Maio

Akristau wakuyambirira adabonera na njala “pa dziko lentse la pantsi.” Amuna akhakhala na thupo kuti an’pasa ciyani mabanja yawo. Kodi njalayo idatazisa maswaka mazinji kucita bzizinji pa kutumikira Yahova? Kodi iwo adawona kuti bzikhali bwino kudzacita bzimwebzo njalayo ikamala? Napo kuti Akristauwo akhagumana na mabvuto, iwo adapitiriza kucita bzomwe angadakwanisa mwakubverana na momwe bzinthu bzikhaliri pa moyo wawo. Iwo adapitiriza kupalizira na nyongo ndipo adapereka bzinthu bzomwe akhanabzo kuti athandize abale wawo wa ku Djudeya. (Mab. 11:29, 30) Wale omwe adatambira thandizo kucokera kwa abale wawo adazindikira kuti Yahova akhawathandiza. (Mat. 6:31-33) Bzimwebzi bzidawacitisa kuti akhale wakubverana na abale wawo omwe adawathandizawo. Ndipo wale omwe adacita bzakupereka na wale omwe adathandiza mu njira inango adakwanisa kuwona kuti kupasa kumbabweresa cikondweso. — Mab. 20:35. w23.04 16 ¶12-13

Nthawe zinango, Yahova ambatawira mipembo ya atumiki wace mwakuphatisa basa wanthu omwe ambamunamata lini. Kumbukirani kuti iye adaphatisa basa Mambo Artaxerxe kuti atawire mkumbiro wa Nehemiya wakuti abwerere ku Jeruzalemu kuti akathandize pa basa la kumanga pomwe mzinda. (Neh. 2:3-6) Ntsiku zino, Yahova angacitembo bzibodzi-bodzibzi. Iye angaphatise basa wanthu omwe ambamunamata lini kuti atithandize tikakhala tikufuna thandizo. Mipembo yathu imbatawiridwa lini mwakudabwisa. Koma Yahova ambatipasa mitawiro yomwe imbatithandiza kuti tipitirize kukhala wakukhulupirika kwa iye. Bzimwebzi bzin’funa kulewa kuti mun’funika kumbaima na kumbakumbukira momwe Yahova akutawirira mipembo yanu. (Sal. 66:19, 20) Tin’funika lini kundolatiza cikhulupiro mwa kupemba basi, koma tin’funikambo kumbabvuma mitawiro iri-yentse ya mipembo yathu. — Aheb. 11:6. w23.05 11 ¶13; 12 ¶15-16

Pomwe tidabzipereka kwa Yahova, tidalumbira kuti tin’dzamutumikira na kucita kufuna kwace. Tin’funika kukwanirisa lumbiro lathu. Kukhala na moyo mwakubverana na lumbiro lathu ni mtolo lini wakulemera. Yahova adatilenga kuti timbacite kufuna kwace. (Apok. 4:11) Iye adatilenga na cikhumbo cakufuna kumutumikira ndipo adatilenga m’cifanikiso cace. Ndipopa, tingakhale pa uxamwali na iye ticipitiriza kucita kufuna kwace. Ndipo ifepano tikacita bzomwe Mulungu ambafuna na kutewezera Mwana wace, ‘tin’dzagumana mtsangalazo.’ (Mat. 11:28-30) Tenepo pitirizani kulimbisa lufoyi lanu kwa Yahova mwa kumbakumbukira bzisimbo bzomwe wakupasani na bzinthu bzabwino bzomwe mukubzidikhirira kutsogolo. Lufoyi lanu kwa Mulungu likakula, bzin’dzakhala bzakupusa kumubvera. (1 Juw. 5:3) Jezu adacita kufuna kwa Mulungu thangwe akhapemba kwa iye na kumukumbira kuti amuthandize ndipo akhambakumbukirambo bzisimbo bzomwe angadadzatambira. (Aheb. 5:7; 12:2) Ninga Jezu, pitirizani kupemba kwa Yahova kuti mukhale wamphanvu ndipo mbakumbukirani cidikhiro comwe munaco ca dziko lipsa. w23.08 27-28 ¶4-5

Tentsenefe timbakomedwa na wanthu omwe mbakupirira. Timbalemekeza munthu omwe ambadikhirira cinthu mwakusaya kuneta. Timbatenda thangwe anzathu ambapirira nafe tikaphonya. Ndipo timbatendambo mpfunzisi wathu wa Bibliya thangwe ra kupirira nafe pomwe tikhacita nyongo ya kupfunza, kubvuma na kuphatisa basa bzomwe tikhapfunza m’Bibliya. Kuposa bzentse, timbatenda Yahova Mulungu omwe ambapirira nafe! Napo kuti ifepano timbakomedwa thangwe ra kupirira komwe anzathu ambalatiza, nthawe zinango bzingakhale bzakunesa kwa ifepanombo kulatiza kupirira. Mwa ciratizo, tingafunike kucita nyongo kuti tikhale wakugwa mpfuwa pomwe tiri pa mseu ndipo tikutazira kufamba thangwe rakuti karo zawanda ndipo tacedwa komwe tiri kuyenda. Bzingatinese kupirira anzathu akatikalipisa. Ndipo nthawe zinango, bzingatinese kupitiriza kudikhirira dziko lipsa lomwe Yahova adatipicira. w23.08 20 ¶1-2

Pomwe Gidiyoni adauzidwa na Yahova kuti apunguze acikunda wace, iye adabvera ndipo adasala na acikunda ang’ono-ng’ono kwene-kwene. Pinango iye akhabzibvunza kuti: ‘Kodi mpsakufunikadi kupunguza acikundawa? Kodi bzimwebzi bzin’citisa lini kuti tikundidwe?’ Napo bziri tenepo, Gidiyoni adabvera. Akulu ntsiku zino ambatewezera Gidiyoni mwa kuphatisira basa malango mapsa yomwe apasidwa. (Aheb. 13:17) Gidiyoni akhabvera Yahova napo kuti nthawe zinango akhabva mantha ndipo akhaikha moyo wace pa ngozi. (Ato. 9:17) Pomwe Gidiyoni adauzidwa na Yahova kuti angadamuthandiza, iye adakhulupira kuti Yahovayo angadamuthandizadi kuti akhotcerere wanthu wace. Akulu omwe ambakhala m’madziko yomwe basa lathu ndakuletsedwa, ambatewezera Gidiyoni. Iwo ambapitiriza kucita basa lawo mwakukhwimika pa kutsogolera mitsonkhano na utumiki napo kuti ambagopswedwa kuti aniikhidwa m’kawoko, kucosedwa basa ayai kuboneresedwa. Pa citsautso cikulu, akulu an’dzafunika kukhwimika kuti ateweze malango yomwe an’dzapasidwa napo kuti kucita bzimwebzo kungadzaikhe moyo wawo pa ngozi. w23.06 5-6 ¶12-13

Yahova adacitisa kuti bzinthu bzabwino bzomwe Mkulu wa Antsembe Jehoyada adacita bzinembedwe kuti bzitipfunzise. (Aro. 15:4) Ndipo pomwe Jehoyadayo adafa, adalemekezedwa kwene-kwene thangwe rakuti thupi lace lidakaikhidwa “mu mzinda wa Davide pabodzi na amambo, thangwe rakuti iye adacita bzinthu bzabwino mu Jirayeri mwa kulatiza kulemekeza Mulungu wacadidi pa nyumba yace.” (2 Nkha. 24:15, 16) Nkhani ya Jehoyada ingatithandizembo kuti timbagope Mulungu. Abale omwe ambatsogolera mu gulu la Yahova angatewezere Jehoyada mwa kukhala tceru kuti apitirize kukhotcerera mabira ya Mulungu. (Mab. 20:28) Abale wacikulire angapfunze bzizinji na Jehoyada. Iwo akagopa Yahova acipitiriza kukhala wakukhulupirika kwa iye, Yahovayo angawaphatise basa kuti acite bzinthu bzizinji. Maswaka yangatewezere bzomwe Yahova adacita na Jehoyada mwa kumbawona abale wacikulire kuti mbakufunika na kumbawalemekeza, maka-maka wale omwe ambalatiza kuti mbakukhulupirika. (Mim. 16:31) Bwerani timbathandizire “wale omwe akutsogolera” mu gulu la Yahova mwa kumbawabvera. — Aheb. 13:17. w23.06 17 ¶14-15

Pomwe tikufuna kupereka mitawiro yathu pa mitsonkhano, tin’funika kumbakumbukirambo anzathu. Tikambaimisa boko kawiri-kawiri, tin’dzacitisa kuti m’bale omwe akucitisa pfunziroyo ambalate ifepano basi napo kuti pana wanthu winango omwe aimisambo manja omwe akanati kutawira. Bzimwebzi bzingawacitise kuleka kumbaimisa boko. (Mpal. 3:7) Penu m’gwere mwanu muna abale azinji omwe ambaimisa manja, ifepano tin’dzakwanisa lini kutawira ndime zentse zomwe takonzekera, thangwe nyakutsogolera angalate munthu munango. Bzimwebzi bzikacitika, tin’funika lini kukalipa. (Mpal. 7:9) Penu imwepo mumbatawira lini kawiri-kawiri pa mitsonkhano, mbatetekerani mwatceru pomwe winango akupereka mitawiro yawo. Ndipo kuphampha kwa mitsonkhanoyo, mungawatende thangwe ra mitawiro yawoyo. Abale na mpfumakazi angabzibve kukhala wakulimbikisidwa imwepo mukambawatenda kuposa mitawiro yomwe imwepo mwapereka. w23.04 23-24 ¶14-16

Mbapfunzani Fala la Mulungu mucimbakumbukira bzomwe mukupfunzabzo. Muti umbakhala wakulimba mizi yace ikakhala idayenda pantsi kwene-kwene. Kuti tikhale na cikhulupiro cakulimba tin’funika kumbapfunza Fala la Mulungu. Tikambapfunza na kukumbukira, timbalimbisa cikhulupiro cathu na citsimikizo cakuti njira za Mulungu n’zakulungama. (Akol. 2:6, 7) Kumbukirani momwe malamulo na mitemo ya Yahova bzidakhotcererera atumiki wace m’mbuyomu. Mwa ciratizo, Ezekiyeli adakhala tceru kwene-kwene pomwe anjo akhamuuza momwe medida za templo zingadakhalira. Bzomwe Ezekiyeli adawonabzi bzidamulimbikisa kwene-kwene, ndipo bzikutipfunzisambo momwe ifepano tin’funika kumbayawonera malamulo ya Yahova. (Ezek. 40:1-4; 43:10-12) Ifepanombo timbakhala na phindu likulu kwene-kwene tikambakhala na nthawe ya kupfunza na kukumbukira bzomwe tawerenga m’Fala la Mulungu. Kuti tikhale na mtima wakulimba, tin’funika kukhulupira Yahova na mtima wathu wentse — Sal. 112:7. w23.07 18 ¶15-16

M’Bibliya muna wanthu wakukhulupirika omwe alumbwana angawatewezere. Wanthu amwewa akhafuna Mulungu ndipo adacita bzinthu bzakusiyana-siyana kuti asamalire wanthu wa Mulungu. Ndipo imwepo mungatewezerembo bziratizo bza Akristau wakukhwima mwauzimu m’banja mwanu na m’gwere. (Aheb. 13:7) Ndipo munthu munango wabwino kwene-kwene omwe mungamutewezere ni Jezu Kristu. (1 Ped. 2:21) Pomwe mukupfunza bziratizo bzimwebzi, mbawonani makhalidwe yabwino yomwe iwo adalatiza. (Aheb. 12:1, 2) Mukamala onani momwe mungatewezerere makhalidwe yawoyo. Munthu omwe ambakumbuka bwino, ambakhala na nthawe yakukwanira kuti awone penu bzomwe an’funa kucitabzo mpsabwino ayai ne. Tenepo, citani nyongo kuti mukwanise kukhala na khalidwe limweri. Mbapfunzani nfundo za m’Bibliya mucimbakumbukira kuti thangwe ranyi izo n’zakuthandiza. Mukamala phatisani basa nfundozo kuti mucite bzakusankhula bzomwe Yahova ambakomedwa nabzo. (Sal. 119:9) Bzimwebzi mpsakufunika kwene-kwene kuti mukhale Mkristau wakukhwima mwauzimu. — Mim. 2:11, 12; Aheb. 5:14. w23.12 24-25 ¶4-5

Abereki angakwanise kupfunzisa wana wawo kuti ambakhale wakuderekha akakhala kuti akunyosedwa thangwe ra bzomwe ambakhulupira. (Tiy. 3:13) Abereki winango ambakonzekereratu na wana wawo pa kunamata kwawo kwa pa banja bzomwe wanawo angadzacite akadzabvunzidwa mbvunzo wakunesa ku xikola. Iwo ambafotokozera wana wawowo na kuwapfunzisa momwe angatawirire mwakuderekha. Mbakonzekerani mbali zomwe zingathandize Akristau kubvesesa bzomwe ambakhulupira na kukwanisa kufotokozera anzawo. Pa mbali yakuti “Zimene Achinyamata Amafunsa” yomwe iri pa jw.org pana mbali inango yakuti Zoti Achinyamata Achite. Mbali zimwezi zidakonzedwera maswaka kuti yalimbise cikhulupiro cawo pa bzomwe yambakhulupira na kuwakonzekeresa kuti adzafotokozere anzawo bzomwe ambakhulupira mwa mafala yawo-yawo. Tikambapfunza nkhani zimwezi na banja lathu, tin’dzadziwa momwe tingakhotcererere cikhulupiro cathu na kutawira mwakugwa mpfuwa wanthu omwe angatibvunze. w23.09 17 ¶10; 18 ¶15-16

Kodi imwepo mudakhala kale na cakulinga cauzimu comwe mukhafuna kucikwanirisa koma mudatazira? Penu n’tenepo, muli lini mwekha. Mwa ciratizo, Filipi akhafuna kukhala na nthawe yakuti ambacite mpembo, tsono akhakwanisa lini kugumana nthaweyo. Erika akhafuna kuti ambafike mwakamfulumize pa mtsonkhano wa utumiki, koma napo bziri tenepo iye akhambacedwa basi kufika pa mtsonkhanoyo. Penu pana cakulinga cibodzi cauzimu comwe mukanati kucikwanirisa, lekani kuwofoka thangwe nthawe zinango bzimbakhala bzakunesa kukwanirisa cakulinga napo cikhale cing’ono. Mtima wanu wakufuna kukhala na cakulinga na kufuna kucikwanirisa ukulatiza kuti mumbawona kuti ni mwayi ukulu kwene-kwene kukhala pa uxamwali na Yahova, ndipo mukufuna kucita bzizinji pa kumutumikira. Yahova ambatenda nyongo yanu, ndipo iye ambadikhirira lini kuti mucite bzinthu bzomwe mungakwanise lini kubzicita. (Sal. 103:14; Mik. 6:8) Ndipopa mukafuna kukhala na bzakulinga bzauzimu sankhulani bzinthu bzomwe mun’kwanisa kucita bzomwe bzikubverana na moyo wanu. w23.05 26 ¶1-2

Wanthu wakukhwimika angabvembo mantha, tsono iwo ambabvuma lini kuti manthayo yawacitise kusiya kucita bzinthu bzabwino. Daniyeli akhali tswaka lakukhwimika. Iye adapfunza bzomwe apolofeta wa Mulungu adanemba, kuphatanidzambo mapolofesiya ya Jeremiya. Kucokera pa bzomwe adapfunzabzo, Daniyeli adakwanisa kuwona kuti ukapolo bwa Adjuda bungadamala mwakusaya kucedwa. (Dan. 9:2) Kuwona kukwanisika kwa mapolofesiya yamweya kudalimbisa cikhulupiro ca Daniyeli kwa Yahova, ndipo wale omwe ana cikhulupiro cakulimba kwa Yahova angakhalembo wakukhwimika. (Ndendemezerani na Aroma 8:32, 37-39.) Cinthu cakufunika n’cakuti Daniyeli akhambapemba kawiri-kawiri kwa Baba wace wa kudzulu. (Dan. 6:10) Iye adazimbula pikado zace kwa Yahova ndipo adamuuza momwe akhabvera. Ndipo Daniyeli adakumbira thandizo. (Dan. 9:4, 5, 19) Iye akhalimbo munthu ninga ife, ndipo alibe kubadwa wakukhwimika. Koma kupfunza, kupemba na kukhulupira Yahova ndibzo bzidamucitisa kuti akhale na khalidwe limweri. w23.08 3 ¶4; 4 ¶7

Tikabvera atsogoleri wa boma timbagumana phindu ndipo wanthu winango ambagumanambo phindu. Mwa njira iponi? Cinthu cibodzi n’cakuti timbatcenkha kugumana na mabvuto yomwe yambabwera thangwe ra kusaya kubvera malamulo. (Aro. 13:1, 4) Magole mazinji m’mbuyomu ku Nigéria, acikunda adapita mu Nyumba ya Umambo pomwe mitsonkhano ikhali mkati, acinyang’ana wanthu omwe akhacita greve yakuletsa kupagali mtsonkho. Tsono munthu omwe akhatsogolera acikundawo adawauza kuti acoke, ndipo adati: “Mboni za Yahova nthawe zentse zimbapagali mtsonkho.” Imwepo mukambabvera malamulo, bzimwebzi bzimbathandiza kuti Mboni za Yahova zikhale na mbiri yabwino. Ndipo mbiri imweyi ntsiku inango ingadzakhotcerere abale na mpfumakazi zathu. w23.10 9 ¶13

Atumiki winango wa Yahova akudikhirira kumala kwa dzikoli kuyambira kale-kale. Kwa wanthu bzimwebzi bzingawoneke ninga kuti bzikucedwa. Ndipo Yahova ambadziwa kuti atumiki wace angawonembo tenepoyo, ndipopa iye adauza Habakuki kuti: “Masomphenyaya yakudikhira nthawe yace, ndipo yakuthamangira ku mamaliziro yace; yaninama lini. Napo yacedwe, pitiriza kuyadikhirira pakuti yan’dzacitikadi mwakusaya kucedwa!” (Hab. 2:3) Kodi Yahova akhanembera Habakuki basi mafala yamweya? Ayai akhanemberambo ifepano ntsiku zino? Mwa kutsogoleredwa na mzimu wakucena wa Mulungu, mpostolo Paulo adalatiza kuti mafalaya yadanembedwerambo Akristau omwe akudikhirira dziko lipsa. (Aheb. 10:37) Ifepano tin’funika kutsimikizira kuti napo kuti kupulumusidwa kwathu kungawoneke ninga kuti kukucedwa, ‘iko kun’dzacitikadi mwakusaya kucedwa!’ w23.04 30 ¶16

Ajirayeri alibe kubvuma kuti Mozeji akhaphatisidwa basa na Yahova kuti awatsogolere. (Num. 14:10, 11) Mwakubwereza-bwereza, iwo adalamba kubvuma kuti Mozeji kakhali mtsogoleri wawo. Ndipopa, Yahova alibe kulekerera kuti wanthu amwewa apite mu Dziko Lakupiciridwa. (Num. 14:30) Tsono, Ajirayeri winango adabvuma kutsogoleredwa na Yahova. M’bodzi wa wanthu amwewa akhali Kalebe. Pakulewa bza iye, Yahova adati: “Kalebe . . . abvuma kunditewera na mtima wentse.” (Num. 14:24) Mulungu adasimba Kalebe, mwakuti iye adacita kusankhula yekha komwe angadakhala mu dziko la Kanani. (Djos. 14:12-14) Ajirayeri omwe adapita mu Dziko Lakupiciridwa mbale omwe adabvumambo kutsogoleredwa na Yahova. Pomwe Djoswa adapita mbuto ya Mozeji kuti atsogolere Ajirayeri, Ajirayeriwo “adamulemekeza kwene-kwene mu ntsiku zentse za moyo wace.” (Djos. 4:14) Ndipopa, Yahova adawasimba mwa kuwapasa dziko lomwe akhadawapicira. — Djos. 21:43, 44. w24.02 21 ¶6-7

Ninga momwe dotolo ambadziwira bza thanzi la mtima wathu mwa kuwona boko lathu, tingakwanisembo kudziwa kukula kwa lufoyi lathu kwa Mulungu mwa kuwona lufoyi lomwe tinalo kwa abale wathu. Tikawona kuti lufoyi lathu kwa abale na mpfumakazi zathu likumala, bzimwebzi bzingalatize kuti lufoyi lathu kwa Mulungu likumalambo. Tsono nthawe zentse tikambalatiza lufoyi kwa abale wathu, timbakhala tikulatiza kuti lufoyi lathu kwa Mulungu ndamphanvu. Tin’funika kukhala na thupo tikawona kuti lufoyi kwa abale wathu likumala. Thangwe ranyi? Thangwe bzimwebzi bzingathandauze kuti tiri pa ngozi yauzimu. Mpostolo Juwau adabvekesa nfundo imweyi mwakulewa kuti: “Ule omwe ambafuna lini m’bale wace omwe ambamuwona, angakwanise lini kufuna Mulungu omwe ambamuwona lini.” (1 Juw. 4:20) Kodi tikupfunza ciyani na mafalaya? Kuti Yahova akomedwe nafe, tin’funika “kumbafunana.” — 1 Juw. 4:7-9, 11. w23.11 8 ¶3; 9 ¶5-6

Pomwe Mambo Jehowasi akhali mwana, iye adacita cakusankhula canzeru. Pakuti Jehowasi akhalibe pai, iye adaphatisa basa malango yomwe akhapasidwa na Mkulu wa Antsembe wakukhulupirika, Jehoyada. Mkulu wa antsembeyo adamupfunzisa Jehowasi ninga mwana wace caiye. Jehowasi adabvera malangoyo. Iye adatumikira Yahova ndipo adathandizambo wanthu winango kutumikirambo Yahovayo. Ndipo Jehowasi adacita makonzedwe kuti mbali zakudzongeka za templo zikonzedwe. (2 Nkha. 24:1, 2, 4, 13, 14) Penu imwepo mukupfunzisidwa kuti mumbafune Yahova na kubvera malamulo yace, dziwani kuti umweyu ni mwayi ukulu kwene-kwene. (Mim. 2:1, 10-12) Abereki wanu angakupfunziseni mu njira zizinji. Abereki wanu an’dzakomedwa kwene-kwene imwepo mukambabvera malango yakucokera m’Bibliya yomwe iwo ambakupasani. Cakufunika kwene-kwene n’cakuti Yahova an’dzakomedwambo kwene-kwene ndipo mun’dzakhala pa uxamwali bwakulimba na iye. (Mim. 22:6; 23:15, 24) Yamweya ni mathangwe yabwino yakuti mutewezerere ciratizo ca Jehowasi pomwe iye akhali tswaka. w23.09 8-9 ¶3-5

Yahova akupicira kuti an’dzatetekera mipembo yathu. Mulungu wathu ambafuna kwene-kwene atumiki wace wakukhulupirika, ndipopa an’dzatawira mipembo yawo. (Sal. 10:17; 37:28) Tsono bzimwebzi bzin’funa lini kulewa kuti iye an’dzaticitira bzinthu bzentse bzomwe tingamukumbire. Pana bzinthu bzinango bzomwe iye angadzatitawire mu dziko lipsa. Yahova ambawona kubverana komwe kulipo pakati pa bzomwe takumbira na cakulinga cace. (Zai. 55:8, 9) Cakulinga caceco n’cakuti adzaze dziko la pantsi na wanthu wakukondwa omwe an’dzabvuma kutongedwa na Umambo bwace. Tsono, Sathani adalewa kuti wanthu angakhale na moyo wabwino akambabzitonga okha. (Gen. 3:1-5) Kuti Yahova alatize kuti bzomwe Sathaniyo adalewa mpsakunama, iye alekerera kuti wanthu abzitonge okha. Tsono, tikuwona kuti utongi bwa wanthu bukucitisa kuti wanthu agumane na mabvuto mazinji kwene-kwene. (Mpal. 8:9) Ifepano timbabvesesa kuti Yahova angacose lini mabvuto yentse yomwe tikugumana nayo ntsiku zino. w23.11 21 ¶4-5

Yahova adapicira kuti thangwe ra Abalahamu, mitundu mizinji ingadadzasimbidwa. Tsono pomwe Abalahamu akhana magole 100 ndipo Sara akhana magole 90, iwo akhanati kukhala na mwana. Kwa wanthu, bzikuwoneka ninga kuti bzingadakwanisika lini kuti iwo akhale na mwana. Yamweya yadakhala mayezo makulu kwene-kwene kwa Abalahamu. “Tsono thangwe ra cidikhiro, iye akhana cikhulupiro cakuti angadakhala pai wa wanthu wa mitundu izinji.” (Aro. 4:18, 19) Pakumalizira pace, bzomwe Abalahamu akhadikhirira bzidakwanisika. Iye adakhala pai wa Izaki, mwana omwe akhamudikhirira kwa nthawe itali. (Aro. 4:20-22) Ifepano tingabvumidwembo na Mulungu ticiwonedwa kuti ndife wakulungama na kukhala axamwali wace ninga momwe bzidacitikira na Abalahamu. Bzimwebzi ndibzo bzomwe Paulo akhafuna kulewa, pomwe adati: “Mafala yakuti ‘ adawonedwa kukhala ninga,’ yalibe kunembedwera [Abalahamu] yekha, koma yadanembedwerambo ifepano, ndipo ifepano tin’dzawonedwambo kukhala ninga wakulungama thangwe ra kukhulupira Mulungu, omwe adalamusa Jezu Mbuya wathu kwa anyakufa.” (Aro. 4:23, 24) Ninga Abalahamu, tin’funika kukhala na cikhulupiro pabodzi na mabasa yace ticikhalambo na cidikhiro. w23.12 7 ¶16-17

Mukakhala mukugumana na bvuto lomwe likukucitisani kubva mantha, kumbukirani kuti Yahova akuwona bvutolo ndipo akudziwa momwe imwepo mukubvera. Mwa ciratizo, Yahova alibe kundowona mabvuto yomwe Ajirayeri akhagumana nayo ku Edjipito, koma iye adadziwambo “mazunzo yawo.” (Eki. 3:7) Tsono, pinango mungabzibvunze kuti Yahova akukuthandizani tani uko mukugumana na bvuto lakugopswa. Mukumbireni kuti akuthandizeni kuwona momwe akukuthandizirani. (2 Ama. 6:15-17) Mukamala kumbukirani momwe nkhani yomwe yafotokozedwa na mitawiro yomwe yaperekedwa pa mitsonkhano bzakulimbikisirani. Ndipo kumbukiranimbo momwe mabukhu yathu, mavidiyo ayai nyimbo za broadcasting zakulimbikisiranimbo. Kodi pana munthu omwe wakuwerengerani vesi lomwe lakucitisani kubzibva bwino? Tingayebwe momwe lufoyi lomwe abale na mpfumakazi zathu ambatilatiza na cilimbikiso comwe timbatambira kucokera m’Fala la Mulungu bzimbatithandizira. Zimwezi ni mphaso zabwino kwene-kwene zakucokera kwa Yahova. (Zai. 65:13; Mar. 10:29, 30) Bzinthu bzimwebzi bzikulatiza kuti Yahova ambacita namwe thupo. (Zai. 49:14-16) Ndipo bzimbalatizambo kuti imwepo mun’funika kumukhulupira. w24.01 4-5 ¶9-10

Pomwe Jezu akhanati kubwerera kudzulu, iye adauza anyakupfunza wace kuti apalizire “ku Jeruzalemu, ku Djudeya kwentse na ku Samariya mpaka mbuto zakutali za pa dziko la pantsi.” (Mab. 1:8; Luk. 24:46-48) Patsogolo pace, akulu-akulu wacidjuda adamanga mpostolo Pedru na Juwau aciwayendesa ku nyumba ya mphala ya Sinedriyo ndipo adawagopswa aciwauza kuti asiye kupalizira. (Mab. 4:18, 21) Pedru na Juwau adalewa kuti: “Tongani mwekha penu mpsakuthemera pamaso pa Mulungu kubvera imwepo, kuposa kubvera Mulunguyo. Tsono ifepano, tingaleke lini kulewalewa bzinthu bzomwe tidawona na kubva.” (Mab. 4:19, 20) Pomwe Pedru na Juwau adatsudzulidwa, anyakupfunza anango adapemba kwa Yahova thangwe akhafuna kucita kufuna kwace. Yahova adatawira mpembo wawoyo. — Mab. 4:31. w23.05 5 ¶11-12

Pakuti Yahova na Mwana wace adakhala pabodzi magole mazinji kwene-kwene bzimwebzi bzidacitisa kuti iwo afunane kwene-kwene. Yahova adalatiza kuti ambafuna Mwana wace, Jezu, mwakulewa mafala yomwe yali mu vesi la lero. Yahova angadandolewa kuti: ‘Uyu ngule omwe inepano nimbakomedwa naye.’ Tsono iye akhafuna kuti ifepano tidziwe kuti iye ambafuna kwene-kwene Mwana wace, Jezu, ndipopa iye adalewa kuti: “Uyu ndiye Mwana wangu wakufunidwa.” Yahova akhakomedwa kwene-kwene na Mwana wace, Jezu, ndipo akhakomedwambo na bzomwe iye akhafuna kucita pa dziko la pantsi pano. (Aef. 1:7) Ndipo Jezu akhakhulupira kuti Baba wacewo akhamufunadi. Lufoyi la Yahova kwa Jezu likhali la cadidi, ndipopa Jezuyo akhakwanisa kuwona bzimwebzo. Iye adalewa kazinji-kentse kuti Baba wace ambamufuna. — Juw. 3:35; 10:17; 17:24. w24.01 28 ¶8

Tiyezezere kuti munthu omwe mumbamufuna akukulewani bzinthu bzakuipa. Imwepo mukudziwa kuti bzomwe akulewabzo mpsakunama; tsono, winango akukumbuka kuti mpsacadidi. Ndipo iwo akuuzambo winango magunkhayo. Kodi imwepo mungabzibve tani? Bzikuwonekeratu kuti mungabve kuwawa kwene-kwene na kukunamiziraniko. Bzimwebzi bzingatithandize kubvesesa momwe Yahova adabvera pomwe dzina lace lidapswipizidwa. M’bodzi wa wana wauzimu wa Yahova adauza gunkha Eva. Ndipo Evayo adakhulupira gunkhalo. Gunkha limweri lidacitisa kuti abereki wathu wakuyamba apandukire Yahova. Thangwe ra gunkhali, pikado na infa bzidabwera pa dziko la pantsi. (Gen. 3:1-6; Aro. 5:12) Mabvuto yentse yomwe timbagumana nayo, ninga nkhondo na kubonera, bzimbabwera thangwe ra gunkha lomwe Sathani adalewa. Kodi Yahova ambabva kuwawa thangwe ra kunamiziridwa na mabvuto yomwe yambabwera thangwe ra kunamiziridwako? Inde bzimbamuwawa kwene-kwene. Napo bziri tenepo, Yahova ambakoya lini cakumtima. Iye ni “Mulungu wakukondwa.” — 1 Tim. 1:11. w24.02 8 ¶1-2

Kodi mungacite ciyani kuti mukhale ninga Zuze? Mungakonzekereretu tsapano bzomwe mungadzacite mukadzayezedwa. Khalani wakukonzeka kulamba bzinthu bzomwe Yahova ambakomedwa lini nabzo ndipo lekani kumbabzikumbukira. (Sl 97:10; 119:165) Mukacita bzimwebzi, imwepo mun’dzacita lini pikado mukadzayezedwa. Pinango imwepo mwazindikira kuti comwe mwagumanaci ni cadidi ndipo mukufunisisa kutumikira Yahova na mtima wanu wentse, tsono mukuwona kuti muli lini wakukonzeka kubzipereka kwa iye na kubatizidwa. Imwepo mun’funika kutewezera Mambo Davide. Mungadandaulire Yahova kuti: “Ndifufudzeni, imwe Mulungu, muciudziwa mtima wangu. Ndifufudzeni, muciyadziwa makumbukidwe yangu yomwe yakundisayisa mtendere. Ndipo onani penu ciripo ciri-centse comwe cikundifambisa mu njira yakuipa, mucinditsogolera mu njira ya muyaya.” (Sal. 139:23, 24) Yahova ambasimba wale omwe “ambamulinga na mtima wentse.” Ndipo nyongo yomwe imwepo mukucita kuti mubzipereke kwa iye na kubatizidwa ikulatiza kuti mukufunisisa kucitadi bzimwebzi. — Aheb. 11:6. w24.03 6 ¶13-15

Mkulu wa antsembe akhana basa la kuimikira wanthu kwa Mulungu. Mkulu wa antsembe wakuyamba wa Ajirayeri, Aroni, adaikhidwa na Yahova pomwe tendi la mkonkhano lidakhazikisidwa. Tsono, mpostolo Paulo adalewa kuti: “Antsembe angadapitiriza lini na basa lawo thangwe [akhambafa], ndipopa wanthu winango akhambapita m’mbuto mwawo kuti apitirize na basalo.” (Aheb. 7:23-26) Pakuti antsembewo akhali wakuperewera, iwo akhafunika kupereka ntsembe thangwe ra pikado zawo. Pamwepa pana kusiyana kukulu pakati pa akulu wa antsembe wa mu nthawe ya Ajirayeri na Mkulu wa Antsembe Jezu Kristu. Jezu Kristu ni “mtumiki . . . pa tendi lacadidi lomwe lidakonzedwa na Yahova sikuti na munthu.” (Aheb. 8:1, 2) Paulo adalewa kuti “pakuti [Jezu] akupitiriza kukhala na moyo mpaka kale-kale, untsembe bwace bun’funika lini kupitidwa m’mbuto.” Paulo adathumizira kulewa kuti Jezu ni “wakucena, wakusiyana na wanthu wapikado” ndipo mwakusiyana na akulu wa antsembe mu nthawe ya Ajirayeri, “iye an’funika lini kupereka ntsembe ntsiku zentse” thangwe ra pikado zace. w23.10 26 ¶8-9

“Kudzulu kwa kale” kumbathandauza maboma ya dziko yomwe yambatsogoleredwa na Sathani pabodzi na madimonyo yace. (Mat. 4:8, 9; 1 Juw. 5:19) Nthawe zinango, “dziko la pantsi” limbathandauza wanthu omwe akukhala pa dzikolo. (Gen. 11:1; Sal. 96:1) Ndipopa, “dziko la pantsi lakale” likuthandauza wanthu wakuipa omwe ali pa dziko la pantsi pano. Yahova an’dzandokonza lini “kudzulu” na “dzikoli”; koma iye an’dzabzicinja. Iye an’dzacosa kudzulu kwa kale na dziko la pantsi la kale aciikha “kudzulu kupsa na dziko la pantsi lipsa.” Bzimwebzi bzikuthandauza kuti pan’dzakhala na boma lipsa pabodzi na wanthu wapsa pa dziko la pantsi. Na tenepo, Yahova an’dzacitisa kuti dziko la pantsi pabodzi na wanthu bzikhale bzipsa mwakucitisa wanthu kuti akhale wakulungamiratu. Ninga momwe Zaiya adalewera, dziko lentse la pantsi lin’dzakhala lakudeka ninga zunde la Edeni. Iye an’dzaticitisa kuti tikhale wanthu wapsa mwa kupozeratu wanthu wentse kuti akhale wakulungama. Wanthu wakupunduka, wakusaya kuwona na wakusaya kubva an’dzapozedwa ndipo omwe adafa an’dzalamusidwa. — Zai. 25:8; 35:1-7. w23.11 4 ¶9-10

“Citsautso cikulu” cin’dzabwera mwakudzidzimusa. (Mat. 24:21) Tsono citsautsoco cin’dzakhala cakusiyana na malengwa ya pantsi yomwe yambacitika, thangwe timbadziwa kuti ico cin’fika tsapanopapa. Magole 2000 m’mbuyomu, Jezu adacenjeza anyakupfunza wace kuti akhafunika kukonzekera kubwera kwa ntsikuyi. Tikakhala wakukonzeka, bzin’dzakhala bzakupusa kupirira pa nthawe yakunesayi na kuthandizambo anzathu kucita bzibodzi-bodzibzi. (Luk. 21:36) Tin’dzafunika kupirira kuti tidzabvere Yahova na citsimikizo centse cakuti iye an’dzatikhotcerera. N’ciyani comwe tin’dzacita abale wathu akadzaluza bzinthu bzawo bzentse? (Hab. 3:17, 18) Tin’dzafunika kukhala na ntsisi kuti tidzakwanise kuwathandiza. Kodi tin’dzacita ciyani anyamadulanthaka wathu akadzafuna kutipfudza ndipo tikadzafunika kukhala pabodzi na abale na mpfumakazi zathu? (Ezek. 38:10-12) Tin’dzafunika kulatizana lufoyi kuti tidzakwanise kuthandizana pa nthawe yakunesayi. w23.07 2 ¶2-3

Mabanja yangapfunze bzizinji na bzomwe Akila na Prisila akhacita. Banja limweri likhalemekezedwa kwene-kwene mu nthawe ya Akristau wakuyambirira. (Aro. 16:3, 4) Iro likhaphata basa, kupalizira na kuthandizambo wanthu pabodzi. (Mab. 18:2, 3, 24-26) Ndipopa, Bibliya likaguma bza Akila na Prisila, nthawe zentse limbawaguma ali pabodzi. Kodi mabanja yangawatewezere tani? Kumbukirani bzomwe imwepo na mwanzanu wa m’banja mungacite pabodzi. Kodi mungacite bzinthu bzinango pabodzi m’mbuto mwa kubzicita mwekha? Akila na Prisila akhambapalizira pabodzi. Kodi imwepo mumbacitambo bzimwebzi? Cinthu cinango comwe Akila na Prisila akhacita ndico kuphata basa pabodzi. Pinango imwepo na mwanzanu wa m’banja mumbaphata lini basa lakundendemerana. Tsono tani mucimbacita bzinthu bza pa mui pabodzi? (Mpal. 4:9) Imwepo mukambathandizana basa, bzimwebzi bzin’dzacitisa kuti mumbakhale na nthawe yakuceza. w23.05 22-23 ¶10-12

Munthu ali-wentse ambacita mantha nthawe zinango. Mwa ciratizo, pomwe Mambo Sauli akhatewera m’mbuyo Davide kuti amuphe, iye adathawira ku mzinda wa Afilisteu, ku Gate. Mambo wa ku Gateko, Akisi, adadziwa kuti Davide akhali mcikunda omwe adapha acikunda wa Afilisteu wakukwana “10 000.” Davide “adacita mantha kwene-kwene.” (1 Sam. 21:10-12) Iye adakhala na thupo kuti Akisi angadamupha. N’ciyani comwe cidathandiza Davide kuti akhale wakukhwimika? Mu Salimo 56, Davide adafotokoza momwe akhabvera pomwe akhali ku Gate. Mu salimo limweri, iye adafotokoza cinthu comwe cikhamucitisa kubva mantha ndipo adafotokozambo bzomwe bzidamuthandiza kuti akunde manthayo. Pomwe akhacita mantha, Davide adathemba Yahova. (Sal. 56:1-3, 11) Iye akhana mathangwe yakubveka yakukhulupira Yahova. Mwakuthandizidwa na Yahova, Davide adacita cinthu cinango cakudabwisa. Iye adayezezera kuti akhali nyamsala, ndipo bzimwebzi bzidacitisa kuti bzinthu bzimufambire bwino. Pomwe Akisi adawona bzimwebzi, iye alibe kufuna kupha Davide, iye adandofuna kuti Davideyo acoke mu mzinda wawoyo. Tenepo, Davide adapulumuka. — 1 Sam. 21:13–22:1. w24.01 2 ¶1-3

Kodi omwe akulewedwa mu cinemboci ni mbani? Ni anyakudzozedwa omwe an’dzalamusidwa aciyenda kudzulu! Tenepo anyakudzozedwa wentse omwe ali pa dziko la pantsi akadzayenda kudzulu kuphampha kwa citsautso cikulu, basa lakuyamba lomwe iwo an’dzacita lin’dzakhala la kumenya nkhondo. Akadzalamusidwa aciyenda kudzulu, iwo an’dzaphata basa pabodzi na Jezu na anjo wakucena pa kumenya nkhondo yakumalizira na anyamadulanthaka wa Mulungu. Kumbukirani kuti Akristau winango wakudzozedwa omwe akali pa dziko la pantsi pano ni nkhalamba ndipo alibe mphanvu! Tsono iwo akadzalamusidwa aciyenda kudzulu an’dzakhala bzakulengedwa bzauzimu bza mphanvu na bzakusaya kufa bzomwe bzin’dzacita basa la kumenya nkhondo pabodzi na Jezu Kristu. Iwo akadzamala kumenya nkhondo ya Armagedo, an’dzathandizira pa basa la kuthandiza wanthu kuti akhale wakulungamiratu. Iwo an’dzacita bzizinji kwene-kwene kuti athandize abale na mpfumakazi zawo kuposa momwe iwo akuwathandizira pomwe ali pa dziko la pantsi pano! w24.02 6-7 ¶15-16

Wanthu winango ambazeza kubzipereka kwa Yahova na kubatizidwa. Iwo ambacita mantha kuti pambuyo pa kubatizidwa angadzacite pikado ikulu acidzacosedwa. Penu imwepo mukucita mantha na bzimwebzo, khalani na citsimikizo cakuti Yahova an’dzakuthandizani “kuti mufambe mwakuthemera ninga momwe Yahova akufunira.” (Akol. 1:10) Iye an’dzakupasanimbo mphanvu kuti mucite bzinthu bzabwino. Iye adapasa kale mphanvu wanthu azinji kuti acite bzinthu bzabwino. (1 Ako. 10:13) Ndipopa mbanthu ang’ono-ng’ono omwe ambacosedwa m’gwere. Yahova ambathandiza wanthu wace kuti apitirize kukhala wakukhulupirika. Munthu ali-wentse wakuperewera ambayezedwa kuti acite bzinthu bzakuipa. (Tiy. 1:14) Tsono, imwepo mungasankhule bzomwe mungadzacite mukadzayezedwa. Omwe angadzacite cakusankhula cimweco ndimwepo. Napo kuti winango ambalewa kuti tingakwanise lini kubziphata pa bzomwe timbacita, tsono bzimwebzi mpsakunama. Imwepo mungapfunze kubziphata mukakhala na bzikhumbo bzakuipa na pomwe mukuyezedwa kucita cinthu cakuipa. w24.03 5 ¶11-12