Kukulisa Luso Lathu Mu Utumiki—Momwe Tingayambisire Pfunziro la Bibliya mwa Kuphatisa Basa Bukhu la Baibulo Limaphunzitsa Chiyani
Thangwe Ranyi Mpsakufunika: Wanthu wazinji wambabvesesa lini bzomwe mafala yomwe timbalewa yambathandauza yakuti timbacitisa mapfunziro ya Bibliya panyumba mwa fovolo. Iwo wambakumbuka kuti wan’funika kukagumana pa thimu la anyakupfunza ayai kuti wacite kurso mwa kumbacita kutumiza matsamba. M’mbuto mwa kundomukumbira kuti mumbacite naye pfunziro, thangwe ranyi munsaya kumulatiza momwe timbacitira pfunzirolo? Mu nthawe zing’ono-ng’ono napo mucikhala kuti mudaima panyumba pace, mungamulatize momwe timbacitira pfunziro la Bibliya kuti awone kuti limbacitika mwakusaya kunesa na mu njira yakubveseseka.
Momwe Mungacitire:
• Mukayambisa kucezako, bvunzani mweneciro nyumba penu iye ana thupo la momwe bzinthu bzidzakhalire m’tsogolo.
• Fotokozani kuti wanthu wazinji wanalombo thupo ninga limwero, ndipo mulatizeni misolo yankhani yomwe iri kumayambiriro kwa bukhu la Baibulo Limaphunzitsa Chiyani. Fotokozani kuti bukhuli lina misolo yakupusa bvesesa yomwe imbalatiza momwe Bibliya limbapfunzisira bza kutsogolo na nfundo zinango, ndipo mubvunzeni msolo womwe iye wakomedwa naye.
• Mupaseni iye bukhu libodzi ndipo mulatizeni msolo womwe iye wasankhula. Mufotokozereni mibvunzo yomwe iri kwakuyambirira kwa msolo womwe unkutawiridwa mu ndime zakutewerazo.
• Mukumbireni mweneciro nyumba penu angafune kuti awerenge ndime yakuyamba. Akamala werengani mbvunzo wa ndimeyo, ndipo cezeranani pabodzi mtawiro wace. Cezeranani vesi lomwe linkubverana na mtawiroyo. Mulazeni momwe imwepo mudaigumanira mitawiro mu bukhu lanu yomwe mudanemba mizere kunsi kwace.
• Cezeranani ndime ya patsogolo pace, koma tsapano kumbirani mweneciro nyumbayo kuti ayezere kutawira mbvunzoyo mwa mafala yace-yace.
• Mutendeni, ndipo citani makonzedwe yakuti mudzabwerere pomwe mpaka mudzamalize msoloyo.
• Penu bzingakwanisike, mulatizeni vidiyo mu jw.org ya msolo wakuti Kodi Phunziro la Baibulo Limachitika Bwanji?
Yezerani Kucita Bzimwebzi Mkati mwa Mwezi Wathunthu:
• Kumbirani Yahova mu mpembo kuti asimbe nyongo yanu yakuyambisa pfunziro lipsa la Bibliya.—Waf. 2:13.
• Yezerani kulatiza momwe tingacitire pfunziro la Bibliya mwa kuphatisa basa bukhu la Baibulo Limaphunzitsa Chiyani, ayai latizani vidiyo yakuti Kodi Phunziro la Baibulo Limachitika Bwanji? napo kabodzi kokha pomwe muli mu utumiki bwa kumunda.