulo adacita pakulatiza kutenda Mulungu na Kristu. Iye akhadziwa kuti cakulinga ca Mulungu n’cakuti “wanthu wa mtundu uli-wentse apulumuke acifika pakukhala na cidziwiso caico cacadidi.” — 1 Tim. 2:3, 4. w23.10 22-23 ¶13-14

Azinji wa ifepano timbaphatisa basa mafala ya mu cinemboci tikakhala tikupalizira wanthu bza Paraizo yomwe in’dzabwera kutsogoloku. Kodi tingacite ciyani kuti tikhulupire na kuthandizambo anzathu kuti akhulupire kuti bzinthu bzomwe bzidanembedwa pa Apokalipse 21:3, 4 bzin’dzacitikadi? Yahova alibe kundolewa mapiciro yamweya yomwe yambatikondwesa, koma adalewambo mathangwe yomwe yambaticitisa kuyakhulupira. Pana mathangwe yomwe yambaticitisa kukhulupira piciro la Yahova lakuti an’dzatibweresera Paraizo kutsogoloku. Timbawerenga kuti: “Ule omwe akhadakhala pa mpando wa umambo, adati: ‘Ona! Ndikukonza papsa bzinthu bzentse.’ Ndipo adalewa pomwe kuti: ‘Nemba, pakuti mafala yamweya njakukhulupirika na yacadidi.’ Ndipo iye adandiuza kuti: ‘Bzakwanisika! Inepano ndine Alfa na Omega, wakuyamba na wakumalizira.’” — Apok. 21:5, 6a. w23.11 3 ¶3-5

Comwe cin’dzalatiza kuti mulumbwana ambakumbuka bwino ni momwe iye an’dzasankhulira bzakubvala na momwe an’dzabzidekesera. Kazinji-kazinji bzakubvala bza moda bzimbakonzedwa na wanthu omwe ambalemekeza lini Yahova ndipo ana makhalidwe yakuipa. Iwo ambalatiza kuti ana makhalidwe yakuipa mwa kukonza bzakubvala bzakuthimba kwene-kwene bzomwe bzimbacitisa kuti amuna awoneke ninga akazi. Mulumbwana omwe akukhala wakukhwima mwauzimu akambasankhula bzakubvala bzomwe an’funa kubvala, iye ambatsogoleredwa na nfundo za m’Bibliya na kutewezerambo bziratizo bza abale wakukhulupirika wa m’gwere. Iye an’funika kubzibvunza kuti: ‘Kodi bzakubvala bzomwe nimbasankhula kuti ndibvale bzimbalatiza kuti ndina makumbukidwe yabwino ndipo nimbakumbukirambo wanthu winango? Kodi bzakubvala bzangu bzimbalatiza kwa wanthu winango kuti ndikufuna kutumikira Yahova na mtima wentse?’ (1 Ako. 10:31-33) Mulumbwana omwe ambakumbuka bwino an’dzalemekezedwa na abale na mpfumakazi zace ndipo an’dzalemekezedwambo na Yahova. w23.12 26 ¶7

M’mbuyomu, “mambo wa ku suli” adazunzambo wanthu wa Yahova. (Dan. 11:40) Mwa ciratizo, pa nthawe ya Nkhondo Yakuyamba ya pa Dziko Lentse na Nkhondo Yaciwiri ya pa Dziko Lentse, abale azinji adaikhidwa m’kawoko ndipo wana winango wa Mboni za Yahova adacosedwa xikola thangwe ra kulamba kupitira nkhani za ndale. Ndipo ntsiku zino, kukhulupirika kwa wanthu wa Yahova omwe ambatongedwa na mambo umweyu kumbayezedwa mu njira inango. Pa nthawe ya mavoti, Mkristau angayezedwe kuthandizira partido inango ayai kuthandizira munthu munango. Napo kuti iye ambayenda lini kukavota, iye angawone ninga kuti partido inango njabwino kuposa inango. Ndipopa kuti titcenkhe kumbapitira nkhani za ndale tin’funika kucita bzinthu mwakusamala! — Juw. 15:18, 19. w23.08 12 ¶17

Pomwe tikuthamanga mu njira ya ku moyo, tin’funika ‘kuthamanga kuti tikwanise kudzatambira mabaibai.’ (1 Ako. 9:24) Jezu adalewa kuti lekani “kulemedwa na kudya kwene-kwene, kumwa kwene-kwene pabodzi na thupo la pa moyo.” (Luk. 21:34) Cinembo cimweci na bzinango bzingatithandize kuzindikira bzinthu bzomwe tingafunike kucinja pa kuthamanga pa njira ya ku moyo. Tingakhale na citsimikizo cakuti tin’dzathamanga mpaka kuphampha thangwe Yahova an’dzatipasa mphanvu yakufunikira. (Zai. 40:29-31) Tenepo, lekani kuneta! Tewezerani mpostolo Paulo omwe adacita ciri-centse kuti akatambire mabaibai. (Afil. 3:13, 14) Palibe munthu omwe angakuthamangireni, koma na thandizo la Yahova imwepo mungathamange mpaka kuphampha. Yahova angakuthandizeni kunyamula mitolo yanu na kutaya mitolo yakusaya kufunika. Na thandizo la Yahova, imwepo mungathamange mwakupirira mucifika kuphampha! w23.08 31 ¶16-17

Pomwe Jezu akhana magole 12, abereki wace adamusiya yekha ku Jeruzalemu. (Luk. 2:46-52) Tsono pomwe abereki wacewo akhabwerera ku mui pambuyo pa phwando la Paskwa, iwo adazindikira kuti Jezu akhali lini nawo pabodzi. Tenepo Zuze na Mariya adabwerera ku Jeruzalemu kuti akamunyang’ane. Pomwe iwo adamugumana, Mariya adamukalipira thangwe akhadawadedemesa! Jezu angadafuna angadauza abereki wacewo kuti iwo akhafunikira lini kumukalipira. Tsono iye adatawira abereki wacewo mwa ulemu. Koma Zuze na Mariya “alibe kubvesesa bzomwe iye akhawauzabzo.” Napo bziri tenepo, Jezu adabvuma kuyenda nawo “acipitiriza kumbawabvera.” Maswaka, kodi imwepo mumbawona kuti mpsakunesa kubvera abereki wanu iwo akakhala kuti aphonya ayai alibe kukubvesesani? N’ciyani comwe cingakuthandizeni? Mbakumbukirani momwe Yahova ambabvera. Bibliya limbalewa kuti “kucita bzimwebzi kumbakondwesa Mbuya.” (Akol. 3:20) Yahova ambadziwa kuti nthawe zinango abereki wanu ambakubvesesani lini, ayai nthawe zinango iwo ambaikha malamulo yomwe njakunesa kuyabvera. Tsono imwepo mukasankhula kubvera abereki wanuwo, mumbamukondwesa Yahova. w23.10 7 ¶5-6

Mwanzathu wa ku xikola angalewe kuti Mboni za Yahova zin’funika kucinja momwe zimbawonera amuna ayai akazi omwe ambalowolana okha-okha. Ifepano tin’funika kumutsimikizira kuti timbazindikira kuti munthu ali-wentse ana ugo bwakucita cakusankhula comwe iye angafune. (1 Ped. 2:17) Tikacita bzimwebzi, tingakwanise kumulatiza nfundo za m’Bibliya zomwe zimbafotokoza bza nkhani imweyi. Tikagumana na munthu omwe akulatiza kuti ambakhulupira lini Mboni za Yahova, tin’funika lini kukumbuka kuti tikudziwiratu bzomwe iye ambakhulupira. Mwa ciratizo, tani penu mwanzanu wa ku xikola walewa kuti n’kusaya nzeru kukhulupira Mulungu? Kodi imwepo mun’funika kukumbukiratu kuti iye ambakhulupira kuti bzinthu bzidacita kusanduka ndipo ambadziwa bzizinji pa nkhani imweyo? Iye angandokhale akulewa bzinthu bzomwe adabva. Pinango imwepo mungamuuze kuti iye awerenge nkhani zakulewa bza cirengedwe zomwe zimbagumanika mu jw.org. Iye angakhale wakukonzeka kuceza namwe bza nkhani ayai vidiyo yomwe iye aiwona mu webisaitemo. Inde, kutawira mwakugwa mpfuwa kungamuthandize kuti iye acinje makumbukidwe yace. w23.09 17 ¶12-13

Ifepano tingakhale na citsimikizo cakuti Yahova an’dzatiphatisa basa na kutisimba napo kuti tidacita bzinthu bzakuphonyeka. (Mim. 28:13) Samusoni akhali lini wakulungamiratu; tsono napo bziri tenepo, iye alibe kusiya kutumikira Yahova napo kuti iye adacita bzinthu bzakuphonyeka na Dalila. Ndipo Yahovambo alimbe kumusiya. Mulungu adalatiza kuti akhakomedwa naye mwa kumupasa pomwe mphanvu. Yahova adamuwona Samusoni kuti akhali munthu wacikhulupiro camphanvu, ndipopa adacitisa kuti dzina lace likhale liripombo pa lista ya wanthu wakukhulupirika omwe ambafotokozedwa mu kapitulo 11 ya bukhu la Ahebereu. Mpsakulimbikisa kwene-kwene kudziwa kuti tikutumikira Pai wathu wakudzulu wa lufoyi omwe ambafuna kutitsangalaza maka-maka pa nthawe yomwe tawofoka! Ndipopa ninga Samusoni, bwerani tentse tidandaulire Yahova kuti: “Ndaphata minyendo, ndilimbiseni na kundipasa mphanvu.” — Ato. 16:28. w23.09 7 ¶18-19

Tikambakumbukira kuti ntsiku ya Yahova iri pafupi, ifepano tin’dzacita nyongo yakupalizira mafala yabwino ya Umambo kwa anzathu. Tsono nthawe zinango, ifepano tingazeze kupalizira. Thangwe ranyi? Bzimwebzi bzingacitike thangwe ra kugopa wanthu. Bzimwebzi bzidacitikirambo Pedru. Pa usiku bwakumalizira bwa Jezu, Pedru adalamba kuti akhali nyakupfunza wa Jezu, ndipo iye adacita bzimwebzi katatu-kentse. (Mat. 26:69-75) Tsono na kupita kwa nthawe, Pedruyo adadzakhala wakukhwimika ndipo adalewa kuti: “Lekani kugopa bzomwe iwo ambagopa ne kukhala na thupo.” (1 Ped. 3:14) Mafala ya Pedruya yakulatiza kuti ifepano tingakhale wakukhwimika ticileka kumbagopa wanthu. Kodi n’ciyani comwe cingatithandize kuti tileke kumbagopa wanthu? Pedru adalewa kuti: “Bvumani m’mitima mwanu kuti Kristu ni Mbuya.” (1 Ped. 3:15) Bzimwebzi bzikulatiza kuti tin’funika kumbakumbukira kuti Jezu Kristu tsapano ni Mbuya na Mambo omwe ana mphanvu kwene-kwene. w23.09 27-28 ¶6-8

Ifepano tin’funika kucita ciri-centse kuti titcenkhe kucita “mabasa ya mu mdima yomwe yambabala lini bzisapo.” (Aef. 5:11) Bzomwe bzikulatiziratu kuti munthu omwe ambapitiriza kunyang’anisa, kutetekera, kubva nkhani zakuipa ayai bzinthu bza upombo, iye ambadzamalizira kucita pikado. (Gen. 3:6; Tiy. 1:14, 15) Dziko la Sathaniri limbayezera kutipumpsa kuti tikhulupire kuti bzomwe Yahova ambalewa kuti mpsakuipa mpsakuipa lini. (2 Ped. 2:19) Msampha ubodzi omwe Sathani ambauphatisa basa ngwa kunamiza wanthu kuti ataze kudziwa cabwino na cakuipa. (Zai. 5:20; 2 Ako. 4:4) Ndipopa programa zizinji za pa TV, mavidiyo na nkhani za pa interneti zimbalimbikisa wanthu kuti acite bzinthu mwakupitana na mitemo yakulungama ya Yahova! Sathani ambayezera kuticitisa kukumbuka kuti makhalidwe yakuipa yangatidzonge lini. — Aef. 5:6. w24.03 22 ¶8-10

Tendi la mkonkhano cikhali cinthu cakukonzedwa na tendi comwe Ajirayeri akhambacinyamula kuli-kwentse komwe iwo akhambayenda. Iwo adaphatisa basa tendi la mkonkhano limweri kwa magole pafupi-fupi 500 mpaka pomwe templo idadzakonzedwa ku Jeruzalemu. (Eki. 25:8, 9; Num. 9:22) “Tendi la mkonkhano” likhali mbuto yomwe Ajirayeri akhapereka ntsembe zawo kwa iye. (Eki. 29:43-46) Tsono, tendi la mkonkhanolo likhaimira cinthu cikulu. Iro likhali mthunzi wa “bzinthu bzakudzulu,” ndipo likhaimira templo ikulu yauzimu ya Yahova. Mpostolo Paulo adalewa kuti: “Tendi limweri [ayai tendi la mkonkhano] ni ciratizo ca nthawe ino.” (Aheb. 9:9) Tsono, pomwe iye adanembera Ahebereu mafala yamweya, templo yauzimuyo ikhadayambika kale kwa Akristau. Iyo idayamba mu gole la 29 EC. Mu gole limweri, Jezu adabatizidwa, ndipo adayamba kutumikira ninga “mkulu wa antsembe” wa Yahova mu templo yauzimu imweyi. — Aheb. 4:14; Mab. 10:37, 38. w23.10 25-26 ¶6-7

Ninga muti wakubvuma kufunyika, ifepano tin’funikambo kubvuma kufunyika. Kodi tingacite tani bzimwebzi? Tin’funika lini kumbangingimira nzeru zathu bzinthu bzikacinja pa moyo wathu na kumbalemekeza makumbukidwe na bzakusankhula bza anzathu. Ninga atumiki wa Yahova, ifepano tin’funika lini kumbangingimira nzeru zathu. Ndipo tin’funika kukhala wanthu wakubzicepesa na wantsisi. Yahova ni “Tsendwa” thangwe ngwakulimba na wakusaya kutekenyeka. (Deut. 32:4) Tsono iye ambangingimira lini nzeru zace. Pomwe bzinthu bzikucinja mu dzikoli, Yahova akupitiriza kucinjambo kuti cakulinga cace cikwanisike. Yahova adalenga wanthu m’cifanikiso cace mu njira yakuti iwo ambakwanise kucinja bzinthu pa moyo wawo. Iye adapereka malango yace m’Bibliya kuti yambatithandize kusankhula bzinthu mwa nzeru bziribe basa mabvuto yomwe ifepano tingagumane nayo. Ciratizo ca Yahova na malango yomwe iye ambatipasa bzimbalatiziratu padeca kuti napo kuti iye ni “Tsendwa,” ambangingimira lini nzeru zace. w23.07 20 ¶1-3

M’Bibliya, Yahova ambandendemezeredwa na mai walufoyi kwene-kwene. (Zai. 66:12, 13) Kumbukirani bza mai omwe ambasamalira bwino mwana wace na kumucitira bzomwe iye akufuna. Tikakhala tikubva kuwawa, tin’funikambo kukhulupira kuti Yahova an’dzatithandiza. Iye ambatisiya lini tikacita bzinthu bzakuphonyeka. (Sal. 103:8) Mtundu wa Ajirayeri ukhaphonyera Yahova mwakubwereza-bwereza; koma, iye adalatiza kuti akhawafuna mwakuwauza mafala yakuti: “Pakuti iwepo ndiwe wakufunika pa maso pangu, iwepo walemekezedwa, ndipo inepano nimbakufuna.” (Zai. 43:4, 5) Lufoyi la Yahova liribe kucinja. Napo tikacita bzinthu bzakuphonyeka kwene-kwene, tikakungula ticibwerera kwa Yahova, tin’dzazindikira kuti lufoyi lace kwa ifepano likalipo. Iye akupicira kuti ‘an’dzatilekerera na mtima wentse.’ (Zai. 55:7) Ndipo kutilekererako kumbatibweresera “nthawe za mtsangalazo . . . kucokera kwa Yahova.” — Mab. 3:19. w24.01 27 ¶4-5

Yahova angatithandize tikakhala tikugumana na mabvuto. Mwa ciratizo, tikakumbira patrau wathu kuti atipase nthawe kuti tikwanise kuyenda ku mtsonkhano wa cigawo ayai kumukumbira kuti acinje nthawe yomwe timbaphata basa kuti tikwanise kumbagumanika pa mitsonkhano, timbakhala tikumupasa mpata Yahova kuti atithandize pa moyo wathu. Tingadabwe kwene-kwene tikawona momwe bzinthu bzikufambira pa moyo wathu. Ndipo bzimwebzi bzin’dzacitisa kuti timukhulupire kwene-kwene Yahova. Ezara adapemba kwa Yahova acimukumbira thandizo. Nthawe zentse Ezara akawona kuti bzinthu bzamuwandira pa udindo bomwe akhanabo, akhapemba mwakubzicepesa kwa Yahova. (Eza. 8:21-23; 9:3-5) Bzomwe Ezara akhacita bzidacitisa kuti wanthu winango amuthandize na kutewezerambo bzomwe iye akhacitabzo. (Eza. 10:1-4) Tikakhala tikucita thupo na bzinthu bzathu bzakuthupi ayai momwe tingakhotcererere banja lathu, tin’funika kupemba kwa Yahova. w23.11 18 ¶15-17

Yahova akulewa lini kuti penu ifepano tikufuna kukhala wakulungama tin’funika kuteweza ndendende bzinthu bzomwe Abalahamu adacita. Pana njira zizinji zomwe tingalatizire kuti tina cikhulupiro mwa mabasa yathu. Tingathandize wale omwe mbanovu mu gwere, tingathandize abale na mpfumakazi zathu pa bzomwe akufunikira na kucitira bzabwino wanthu wa m’banja mwathu. Tikacita bzimwebzi, Yahova an’dzakomedwa nafe ndipo an’dzatisimba. (Aro. 15:7; 1 Tim. 5:4, 8; 1 Juw. 3:18) Njira inango yakufunika kwene-kwene yakulatizira kuti tina cikhulupiro ndiyo kupalizira na nyongo mafala yabwino kwa wanthu winango. (1 Tim. 4:16) Tentsenefe tingalatize m’bzicito bzathu kuti bzinthu bzentse bzomwe Yahova adalewa bzin’dzakwanisika nakuti bzentse bzomwe ambacita mpsabwino. Tikacita bzimwebzi, tingakhale na citsimikizo centse cakuti Mulungu an’dzatiwona kuti ndife wakulungama ndipo tin’dzakhala axamwali wace. w23.12 2 ¶3; 6 ¶15

Mambo Davide adauza Salomau mafala yomwe yali padzauluya. (1 Ama. 2:1, 3) Amuna wentse wacikristau ntsiku zino angacite bwino kubvera malango yamweya. Kuti bzinthu bziwafambire bwino pa moyo wawo, iwo an’funika kupfunza malamulo ya Mulungu na kuyaphatisa basa. (Luk. 2:52) Thangwe ranyi mpsakufunika kuti alumbwana akhale wakukhwima mwauzimu? Mkristau ana udindo bwakufunika m’banja na m’gwere. Alumbwana, tikupenukira lini kuti imwepo mudakumbukira kale bza mabasa yomwe mun’dzakhala nayo kutsogolo. Imwepo mungafune kudzakhala mtumiki wa nthawe zentse, mtumiki wakuthandiza ndipo mukadzakula mucidzakhala mkulu wa gwere. Ndipo imwepo mungadzafunembo kulowola mucikhala na wana. (Aef. 6:4; 1 Tim. 3:1) Kuti mudzakwanise kudzacita bzentsenebzi mukadzakula, imwepo mun’funika kukhala Mkristau wakukhwima mwauzimu. w23.12 24 ¶1-2

Akulu wa gwere adapasidwa basa lakutsogolera na kukhotcerera mabira yakufunika ya Yahova. Amuna wakubziperekawa ambatenda kwene-kwene mwayi omwe anawo wakutumikira abale na mpfumakazi zawo, ndipo ambaphata basa na nyongo kuti akhale ‘abusa omwe ambawatsogoleradi.’ (Jer. 23:4; 1 Ped. 5:2) Timbakomedwa kwene-kwene kukhala na amuna wakukhulupirikawa mu gwere! Akulu angapfunze bzizinji na ciratizo ca Mtongi Gidiyoni. (Aheb. 6:12) Iye adakhotcerera na kutsogolera wanthu wa Mulungu. (Ato. 2:16; 1 Nkha. 17:6) Ninga Gidiyoni, akulu adaikhidwa na Mulungu kuti akhotcerere na kutsogolera wanthu wace pa nthawe yakunesa ino. (Mab. 20:28; 2 Tim. 3:1) Gidiyoni adayezedwa pomwe akhacita basa lace, koma adapirira. Ifepano tingagumane phindu tikapfunza nkhani ya kubzicepesa na kubvera kwa Gidiyoni. Bziribe basa kuti tikutumikira ninga mkulu wa gwere ayai ne, tentsenefe tin’funika kumbatenda basa lomwe akulu ambacita. Tingacite bzimwebzi mwa kuwathandiza. — Aheb. 13:17. w23.06 2 ¶1; 3 ¶3